1 Timoo̱ 1

Pabloo̱ bi̱ tsꞌén katsꞌéntinde Timoo̱

1Án boá xi ꞌmína Pabloo̱, nda̱ apostroo̱#1:1 “Xi kanangiyaa̱” tsó “nda̱ apostro̱” axa̱ “já apostro̱” nga én ngriengo̱. Jesukristoo̱, xikótsꞌèn katsjákjo̱a̱ kui Néná xí tsꞌaxiéꞌáná, ko̱jo Ndi̱a̱ná Jesukristoo̱ kui xi ndyi̱chiyáa̱ nga kjo̱e̱ꞌe nginí. 2Tjítsꞌentindee ji Timo̱, ji xi ndína kjo̱a̱a̱ ngi̱yaa̱ kjo̱a̱sꞌijinná. Néná xí Na̱ꞌminá ko̱jo Ndi̱a̱ná Kristo̱ Kjisoo̱ nga tsjaá kjo̱a̱ndaa̱, ko̱jo kjo̱a̱ni̱ma̱takoón, ko̱jo kjo̱a̱xioó.

Pabloo̱ bi̱ tsꞌén tsíchji̱a̱jo Timoo̱ ni xi chjiéngá sa̱ꞌínjo̱ já mostro̱ ndisoo̱

3Kjiꞌanga kijí an nangi Masendonia̱, ꞌniú tsíꞌaá tsi̱ꞌe̱ nga ki̱a̱ ku̱i̱ndyin ji na̱xi̱ńdáꞌniú Éfeso̱, kó ti̱ kuíꞌá ngiñaá tsi̱ꞌe̱ nga kꞌuíchjée̱ xota̱ xi kje̱ꞌe ni xi ndyi̱bokoyá, 4kui xi ndyi̱tsꞌènseén én xchá xi chji̱a̱ xotaa̱, ko̱jo xikótsꞌèn kjindibáni tji̱e̱e̱ xota̱ xi xchaá, ngatꞌa̱ ki̱a̱ ndibánií nga chji̱a̱ti xotaa̱, kó kui nii̱ bosikójojínná tsi̱ꞌe̱ nga xcha̱ ni xi índa Néná, ngototo nga sꞌijinná Néná nga xcha̱ kuí nii̱.

5Kuíni nga bo̱a̱ kixianñaa ngatꞌa̱ mejénna nga si̱ꞌantjó xingi̱, nga kꞌuiéná ngo kjo̱a̱tjó xi ndibánií ngi̱jin ini̱ma̱ tsjiená, ko̱jo ngi̱jii̱n kjo̱a̱kjíntakón ndaná, ko̱jo ngi̱jii̱n kjo̱a̱sꞌijin ja̱koxi̱ná. 6Tjín xí kichíyaá kui nii̱, kó kijítꞌaxín nga ta̱sá én xí ta̱xkiya kijítji̱ngi, 7kamámejeén nga mostroo̱ kjo̱a̱kitii̱ kamá, kó ti̱nde kui makjínjiín ni xi chji̱a̱, kó ta̱xkiya bo̱a̱ kjiꞌi ndyi̱tsó, kjo̱a̱a̱ ni xi ndyi̱bokoyá.

8Ta̱nga jè ya ñá nga nda kjo̱a̱kitii̱ Néná, tsi si̱ꞌankjién xikótsꞌèn chjiéngá si̱ꞌankjién. 9Kó ti̱ ya nga kjo̱a̱kitii̱ kuijín xota̱ xi kixi̱i̱ xi katseꞌeé tsi̱ꞌe̱ nga ka̱machji̱ni̱e̱. Kjo̱a̱kitii̱, kuí xota̱ xi̱ꞌbi̱ xi katseꞌeé tsi̱ꞌe̱ nga ka̱machji̱ni̱e̱: Xota̱ xi ndyi̱tsꞌèn ni xi ndajín, ko̱jo xota̱ xi ntꞌiéꞌénjín, ko̱jo xota̱ xi ndajín, ko̱jo xota̱ xi ndyi̱tsꞌèn jé, ko̱jo xota̱ xi ndyi̱bendikónjín Néná, ko̱jo xota̱ xi ndyi̱bendikónjín ni tsjie xi tsi̱ꞌe̱ Néná, ko̱jo xota̱ xi ndyi̱tsꞌènkꞌién na̱ꞌmii̱ ko̱jo na̱aa̱n, ko̱jo xota̱ xi ndyi̱tsꞌènkꞌién ini̱ma̱, 10ko̱jo xota̱ xi tondo̱, ko̱jo xota̱ xi xonda, ko̱jo xota̱ xi ndyi̱botiñá moso̱, ko̱jo xota̱ xi ndiso xi ngaskande ngiboanéná ndyi̱tsó nga ndyi̱chji̱a̱, ko̱jo ngayeje xota̱ xi kondra̱ síndonii̱ kjo̱a̱bokoyá xi ndaa̱. 11Kui kjo̱a̱bokoyá xi nda xi xikó kjiꞌi kjo̱a̱je xi tjiín éntjatsi̱e̱e̱ kui Néná xi tsja tjiín, kuí éntjatsi̱e̱e̱ xi kiniꞌánkꞌasꞌienna tsi̱ꞌe̱ nga kꞌuini̱jmì án.

Pabloo̱ bi̱ tsꞌén katsjaá ndokꞌóchjì Néná kjo̱a̱a̱ xá xi katseꞌeé

12Ndokꞌóchjì tsjàa̱ Ndi̱a̱ná Kristo̱ Kjisoo̱, kui xi katsjána ngaꞌniú, ngatꞌa̱ kuí boá xi kamáꞌniátakónna, kó katsjána xá xi̱ꞌbi̱, 13ndatsi ngasꞌe̱ achichí chꞌo kixian an kondraa̱ kui, tsangatji̱ngíi̱ xota̱ xi tsi̱ꞌe̱, ko̱jo chꞌo kixiáa̱n. Ta̱nga Néná ni̱ma̱ kamaá an, ngatꞌa̱ kui ni̱xtjin jàn kji̱e̱ sꞌijinjínna Kristoo̱, kó bejín an ni xi katsꞌen an. 14Achichí tsie kjo̱a̱nda xi katsjána Ndi̱a̱ná, kó katsjána kjo̱a̱sꞌijin, ko̱jo kjo̱a̱tjó xi tjiín Kristo̱ Kjisoo̱.

15Én xí ma niꞌánsꞌijin boá xi̱ꞌbi̱, kó chjiéngá ngayeje xota̱ xi sa̱ꞌínsꞌijin: Nga Kristo̱ Kjisoo̱ jeꞌe kui nga̱sondiee̱, tsi̱ꞌe̱ nga kꞌo̱xiéꞌá xota̱ jé. Kó án boá xi tjón an ngi̱jii̱n kui xota̱jeé. 16Kuíni nga Néná kamáni̱ma̱a̱ an, tsi̱ꞌe̱ nga Jesukristoo̱ akó ngayeje kjo̱a̱ndaa̱ nga katsꞌénkjiénna án. Kó bo̱a̱ tsꞌén nga an xi chi̱bo̱a̱ kamá an tsi̱ꞌe̱ xota̱ xi jaskan sꞌi̱jii̱n kui, tsi̱ꞌe̱ nga sa̱ko̱ó kjo̱a̱mindyion ngatsjéni̱xtjii̱n. 17Kó kui Néná xi nda̱ Re xi kꞌuijñá ngatsjéni̱xtjii̱n, kui xi ko̱yàjín, kui xi yàjín a̱sie̱én, kui xi ta̱ ngo tsí má, kui ngateꞌeé kjo̱a̱yandikón, ko̱jo kjo̱a̱je ngatsjéni̱xtjin. Bo̱a̱ kjiꞌi.

18Ji Timo̱, ndí tsa̱ꞌa̱n, ꞌniú tsꞌénmíꞌaá tsi̱ꞌe̱ nga si̱ꞌinkjatjosén ji ni xi tꞌíxiaán nga si̱ꞌin, tsi̱ꞌe̱ nga xikó katsó jáchji̱ni̱e̱ꞌe̱én Néná kjo̱a̱a̱ ji, bo̱a̱ tsꞌén nda ti̱xkéntjé ji ni xi ndaa̱. 19ꞌNiú tindyin ji kjo̱a̱a̱ kjo̱a̱sꞌijìi̱n, ko̱jo nga tsjietsꞌén si̱ꞌinkjé ji ngindyi̱ko̱n Néná, ngatꞌa̱ tjín xí je íjñámasien kui nii̱, kó ngiti̱ sꞌijinjiín Néná, kuíni nga je tjimá kichajá, 20xikoó nda̱ ꞌmí Imeneo̱, ko̱jo Rijaá, kui xi je katsꞌenkꞌasꞌièe̱n xindajín Satanaa̱, tsi̱ꞌe̱ nga ka̱maa̱ nga ngiti̱ jmí én chꞌo tsó ku̱i̱chji̱a̱jín kondraa̱ Néná.

Currently Selected:

1 Timoo̱ 1: MAIX

Highlight

Compare

Copy