1 Timoo̱ 4

Pabloo̱ bi̱ tsꞌén íni̱jmi̱ì Timoo̱ nga kꞌuié xota̱ xi ngiti̱ sa̱ꞌínsꞌijinjín Néná

1A̱si̱énni̱xtjii̱n Néná tsóyà cha̱n cha̱n nga ngije kjifetꞌa ni̱xtjii̱n, kꞌuié xota̱ xi kꞌuijñátꞌaxín xi ngiti̱ sa̱ꞌínsꞌijinjín Néná, kó ki̱a̱ ko̱e̱je̱tji̱ngii̱ nga ku̱i̱ntꞌie̱é a̱siénni̱xtjin xi ndiso, ko̱jo kjo̱a̱bokoyá xi tsi̱ꞌe̱ xindajín. 2Kui nii̱ xi ka̱tso̱yà xota̱ jókje̱n ndiso xi je ngiti̱ jmíjiín kjo̱a̱soboaá. 3Kui xotaa̱ tsja̱ndièjín nga ku̱i̱xan xotaa̱, kó tsja̱ndièjín nga ka̱ma xi̱ni̱e̱ kaꞌa, nichinie xi Néná katsꞌénda nga ka̱ma skji̱ni̱e̱ xota̱ xi sꞌijii̱n Néná, kui xi je be ja̱koxi̱i̱, kui xi tsjaá ndokꞌóchjì Néná kjo̱a̱a̱ ngayeje nii̱. 4Nda ngayeje ni xi Néná katsꞌénda, kó chjiénjín nga si̱ꞌanchꞌo tsi chjábé nga ko̱e̱ꞌée̱ ndokꞌóchjì Néná. 5Ngatꞌa̱ ta̱ngatꞌanií eén Néná, ko̱jo nga ndokjo̱a̱a̱ Néná nga matsjieni kui nii̱.

Pabloo̱ bi̱ tsꞌén íni̱jmi̱ì Timoo̱ xikótsꞌèn ko̱kóyaá xota̱ na̱ngo̱xi̱i̱

6Tsi kui nii̱ xi ko̱ko̱yée̱ ntsꞌié, ngo nda̱ xi nda tsꞌénxátꞌaa̱ Jesukristoo̱ ka̱ma ji, kó tsja̱á ngaꞌniú kui eén kjo̱a̱sꞌijinná ko̱jo kjo̱a̱bokoyá xi tiꞌmitji̱ngi ji. 7Ta̱nga ngata̱ niꞌínsénjíi̱n én xchá xi jmí ni chjíjiín, ko̱jo én chi̱ni. Ta̱sá ti̱ꞌingée̱ ini̱màa̱ nga ngo nda̱ nda xi xota̱a̱ Jesukristoo̱ ka̱ma ji. 8Ngatꞌa̱ nga niꞌángáa̱ yojona nga chjaxingá, ta̱ chiboa tsi bosikójoná kuí nii̱, ta̱nga nda ngase nga ngo nda̱ nda xi xota̱a̱ Jesukristoo̱ ka̱ma, ngatꞌa̱ ꞌniú bosikójoná kuí nii̱ kui kjo̱a̱mindyion xi̱ꞌbi̱, ko̱jo kjo̱a̱mindyion xi sꞌe̱ ndibaá. 9Ta̱nisién ꞌniú ꞌniátakón kuí eén, kó chjiéngá ngayeje xota̱ xi sꞌi̱jii̱n. 10Ngatꞌa̱ ta̱ngatꞌanii̱ kui nii̱ nga ꞌniú ndyi̱niꞌánxá, ko̱jo nga ndyi̱bixkántjé, ngatꞌa̱ ndyi̱chiyáa̱ ni nda xi tsja̱aná kui Néná xi tikoón, kui xi ꞌboxiéꞌá ngayeje xotaa̱, ngase ma kui xota̱ xi sꞌijii̱n Néná.

11Kuí nii̱ xi tatíxomée̱, ko̱jo xi takoyèe̱ xotaa̱. 12Ngata̱ boeꞌéndièjín ji nga ta̱ ton xchaa̱, ngatꞌa̱ xo̱ngò ji. Ta̱sá chjiéngá chi̱bo̱a̱ ka̱maa̱ ji xota̱ xi sꞌijii̱n Néná kjo̱a̱a̱ xikótsꞌèn ndokjo̱e̱, ko̱jo xikótsꞌèn tindyin, ko̱jo xikótsꞌèn tjiín kjo̱a̱tjó, ko̱jo xikótsꞌèn sꞌijii̱n Néná, ko̱jo xikótsꞌèn tsjie tindyin ji ngindyi̱ko̱n Néná. 13Ti̱ꞌinyée̱ xo̱jo̱n eén Néná xotaa̱, te̱ꞌéngaꞌníi̱ ko̱jo takoyèe̱, tji̱e̱nga kjóchó an. 14Ti̱ꞌinkjìn jí kui kjo̱a̱nda xi tikoón xi katsjaá Néná kui xi katsóyàtjón jáchji̱ni̱e̱ꞌe̱én, kjiꞌanga xota̱ xi xchaá na̱ngo̱xi̱i̱ íjñasoón tsja.

15Ti̱ꞌin ji kui nii̱, kó ꞌniú tasínijìi̱n, tsi̱ꞌe̱ nga ngayeje xotaa̱ sku̱i̱e̱ nga nda tjítsꞌeén kjo̱a̱nda xi katseꞌeé. 16Chíi̱n yojòo̱ ko̱jo chíi̱n ni xi tibokoyée̱ xotaa̱, ꞌniú ti̱ndyíi̱n ngayeje kui nii̱, ngatꞌa̱ tsi bo̱a̱ si̱ꞌin, kjo̱tjoꞌàa̱ yojòo̱, kó ti̱ ko̱ꞌna̱xiéꞌé ji xi ku̱i̱ntꞌie̱é nga.

Currently Selected:

1 Timoo̱ 4: MAIX

Highlight

Compare

Copy