Oseas 2
2
1Chane'eja gaa'me le'mi
male qoyen lenaĝa't “Dios lec'oqo'tepi”
nataq'aen gaa'me yauo'
male qoyen “Lichoĝodenatal ñe'me Dios.”»
Gómer qodaloqotenaĝana da'me loqovinaĝanaĝa'j ga'me Israel laje'pi
2Dios yitaĝa enaac ca'li:
«Da'me ami Israel lec'oqo'tepi,
auepoliquilegue jaga'me adach'ii,
naqaga ga'me noic Israel:
qa'a ena'am ta'le youa joca'li,
qalaĝaja male ja naq'aeta;
ena'am ta'le nach'aga je'uoneguet joca'li,
qalaĝaja ja yitaĝa ta'le joue'tajop jaga'me.
Chane'eja 'noota qom auepoliquilegue jaga'me,
qaedi yaĝañi da'me yaeñi ga'me quejeguetaĝae leuo,
qaedi ja yitaĝa ya'uo da'me lequejeguetaĝa.
3Di'me noic jo'ne Israel, qom ja ya'uo jena'me jenjo',
qama'le ñaqa't qomle gaa'me leuo lael:
jadenaĝat ena'am ca'li yemta niyiñe.
Qama'le jen qaqata, ena'am di'me aleua jo'ne totapega't,
qama'le jalatec da'me jen yeliñquip.
4Yataqata ja jichoĝode'n qomle jonaa'me c'oqo'te,
qa'a chiyoqodayi da'me nequejeguetaĝa;
naa'me naajo' jo'ne ja yalaqa.
5Qa'a Israel qodajelaĝanec nale,
ena'am jaga'me quejeguetaĝae;
male qaya'te li'yoĝodic qa'a nenaĝategue ca'li:
“Jep'iya'alo nayi gaa'me lequi'il ñe'me Baal,
jogaa'me jo'ne ena'am ta'le yojaĝa'u,
qa'a naqaegaua jo'ne yauote ga'me jouetaque nale:
jayem yate'm joga'me jalic
nataq'aen joga'me ñiyomigui,
yauo'oe naa'me yeuo lael,
nataq'aen joga'me ñeyoĝoqui,
qama'le yataqata e'n jayem matac nale”.
6»Chane'eja japadeta'uo qomle,
japadiñgui da'me ladic,
qama'le jachaue jaga'me qop'adit
jo'ne yeda'at jaga'me yaĝat,
qaedi ja yaqanatet ta'le yenoĝonegue.
7Jetaque equeguelo jogaa'me lojaĝa'u jañe'me,
qalaĝaja ja yedalo'te;
jetaque yelapiyi jogaa'me,
qalaĝaja ja yauanalo.
Qama'le naq'aeta da'me lelnataĝac qomle:
“Yitaĝa ji'iyelaĝa qomle jo'me 'uaeñe yecochaĝaua,
qa'a yataqata 'noota joca'li da'me 'yoyaĝac,
ja ena'am da'me 'uo nayi”.
8»Jañe'me qa'a ja jetaque 'yamaqaten
da'me naqayem jo'ne jiqui'yaĝatac ca'li,
nataq'aen janem yema joga'me youetaque.
Chayovida'a janem ca'li jaga'me oro
nataq'aen jaga'me plata,
naqagaua jo'ne yaconalo
qaedi ye't jogaa'me lequi'il ñe'me Baal.
9Chane'eja yitaĝa jacona qomle
yema joga'me joote janem:
joga'me trigo jala nataq'aen jaga'me uva li'i,
chayovida'alo gaa'me leuo lael,
yema joĝotaĝanec qomle.
10Qom maliaĝa dajo'tagueta jogaa'me lojaĝa'u,
male jen jale'tague:
¡jena'me jenjo' ja nepaten jo' qomle!
11Yataqata jen ye'm qomle daa'me leualayaĝaco
nale yenoĝodegue naa'me noloqo'ote
naa'me auoĝoyaqa chayovida'alo naa'me 'uoidi:
male ja yitaĝa matac jañe'me.
12Japalaĝa't qomle gaa'me nanal jo'ne uva lichidijat
nataq'aen jaga'me higuera jo'ne jalcote,
naqagaua jo'ne yepetapega yanema ca'li gaa'me lojaĝa'u.
Yataqata jeleguemaĝata ga'me yaĝat lichidijat,
qama'le gaa'me yejidi yali'j jo' qomle.
13Yataqata je'uaĝan qomle jañe'me,
jouaĝat ga'me ua'a
da'me yegoue ga'me yoĝoqui
jo'ne yanema gaa'me lequi'il ñe'me Baal,
ca'li yaediñe gaa'me 'noe'n li'yoĝodaqa'te
jo'ne nechijaĝal nataq'aen loqolal,
qaedi dejapichiyalo gaa'me lojaĝa'u.
Qalaĝaja da'me jayem, yataqata ja jayem 'te uenata nale.
Mach'e jayem jo'ne jayem Jaliaĝanec.»
Dios yichoĝode'n qomle joga'me c'oqo'tepi
14Yitaĝa nenaĝategue ñe'me Jaliaĝanec, enaac:
«Qo'oche' male jauegue di'me aleua jo'ne totapega't,
qama'le ua'a da'me yataqata jichoĝoden,
qaedi yitaĝa jayem noqopita qomle.
15Yem da'me dojo' qama'le yitaĝa janema
gaa'me nanal jo'ne uva lichidijat,
qama'le di'me laqauaedegue jo'ne Acor#2:15 Acor: hebreo 'laqatac jo'ne yelo'teguet da'me Nachoĝodec.
jen uaue qomle da'me leuataqataĝanaĝa'j joga'me yalaqapi.
Qama'le yitaĝa jayem 'nonaĝachedigui qomle,
male t'onaĝa'n, ena'am ca'li ja 'yaĝayaqa,
ena'am jo'me nolo' ca'li queda'e di'me Egipto.
16Qama'le ja yitaĝa ta'le etedac da'me jayem ladipa',
dite da'me male etedac qomle da'me naqayem jo'ne loua';
mach'e jayem jo'ne Jaliaĝanec.
17Qa'a naa'me nedegaqa'te,
jotaĝaneque qomle naa'me lenaqa'te
ñaa'me qop'iyapegalo,
qaedi ja yitaĝa nenaĝatedegue daa'me.
18»Qom yovita naa'me naajo' uo'oe,
qama'le 'ñañaĝatelo'te jena'me Israel laje'pi
da'me yataqata machidiñe jo' qomle,
nataq'aen uetauelo da'me 'nemaĝac:
qaya'te jiyac ta'le 'uo ga'me 'yeteque,
uotaĝa noic laqaya da'me te'me nautenalo
da'me jetaque ya'uo nalada't.
19Israel, yitaĝa jen am youa jo' qomle,
qaedi nach'e eta't da'me am yequiaĝaua,
qa'a ja'uo da'me chimaqachiñe,
naqayem jo'ne jalcote da'me yoqopich'i
nataq'aen da'me yichoĝodenataĝanaĝac.
20Qomle yataqata am youa,
qama'le ja ch'e am joqovi'n,
dite da'me yataqata jayem auateton qomle,
mach'e jayem jo'ne Jaliaĝanec.
21Eja, naqayem jo'ne Nedios jena'me Israel laje'pi,
male ami ñaquiaĝanalo,
qama'le jojapegue' qomle jodi'me piyem
qaedi yataqata uotep,
qama'le talegue jena'me aleua.
22Qama'le jena'me aleua jalcote da'me lejalayaĝac:
'uo ga'me trigo, uva li'i nataq'aen ga'me aceite jo'ne jalcote,
qama'le yataqata nichiguegue qomle jena'me Jezreel.#2:22 Jezreel: hebreo 'laqatac jo'ne yelo'teguet da'me Dios danaĝan. Jena'me jenjo' qoyen yelo'teguet jena'me Israel laje'pi.
23Chane'eja, ami jaalo'te qomle jena'me aleua,
qaedi yitaĝa ami noic jo'ne mach'e yoĝot.
Qama'le jichoĝode'n qomle jogaa'me jo'ne qoye'n lenaĝa't ca'li da'me Lo-ruhama,#2:23 Lo-ruhama: hebreo 'laqatac jo'ne yelo'teguet da'me ja qoyichoĝoden. Auec'aten Oseas 1:6.
nataq'aen jogaa'me jo'ne qoye'n lenaĝa't ca'li da'me Lo-amí,#2:23 Lo-amí: hebreo 'laqatac jo'ne yelo'teguet da'me jenjo' noic ja mach'e yoĝot. Auec'aten Oseas 1:9.
janema qomle jena'me jenjo' 'yaqatac, jenaac:
“Male yataqata ami yalaqapi nayi”,
qama'le jayem a'uachiyeguet qomle, aueñiyaac:
“¡Je'e: naqa'am jo'ne Qanedios!”»
Biblia en Toba del Oeste © Sociedad Bíblica Argentina, 2014, 2019.