Ni xi kamá 15

Bi̱ tsꞌén kamátikó já apostroo̱ ko̱jo xota̱ xi xchaá na̱ngo̱xi̱i̱

1Kui ni̱xtjin jàn tjín xota̱ xi chji̱a̱ni nangi Jundea̱ xi kijí na̱xi̱ńdáꞌniú Antiokiya̱, kó ki̱a̱ ítsꞌi̱yanii̱ nga akóyaá ntsꞌiee̱ nga kjo̱tjoꞌajiín yojoo̱ tsi si̱ꞌánjiín sirkunsisioo̱n xikó kjiꞌi kjo̱a̱xchá xí íjñá Moisee̱. 2Pabloo̱ ko̱jo Bernabee̱ ꞌniú askjoyáni kui nii̱ ko̱jo kui jaá, kó ti̱chaa̱n Pabloo̱ ko̱jo Bernabee̱ kisꞌińdonda ko̱jo kje̱ꞌe ngase xota̱ xi katseꞌéxaá, tsi̱ꞌe̱ nga kijí na̱xi̱ńdáꞌniú Jerusale̱n nga kijíkꞌínda kui kjo̱a̱a̱ ko̱jo já apostroo̱, ko̱jo xota̱ xi xchaá na̱ngo̱xi̱ xi chji̱a̱ni kui na̱xi̱ńdáꞌniú jàn.

3Kó kui jaá, ngije katsꞌénkjíyindi̱yà xota̱ na̱ngo̱xi̱i̱, jaꞌa nangi Fenisia̱ ko̱jo nangi Samaria̱, kó katsóyaà kótsꞌèn xota̱ xi jundío̱jiín íjñámasien kjo̱a̱xcha̱á, kósꞌe̱ katsꞌénsꞌijin Néná, kó ngayeje ntsꞌiee̱ achichí tsja kamaá nga tsintꞌié kuí nii̱.

4Kó nga jachó na̱xi̱ńdáꞌniú Jerusale̱n, ki̱a̱ ndyi̱koyaa̱ xota̱ na̱ngo̱xi̱i̱, ko̱jo já apostroo̱, ko̱jo xota̱ xi xchaá, kó katsóyaà ngayeje ni xi katsꞌén Néná ngi̱ya tsja kui jaá. 5Ta̱nga tjín xota̱ fariseo̱ xi je kisꞌijii̱n eén Néná xi jastjíe̱n, sꞌe̱ bi̱ katsó:

–Chjiéngá si̱ꞌaa̱n sirkunsisioo̱n kui xota̱ xi je kisꞌijii̱n eén Néná xi jundío̱jiín, kó ꞌniú kꞌuijñáa̱ nga sa̱ꞌínkjatjosón kjo̱a̱kitii̱ Moisee̱.

6Kó ítikó yojoo̱ já apostroo̱, ko̱jo xota̱ xi xchaá tsi̱ꞌe̱ nga askjoyáni kui kjo̱a̱a̱. 7Kó ngije tsie askjoyáni kui kjo̱a̱a̱, jastjíe̱n Peé, kó bi̱ katsoó:

–Jún já ntsꞌie, jún jè yàjnú nga je tsienii̱ nga Néná jaꞌájinna ngi̱jii̱n jún, tsi̱ꞌe̱ nga xiyàa̱ éntjatsi̱e̱e̱ Néná xota̱ xi jundío̱jiín, tsi̱ꞌe̱ nga sꞌi̱jii̱n. 8Kó Néná xí be ini̱ma̱ná akó nga tjoó xotaa̱, ngatꞌa̱ katsjaá A̱si̱énni̱xtjii̱n Néná xikótsꞌèn katsjáná ñá, 9kó Néná skjánjín tjítsꞌénná ñá ko̱jo kui jaá, ngatꞌa̱ ti̱ jè katsꞌéntsjie ini̱ma̱a̱ ngije kisꞌijii̱n Néná nga. 10Ngotꞌe̱ ꞌne̱, míkjo̱a̱a̱ nga Néná ndyi̱chjatꞌayákónjnú nga kjo̱a̱ꞌniú ndyi̱niꞌánjnúu̱ kui xota̱ xi tsi̱ꞌe̱ Néná, nga ko̱a̱ꞌa̱nijín ngo chꞌià xí ngaskande ñá ko̱jo xota̱ tji̱e̱ xcháná kamájiín tsaꞌanijín. 11A mí tsí ta̱sá sꞌijin kjimáná nga ta̱ kjo̱tjoꞌa ñá ta̱ngatꞌanii̱ kjo̱a̱ndaa̱ Ndi̱a̱ná Kjisoo̱, xikoó kui jaá.

12Kó ngayeje xotaa̱ nga xió kisꞌińdo, tji̱e̱nga tsintꞌieé Bernabee̱ ko̱jo Pabloo̱ nga íni̱jmì kjo̱a̱a̱ ngayeje chi̱bo̱a̱ ko̱jo kjo̱a̱ndikón xí katsꞌén Néná ngi̱ya tsja kui jaá ngi̱jii̱n xota̱ xi jundío̱jiín. 13Kó ngije xió kisꞌińdo kui jaá, Sandiyaá bi̱ katsó:

–Jún já ntsꞌie, ndaꞌyámájnúꞌun: 14Ximoo̱ íni̱jmìná kó katsꞌén Néná nga tjón tjón nga kamáni̱ma̱a̱ xota̱ xi jundío̱jiín, ko̱jo nga jaꞌájin nga na̱xi̱ńdá xi tsi̱ꞌe̱ Néná ku̱i̱chji̱a̱ni. 15Kó kui nii̱, ti̱ bo̱a̱ ti̱ tsó xikótsꞌèn ítꞌa xo̱jo̱n jáchji̱ni̱e̱ꞌe̱én Néná, nínga bi̱ tsoó:

16Jaskan ngije kamá kui nii̱, kjoéꞌe̱ ngiñá an

kó kjoéꞌe̱ tsꞌendáyà ngi̱ndie ndikoón Ndabii̱ xi jatsoo̱n,

kó sa̱ꞌindaya an xó xí je ixóndoó,

kó ti̱ sa̱ꞌinkjastjíe̱n nginí an kui ndiꞌaa̱,

17tsi̱ꞌe̱ nga xota̱ xi ngasee̱ ko̱ngase Ndi̱a̱ná,

ko̱jo ngayeje xota̱ xi Israee̱ljín

xi je kamátsjie ngi̱yaa̱ jaꞌénna,

18bi̱ tsó Ndi̱a̱ná xi bokó ngayeje kui nii̱ ndeskande ni̱xtjin xchá jàn.

19Kuíni nga an xi xian an nga ka̱májín si̱ꞌanxtii̱ xota̱ xi Israee̱ljín xi je íjñámasien kjo̱a̱xcha̱á tsi̱ꞌe̱ nga Néná jè ko̱e̱je̱tji̱ngi, 20ta̱ ka̱ma ta̱ ngo tsi xo̱jo̱n si̱ꞌandàa̱ nínga kꞌuiyáa̱, tsi̱ꞌe̱ nga ku̱i̱ꞌíjñátꞌaxiín yojoo̱ ngayeje ni xi ndándí xi chji̱a̱ni ngo a̱sie̱én ngo ne xi tsꞌénda xotaa̱, kó nga sa̱ꞌínkamajo̱jín xi tondo̱, ko̱jo nga skji̱ni̱e̱jín yojoo̱ cho̱ xi niꞌánxíndo nga niꞌánkꞌién, ko̱jo yojo xi ndyi̱a̱a̱ jín. 21Ngatꞌa̱ ngaskande ni̱xtjin xchá jàn, Moisee̱ índo xki̱ na̱xi̱ńdá xota̱ xi ku̱i̱ꞌíni̱jmì nga sa̱ꞌínyà kjo̱a̱kitii̱ ngi̱ya ndiꞌa nínga ndokjo̱a̱ eén Néná xki̱ ni̱xtjin ndikón.

22Kósꞌe̱ nda kasasiee̱n já apostroo̱, ko̱jo xota̱ xi xchaá, ko̱jo ngayeje xota̱ na̱ngo̱xi̱i̱, nga jaꞌájin já xí chji̱a̱ni kui já xíꞌiín, xi katsangiya na̱xi̱ńdáꞌniú Antiokiya̱ xi nijan kijíjo̱ Pabloo̱ ko̱jo Bernabee̱, Jundaa̱ nda̱ xi ti̱ Barsaba̱ ꞌmií nga, ko̱jo nda̱ xi ꞌmí Silaa̱ xi achichí kamáyàndikón ngi̱jii̱n já ntsꞌiee̱, 23kó kui jaá xi kanangiyajo̱ ngo xo̱jo̱n, xi bi̱ tsó:

“Ji̱n xi já apostro̱ ji̱n ko̱jo xota̱ xi xchá xí ntsꞌie májnú, tinde bo̱a̱ tꞌínjnú já ntsꞌie xí xota̱ xi jundío̱jín xi síndo na̱xi̱ńdáꞌniú Antiokiya̱, ko̱jo nangi Siria̱, ko̱jo nangi Silisia̱. 24Jè kandaꞌyájne̱ nga tjín xota̱ xi ti̱ kꞌi̱e̱ jatjojinná, kui xi jmí kjo̱a̱ katseꞌéjiín, kó kui xi ndyi̱tsꞌènxtií ini̱ma̱jnú, nga katsangiya nga si̱ꞌánjnú sirkunsisioo̱n, ko̱jo nga si̱ꞌankjatjosónjnú kjo̱a̱kitii̱. 25Nda tsakínjne̱, nga ikꞌíndajne̱ nga kachjeꞌéjinjne̱ jáxíꞌín xi tjójne̱, kuíni nga kanangiyachonjne̱ jún Bernabee̱ ko̱jo Pabloo̱, 26já xí je kitsjienkon yojoo̱ ta̱ngatꞌanii̱ jaꞌeén Ndi̱a̱ná Jesukristoo̱. 27Kó kuíni nga ki̱a̱ kanangiyajne̱ Jundaa̱ ko̱jo Silaa̱, kó kuí jaá xi kuí má xi ku̱i̱chji̱a̱jojnú jún, tsi̱ꞌe̱ nga ka̱tso̱yà yejejnú ti̱kuii ni xi̱ꞌbi̱. 28Ngatꞌa̱ jè nda tsakiín A̱si̱énni̱xtjii̱n Néná, ko̱jo ji̱n, tsi̱ꞌe̱ nga ta̱xkiya si̱ꞌánjínjnú ngo ni, ta̱kuítsí ni xi xikoó xi̱ꞌbi̱: 29Nga xi̱ni̱e̱jínjnú yojoo̱ cho̱ xi je kiniꞌánkꞌasꞌiee̱n ngo a̱sie̱én ngo ne xi tsꞌénda xotaa̱, ko̱jo nga xi̱ni̱e̱jínjnú jín, ko̱jo yojoo̱ cho̱ xi kiniꞌánxíndo, ko̱jo nga ka̱májín tondo̱ ka̱majnú. Tsi si̱ꞌankjatjosónjnú ngayeje kui nii̱, ndakjíꞌí ni xi ndyi̱niꞌánjnú. Nda ngasꞌiejnú.”

30Kó bo̱a̱ tsꞌén kui jaá ngije katsꞌénkixotꞌa xkjín, kijí na̱xi̱ńdáꞌniú Antiokiya̱, kó ítikó ngayeje xota̱ na̱ngo̱xi̱i̱ nga katsꞌénkꞌasꞌien kui xo̱jo̱o̱n. 31Kó ngije katsꞌényà xota̱ na̱ngo̱xi̱i̱ kui xo̱jo̱o̱n, achichí tsja kamaá nga kui eén xi katsꞌéndajoo̱n. 32Kó nga jáchji̱ni̱e̱ꞌe̱én Néná kamá Jundaa̱ ko̱jo Silaa̱, katsꞌéndajoo̱n ko̱jo katsjángaꞌniuú ntsꞌiee̱ nga tsíchji̱a̱jo, 33kó ngije jaꞌa kjín ni̱xtjin, kui ntsꞌiee̱ xió katsꞌénkixotꞌa kui jaá, nga kijíꞌoyá nginí nangi nínga síndo xota̱ xi katsangiya. 34Ta̱nga Silaa̱ kamámejeén nga kisꞌijña ki̱a̱a̱. 35Kó Pabloo̱ ko̱jo Bernabee̱, ko̱jo kjín ngase xota̱, ta̱kó kisꞌińdora na̱xi̱ńdáꞌniú Antiokiya̱ nga akóyá, ko̱jo nga íni̱jmì éntjatsi̱e̱e̱ Néná.

Bi̱ tsꞌén ítsꞌi̱yanii̱ Pabloo̱ xi ma jó ndi̱yà nga katsꞌén xaá Néná

36Ngije jaꞌa kjín ni̱xtjin, Pabloo̱ bi̱ katsoó Bernabee̱:

–Tjianchóo̱n ingo ndi̱yà ngayeje ntsꞌié xi síndo ngayeje na̱xi̱ńdá nínga je ikꞌíni̱jmì eén Néná, tsi̱ꞌe̱ nga xcha̱ kótsꞌèn síndo.

37Kó Bernabee̱ kamámejeén nga nijan kijíjo̱ Juaa̱, kui nda̱ xi ti̱ Marko̱ kiꞌmií nga, 38ta̱nga Pabloo̱ kasasienjiín nga kjo̱jo, ngatꞌa̱ Markoo̱ nangi Panfilia̱ índomasien, kó ngiti̱ kamámejénjiín nga katsꞌén xá xí kiꞌmií. 39Kó Pabloo̱ ko̱jo Bernabee̱ ndse̱je̱njín kamá, kósꞌe̱ kja̱xín kja̱xín kijí nga ngo nga ngo, kó Bernabee̱ kijíjo̱ Markoo̱ nga kijíyà ngo tjotso je tji̱ngi̱ Chipre̱. 40Ta̱nga Pabloo̱ jaꞌájin Silaa̱, kó jatjo kui ngi̱ndiee̱, ngije já ntsꞌiee̱ tsíchji̱a̱tjé nga katsꞌénkꞌasꞌien ngi̱ya tsja Néná, 41kó kui jaá jaꞌa nangi Siria̱ ko̱jo nangi Silisia̱, nga katsjángaꞌniuú xota̱ na̱ngo̱xi̱i̱.

Currently Selected:

Ni xi kamá 15: MAIX

Highlight

Copy