Ni xi kamá 23

1Kó Pabloo̱ askotsijen ndá ndaá ngayeje jáxaá, kósꞌe̱ bi̱ katsoó:

–Jún já ntsꞌie, ngaskande ngotꞌe̱ nda tsꞌén tikón kjo̱a̱kjíntakónna, kó tsjatsꞌèn tikòn an ngindyi̱ko̱n Néná.

2Kó chináꞌmi xi ꞌniú nkꞌa xaá xi ꞌmí Ananiyaa̱, katsjaákjo̱a̱ xota̱ xi síndotꞌa tiñaa̱ Pabloo̱ tsi̱ꞌe̱ nga tsꞌaxtio tsꞌoa. 3Kósꞌe̱ Pabloo̱ bi̱ katsoó:

–¡Néná ku̱i̱e̱ꞌeé ji, jókje̱n! Xi ja̱ kuí xá tindyin ni ji ki̱a̱a̱ tsi̱ꞌe̱ nga ka̱majéna xikó tsó kjo̱a̱kitii̱, kó ánní nga tibitjatjée̱n xikó tsó kjo̱a̱kitii̱, nga tjín xí tinangiye ji tsi̱ꞌe̱ nga ku̱i̱ꞌéna.

4Kó xota̱ xi síndo ki̱a̱a̱, bi̱ katsoó Pabloo̱:

–Ánní bi̱ tsꞌén chꞌo sée̱ chináꞌmi xi ꞌniú nkꞌa xaá xi chji̱a̱ni Néná.

5Kó Pabloo̱ bi̱ katsó:

–Jún ntsꞌie, bejín an tsi chináꞌmi xi ꞌniú nkꞌa xaá kui nda̱a̱, ngatꞌa̱ jè kjitꞌa xo̱jo̱n eén Néná nínga bi̱ tsoó: “Ngata̱ chꞌójín sée̱ xota̱xá xí botixómaá nangi tse̱.”

6Kó nga kamákjiín Pabloo̱ nga ngi̱jii̱n kui jáxaá tjín xí chji̱a̱ni xota̱ sanduseo̱, ko̱jo kje̱ꞌe xi chji̱a̱ni xota̱ fariseo̱, bi̱ katsó nga ꞌniú tsíchji̱a̱:

–Jún já ntsꞌie, nda̱ fariseo̱ an, kó ti̱ xota̱ fariseo̱ chji̱a̱ni xingi̱ an, kó tjíniꞌánjéna ngatꞌa̱ tsꞌénkoyàa̱ nga kjo̱a̱ꞌáꞌyá nginií xota̱ xi je jesoón.

7Kó ngije tsíchji̱a̱ kui nii̱ Pabloo̱, xota̱ fariseoo̱, ko̱jo xota̱ sanduseoo̱ ítsꞌi̱yanii̱ nga tsíchji̱a̱tijo̱ xkjín, kósꞌe̱ jó tjín kamá kui xota̱ xi kamátikoó. 8Ngatꞌa̱ xota̱ sanduseoo̱ sꞌijinjiín nga foaꞌáꞌyá nginií xota̱ xi je jesoón, ko̱jo nga jmíjín xò ndítsjie ko̱jo a̱siénni̱xtjin tsó, ta̱nga xota̱ fariseoo̱ sꞌijinrií ngayeje kui nii̱. 9Kó ngayeje xotaa̱ askjandáyà xtín, kó tjín já xí chji̱ni̱e̱kjo̱a̱kiti, xi xota̱ fariseo̱ chji̱a̱ni xi jastjíe̱n, kó bi̱ katsó:

–Kui nda̱a̱ jmí ni chꞌokjiꞌi katsꞌénjín, kó tsi ngo a̱siénni̱xtjin ko̱jo tsi ngo ndítsjie tsíchji̱a̱jo ki.

10Kó kui kjo̱a̱see̱ sa tsie sa tsie kjima, kó kuíni nga nda̱jun ngito̱ko̱o̱ katsakjónní tsi sa̱ꞌínxi̱ xota̱ na̱xi̱ńdaá Pabloo̱, kó katsangiyakjaꞌá jájún xi kꞌo̱xié Pabloo̱ tsi̱ꞌe̱ nga kꞌo̱xié kui ngi̱ndiee̱, kósꞌe̱ kjo̱jo nginí ki̱a̱ ndiꞌaa̱ jájuún.

11Ni̱xtji̱e̱n xi mangindyiojón, Ndi̱a̱ná akoó yojoo̱ Pabloo̱, kó bi̱ katsoó:

–Ti̱ꞌin ꞌniú takín Pablo̱, ngatꞌa̱ xikótsꞌèn kandokjo̱e̱ ji kjo̱a̱a̱ an kꞌi̱e̱ na̱xi̱ńdáꞌniú Jerusale̱n, kó bo̱a̱ ti̱ tsꞌén chjiéngá ko̱ndókjo̱e̱je ji xota̱ na̱xi̱ńdá xí chji̱a̱ni Roma̱.

Bi̱ tsꞌén kisꞌinda nga si̱ꞌankꞌien Pabloo̱

12Kó nga kamángindyiojón nga ni̱xtjii̱n, tjín xota̱ jundío̱ xi nijan índa tsi̱ꞌe̱ nga sa̱ꞌínkꞌién Pabloo̱, kó ngaskande ngiboanéná katsó nga jmí ni skji̱ni̱e̱jín ko̱jo jmí ni kꞌuijín ngaskande nga sa̱ꞌínkꞌién Pabloo̱. 13Kó tsꞌatio yichán kamá jáxíꞌín xi bo̱a̱ katsoó, 14xi kijíkoón já ngito̱ko̱o̱ chináꞌmii̱ ko̱jo xota̱ xi xchá jundíoo̱, kó bi̱ katsoó:

–Ji̱n jè ngaskande ngiboanéná kiꞌmíjne̱ nga ta̱ jmíjín ni xi xi̱ni̱e̱ji̱n tji̱e̱nga kji̱e̱ niꞌánkꞌiénjínjne̱ Pabloo̱. 15Ngotꞌe̱ ꞌne̱ jún ko̱jo xi ngase jáxá ngito̱ko̱o̱, chji̱a̱ꞌajnúu̱ nda̱jun ngito̱ko̱o̱ tsi̱ꞌe̱ nga ndyiojón ngatjandibájo̱ ngindyikónjnú Pabloo̱, ta̱ tsi̱ꞌe̱ nga ta̱ ni xi si̱ꞌanjo̱ ñá, nga ko̱si̱yáa kókjiꞌi kjo̱a̱ xi tsoꞌbá, kó ji̱n je ku̱i̱ndyiondajne̱ nga si̱ꞌankꞌienjne̱ ngindiee̱ nga kjo̱e̱ꞌe kꞌi̱e̱e̱.

16Ta̱nga ndií ndichja Pabloo̱ tsintꞌié kui ni xi tjisꞌíndataꞌin tsinii̱, kó tji̱e̱nmá kijí ndiꞌaa̱ jájuún kósꞌe̱ katsóyà tji̱ꞌni̱u̱ú Pabloo̱. 17Pabloo̱ tsíchji̱a̱a̱ ngo nda̱ ngito̱ko̱o̱ jájún xi nkꞌa ngase xaá, kó bi̱ katsoó:

–Tꞌenje̱ ji kui nda̱chií nínga tikón nda̱jun ngito̱ko̱o̱ ngatꞌa̱ tjín ni xi ka̱tso̱yaa̱.

18Kó kui nda̱jun ngito̱ko̱o̱ xi ꞌniú nkꞌa xaá kijíjoo̱ kui nda̱chií nda̱jun ngito̱ko̱ xi ingoo̱, kó bi̱ katsoó:

–Pabloo̱, kui nda̱ xi tjiꞌyá ndo̱bo̱a̱ya̱à tsíchji̱a̱na kó tsíꞌána nga kji̱ndi̱bájo̱o̱ kꞌi̱e̱e̱ kui nda̱chií, ngatꞌa̱ tjín xò ni xi ku̱i̱chji̱a̱joo ji.

19Kó nda̱jun ngito̱ko̱o̱ iskjíbé tsja kui nda̱chií, sꞌe̱ kijíjo̱tꞌaxín, kó bi̱ katsó nga asíyaá:

–Mí ni xi kꞌuiyéní.

20Kó kui nda̱chií bi̱ katsó:

–Xota̱ jundíoo̱ je índa xtín tsi̱ꞌe̱ nga ku̱i̱ꞌaa̱ ji nga ndyiojón ko̱na̱ngíyé ji Pabloo̱ nínga síndo jáxá ngito̱ko̱o̱, ta̱ tsi̱ꞌe̱ nga ta̱ ni xi si̱ꞌanjo̱ nga ko̱síyá cha̱n cha̱a̱n xoò mí ni xi tsoꞌbání. 21Ta̱nga ngata̱ niꞌínsꞌinjinjíi̱n, ngatꞌa̱ tsꞌatio yichán má jáxíꞌín xi ndyi̱kondaꞌma, kó kui jaá ngaskande ngiboanéná je katsó nga jmí ni skji̱ni̱e̱jín xò ko̱jo jmí ni kꞌuijín xò ngaskande nga sa̱ꞌínkꞌién xò Pabloo̱, kó ngotꞌe̱, jè síndonda nga ta̱ ndyi̱koyarií ni xi sé jí.

22Sꞌe̱ kui nda̱ ngito̱ko̱o̱ jájuún katsꞌénkjí nda̱chií, kó bo̱a̱ katsoó nga ta̱ꞌyajín xi ka̱tso̱yaa̱ ni xi je katsóyaà kui nda̱juu̱n.

Bi̱ tsꞌén kanangiya Pabloo̱ ngindyi̱ko̱n nda̱ xtitjón xi ꞌmí Firii̱

23Kó kui nda̱jun ngito̱ko̱o̱ tsíchji̱a̱a̱ jó já ngito̱ko̱o̱ jájuún xi ꞌniú nkꞌa ngase xaá, kó katsjaákjo̱a̱ nga ku̱i̱ꞌíndonda jó úchán jájún xi ꞌbítso̱mayise, ko̱jo ichítié ko̱jo kan jájún ndi̱je̱, ko̱jo jó úchán jájún xi boaꞌa yá yijó, tsi̱ꞌe̱ nga ko̱e̱je̱ na̱xi̱ńdáꞌniú Sesarea̱ nga ka̱ma chi̱bo̱a̱ nijan nga jñó, 24kó ti̱ bo̱a̱ ti̱ tsꞌén katsjákjo̱a̱ nga ikꞌíjñandaa̱ ngo ndi̱je̱ xi kꞌuijñásón Pabloo̱, kósꞌe̱ katsjákjo̱a̱ tsi̱ꞌe̱ nga nda kjo̱jo ko̱jo nga si̱ꞌanꞌonjiín ngaskande nga kjo̱chójo̱ nínga tikón nda̱ xtitjón xi ꞌmí Firii̱. 25Kó ngo xo̱jo̱n katsangiyajo̱ kui jájuún xi bi̱ tsó:

26“Nda̱ Klaundio̱ Lisiaa̱, tsangiyaa̱ tinde ji nda̱ xtitjón Firi̱. 27Xota̱ jundíoo̱ katsoboá kui nda̱a̱, kó je mejeén sa̱ꞌínkꞌién katsaki, ta̱nga ngije tsintꞌie an nga na̱xi̱ńdá Roma̱ chji̱a̱ni, kijíjo̱ an jájúnna kósꞌe̱ tsꞌaxiéꞌá an, 28ngatꞌa̱ kamámejénna skuie an míkjo̱a̱a̱ xi tjifongítaꞌin, kijíjo̱ an ngindyi̱ko̱n jáxá jundíoo̱, 29kó kasakona nga kixi̱i̱ nga kjo̱a̱a̱ kjo̱a̱kitii̱ kui jaá ni xi tjifongítaꞌinni, ta̱nga jmí kjo̱a̱jín má nga si̱ꞌankꞌien ko̱jo nga ngaskande nde ka̱májín nga ndo̱bo̱a̱yà kꞌuijñá. 30Ta̱nga nga je kamábe an nga já jundíoo̱ índa tsi̱ꞌe̱ nga sa̱ꞌínkꞌién, ki̱a̱ tsꞌéntsangiyaa ji, kó ti̱ bo̱a̱ ti̱ tsꞌén je tsíꞌáa̱ xota̱ xi ndyi̱bongítaꞌin nga ki̱a̱ ngatꞌínda ngindyikin mí xí chꞌonii̱ kui nda̱a̱.”

31Kó bo̱a̱ tsꞌén jájuún, katsꞌén xikó kjiꞌi ni xi je kiꞌmií, iskjíbé Pabloo̱, kó nga jñoó kijíjo̱ na̱xi̱ńdáꞌniú Antipatri̱, 32kó nga kamángindyiojón, jájún xi ꞌbítso̱mayisee̱ kijíꞌoyá nginí ndiꞌa nínga ꞌbíndo, kósꞌe̱ jájún ndi̱je̱e̱, kui xi kijíjo̱ Pabloo̱ ta̱kó kijíra. 33Kó nga jachó na̱xi̱ńdáꞌniú Sesarea̱, katsꞌénkꞌasꞌiee̱n xo̱jo̱n xi ndyi̱yaꞌaa̱ xtitjoón, kó ti̱ bo̱a̱ ti̱ tsꞌén kiniꞌánkꞌasꞌiee̱n Pabloo̱ nga. 34Kó ngije katsꞌényà xo̱jo̱o̱n, nda̱ xtitjoón asíyá ñá chji̱a̱ni Pabloo̱, kó ngije kamábe nga nangi Silisia̱ chji̱a̱ni, 35bi̱ katsoó:

–Kjiꞌa boá kuintꞌiee ngije kjo̱e̱ꞌe kuí xota̱ xi ndyi̱bongítaꞌii̱n ji.

Kósꞌe̱ katsjákjo̱a̱ nga ki̱a̱ xchindà Pabloo̱ ndo̱bo̱a̱xa̱á Erondee̱.

Currently Selected:

Ni xi kamá 23: MAIX

Highlight

Copy