2 Samuel 22
22
Lalac jo'ne yelo'teguet da'me lomataĝanaĝac ñe'me David
(Nalaco 18)
1Ñe'me David ya'uo jena'me jenjo' lalac jo'ne yanem ñe'me Jaliaĝanec, ca'li nec'alaĝate'guejopa jogaa'me laute'u choqoñe'me Saúl jo'ne yelodaque qaedi yala't. 2Qama'le eetac:
«Am Jaliaĝanec,
mach'e am jo'ne yequepaĝanaĝat,
mach'e am jo'ne am yapiyenaĝala',
mach'e am yec'alaĝaiqui.
3Am Ñedios, auena'am ga'me qa'
jo'ne jayem nequepaĝatetelegue.
Naqa'am da'me jayem anequepaĝatelegue,
qa'a da'me adañoqotaĝanaĝac jayem nec'alaĝategue,
nach'e am jo'ne am ñañoĝotaqa'.
Nach'e am japiyetapecot,
qa'a am yapiyenaĝala'.
¡Jayem auachiyoĝotaue ga'me ja niyamaĝa
qa'a nach'e am yec'alaĝaiqui!
4Am Jaliaĝanec,
nach'e am tayet da'me am qo'nonaĝachigui,
qa'a ca'li am jiyaĝatapije'ma,
qama'le jayem auachiyoĝotetouelo
joga'me yaute'upi.
5»Qa'a da'me neleuaĝa jayem naqachiñi,
ena'ama jogaa'me noĝop lepa'a;
janomeguet da'me yoqolanaĝa,
jouaĝat ga'me noĝop jo'ne vichaĝa'ye
jo'ne 'uo da'me lichic.
6Ga'me lecoñetaĝanaĝat da'me neleuaĝa
jayem lecoĝogue;
jauada'aguet jaga'me napogoqotaĝanaqate
jo'ne dalataĝanac.
7Da'me 'uo da'me yachitataic,
jiyaĝaje'ma ñe'me Jaliaĝanec mach'e Ñedios:
jiyaĝataque ta'le jayem lecochiya,
qama'le joñe'me jayem domachiya
da'me ue'ta ga'me netamenaĝaiqui.
¡Jayem domachiya da'me 'ñalaqatapijeguem!
8»Qama'le let'adaic ga'me ledaĝac ca'li
jena'me aleua,
nach'e ena'am deda di'me piyem:
qo'yequiaĝa'tape qa'a jouaĝat
da'me dalemata joñe'me Jaliaĝanec.
9Joga'me limic na'ya jana'me nemala'
nataq'aen joga'me nedegaĝat na'ya ga'me dole'
jo'ne dapalaqataĝanac:
jogaa'me poqol jo'ne edetañguilo
chiyoqodo'ot joñe'me.
10'Youategue ga'me lapadenaĝat di'me piyem
qama'le na'ya da'me nenochiñe:
petalo'te gaa'me piyem loje' jo'ne jalco'l.
11Qama'le netalegue ga'me piyem le'ec querubín#22:11 Querubín: piyem le'ec jo'ne uo'oe gaa'me laua'. Auec'aten Éxodo 25:18. da'me uayotac:
uayotapelegue da'me 'lañaĝac ga'me layat.
12Qama'le ena'am ta'le napotota'ña ga'me 'lalaĝa
jo'ne coleejop;
qaedi yoĝochiñe da'me lovidaĝac;
gaa'me piyem loje' jo'ne najaqachiguilo ga'me noĝop,
ena'am ta'le lomachaĝaiqui.
13Ga'me edañgui chiyoqo'tot joñe'me
jo'ne yataqachiñe 'uo da'me laqajelgaĝa:
male 'naqadañe jogaa'me poqol
jo'ne edetañguilo, ena'am ta'le uotep.
14»Qampaja'a da'me daja' piyem,
qodomachiya ga'me yemetapiye lajamaĝa,
ena'am ga'me 'loĝoyaĝac:
nach'eda lajamaĝa ñe'me Jaliaĝanec
jo'ne Yataqata P'ajaye.
15Yeloĝodegue gaa'me edañguilo,
ena'am ta'le lechiquenal:
gaa'me laute'upi e'n nelagaĝa
da'me dajodegue.
16Ga'me laeñi ga'me ñache let'a
male qo'youachigui;
nataq'aen gaa'me p'adiñe jena'me aleua
male qo'youatelo'te,
jouaĝat ga'me lajamaĝa ñe'me Jaliaĝanec
jo'ne 'uo da'me lichic,
jouaĝat da'me vichaĝaguet ga'me layat
da'me yepetetoue.
17»Chiyaqaje'ma di'me p'ajeguem
ñe'me Dios da'me jayem navijeguem:
jayem yachiyoĝotañgui ga'me qaya'añgui noĝop.
18Jayem nec'alaĝate'guejopa gaa'me yaute'u
jo'ne p'ajodaye,
jo'ne jayem niquiyatedapega;
nach'egaua ja jena'ama
da'me yataqachiñe 'uañaĝayaqa.
19Jayem quidiñgui ca'li jouetaue
da'me yachoĝodec,
qalaĝaja ñe'me Jaliaĝanec nach'e eta't
jayem nauequetajeguem.
20Jayem yauegue ga'me ua'a
da'me jiyamaqachiñe;
jayem nec'alaĝategue
qa'a 'uo da'me 'lamaqatenataĝanaĝac.
21Ñe'me Jaliaĝanec jayem yanem ga'me ñejetenaguec,
qa'a je'et ga'me 'yamaqaten.
Jayem yichoĝoden
qa'a ja'uo da'me chimaqachiñe,
22qa'a ja ch'e ta'le ñematapec
joñe'me Jaliaĝanec mach'e Ñedios;
yataqachiñe jeque'teguelo jogaa'me
lapaĝaguenataĝanaĝaco joñe'me.
23Nach'e eta't da'me jenate'talo
ena'uaque gaa'me lamajoĝonaĝaco:
qaya'te ua'a ta'le jegue'm
naa'me laqataĝaco.
24Qaya'te yajamataĝac
da'me jep'iya'a joñe'me;
joote jen qaya'a
joda'me 'yetaĝaloĝoc jo'ne ja no'en.
25Qama'le joñe'me Jaliaĝanec jayem yanem
da'me ñejetenaguec,
qa'a ja'uo da'me chimadichiñe:
ñe'me yauana da'me qaya'te yaviyaĝajet.
26»Am Jaliaĝanec,
yataqachiñe avichoĝode'n
gaa'me chimaqachidiñe,
nataq'aen aue'tema da'me onaĝaic
gaa'me qaya'te lejamaĝataĝa'j.
27Gaa'me yataqatelo'te,
yataqachiñe yataqatelegue da'me aue'tema,
qalaĝaja ja yaqanate't ta'le am napaquedalegue
jogaa'me qovinaĝanaĝayaqa.
28Anec'alaĝatedegue gaa'me choĝodayaqolqa,
qalaĝaja jogaa'me 'yoĝodenaĝayaqa
auanema da'me lepocoqo't.
29Am Jaliaĝanec,
mach'e am jo'ne yecoyadaĝanaĝat:
naqa'am jo'ne auecoyadelegue
ga'me 'lalaĝa jo'ne jouetaue.
30Da'me 'uo da'me adecochaĝac, am Ñedios,
male jeguiiñguilo jogaa'me yaute'u,
nataq'aen jayapelegue joga'me lequepaĝanaĝat
ga'me noic.
31»Yataqachiñe chimaqategue ga'me ladiquiyaĝac
ñe'me Jaliaĝanec mach'e Qanedios;
daa'me 'laqataqa joñe'me
yataqachiñe qaya'te 'laĝaje't.
Ñe'me Dios nequepaĝatelo'te ena'uaque
gaa'me jo'ne yapiyetot joñe'me.
32Qa'a ¿jach'e ga'me uoja'ega jaliaĝanec
napacalegue ñe'me Jaliaĝanec mach'e Qanedios?
¿Jach'e jogamaĝa qop'iyapega laqaya
qaedi qo'mi nequepaĝatetelo'te?
33Ñe'me Dios nach'eñe yapiyenaĝala'
jo'ne napacalegue ena'uac;
nach'eñe en yachimaqategue
da'me yadiquiyaĝac.
34Nach'eñe en jayem vidiaqaic,
ena'am jaga'me ta'naĝanaĝa,
nataq'aen jayem yachimaĝachiñi
nale jequetayelo gaa'me qajoĝona'a.
35Nach'eñe jayem yapaĝaguenec
da'me jajoya'agueta gaa'me yaute'u;
'yañaqate't naa'me 'yaltel qaedi jaconoue
ga'me chiquenec jo'ne dajali.
36»Mach'e am yequepaĝanaĝat
nataq'aen yec'alaĝaiqui,
qa'a da'me adecochaĝac let'adaic
jayem 'yañaqatet.
37Aviyamaĝatetac ga'me yadiquiyaĝac,
qaedi qaya'te japoguelaĝanot.
38»Jecalo'te gaa'me yaute'u,
qama'le jolaĝachiguilo;
'ñiyelaq da'me joote jomat
da'me ñemachichidiñe.
39¡Japalaĝa't jogaa'me,
nataq'aen jolaĝachiguilo!
Qama'le ja yitaĝa ñedijeguem,
qa'a je'tema yapiaĝala'te.
40Da'me jaue ga'me nalada't
nach'e am jayem a'uañaqatet;
auen japetalo'te jogaa'me jayem yep'ague'n.
41Nach'egaua jayem dajode'guem.
Naq'aeta da'me ñomachichidiñe
gaa'me jayem niquiyatedapega.
42Yiyaĝatedaque necochague'j,
qalaĝaja qaya'te de'uolo'te;
yiyaĝatedapega ñe'me Jaliaĝanec,
qalaĝaja ñe'me ja 'yategueta.
43¡Yataqachiñe ñejodeñi jogaa'me,
je'tema ga'me enaĝayaĝa!
¡Japelo'te jogaa'me, je'tema ga'me jenal
jo'ne uañgui ga'me noqoigaĝac!
44Ca'li uo'oe gaa'me jayem nauteta,
qama'le jayem aue'uolegue;
auen jayem lajoĝola't gaa'me noyaqa,
qama'le jayem t'onataĝade'uo
gaa'me jiyaĝa'u jo'ne ja jateto'n ca'li.
45Ga'me jiyaĝadipi jo'ne qaya'aguelo naa'me napi'ñalo
jayem naĝadi'ñijop;
da'me jayem domachita,
qama'le paja'a jayem yoqochideta.
46Naajo' jiyaĝadipi jo'ne yoda'alo
paja'a 'uo da'me loqolanaqa't,
qama'le diviloĝo'l da'me chiyaqapegouelo
jogaa'me lapiyenaĝaiqui'.
47»¡'Ñonaĝachigui ñe'me Jaliaĝanec
qa'a jayem nequepaĝatetelegue!
¡'Noota qom qo'nonaĝachigui joñe'me Ñedios,
mach'e Yec'alaĝaiqui!
48Nach'eñe joñe'me Dios ya'uo yovi'
jouaĝa't jogaa'me yaute'u,
qama'le en ñejaliaĝatelo'te
jogaa'me noyaqa jena'me aleua.
49Nach'eñe jayem yelotaĝanema
jogaa'me yaute'u;
jayem aue'tem da'me male ñapacalo'te
jogaa'me jo'ne jayem nauteta ca'li.
¡Nach'e am Jaliaĝanec
jayem anec'alaĝate'guejopa
jogaa'me qaleuaĝayaqa!
50Jo'oche' am 'ñonaĝachigui, am Jaliaĝanec,
nale jouetauelo gaa'me noyaqa jena'me aleua;
jo'o'tape gaa'me nalaco
da'me ji'yoĝodetac da'me adenaĝat.
51Auanem ga'me lomataĝanaĝac let'adaic
ga'me nejaliaĝanec jo'ne aniquiyaye ca'li;
qa'a qaya'te loiquiaqa' joda'me adoqopich'i
jo'ne auachi'tajop ñe'me adiquiyac,
nach'ayem David nataq'aen ena'uaque
joga'me yalaqapi.»
Currently Selected:
2 Samuel 22: TDO
Highlight
Share
Compare
Copy
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
