Ni xi kamá 14

Bi̱ kamá nga kisꞌińdo Pabloo̱ ko̱jo Bernabee̱ na̱xi̱ńdáꞌniú Ikonio̱

1Nga jachó Pabloo̱ ko̱jo Bernabee̱ na̱xi̱ńdáꞌniú Ikonio̱, tsꞌasꞌien nga joó ngi̱ya ndiꞌa nínga ndokjo̱a̱ eén Néná xí chji̱a̱ni já jundíoo̱, kó ki̱a̱ tsíchji̱a̱jo xotaa̱, kjo̱a̱a̱ Kjisoo̱, kó kjín má xota̱ xi kisꞌijii̱n xi jundío̱ ko̱jo xi chji̱a̱ én ngriengo̱. 2Ta̱nga xota̱ jundíoo̱ xi kisꞌijinjiín én xí tsíchji̱a̱ Pabloo̱ ko̱jo Bernabee̱ indyiáꞌá xota̱ xi jundío̱jiín, tsi̱ꞌe̱ nga chꞌo ko̱a̱ꞌa̱ kui já ntsꞌiee̱. 3Kuíni nga, achichí tsie kamaá kui ngi̱ndiee̱, kó ꞌniú kamáꞌniátakón Ndi̱a̱ná nga íni̱jmi̱ì xotaa̱ kjo̱a̱a̱ kjo̱a̱tjoó Néná. Kó Ndi̱a̱ná akó nga ja̱koxi̱ kui nii̱ nga katsjaá ngaꞌniú, tsi̱ꞌe̱ nga sa̱ꞌín chi̱bo̱a̱ ko̱jo kjo̱a̱ndikón. 4Kó xota̱ xi chji̱a̱ni kui na̱xi̱ńdaá jó tjín katsꞌén yojoo̱ ngo tjín xí nijan kamá xota̱ jundíoo̱, sꞌe̱ ngo tjín xí nijan kamá já apostroo̱. 5Ta̱nga xota̱ xi jundíoo̱, ko̱jo xota̱ xi jundío̱jiín nijan kamá já xí botixómaá, kó kjítsꞌuieé kui jaá, tsi̱ꞌe̱ nga ndajín sa̱ꞌínjo̱ ko̱jo nga kꞌo̱ya ndi̱jo̱, 6kó nga kamábe Pabloo̱ ko̱jo Bernabee̱ kui ni xi ka̱mataꞌin, jatjoꞌma, kó na̱xi̱ńdáꞌniú Listra̱, ko̱jo na̱xi̱ńdáꞌniú Nderbe̱ kijí, xi chji̱a̱ni nangi Likaonia̱, ko̱jo nangi xi tiña manii̱ kui ngi̱ndiee̱, 7kó ki̱a̱ katsóyà éntjatsi̱e̱e̱ Néná.

Bi̱ kiniꞌánjo̱ Pabloo̱ ko̱jo Bernabee̱ na̱xi̱ńdáꞌniú Listra̱

8Kó ki̱a̱ na̱xi̱ńdáꞌniú Listra̱ kisꞌijña ngo nda̱ xi ni̱ma̱ xi májín fotsoꞌbá, xi jmíni̱xtjin kamá kistsoꞌbá, ngatꞌa̱ ndeskande koó nga katsen nga ni̱ma̱ kamá sé, kó kui nda̱a̱ ngo yáxíríe̱ tikónnié, 9nga tsintꞌieé én xí tsꞌénchji̱a̱ Pabloo̱, Pabloo̱ askoꞌá ndá ndá, kó kamábe nga kui nda̱a̱ ꞌniú sꞌijii̱n Néná nga ka̱mandaya, 10kó Pabloo̱ ꞌniú tsíchji̱a̱jo kui nda̱a̱, nga bi̱ katsoó:

–¡Ti̱sítji̱n, kó tꞌíjñí na̱xo̱ ndsa̱ki!

Kó kui nda̱a̱ ta̱niján ma iskjínkꞌá, kó kasasienkixi̱, sꞌe̱ kamá kistsoꞌbá. 11Kósꞌe̱ nga kamábe kui xota̱ na̱xi̱ńdaá ni xi katsꞌén Pabloo̱ askjandáyà má nga tsíchji̱a̱ én Likaonia̱, nga bi̱ katsó:

–¡Néná xota̱ kamá, kó kuí xí je jeꞌekónná!

12Kó Bernabee̱ ne Seuu̱ kiꞌmií, kó Pabloo̱ ne Erme̱ kiꞌmií, ngatꞌa̱ nga kuí xí tsíchji̱a̱ má. 13Kó chináꞌmii̱ ne Seuu̱, xi tikón na̱ngo̱xi̱i̱ nga bitjasꞌi̱e̱n na̱xi̱ńdáꞌniuú, jachójo̱ cho̱yojo xi̱ꞌin ko̱jo naxó tsjakon, kó kui chináꞌmii̱ ko̱jo xota̱ na̱xi̱ńdaá kamámejeén katsꞌénkꞌasꞌiee̱n kjo̱a̱tjó. 14Ta̱nga nga kamákjiín já apostro̱ Bernabee̱ ko̱jo Pabloo̱ ni xi ka̱mataꞌin, ngaskande iskjíndiyájón maá ńjñoo̱, sꞌe̱ kijíngajii̱n xotaa̱, kósꞌe̱ askjandáyà má nga bi̱ katsó:

15–¡Jún já! Míkjo̱a̱a̱ nga bi̱ kjiꞌi ni xi ndyi̱niꞌánjnú. A yàjínjnú nga xota̱ ji̱n xikoó jún, ja̱ kuíni nga jéꞌe̱ ji̱n nga kꞌuiníjmi̱jne̱ éntjatsi̱e̱e̱ Néná, tsi̱ꞌe̱ nga kꞌuijñámasienjnú kui ni xi niꞌánjnú xi jmí ni chjíjiín, kó ta̱sá Néná ti̱ndyi̱sé nginíjnú, kui Néná xí tikón ja̱koxi̱i̱, xi katsꞌénda ndiꞌakꞌajmii̱, ko̱jo tꞌanangii̱, ko̱jo ndáchíkoón, ko̱jo ngayeje ni xi tjiín, 16kui xi kje̱ꞌe ni̱xtjin katsjandiè nga ngayeje xotaa̱ kja̱kijí kja̱kijí ndi̱ya̱à nga ngo nga ngo, 17ndatsi ngatsjéni̱xtjin akoó xotaa̱ kjo̱a̱nda xi tsꞌén, tsi̱ꞌe̱ nga xcha̱ ꞌyání xi kui, ngatꞌa̱ kuí xí tsangiyàjnú stseé, tsi̱ꞌe̱ nga nda ka̱maxchá ni xi ꞌbítji̱e̱jnú, kó kuí xí tsja̱ajnú nga nda xi̱ni̱e̱ nga nda sꞌi̱o̱jnú, ko̱jo nga kꞌuieé kjo̱a̱tsja ini̱ma̱jnú.

18Kó ndatsi kui nii̱ katsó, ta̱nga ta̱kó achichí niꞌin kamaá nga íchjaá xotaa̱ nga si̱ꞌankꞌasꞌiee̱n kjo̱a̱tjó.

19Kó ta̱ kjiꞌá má jachó já jundío̱ xi chji̱a̱ni na̱xi̱ńdáꞌniú Antiokiya̱ ko̱jo na̱xi̱ńdáꞌniú Ikonio̱ xi indyiáꞌá xotaa̱, tsi̱ꞌe̱ nga kje̱ꞌe tsꞌén katsꞌénkjó, kósꞌe̱ ndi̱jo̱ akjaya Pabloo̱, kó ngije kisꞌijii̱n nga je kꞌien katsó, iskjifé nga tsꞌaxié ngi̱jin na̱xi̱ńdáꞌniuú. 20Ta̱nga ngayeje xota̱ xi je sꞌijii̱n Kjisoo̱ kamátikónié Pabloo̱, kó Pabloo̱ jastjíe̱n, kó ti̱ kijí nginí ngi̱jin na̱xi̱ńdáꞌniuú, kó nga kamángindyiojón kijí Pabloo̱ ko̱jo Bernabee̱ na̱xi̱ńdáꞌniú Nderbe̱.

21Jaskan ngije íni̱jmì éntjatsi̱e̱e̱ Néná na̱xi̱ńdáꞌniú Nderbe̱ nínga kjín xota̱ katsꞌénsꞌijin eén Néná, kijí nginí na̱xi̱ńdáꞌniú Listra̱, ko̱jo na̱xi̱ńdáꞌniú Ikonio̱, ko̱jo na̱xi̱ńdáꞌniú Antiokiya̱, 22kó ki̱a̱ katsjángaꞌniuú xota̱ xi sꞌijii̱n Kjisoo̱, kó ꞌniú tsíchji̱a̱jo, tsi̱ꞌe̱ nga sa̱ꞌínsꞌijin, kó bo̱a̱ katsoó nga chjiéngá tsie kjo̱a̱ni̱ma̱ ku̱i̱tja̱tió, tsi̱ꞌe̱ nga ku̱i̱tjásꞌi̱e̱n nínga botixómá Néná. 23Kó Pabloo̱ ko̱jo Bernabee̱ xki̱ na̱ngo̱xi̱ katsjaá xá xota̱ xi xchá xí kꞌuíndotjoón na̱ngo̱xi̱i̱, kó ngije tsíchji̱a̱a̱ Néná, ko̱jo ngije jaꞌa nga katsꞌénkjindiá, Ndi̱a̱ná katsꞌéngatꞌaa̱ kui xota̱ xi je kisꞌijii̱n.

Pabloo̱ ko̱jo Bernabee̱ bi̱ tsꞌén kijíꞌoyá nginí na̱xi̱ńdáꞌniú Antiokiya̱

24Pabloo̱ ko̱jo Bernabee̱ jaꞌa nangi Pisindia̱, ngaskande nga jachó nangi Panfilia̱, 25kó ngije katsóyà eén Néná na̱xi̱ńdáꞌniú Perje̱, kijí na̱xi̱ńdáꞌniú Atalía̱, 26ki̱a̱ kijíyà ngo tjotso je, tsi̱ꞌe̱ nga jachó na̱xi̱ńdáꞌniú Antiokiya̱, na̱xi̱ńdáꞌniú nínga kichjiáꞌátjeé Néná nga tsja̱á kjo̱a̱ndaa̱ tsi̱ꞌe̱ xá xí je katsꞌén. 27Kó ngije jachó na̱xi̱ńdáꞌniú Antiokiya̱, ítikó xota̱ na̱ngo̱xi̱i̱, kó íni̱jmi̱ì ngayeje ni xi katsꞌén Néná ngi̱ya tsja kui jaá, ko̱jo nga Néná boá xi katsꞌén nga xota̱ xi jundío̱jiín je sꞌi̱jii̱n Kjisoo̱ nga. 28Kó Pabloo̱ ko̱jo Bernabee̱ achichí tsie tsꞌandíyaá nga kisꞌińdojo̱ xota̱ xi je kisꞌijii̱n Kjisoo̱.

Currently Selected:

Ni xi kamá 14: MAIX

Highlight

Copy