Ni xi kamá 11

Peé bi̱ tsꞌén íni̱jmi̱ì xota̱ na̱ngo̱xi̱ xi chji̱a̱ni Jerusale̱n ni xi kamá ndiꞌaa̱ Korniee̱

1Tsintꞌié já apostroo̱ ko̱jo já ntsꞌie xi chji̱a̱ni nangi Jundea̱ nga ko̱jo xota̱ xi jundío̱jiín je katsꞌénjo̱ꞌo eén Néná nga. 2Kó nga jachó nginí Peé na̱xi̱ńdáꞌniú Jerusale̱n já xí sꞌijii̱n nga chjiéngá si̱ꞌaa̱n sirkunsisioo̱n xotaa̱, tsi̱ꞌe̱ nga xota̱a̱ Néná ka̱ma, tsíchji̱a̱taꞌin Peé, kó bi̱ katsoó nga asíyaá:

3Míkjo̱a̱a̱ nga ki̱a̱ kꞌichíi̱n xota̱ xi kji̱e̱ niꞌánjiín sirkunsisioo̱n, kó míkjo̱a̱a̱ nga ṉño̱ kichinieje̱ kon ji nga.

4Kósꞌe̱ Peé íni̱jmi̱ì ngaskande nga ítsꞌi̱yanii̱ ngayeje ni xi kamaá, kó bi̱ katsoó:

5–Kjiꞌanga tikòn an na̱xi̱ńdáꞌniú Jope̱, tji̱e̱nga tsꞌénchji̱a̱a̱ Néná ngo ni akakona xi ja̱kjiꞌi ńjñotjibé je kjiꞌi, xi tjíꞌniú nga nijón nijon xi tsꞌéndibájèn ndiꞌakꞌajmi jàn ngaskande nínga tikòn an, 6kó askotsijen ndá ndáa̱ ni xi ndyi̱a̱ ngi̱yaa̱, kó kamábe an nga ndyi̱a̱ ngayeje to̱ko̱ya cho̱ xi tjín nijón se xi tjín tꞌanangii̱, ko̱jo cho̱ tamá, ko̱jo cho̱ xi ꞌbifé yojoo̱, ko̱jo ni̱sie xi tjín nkꞌa jàn. 7Kó ti̱ tsintꞌie an ngo nda̱ xi bi̱ katsóna: “Ti̱sítji̱n ji Pé, ti̱ꞌinkꞌin ji kui cho̱o̱, kó chi̱ni ji.” 8Kó bi̱ kixian an ngijee̱: “¡Jmí Ndi̱a̱! Ngatꞌa̱ kji̱e̱ sa chií kjíni̱e̱ an ni xi ta̱xkiya ko̱jo ni xi ndándí.” 9Kó kui nda̱ xi kandaꞌyáni ndiꞌakꞌajmi jàn xi ma jó ndi̱yà, bi̱ katsó nginína: “Ni xi Néná je katsꞌéntsjie ngindyi̱ko̱n kui, ngata̱ ni ndándíjín sée̱.” 10Ján ndi̱yà bo̱a̱ kamá, sꞌe̱ jaskan ti̱ kijínijíngí nginí ngayeje kui nii̱ ndiꞌakꞌajmi jàn. 11Kó ti̱ kjiꞌa ján já xí kjindibáni na̱xi̱ńdáꞌniú Sesarea̱ jachóngasena ndiꞌa nínga tikòn an. 12Kó A̱si̱énni̱xtjii̱n Néná katsangiyana nga, nga jó nga jánjín kꞌuijñáa̱ ini̱ma̱na an nga kjuínjo̱ an kui jaá. Kó bo̱a̱ ti̱ tsꞌén jun ma já ntsꞌie xi katsꞌénkamajo̱na nga kijíjo̱na, kó jáchójne̱ ndiꞌaa̱ nda̱ xi ꞌmí Korniee̱. 13Kó kuí xí íni̱jmìjne̱ nga ngi̱ya ndiꞌaa̱ kamábe ngo ndítsjiee̱ Néná xi jachókoón, kó bi̱ katsoó: “Nangíyé ji já ki̱a̱ na̱xi̱ńdáꞌniú Jope̱ tsi̱ꞌe̱ nga kji̱ndi̱bájo̱ kui nda̱ xi ꞌmí Ximoo̱, xi ti̱ Pé ꞌmií nga, 14kuí xí bo̱a̱ ka̱tso̱o̱ kótsꞌèn kjo̱tjoꞌàa̱ yojòo̱ ji, ko̱jo xota̱ xi síndo ndiꞌàa̱.” 15Kó ngije ítsꞌi̱yanii̱ nga tsíchji̱a̱jo an, A̱si̱énni̱xtjii̱n Néná kjindibánié kui jaá, xikó kamáná ñá nga tjón tjón. 16Kósꞌe̱ bo̱a̱ tsꞌén jaꞌátsjienna ni xi katsóna Ndi̱a̱ná: “Ja̱koxi̱ nga Juaa̱ ndáfoa xí atíndání, ta̱nga jún A̱si̱énni̱xtjii̱n Néná xí sa̱tíndánijnú.” 17Ndakjíꞌí tsi Néná xí katsjaá kui xotaa̱ kui kjo̱a̱nda xi katsjáná ñá xi je kisꞌijinná Ndi̱a̱ná Jesukristoo̱, kósꞌe̱ ꞌyání an, nga tsjandièjàa̱n ni xi sa̱ꞌín Néná.

18Kó ngije tsintꞌié kuí nii̱ xota̱ na̱ngo̱xi̱ xi chji̱a̱ni na̱xi̱ńdáꞌniú Jerusale̱n, xioó kisꞌińdo, kó katsjaá kjo̱a̱je Néná nga bi̱ katsó:

–¡Ko̱jo kui xota̱ xi Israee̱ljín katsjaá Néná nga sa̱ꞌínkꞌoyà yojoo̱ kjo̱a̱a̱ jé xí ndyi̱tsꞌèn tsi̱ꞌe̱ nga kꞌuieé kjo̱a̱mindyion!

Bi̱ tsꞌén ikꞌíni̱jmì eén Néná na̱xi̱ńdáꞌniú Antiokiya̱

19Ngotꞌe̱ ꞌne̱, xota̱ xi kastsojoboa ta̱ngatꞌanii̱ nga ikiyotji̱ngii̱ kjo̱a̱a̱ Ixtibaa̱, jaꞌa nangi Fenisia̱, ko̱jo tji̱ngi̱ Chipre̱ xi tikónjin ngi̱jin ndáchíkoón, ko̱jo na̱xi̱ńdáꞌniú Antiokiya̱. Ki̱a̱ kandokjo̱a̱jo eén Néná kui xi xota̱ jundíoo̱, ta̱nga jmí tsi ko̱jo kje̱ꞌe xota̱. 20Ta̱nga tjín já xí sꞌijii̱n Néná xi chji̱a̱ni tji̱ngi̱ Chipre̱, ko̱jo na̱xi̱ńdáꞌniú Sirene̱ xi jachó na̱xi̱ńdáꞌniú Antiokiya̱, kó tsíchji̱a̱jo xota̱ xi chji̱a̱ én ngriengo̱ nga íni̱jmi̱ì éntjatsi̱e̱e̱ Ndi̱a̱ná Kjisoo̱. 21Kó Néná katsjaá ngaꞌniú nga asíko̱jo kui jaá, kó bo̱a̱ tsꞌén kjín xota̱ xi kisꞌijii̱n nga, kósꞌe̱ katsꞌénjo̱ꞌo Ndi̱a̱ná.

22Kó kui xota̱ na̱ngo̱xi̱ xi chji̱a̱ni na̱xi̱ńdáꞌniú Jerusale̱n tsintꞌié kuí nii̱, kó katsangiya kui nda̱ xi ꞌmí Bernabee̱ na̱xi̱ńdáꞌniú Antiokiya̱, 23kó nga jachó, kamábe kjo̱a̱ndaa̱ Néná kó tsja kamaá, kó ꞌniú atíxomaa̱ ngayeje xotaa̱ tsi̱ꞌe̱ nga ngayeje ini̱ma̱a̱ nga ꞌniú ka̱maꞌniátakón Ndi̱a̱ná, 24ngatꞌa̱ Bernabee̱ ngo nda̱ xi ta̱nisién nda ini̱ma̱ kamá, kó ꞌniú kistsoꞌbájo̱ A̱si̱énni̱xtjii̱n Néná, ko̱jo ꞌniú kisꞌijii̱n nga. Kó achichí kjín xota̱ xi katsꞌénjo̱ꞌo nga kisꞌijii̱n Ndi̱a̱ná.

25Kó jaskan ngije kamá kui nii̱, Bernabee̱ kijí na̱xi̱ńdáꞌniuú Tarso̱ nga kijíngase Sauloo̱. 26Kó ngije kasakoo̱ kijíjo̱ na̱xi̱ńdáꞌniú Antiokiya̱. Kó ki̱a̱ kisꞌińdojo̱ xota̱ na̱ngo̱xi̱i̱ ngo nó ndo̱jò, nínga kjín xota̱ akóyaá. Kó Antiokiya̱ boá nínga tjón tjón xota̱ kristiano̱ kiꞌmií xota̱ xi kisꞌijii̱n Kjisoo̱.

27Kó kui ni̱xtjin jàn tjín jáchji̱ni̱e̱ꞌe̱én Néná xi jatjoni na̱xi̱ńdáꞌniú Jerusale̱n ngaskande nga jachó na̱xi̱ńdáꞌniú Antiokiya̱. 28Kó ngo kui jaá xi ꞌmí Angabo̱ xi bo̱a̱ katsó nga A̱si̱énni̱xtjii̱n Néná xò xí katsóyaà nga ngo kjindiá ꞌniú xí kꞌuié ngayeje són tꞌanangii̱, kó bo̱a̱ kamá kui ni̱xtjin jàn nga kisꞌijña xtitjoón na̱xi̱ńdá Roma̱ nda̱ xi ꞌmí Klaundioo̱. 29Kósꞌe̱ xota̱ xi je kisꞌijii̱n Kjisoo̱ xi chji̱a̱ni na̱xi̱ńdáꞌniú Antiokiya̱ bo̱a̱ katsó nga sa̱ngíyaá chji̱e̱ ntsꞌié xi síndo na̱xi̱ńdá Jundea̱, xikótsꞌèn kasakoo̱ nga ngo nga ngo nga tsja̱á kui chji̱e̱e̱, 30kó kui nii̱ katsꞌén kui xotaa̱, kó Bernabee̱ ko̱jo Sauloo̱ katsangiyajo̱ kui chji̱e̱e̱, tsi̱ꞌe̱ xota̱ xi xchá xí chji̱a̱ni nangi Jundea̱.

Currently Selected:

Ni xi kamá 11: MAIX

Highlight

Copy