1 Xo̱jo̱o̱n Peé 4

Bi̱ tsꞌén íni̱jmì Peé kjo̱a̱a̱ ni xi ngiti̱ si̱ꞌánjín ñá

1Xikó tsꞌén Kristoo̱ jaꞌatio kjo̱a̱ni̱ma̱ nga kiniꞌánꞌoón yojoo̱, ti̱ bo̱a̱ ti̱ tsꞌén tjajintakónjnú nga ko̱e̱ꞌéngaꞌniújnúu̱ yojojnú, ngatꞌa̱ xota̱ xi jaꞌatio kjo̱a̱ni̱ma̱ nga kiniꞌánꞌoón yojoo̱, jè íjñámasien jeé, 2tsi̱ꞌe̱ nga xikó kjiꞌi ni̱xtjin xi chaja ngasee̱ nga kꞌuijñá nga̱sondiee̱, kꞌuijñá xikótsꞌèn mejeén Néná, kó jmí tsi xikótsꞌèn mejeén kjo̱a̱niꞌánkjoó xotaa̱. 3Jè jaꞌa ni̱xtjin xikótsꞌèn kixindyionjnú ngasꞌe̱, kjiꞌanga kiniꞌánjnú ni xi tsja máa xota̱ xi sꞌijinjiín Néná, nga kiniꞌánjnú ni xi ndajín, ko̱jo ni xi ndajín xi mejeén yojojnú, ko̱jo kjo̱a̱chꞌi̱, ko̱jo nga chꞌo kiniꞌánjo̱xtínjnú yojo ndikónjnú, ko̱jo nga ikitjatjónjnúu̱ nga kiniꞌánjnú sꞌué, ko̱jo nga kiniꞌántsjájnúu̱ a̱sie̱én ne xi tsꞌénda xotaa̱, kui xi achichí chꞌokoón. 4Ta̱nga ngotꞌe̱ ꞌne̱ nga ngiti̱ ndyi̱niꞌánkamajo̱jínjnú kui xota̱ xi ndyi̱tsꞌèn ni xi ndajiín, kuíni nga ta̱ bi̱ ta̱ máa, kó chꞌo tsójnú, 5ta̱nga kui xotaa̱, chjiéngá ki̱a̱ kjo̱chó tsjaá xki̱ kui xi je tikóndaa̱ nga ka̱tso̱yà tsi nda ko̱jo tsi ndajín katsꞌén xota̱ xi síndo ko̱jo xi je jesoón. 6Ngatꞌa̱ kuíni nga ngaskande xota̱ xi je jesón, ngotꞌe̱ ikꞌíni̱jmi̱ì kui éntjatsi̱e̱e̱ Néná, tsi̱ꞌe̱ nga ngije Néná katsóyà tsi nda ko̱jo tsi ndajín katsꞌén nga kisꞌińdo nga̱sondie, kꞌuíndo nga a̱siénni̱xtjin xikótsꞌèn mejeén Néná nga kꞌuíndo.

Bi̱ tsꞌén íni̱jmì Peé kjo̱a̱a̱ nga nda si̱ꞌanxájo̱ ni xi katsjáná Néná

7Jè kjimatiñaa̱ nga kju̱i̱e̱ ngayeje ni xi tjiín, kuíni nga nda tsꞌén ti̱ꞌankjójnú nga ndókjo̱a̱jnúu̱ Néná, kó nda chónjnúu̱ nga si̱ꞌánjnú kui nii̱. 8Tsie kjo̱a̱tjó ngatꞌiéjnú ngi̱jinjnú, ngatꞌa̱ kjo̱a̱tjoó achichí jé sa̱ꞌínkjié. 9Ja̱kꞌi̱e̱ ja̱ngaján te̱ꞌéndièjnúu̱ nga kꞌuíndo ndiꞌajnú xingi̱jnú, kó tsjangatꞌiéjnú nga bo̱a̱ si̱ꞌánjnú. 10Nga ngo nga ngojnú xi tjínjnú ngo kjo̱a̱nda xi katsjájnú Néná, ti̱ꞌankjiénjnú kui nii̱ ngandaa̱ xota̱ xi ngasee̱, bo̱a̱ ti̱ꞌánjnú xikoó xota̱ xi nda tsꞌénxájo̱ ngayeje to̱ko̱ya kjo̱a̱nda xi tsjá Néná ngandaa̱ xota̱ xi ngasee̱. 11Tsi tjín xí ku̱i̱chji̱a̱, ngatíchji̱a̱ én xí tsꞌéntsjaá Néná nga ku̱i̱chji̱a̱. Tsi tjín xí ko̱síko̱jo xotaa̱, bo̱a̱ nga tsꞌén xikó kjiꞌi ngaꞌniú xí tsꞌéntsjaá Néná, tsi̱ꞌe̱ nga Néná ko̱e̱ꞌeé kjo̱a̱je kjo̱a̱a̱ ngayeje nii̱ ngatꞌaa̱ Jesukristoo̱, kui xi tsi̱ꞌe̱ ngayeje kjo̱a̱jee̱, ko̱jo ngayeje ngaꞌniuú ngatsjéni̱xtjin. Bo̱a̱ kjiꞌi.

Bi̱ tsꞌén íni̱jmì Peé kjo̱a̱a̱ nga ꞌniú ku̱i̱ndyiajin ñá ni xi tsi̱ꞌe̱ Kristoo̱

12Jún ndí ntsꞌie xi tjóna, ngata̱ fíndikónjínjnú kjo̱a̱a̱ kjo̱a̱chjatꞌayákón xi ndyi̱bitjajinjnú, xikoó tsi ngo ni xi yàjínjnú ka̱majnú. 13Ta̱sá tsjangatamajnú nga ko̱jo jún ku̱i̱tja̱tiójnú kui kjo̱a̱ni̱ma̱ xi xikoó xi jaꞌatio Kristoo̱, tsi̱ꞌe̱ nga tsja ka̱majnú kjiꞌanga kji̱ndi̱bá nginí Kristoo̱ nga ko̱kó kjo̱a̱jee̱. 14Achichíra̱ tsjajnú tsi chꞌo tjíꞌmíjnú ta̱ngatꞌanii̱ nga Kristoo̱ timatji̱ngijnú, ngatꞌa̱ A̱si̱énni̱xtjii̱n Néná xí tjiín kjo̱a̱jee̱, ngatsjéni̱xtjin nga ki̱a̱ tikónjo̱jnú jún. 15Nga ngojín jún xi ku̱i̱tja̱tiójnú kjo̱a̱ni̱ma̱ ta̱ngatꞌanii̱ nga ini̱ma̱ sa̱ꞌínkꞌién, ko̱jo tsi kjo̱a̱a̱ nga sa̱ꞌínchejé, ko̱jo tsi kjo̱a̱a̱ nga ndajínxota̱, ko̱jo tsi kjo̱a̱a̱ nga ni xi tsi̱ꞌe̱jín xi skongájin, 16ta̱nga tsi ngo jún xi si̱ꞌankjaꞌatio kjo̱a̱ni̱ma̱ kjo̱a̱a̱ nga Kristoo̱ chji̱a̱ni, ngata̱ soboájín maá, ta̱sá nga tsjaá kjo̱a̱je Néná kjo̱a̱a̱ kui nii̱.

17Jè jachó chi̱bo̱a̱ nga Néná ku̱i̱ꞌítsꞌi̱yanii̱ nga ka̱tso̱yà tsi nda ko̱jo tsi ndajín katsꞌén xota̱ xi tsi̱ꞌe̱, kó tsi ñá tjón ku̱i̱ꞌítsꞌi̱yanii̱ nga bo̱a̱ sa̱ꞌín, kókjiꞌi ni xi ka̱maa̱ xota̱ xi ntꞌiéꞌénjiín éntjatsi̱e̱e̱ Néná. 18Kó tsi niꞌin kjo̱tjoꞌa xota̱ xi kixi̱i̱, kókjiꞌi ni xi ka̱maa̱ xota̱ xi ꞌniú ndajiín, ko̱jo xota̱ jeé nga. 19Kó kuíni nga xi ndyi̱foaꞌatio kjo̱a̱ni̱ma̱ ngatꞌa̱ bo̱a̱ tsꞌén kamámejeén Néná, ngatsꞌénkꞌásꞌieén ini̱ma̱a̱ Néná nga nda sa̱ꞌín, ngatꞌa̱ kuí boá Néná xi ꞌniátakón ñá nga katsꞌénda ngayeje nii̱.

Currently Selected:

1 Xo̱jo̱o̱n Peé 4: MAIX

Highlight

Compare

Copy