Ni xi kamá 1

Bi̱ tsꞌén katsóyàtjón Kjisoo̱ nga sa̱ngíyá A̱si̱énni̱xtjii̱n Néná

1Xo̱jo̱n xi tjoón, ji ndí Teofilo̱, ítꞌa an kjo̱a̱a̱ ndeskande nga ítsꞌi̱yanii̱ ngayeje ni xi katsꞌén, ko̱jo ni xi akóyá Kjisoo̱, 2ngaskande ni̱xtjin nga kijí ndiꞌakꞌajmi jàn, ngije ja̱bo̱a̱ je katsjaá kjo̱a̱botíxoma já apostro̱ xi je jaꞌájin nga A̱si̱énni̱xtjii̱n Néná katsꞌénkjién, 3kui já apostro̱ xi akoó yojoo̱, ngije kꞌien kó jaꞌáꞌyaá, kó bo̱a̱ tsꞌén akó cha̱n cha̱a̱n chi̱bo̱a̱ nga tikón, yichán ni̱xtjin akoó yojoo̱ Kjisoo̱ kui jaá, kó tsíchji̱a̱jo kjo̱a̱a̱ xikótsꞌèn ko̱tíxoma Néná.

4Kó kjiꞌanga nijan síndotikó kui, ko̱jo já apostroo̱, Kjisoo̱ atíxomaa̱ tsi̱ꞌe̱ nga kjo̱tjojín na̱xi̱ńdáꞌniú Jerusale̱n, kó bi̱ katsoó:

–Chiyájnúu̱ nga kjo̱tjosón ni xi katsó Na̱ꞌmii̱ nga ka̱ma, xikótsꞌèn je tsíchji̱a̱jojnúꞌun. 5Ngatꞌa̱ ja̱koxi̱ boá nga Juaa̱ ndáfoa atíndání xotaa̱, ta̱nga ngi chiboa ni̱xtjin, kó jún sa̱tíndánijnú A̱si̱énni̱xtjii̱n Néná.

Bi̱ tsꞌén kijí Kjisoo̱ ndiꞌakꞌajmi jàn

6Kósꞌe̱ kui já xí kamátikójo̱ Kjisoo̱, bi̱ tsꞌén asíyaá:

–Ji Ndi̱a̱, a kuí ni̱xtjii̱n nga ko̱e̱ꞌée̱ nga xota̱ xi chji̱a̱ni Israee̱l ko̱tíxomaa̱ nangi xi tsi̱ꞌe̱.

7Kó Kjisoo̱, bi̱ katsoó kui jaá:

–Júnjín tsoboájnú nga xcha̱jnú chi̱bo̱a̱, ko̱jo ni̱xtjin nga sa̱ꞌínkjatjosón Na̱ꞌmii̱ ni xi je índa, ni xi ngototo kui botixómaá nga sa̱ꞌín, 8ta̱nga kjiꞌanga kjo̱e̱ꞌe̱kónjnú A̱si̱énni̱xtjii̱n Néná, sa̱kójnú ngaꞌniuú, kó ka̱ma chistiko̱na ka̱majnú, kó jmí tsi ta̱ na̱xi̱ńdáꞌniú Jerusale̱n tsi, ko̱jo ngayeje nangi Jundea̱, ko̱jo nangi Samaria̱, ko̱jo ngaskande nínga fetꞌaa̱ tꞌanangii̱.

9Kó ngije katsó kui nii̱, kamábe ngayeje kui já apostroo̱, kótsꞌèn kachjaninkꞌa Kjisoo̱, kó ngo ṉdi̱ yíꞌmá, kó ngiti̱ kamábejín ngase kui jaá. 10Kó tji̱e̱nga ndyi̱kotsijen ndá ndaá kui jaá nkꞌa jàn, kamábe nga sa kjin sa kjin kijí Kjisoo̱, kó jó já xí ndyi̱yajá ńjño tiboa jeꞌekoón kui já apostroo̱, 11kó bi̱ katsoó:

–Já Ngalilea̱, míkjo̱a̱a̱ nga nkꞌa jàn ndyi̱tsitsijenjnú. Ti̱ kuíní Kjiso̱ xi̱ꞌbi̱ xi kisꞌijñajo̱jnú, xi je tsangínjo̱ ndiꞌakꞌajmi jàn xi kji̱ndi̱bá nginí xikótsꞌèn kamáyàjnú nga kijí ndiꞌakꞌajmi jàn.

Bi̱ tsꞌén katjoꞌójin Matiyaa̱ nga apostro̱ kamá

12Kósꞌe̱ jatjoni ki̱a̱ tji̱ngi̱ xi ꞌmí oliboo̱, sꞌe̱ kijí nginí na̱xi̱ńdáꞌniú Jerusale̱n, ngo kilometro̱ kijíyise, xi tsjandiè kjo̱a̱kitii̱ nga mongín ndsa̱ko nga ngo ni̱xtjin ndikón. 13Kó nga jachó na̱xi̱ńdáꞌniuú, kijínijíngí nkꞌaa̱ kui ndiꞌa nínga síndo kui jaá, nínga síndo Peé, ko̱jo Juaa̱, ko̱jo Sandiyaá, ko̱jo Jandree̱, ko̱jo Ngiripee̱, ko̱jo Tomaa̱, ko̱jo Bartolomee̱, ko̱jo Matioo̱, ko̱jo Sandiyá ndií Alfeoo̱, ko̱jo Ximo̱ nda̱ xi Chi̱ni̱ kiꞌmií nga, ko̱jo Junda̱ ntsꞌi̱e̱ Sandiyaá. 14Ngayeje kui jaá kamátikó nga ꞌniú kisꞌińdo nga tsíchji̱a̱a̱ Néná kui ko̱jo tjín ínchjín, ko̱jo na̱ Riya̱ na̱aa̱n Kjisoo̱, ko̱jo já ntsꞌi̱e̱.

15Kui ni̱xtjin jàn, Peé jastjíe̱n ngamasiee̱n kui já ntsꞌiee̱, mara̱ tsi ta̱ úchán ko̱jo kan xi kamátikoó, kó bi̱ katsoó:

16–Jún ntsꞌie, chjiéngá jatjosón ni xi kjitꞌa xo̱jo̱n eén Néná kjiꞌanga A̱si̱énni̱xtjii̱n Néná katsꞌénkíchji̱a̱ Ndabii̱ kjo̱a̱a̱ Jundaa̱, nga kui xi kitsjientjoón xota̱ xi katsoboá Kjisoo̱, 17ngatꞌa̱ Jundaa̱ nijan kamájo̱ná, kó ti̱ kasakoo̱ kui xaá nga. 18Ta̱nga kui kijí, kó tsꞌatsie ngo tꞌanangi kui to̱n xi kamáchjínií kjo̱a̱a̱ ni xi ndajín xi katsꞌén, sꞌe̱ kaxaxixtien kó katꞌosén to̱ko̱, sꞌe̱ kitjiyá masien masien, kó ngayeje tsiꞌee̱ jatjo. 19Kó kui nii̱ kamábe ngayeje xota̱ na̱xi̱ńdáꞌniú Jerusale̱n, kuíni nga kui ngi̱ndiee̱ Asélndama̱ katsoó, nga én tsi̱ꞌe̱ kui jaá, ngi̱ndiee̱ jín, tsó kui eén. 20Ngatꞌa̱ bo̱a̱ tsꞌén kjitꞌa xo̱jo̱n eén Néná ki̱a̱ Salmoo̱ nínga bi̱ tsoó:

Ngasꞌietiya ndiꞌaa̱,

kó nga jmíjín xi kꞌuíndoꞌyà.

Kó ti̱ bi̱ tsó nga:

Kje̱ꞌe xí nga kjíbé xaá.

21Kó chjiéngá, nga kui já xí ngatsjéni̱xtjin kꞌi̱e̱ síndojo̱jne̱, nga kisꞌijñajin ngasejne̱ Ndi̱a̱ Kjisoo̱, 22ndeskande nga Juaa̱ atíndá Kjisoo̱, kó ngaskande ni̱xtjin nga tsangínjo̱ ndiꞌakꞌajmi jàn, nga ngo kui jaá xi nijan ngatamajo̱ná chistiko̱ nga jaꞌáꞌyaá Kjisoo̱.

23Kó jó ma xi kiniꞌánkaxoma jaꞌeén: Kosie̱ xi ꞌmí Barsabaa̱, xi ti̱ Justo̱ kiꞌmií nga, ko̱jo nda̱ xi ꞌmí Matiyaa̱. 24Kó bi̱ katsó kui jaá nga tsíchji̱a̱a̱ Néná:

–Ji Ndi̱a̱, ji xi ye ji ngayeje ini̱ma̱a̱ xotaa̱, takejne̱ ꞌyání nga jó kui jaá xi je kachjeꞌéjin ji, 25tsi̱ꞌe̱ nga kꞌuijñá ngi̱ndiee̱ xá apostro̱ xi íjñámasien Jundaa̱, ta̱ngatꞌanii̱ nga katsꞌénkjatjosónjín, nga kijí ngi̱ndie xi katsoboaá kui.

26Kó kui jaá ngo kjo̱a̱chꞌáṉcha̱ katsatonni ꞌyání nga joó xi sa̱ko̱ó kui xaá, kó Matiyaa̱ katjoꞌójin, kó kui kamáxki̱jo xi ngi tiengo já apostroo̱.

Currently Selected:

Ni xi kamá 1: MAIX

Highlight

Copy