Ni xi kamá 5

Bi̱ katsꞌén Ananiyaa̱ ko̱jo na̱ Safiraa̱

1Ta̱nga kisꞌijña ngo nda̱ xi ꞌmí Ananiya̱, ko̱jo na̱ Safira̱ chjo̱ón, xi atíñá ngo xoꞌba xi tikoón, 2kó kui nda̱a̱ ko̱jo chjo̱ón nijan kamá nga índa nga katsꞌénkꞌasꞌien yejejiín já apostroo̱ to̱o̱n ni xi atíñá. 3Ta̱nga Peé, bi̱ katsoó:

–Ananiya̱, ánní nga xindajín Satanaa̱ tsꞌasꞌieén ngi̱jii̱n ini̱màa̱ nga ikꞌíndiseje̱ ji A̱si̱énni̱xtjii̱n Néná, nga kachjábé jí ngo tjín kui to̱o̱n ni xi akatíñí ji. 4A tse̱jín kamá kui xoꞌbaa̱. Kó ngije akatíñí, a tse̱jín kamá kui to̱o̱n. Ánní nga bo̱a̱ kjiꞌi ni xi ikꞌíjñijin ini̱màa̱. Ngatꞌa̱ jmí tsi xota̱ xi ikꞌíndiseje̱, Néná boá xi kichꞌíṉche̱je.

5Kó nga tsintꞌié kuí eén Ananiyaa̱, ja̱kó tsꞌáka, sꞌe̱ kꞌien tji̱ꞌni̱u̱, kó achichí katsakjónní ngayeje xota̱ xi tsintꞌié kuí ni xi kamaá. 6Kó ja̱kó kjindibá já xo̱ngò xí íxtié yojoo̱ Ananiyaa̱, sꞌe̱ kijíkanijín.

7Jaꞌara̱ tsi ta̱ ján ora̱, sꞌe̱ jachó chjo̱ón kui nda̱ xi kꞌiee̱n, kó nde bejín mí ni xi kamaá. 8Kó Peé, bi̱ katsoó:

–Tꞌíyéní, a bo̱a̱ kjiꞌi akatíñájnú kui xoꞌba xi akatíñájnú.

Kó bi̱ katsó kui xota̱chjo̱on:

–Jo̱o̱n, bo̱a̱ kjiꞌi.

9Sꞌe̱ Peé, bi̱ katsoó:

–Ánní nga bo̱a̱ tsꞌén ikꞌíndajnú nga kachjatꞌayákónjnú A̱si̱énni̱xtjii̱n Ndi̱a̱a̱. Jànꞌa̱n, ki̱a̱ ndyi̱ndibá já xí kijíkanijín xi̱ꞌíi̱n, kó ti̱ bo̱a̱ ti̱ tsꞌén ko̱e̱je̱kanijiín ji nga.

10Ti̱ kjiꞌa tsꞌáka na̱ Safiraa̱ ngindie se Peé, kó kꞌien tji̱ꞌni̱u̱, kó ngije tsꞌasꞌien já xo̱ngo̱ò ngi̱yaa̱, je kjiꞌijñakꞌien, kó tsꞌaxié, sꞌe̱ kijíkanijín tꞌa nínga kjiꞌijña ndie xi̱ꞌii̱n. 11Kó achichí katsakjónní ngayeje xota̱ na̱ngo̱xi̱i̱, ko̱jo ngayeje xota̱ xi tsintꞌié kuí nii̱.

Kjín kjo̱a̱ndikón katsꞌén já apostroo̱

12Kó kui já apostroo̱ achichí kjín chi̱bo̱a̱, ko̱jo kjo̱a̱ndikón xí katsꞌén ngi̱jii̱n xota̱ na̱xi̱ńdaá, kó ngayeje xotaa̱ ki̱a̱ kamátikó xtín nínga tikón ngi̱ndie xi ꞌmí Pórtikoo̱ Salomoo̱. 13Xota̱ xi ngasee̱, nde ngiti̱ ingojín xi nijan kamátikójo̱, ta̱nga xota̱ na̱xi̱ńdaá ꞌniú ton ton kamábendikón kuí já apostroo̱, 14kó xota̱ xi je tjisꞌíjii̱n Ndi̱a̱a̱ ta̱sasá kamákjín, bo̱a̱ kjiꞌi xi xi̱ꞌin, kó bo̱a̱ kjiꞌi xi ínchjín, 15kó ngaskande ngi̱ya ndi̱yàtié kaꞌnaxié xota̱ xi oo̱n, nga akjajñasón ṉchan tsi̱ꞌe̱ nga, nga kjo̱a̱ꞌa Peé, ndeta̱ tji̱nkꞌi̱e̱én xí kjo̱a̱ꞌanié kui xota̱ xi oo̱n. 16Ti̱ bo̱a̱ ti̱ tsꞌén xota̱ xi síndotꞌa tiñaa̱ na̱xi̱ńdáꞌniú Jerusalee̱n jachójo̱ xota̱ xi oo̱n, ko̱jo xota̱ ndyi̱tsꞌènníꞌiín a̱siénni̱xtjin xi ndajín, kó ngayejee̱ nga kamándaya.

Bi̱ tsꞌén ikiyotji̱ngii̱ Peé ko̱jo Juaa̱

17Kó já ngito̱ko̱o̱ chináꞌmi xi ꞌniú nkꞌa xaá, ko̱jo xota̱ xi chji̱a̱ni já sanduseoo̱ kamáchi̱ni̱, 18kuíni nga kandobá já apostroo̱ sꞌe̱ tsangínjo̱ ndo̱bo̱a̱ya̱à na̱xi̱ńdaá. 19Ta̱nga ngo ndítsjiee̱ Néná iskjíxꞌá nga̱ntjo̱a̱ ndo̱bo̱a̱ya̱à nga jñoó, sꞌe̱ índondé, kó bi̱ katsoó:

20–Tangínjnú na̱ngo̱xi̱ jàn, kó tꞌíni̱jmìjnúu̱ xota̱ na̱xi̱ńdaá eén Néná xí tsjá kjo̱a̱mindyioo̱n.

21Kó ngije tsintꞌié kuí nii̱, nga ꞌniú ta̱jño̱ó nga kamángindyiojón tsꞌasꞌien na̱ngo̱xi̱i̱ kó akóyá eén Néná.

Kósꞌe̱, chináꞌmi xi ꞌniú nkꞌa xaá, ko̱jo xota̱ xi nijan síndojo̱, tsíchji̱a̱a̱ xota̱ xi xchá xí chji̱a̱ni Israee̱l, kó kamátikó ngayeje jáxaá, kó katsangiya jájuún nga kijíchjaꞌá já apostroo̱ nínga síndoyá ndo̱bo̱a̱ya̱à. 22Ta̱nga nga jachó jájún xi kondaa̱, je ngiti̱ jmíjín xi síndo ngi̱ya ndo̱bo̱a̱ya̱à, kó tji̱e̱nmá kijíꞌoyá nginí nga katsóyà, 23nga bi̱ katsó:

–Ndo̱bo̱a̱ya̱à tjíchjá cha̱n cha̱n, kó jájún xi ndyi̱kondaa̱, ta̱kó bo̱a̱ tsꞌén ndyi̱a̱kixi̱ ki̱a̱ nga̱ntjo̱a̱a̱, ta̱nga nga kachjáxꞌájne̱ nga̱ntjo̱a̱ ndo̱bo̱a̱ya̱à ta̱ꞌyajín xi kasakojne̱ ngi̱yaa̱.

24Nga tsintꞌié kuí eén nda̱ ngito̱ko̱ xi konda na̱ngo̱xi̱i̱, ko̱jo já ngito̱ko̱o̱ chináꞌmii̱, ja̱kꞌi̱e̱ ja̱ngaján asíyaá xkjín nga bo̱a̱ katsoó nga ñá tji̱e̱n kjo̱chó kui ni xi kjimaa̱. 25Ta̱ kjiꞌá má jachó ngo nda̱, xi bi̱ katsó:

–A yàjnú ꞌne̱, kui já xí kanangisꞌienjnú ndo̱bo̱a̱yà, je síndo nginí na̱ngo̱xi̱i̱ nga ndyi̱bokoyaá xota̱ na̱xi̱ńdaá.

26Kósꞌe̱ nda̱ ngito̱ko̱o̱ jájuún, ko̱jo jájún xi kondaa̱ kijíngase, ta̱nga jmí ni katsꞌénjo̱jín, ngatꞌa̱ nga katsakjónní tsi xotaa̱ ndi̱jo̱ kꞌo̱ya. 27Kjiꞌanga jachójo̱, kijíjo̱ ngindyi̱ko̱n jáxaá, kó ngito̱ko̱o̱ chináꞌmi xi ꞌniú nkꞌa xaá, bi̱ katsoó:

28–Ji̱n jè ta̱nisién ꞌniú akatíxomajne̱ nga ngiti̱ chiíjín ko̱ndókjo̱a̱ni̱jmìjnú kjo̱a̱a̱ Kjisoo̱ nga ko̱ko̱yájnú, kó ngayeje na̱xi̱ńdáꞌniuú ikꞌíkitsiejnú kui ni xi akakoyájnú, kó mejénjnú nga ji̱n xi sꞌi̱niéjne̱ nga kiniꞌánkꞌién Kjisoo̱.

29Kó Peé ko̱jo já apostroo̱ xi ngasee̱, bi̱ katsó:

–Chjiéngá Néná xi ko̱nda̱ꞌyáꞌénjne̱ ngindiee̱ nga xotaa̱ xi ko̱nda̱ꞌyáꞌénjne̱. 30Kui Néná xí tsi̱ꞌe̱ xota̱ tji̱e̱ xcháná kui xi katsꞌénkjaꞌáꞌyaá Kjisoo̱, kui Kjiso̱ xi jún kiniꞌánkꞌiénjnú nga akjatꞌajnú kro. 31Kui Kjisoo̱ xi Néná iskjininkꞌa, kó katsjaá ngo ngi̱ndie nga kisꞌijñatꞌaa̱ tsja fojnií, kó katsjaá xá nga kui xi kꞌo̱xiéꞌá xotaa̱, tsi̱ꞌe̱ nga xota̱ xi chji̱a̱ni Israee̱l sa̱ꞌínkꞌoyà yojoo̱, kó Néná sa̱ꞌínjetakoón jé xí ndyi̱tsꞌèn. 32Kó ji̱n xí chistikoo̱ kui nii̱, ko̱jo A̱si̱énni̱xtjii̱n Néná, kui A̱siénni̱xtjin xi Néná katsjaá kui xota̱ xi ndyi̱ntꞌièꞌeén.

33Kó kui jaá nga tsintꞌié kuí nii̱, achichí kamáxtií, kó kamámejeén katsꞌénkꞌién já apostroo̱. 34Kósꞌe̱ ngi̱jii̱n kui jáxaá kisꞌijña ngo nda̱ fariseo̱ xi ꞌmí Ngamaliee̱l, ngo nda̱ mostroo̱ kjo̱a̱kitii̱ xi ta̱nisién kamábendikón xota̱ na̱xi̱ńdaá, kó kui nda̱a̱ jastjíe̱n, kó tsíꞌá kjo̱a̱ tsi̱ꞌe̱ nga ko̱ꞌna̱xié ngotjón ndi̱tsee̱n kui já apostroo̱, 35kó jaskan, bi̱ katsó:

–Jún bo̱a̱ já Israee̱l, nda nda ma ti̱ꞌankjójnú ni xi si̱ꞌanjo̱jnú kui jaá. 36Ngatꞌa̱ ngindiee̱ kui ni̱xtjii̱n kistsoꞌbá nda̱ xi ꞌmí Teundaa̱, nga ta̱nisién ꞌniú je katsoó yojoo̱, kó kamájo̱ra̱ tsi ta̱ nijón úchán jáxíꞌín, ta̱nga kiniꞌánkꞌién, kó ngayeje já xí nijan kamá kastsojoboa ngayejee̱, kó ta̱ ki̱a̱ tji̱e̱n je tsí. 37Kó jaskan, ni̱xtjin nga katjoꞌóꞌyá xki̱i̱ xota̱, kistsoꞌbá nginí Jundaa̱, nda̱ xi chji̱a̱ni Ngalilea̱, kó kjín xota̱ xi kisꞌiṉtso̱matjingi nginií, kó ti̱ bo̱a̱ ti̱ tsꞌén kiniꞌánkꞌién nginí, kó ngayeje xota̱ xi kisꞌiṉtso̱matjingii̱ kastsojoboa yeje nginí. 38Kó kuíni nga bi̱ xiánjnúꞌun, xióchònjnúu̱ kui jaá, kó ngata̱ kuijín niꞌánjo̱jnú, ngatꞌa̱ tsi tsi̱ꞌe̱ xotaa̱ ni xi ndyi̱ꞌbínda xi ndyi̱tsꞌèn, kju̱i̱e̱kjo̱a̱, 39ta̱nga tsi tsi̱ꞌe̱ Néná kui xaá, ka̱májínjnú si̱ꞌankjiejnú. Chónjnú yojojnú ngatꞌa̱ tsi ta̱ Néná xí ndyi̱bixkánjo̱jnú. Kó kui jaá katsꞌénseén ni xi kiꞌmií.

40Sꞌe̱ kandokjo̱a̱a̱ já apostroo̱, ngije ja̱bo̱a̱ je akjaa̱, kó ꞌniú ikꞌíjñaá nga ngiti̱ chiíjín ku̱i̱chji̱a̱ ngase kjo̱a̱a̱ jaꞌeén Kjisoo̱, sꞌe̱ ikꞌíndondé ngijee̱. 41Kó kui já apostroo̱ ata̱ chichí tsja tjiín nga jataxie nínga síndo jáxaá, ta̱ngatꞌanii̱ nga Néná katsjaá nga jaꞌatio kjo̱a̱ni̱ma̱ kjo̱a̱a̱ nga tsintꞌiéꞌeén Kjisoo̱. 42Kó ndyiojón ndyiojón ki̱a̱ ndi̱tsee̱n na̱ngo̱xi̱i̱, ko̱jo xki̱ ndiꞌa akóyá, ko̱jo íni̱jmì éntjatsi̱e̱e̱ Néná nga Kjisoo̱ xi Kristoo̱.

Currently Selected:

Ni xi kamá 5: MAIX

Highlight

Copy