2 Timoo̱ 2

Bi̱ tsꞌén íjñá chi̱bo̱a̱ Pabloo̱ nga akóyaá Timoo̱

1Kó kuíni nga ji Timo̱, ndí tsa̱ꞌa̱n, ti̱ꞌingaꞌní jí kjo̱a̱a̱ kui kjo̱a̱nda xi katseꞌéná ngatꞌaa̱ Kristo̱ Kjisoo̱. 2Ni xi je kandaꞌyéní nga kixiya an ngindyi̱ko̱n kjín chistiko̱, mejénna nga ko̱ko̱yée̱ já xí ma ꞌniátakoón, tsi̱ꞌe̱ nga ka̱maa̱ ko̱kóyaá kje̱ꞌe xota̱.

3Ti̱ꞌinchíkjo̱e̱ ji kjo̱a̱ni̱ma̱ xi ku̱i̱tja̱tí ji, ngatꞌa̱ jí xi xikoó ngo nda̱jun xi ndaa̱ Kristo̱ Kjisoo̱. 4Ngojín nda̱jun xi tjitsꞌénxá xí ka̱mamejeén sa̱ngínjin yojoo̱ ni xi tjín kuí nga̱sondiee̱, ngatꞌa̱ chjiéngá tsjatsꞌèn kꞌuijñá ngindyi̱ko̱n xi katsjaá kui xaá. 5Kó ti̱ bo̱a̱ ti̱ tsꞌén, ngo nda̱ xi tsꞌéntsaton, ka̱májín sa̱ko̱ó ngo ni xi niꞌán tsi tjónjín sa̱ꞌíntsobe xikó kjiꞌi kjo̱a̱kitii̱ kui kjo̱a̱ńtoo̱n. 6Ti̱ bo̱a̱ ti̱ tsꞌén nda̱ xi ꞌniú tjitsꞌénxá ngi̱jin jno̱o̱, tjínrií kjo̱a̱nda nga kui xi tjón sa̱ko̱ó ni xi kamáxchaá. 7Nda ti̱ꞌinkjé jí kjo̱a̱a̱ kui ni xi tꞌíxiaán, kó Ndi̱a̱ná tsja̱á nga kamákjiín ngayeje kui nii̱.

8Ngatjaꞌátsjiee̱n Jesukristoo̱ nga xota̱ tji̱e̱e̱ re Ndabii̱ chji̱a̱ni, ko̱jo nga jaꞌáꞌyaá ngi̱jii̱n xota̱ xi je jesoón, xikó tsó éntjatsi̱e̱e̱ Néná xí tsꞌénxiya an. 9Kó ta̱ngatꞌanii̱ kui éntjatsi̱e̱e̱ nga tjítsꞌenchíkjo̱a̱ an tsie kjo̱a̱ni̱ma̱, ngaskande nga tjítꞌa an ngo ńꞌniúki̱cha̱ xikoó ngo nda̱ xi tjiín jé, ta̱nga eén Néná tjitáꞌniújín. 10Kuíni nga tsꞌenchíkjo̱a̱ an ngayeje nii̱, ta̱ngatꞌanii̱ ngandaa̱ xota̱ xi je jaꞌájin Néná, tsi̱ꞌe̱ nga ko̱jo kui sa̱ko̱ó kjo̱a̱ꞌnaxiéꞌaá, ko̱jo kui kjo̱a̱je xi májiín fe xi tsja̱aná Kristo̱ Kjisoo̱.

11Ta̱nisién ꞌniú ꞌniátakón kui én xí bi̱ tsoó:

Tsi akayajo̱ Kristoo̱, ti̱ bo̱a̱ ti̱ tsꞌén ku̱i̱ndyión xikótsꞌèn tikón kui.

12Tsi si̱ꞌanchíkjo̱a̱ kuí kjo̱a̱ni̱ma̱a̱, ti̱ bo̱a̱ ti̱ tsꞌén nijan ko̱ti̱xomajo̱.

Tsi si̱ꞌankie jàn yojoná nga ki̱a̱ timatji̱ngìi̱, ti̱ bo̱a̱ ti̱ tsꞌén kuí sa̱ꞌínkiejín yojoo̱ nga bená ñá.

13Tsi kje̱ꞌe xota̱ ka̱májiín ka̱maꞌniátakónná ñá, ta̱nga ka̱ma ka̱maꞌniátakón Kristoo̱.

Ngatꞌa̱ kui ka̱májiín tsi ti̱kuii ko̱síkjo eén.

Pabloo̱ bi̱ tsꞌén akóyaá Timoo̱ xikótsꞌèn sa̱ꞌínxátꞌaa̱ Kristoo̱

14Ti̱ꞌinkjaꞌátsjìi̱n xota̱ na̱ngo̱xi̱i̱ ngindyi̱ko̱n Ndi̱a̱ná, kó bo̱a̱ tꞌíi̱n nga chjiénjín nga ta̱jmì énní xi ku̱i̱chji̱a̱ti, ngatꞌa̱ jmí ni chjíjiín nga bo̱a̱ niꞌaán, kó ta̱sá ndajíntsꞌeén, kó tsꞌénchájá xota̱ xi ntꞌieé kui kjo̱a̱ndokjo̱a̱tii̱. 15Ti̱ꞌin ji ngo ngaꞌniú tsi̱ꞌe̱ nga nda tsꞌén kꞌuin jí ngindyi̱ko̱n Néná, xikoó ngo nda̱ xi je kiniꞌánjo̱ꞌo, xikoó ngo nda̱ xi tsꞌénxá xi jmíjiín míkjo̱a̱a̱ nga soboá ka̱maa̱, xi bokoyá cha̱n cha̱n én xí ja̱koxi̱i̱. 16Ta̱nga ngata̱ niꞌínsénjíi̱n én xi jmí ni chjíjiín xi tsi̱ꞌe̱ kui nga̱sondiee̱, ngatꞌa̱ xi bo̱a̱ tsꞌén chji̱a̱a̱ tsꞌénkjii̱n yojoo̱ Néná. 17Kó kui ni xi bokoyá, ma tsie xikó maá chiꞌindíꞌyó, kó mandayajín, bo̱a̱ kamaá Imeneo̱, ko̱jo Filetoo̱, 18kui xi je xín katsꞌénkjaꞌaa̱ yojoo̱ ni xi ja̱koxi̱i̱, nga bo̱a̱ ndyi̱tsó nga kjo̱a̱foaꞌáꞌyaá jè xò kamá, kó bo̱a̱ tsꞌén katsꞌéntsobéjii̱n kjo̱a̱sꞌijii̱n tjín káꞌá xota̱. 19Ta̱nga ta̱kó ꞌniú tikón eén Néná, kó tikón xikoó ngo xó xí ꞌbítjatsꞌennii̱ ngo ndiꞌa, nínga bi̱ tsꞌén kjitꞌa: “Ndi̱a̱ná be kuí xota̱ xi je tsi̱ꞌe̱”, ko̱jo: “Ngayeje xota̱ xi míꞌátjéni nga tsꞌénkáxoma jaꞌeén Néná, ngatꞌíndomasien ngayeje ni xi ndajiín.”

20Ngi̱yaa̱ ngo ndiꞌa je, jmí tsi ta̱ ni xi to̱nsinié, ko̱jo tsi ta̱ ni xi to̱ntiboa tsí xi tjín, ti̱ tjín ni xi yá, ko̱jo ni xi ńdie kamándani nga, tjín xí ta̱ kjiꞌání tsi nga niꞌánkjién, xikoó nga ma sꞌué, kó ti̱ tjín ni xi ndyiojón ndyiojón niꞌánkjién. 21Kuíni nga tsi tjín xí sa̱ꞌíntsjie yojoo̱ kjo̱a̱a̱ kui ni xi ndajiín, xikónií tsi ngo ni xi niꞌánkjién nga ma sꞌué ka̱ma. Kuí xí tsjie ka̱ma, kó Ndi̱a̱ná ka̱ma sa̱ꞌínkjién, kó kꞌuijñánda tsi̱ꞌe̱ nga sa̱ꞌin ngayeje ni xi ndaa̱.

22Chje̱ꞌéxíi̱n yojòo̱ ni xi ndajín xi mején tsꞌén já xo̱ngo̱ò, kó tꞌentji̱ngi ji kjo̱a̱kixi̱i̱, ko̱jo kjo̱a̱sꞌijii̱n, ko̱jo kjo̱a̱tjoó, ko̱jo kjo̱a̱xioó, ki̱a̱ ti̱ꞌinkamaje̱ xota̱ xi tsjie ini̱ma̱a̱ ko̱jo xi chji̱a̱a̱ Ndi̱a̱ná. 23Ta̱nga nga ki̱a̱jín niꞌínsée̱n kjo̱a̱ndokjo̱a̱ti xi kitikjo̱a̱, ko̱jo xi jmí ni chjíjiín, ngatꞌa̱ jè yé ji nga kuí nii̱ xi tsꞌénkjánná. 24Ngatꞌa̱ ngo xota̱ xi mosoo̱ Ndi̱a̱ná, chjiénjín nga xota̱ skjánjo̱, ta̱sá chjiéngá nda sa̱ꞌínjo̱ ngayeje xota̱, chjiéngá ka̱maa̱ ko̱kóyá, ko̱jo chjiéngá kꞌuieé kjo̱a̱chiyákjo̱a̱. 25Chjiéngá ni̱ma̱kjo̱a̱ ka̱ma ji nga si̱ꞌinchji̱ni̱ xota̱ xi kondra̱ síndoo̱ ni xi tibokoyé ji. Tsi̱ꞌe̱ nga tsi ta̱ꞌa nga Néná xí mejeén tsja̱á kjo̱a̱nda kui xota̱ kondraa̱, nga sa̱ꞌínkꞌoyà yojoo̱, tsi̱ꞌe̱ nga sku̱i̱e̱ ni xi ja̱koxi̱i̱, 26kó ngatangaa̱ ni xi ꞌboṉcha̱joni kui xindajín ndiabloo̱, kui xi ndyi̱a̱a̱ ndo̱bo̱a̱yà xotaa̱ tsi̱ꞌe̱ nga ta̱ ni xi mejénrií kui, ni xi sa̱ꞌínjo̱.

Currently Selected:

2 Timoo̱ 2: MAIX

Highlight

Compare

Copy