2 Xota̱ Tesalónika̱ 2
2
Bi̱ tsꞌén íni̱jmì Pabloo̱ ni chꞌokjiꞌi xi ka̱ma ngindiee̱ nga ko̱kó yojoo̱ Jesukristoo̱
1Jún ntsꞌie, kjo̱a̱a̱ nga kjo̱e̱ꞌe nginí Ndi̱a̱ná Jesukristoo̱, ko̱jo kjo̱a̱a̱ nga nijan ka̱matikójo̱ ñá, ꞌniú chjiáꞌájne̱ jún nga, 2nga bosíkjojínjnú kjo̱a̱niꞌánkjójnú, ti̱nde ngata̱ jmíjín xi mindyiandíkónjnú, tsi tjín xi bo̱a̱ ka̱tso̱jnú nga ngo ni akoó a̱si̱énni̱xtjii̱n, ko̱jo tsi én, ko̱jo tsi ngo xo̱jo̱n kjitꞌa xi xikoó tsi ji̱n kanangiyajne̱, nínga bo̱a̱ tsó nga Ndi̱a̱ná jè jeꞌe. 3Ngata̱chiíjín boeꞌéndièjnú tsi tjín xi kꞌo̱ṉcha̱jojnú, ngatꞌa̱ kjo̱e̱ꞌejín Ndi̱a̱ná tsi tjónjín xotaa̱ kondra̱ kꞌuíndonii̱ Néná, ko̱jo nga ko̱kó yojoo̱ xota̱ nga̱sondie xi tsi̱ꞌe̱ jeé, kui xi ndií ndo̱bo̱a̱ṉkꞌi̱e̱e̱n. 4Kui xi kondraa̱ ko̱jo xi skjánjo̱ ngayeje ni xi Néná tsoó xotaa̱, ko̱jo ngayeje ni xi bendikón xotaa̱, kó kꞌuijñá ngi̱ndie ndikoón Néná, nga Néná sa̱ꞌín yojoo̱.
5A foaꞌátsjienjínjnú nga tsíchji̱a̱jojnúꞌun kjo̱a̱a̱ kui nii̱, kjiꞌanga ta̱kó ki̱a̱ kisꞌijñajinjnúꞌun. 6Kó ngotꞌe̱ ꞌne̱ jún jè yàjnú mí ni xi tsꞌénꞌbichjaá xota̱ nga̱sondie xi tsi̱ꞌe̱ jeé, tsi̱ꞌe̱ nga kjiꞌá má nga kjo̱chó ni̱xtjii̱n kjo̱tjokjá. 7Ngatꞌa̱ jè tjitsꞌénxá ngaꞌniuú ni xi tjiꞌmaá ni xi ndajiín, ta̱ chaja tsí nga xtjo̱ꞌóxín ngamasiee̱n kui xi tsꞌénꞌbichjaá. 8Sꞌe̱ kjiꞌa ꞌne̱ nga kjo̱tjokjá kuí xota̱ nga̱sondie xi tsi̱ꞌe̱ jeé, kó Ndi̱a̱ná Kjisoo̱ ta̱ tjo̱o̱ tsꞌoa tsí xi sa̱ꞌínkjién nga sa̱ꞌiín, kó ndiꞌí ꞌna̱a̱ nga kjo̱e̱ꞌe, sa̱ꞌínkjié. 9Kui xota̱ nga̱sondie xi tsi̱ꞌe̱ jeé, xindajín Satanaa̱ boá xi ko̱síko̱jo nga kji̱ndi̱bá, kó achichí ngaꞌniú kꞌuieé, kó sa̱ꞌín chi̱bo̱a̱ ko̱jo kjo̱a̱ndikón xí ndiso. 10Kó ngayeje to̱ko̱ya ni xi ndajín sa̱ꞌínkjién, tsi̱ꞌe̱ nga kꞌo̱ṉcha̱jo kui xota̱ xi xcha̱jaa̱, ngatꞌa̱ kamámejénjiín nga katsꞌénjo̱ꞌo, ko̱jo katsꞌéntjó ni xi ja̱koxi̱i̱, tsi̱ꞌe̱ nga sa̱ko̱ó kjo̱a̱ꞌnaxiéꞌaá katsaki. 11Kuíni nga Néná sa̱ngíyaá kui xotaa̱ ngo ngaꞌniú xí kꞌo̱ṉcha̱jo, tsi̱ꞌe̱ nga ka̱maa̱ sa̱ꞌínsꞌijin kui kjo̱a̱ndisoo̱. 12Bo̱a̱ tsꞌén sa̱tíjeé ngayeje xi kisꞌijinjiín ni xi ja̱koxi̱i̱, kó ta̱sá tsja kamaá nga katsꞌén ni xi kixi̱jín ngindyi̱ko̱n Néná.
Bi̱ tsꞌén íni̱jmì Pabloo̱ kjo̱a̱a̱ nga ꞌniú ku̱i̱ndyiajin xota̱ xi chji̱a̱ni na̱xi̱ńdáꞌniú Tesalónika̱ ni xi tsi̱ꞌe̱ Néná
13Ta̱nga ji̱n chjiéngá ngatsjéni̱xtjin ko̱e̱ꞌéjne̱ ndokꞌóchjì Néná kjo̱a̱a̱ jún, já ntsꞌie xi Ndi̱a̱ná tjoó, ngatꞌa̱ nga tjón tjón Néná jún xí jaꞌájinjnú, tsi̱ꞌe̱ nga sa̱kójnú kjo̱a̱ꞌnaxiéꞌaá, ngatꞌa̱ A̱si̱énni̱xtjii̱n Néná tsꞌéntsjiejnú, ko̱jo je kisꞌijinjnú én xí ja̱koxi̱i̱. 14Néná tsíchji̱a̱jnú nga kiꞌmíyàjne̱ jún éntjatsi̱e̱e̱, tsi̱ꞌe̱ nga sa̱kójnú kjo̱a̱jee̱ Ndi̱a̱ná Jesukristoo̱.
15Kó kuíni ntsꞌie, ꞌniú ti̱ndyiónjnú, kó chjábé tsján tsjánjnú kui kjo̱a̱bokoyá xi akakoyájne̱ jún, tsi én xi kandokjo̱a̱jne̱ ko̱jo tsi xo̱jo̱n akjatꞌajne̱. 16Kó kuí má Ndi̱a̱ná Jesukristoo̱, ko̱jo Néná xí Na̱ꞌminá, kui xi tsꞌéntjóná, ko̱jo xi tsjáná ngaꞌniú ngatsjéni̱xtjin, ko̱jo xi tsjáná kjo̱a̱chiyá ngatꞌaa̱ kjo̱a̱ndaa̱, 17nga tsja ngaꞌniuú ini̱ma̱jnú tsi̱ꞌe̱ nga ko̱ndókjo̱a̱jnú én xí nda ko̱jo nga si̱ꞌánjnú xá xí nda.
Currently Selected:
2 Xota̱ Tesalónika̱ 2: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
