1 Xota̱ Tesalónika̱ 3
3
Bi̱ tsꞌén íni̱jmì Pabloo̱ míkjo̱a̱a̱ nga katsangiya Timoo̱ na̱xi̱ńdáꞌniú Tesalónika̱
1Kó bo̱a̱ tsꞌén ngije ngiti̱ kichikjo̱a̱jínjne̱, tsi̱ꞌe̱ nga kamámejénjne̱ xcha̱jne̱ xikótsꞌèn tindyiónjnú, ikꞌíndajne̱ tsi̱ꞌe̱ nga kixindyion so̱bo̱a̱jne̱ na̱xi̱ńdáꞌniú Atena̱, 2kó kanangiyajne̱ nda̱ ntsꞌié xí ꞌmí Timoo̱, kui xi tjítsꞌén xaá Néná nga tsꞌéntsóyà éntjatsi̱e̱e̱ Kristoo̱, tsi̱ꞌe̱ nga kijítsjángaꞌniújnú, ko̱jo nga ko̱síko̱jójnú kjo̱a̱a̱ nga ꞌniú ku̱i̱ndyiajinjnú kjo̱a̱sꞌijinjnú, 3tsi̱ꞌe̱ nga ngojín xi sa̱ꞌínkjiékjo̱a̱ nga kjo̱a̱ꞌatio kui kjo̱a̱ni̱ma̱a̱. Ja̱ ti̱ júnní yàjnú nga chjiéngá bo̱a̱ ka̱mataꞌin ñá. 4Ngatꞌa̱ ti̱ bo̱a̱ ti̱ tsꞌén kjiꞌanga ta̱kó tindyionjinjne̱ jún, kandokjo̱a̱tjónjne̱ nga kui kjo̱a̱ni̱ma̱a̱ ku̱i̱tja̱tió, kó bo̱a̱ kamá, xikótsꞌèn je yàjnú. 5Kuíni nga ko̱jo an, ngiti̱ kamáꞌniújínna nga kamámejénna skuie an xikótsꞌèn tindyiónjnú jún, kó katsangiya an Timoo̱ tsi̱ꞌe̱ nga skuie an tsi ta̱kó ꞌniú tindyionjinjnú kjo̱a̱sꞌijinjnú. Katsakjonña an, nga tsi ta̱ xindajín kui xi kjitꞌayákónná askotꞌayákónjnú jún, kósꞌe̱ tsi ta̱ ta̱kjo̱a̱nda kamá xájne̱.
Bi̱ tsꞌén íni̱jmì Pabloo̱ ni xi katsó Timoo̱
6Ta̱nga ngotꞌe̱ ꞌne̱, Timoo̱ jè jeꞌeni na̱xi̱ńdáꞌniú Tesalónika̱, kó yaꞌajne̱ én nda kjo̱a̱a̱ kjo̱a̱sꞌijinjnú, ko̱jo kjo̱a̱a̱ kjo̱a̱tjó xi tjínjnú jún. Ti̱ bo̱a̱ ti̱ katsójne̱ nga tsjá xò tsꞌén foaꞌátsjienjnú ji̱n ngatsjéni̱xtjin, ko̱jo nga achichí xò mejénjnú jún nga xcha̱jnú ji̱n, ti̱ bo̱a̱ ti̱ tsꞌén mejénjne̱ ji̱n nga xcha̱jne̱ jún. 7Kó kuíni ntsꞌie, ngi̱jii̱n ngayeje kui kjo̱a̱ni̱ma̱ ko̱jo kui kjo̱a̱boaa̱, achichí tsie ngaꞌniú kasakojne̱ nga jún ta̱kó ꞌniú tindyionjinjnú kjo̱a̱sꞌijinjnú. 8Ngatꞌa̱ ngotꞌe̱ ꞌne̱ tjisákóngaꞌniújne̱ nga yàjne̱ nga jún ꞌniú tindyiàjnú nga sꞌijinjnú Ndi̱a̱ná. 9Ngatꞌa̱ nde sakójínjne̱ én, kótsꞌèn ka̱ma ko̱e̱ꞌéjne̱ ndokꞌóchjì Néná, kjo̱a̱a̱ nga ꞌniú sꞌijinjnú Ndi̱a̱ná, ko̱jo kjo̱a̱a̱ kui kjo̱a̱tsja xi jún ndyi̱boeꞌéjnú ji̱n ngindyi̱ko̱n Néná. 10Nga ni̱xtjin ko̱jo nga ni̱xtji̱e̱n ꞌniú ndyi̱chjiáꞌájne̱ Néná, nga ndyi̱ndokjo̱a̱jne̱ tsi̱ꞌe̱ nga tsja̱ndièjne̱ nga xcha̱ ngiñá xingi̱, kó bo̱a̱ tsꞌén ka̱mando̱jo tsi ta̱ꞌa tjín ni xi chaja ngasee̱ kjo̱a̱sꞌijinjnú.
11Néná kui xi Na̱ꞌminá, ko̱jo Ndi̱a̱ná Kjisoo̱ nga tsjandièjne̱ tsi̱ꞌe̱ nga ka̱ma kongínchonjne̱ jún. 12Ndi̱a̱ná ngatasikójojnú tsi̱ꞌe̱ nga ja̱kꞌi̱e̱ ja̱ngaján si̱ꞌantjó ngasejnú xingi̱jnú ko̱jo ngayeje xotaa̱, xikótsꞌèn niꞌántjójne̱ jún. 13Néná nga tsja ngaꞌniuú ini̱ma̱jnú, kó kjiꞌanga kjo̱e̱ꞌe nginí Ndi̱a̱ná Jesukristoo̱ nga kjo̱e̱ꞌéjo̱ xota̱ na̱xi̱ńdá tsjiee̱, nga jmíjín xi ka̱maa̱ chꞌo tsꞌén ku̱i̱chji̱a̱taꞌinjnú, ko̱jo nga ꞌniú tsjie ku̱i̱ndyionjnú ngindyi̱ko̱n Néná xí Na̱ꞌminá.
Currently Selected:
1 Xota̱ Tesalónika̱ 3: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
