2 Samuel 11
11
David nataq'aen jañe'me Betsabé
1Ca'li yovita jo'me uo'e dalaĝaic, jo'ne ua'a nale gaa'me jaliaĝanaqa yeuo'tape jouaĝat da'me nalada't, ñe'me David yamaq ñe'me Joab choqogaa'me lejaliaĝanaqa gaa'me nalada't lo'ol, nataq'aen ena'uaque gaa'me nalada't lo'olpi jo'ne Israel laje', qama'le nomachichidiñe jogaa'me Amón laje' nataq'aen coleedejop di'me noic jo'ne Rabá qaedi quidiñgui. Qalaĝaja ñe'me David ue'tedi ca'li, ue'ta di'me Jerusalén.
2'Uo jo'me javit ca'li, da'me ñejeguem ñe'me David chiyaqalegue ga'me 'lochaĝala' qama'le yeuotapiye't quetalegue ga'me p'ajeguem ga'me lejaliaĝaiqui, qanach'e ua'a da'me yelotapega jañe'me yauo jo'ne yataqachiñe onaĝae; nach'añe nachiletac ca'li. 3Ñe'me David damajoĝona qaedi qodenataĝalegue jañe'me, qama'le qot'aqataĝanem joñe'me David queda'me lenaĝat da'me Betsabé, jo'ne mach'e c'oqote ñe'me Eliam nataq'aen mach'e loua ñe'me Urías jo'ne hitita le'ec. 4Ñe'me David yauo'oe gaa'me lamaĝa's da'me damajoĝona jañe'me; ca'li qoyauega qama'le David leuaua. Jañe'me yemta niyola't qa'a joote yem da'me 'naĝac. Yem da'me ue'tajop ñe'me David qama'le yitaĝa 'viyelaĝague ga'me 'lachaqa'.
5Jañe'me ca'li paja'a qo'uaĝae, qama'le en qo'yaĝatem da'me dojo' ñe'me David qaedi nomaye. 6Qampaja'a David damajoĝonegue ñe'me Joab qaedi en nec'ata joñe'me Urías jo'ne hitita le'ec. 7Ca'li ñe'me Urías yovita ñe'me David, joñe'me yachimaĝatec jach'e ga'me eeta ga'me ueteda'ague joñe'me Joab choqogaa'me nalada't lo'olpi, nataq'aen jach'e jogamaĝa 'laqataĝanaĝac jouaĝat ga'me nalada't. 8Yem qama'le yamaĝague ga'me 'lachaqa' qaedi 'nomategue.
Mane'e da'me yenoĝonegue ñe'me Urías, ca'e ga'me nejaliaĝaiqui, ñe'me jaliaĝanec yamaĝague ga'me en neme niqui'yaĝat jo'ne yataqachiñe p'ajaye; 9qalaĝaja ñe'me Urías, ja queuo ca'li, maq joda'me ue'ta ga'me najom ga'me nejaliaĝaiqui jo'me pi'yaq, uetauelo gaa'me coico laje' jo'ne nevitoqo't ñe'me jaliaĝanec. 10Ca'li qot'aqataĝanem ñe'me David queda'me Urías ja dajoyi ga'me 'lachaqa', qama'le yenat:
«¿Toqoch'e ja auajoyi ga'me at'achaqa', da'me yem da'me adeuoĝoc?»
11Ñe'me Urías 'yateguet:
«Jaga'me lae't daa'me namajoĝonaĝaco choqogaa'me coico laje' jena'me Israel choqodi'me Judá netedo'ot joga'me ch'e nepe'l jo'ne ualoq na'me lael, nach'e ena'am ñe'me Joab jo'ne mach'e yajoĝola' choqogaa'me coicopi lajoĝola'ate jo'ne mach'e adalemaĝaje'te ueda'ya ga'me 'nonaĝa da'me t'oche'y; chane'eja qom naq'aeta ¿qo'li jec'ata ga'me 'yachaqa' qaedi jeque'e nataq'aen ñiyom nataq'aen yeuaua jaga'me youa? Am yejaliaĝanec, ¡yataqachiñe ja naq'aeta da'me ja'uo!»
12Qalaĝaja ñe'me David cha'li en ue'ta jodi'me, enaac:
«Cha'li oue'tena, qom 'yoĝoñi yemta am jajeta da'me oc.»
Chane'eja ñe'me Urías cha'li ue'ta di'me Jerusalén jo'me pi'yaq chayovida'a jo'me 'yoĝoñi. 13Ñe'me David nepoda ñe'me Urías qaedi neuat'ai da'me deque'e nataq'aen niyom, qama'le chayovida'a taĝaic joñe'me. Joote pi'yaq ca'li, ñe'me Urías yenoĝonegue qama'le ec qaedi t'oche uauelo gaa'me coico laje' jo'ne nevitoqo't ñe'me jaliaĝanec, qalaĝaja ja queuo ca'li.
14Jo'me nete' laqaya ca'li, ñe'me David yamaĝa jaga'me lediije ñe'me Joab, yedenaqatenegue ñe'me Urías. 15Ja'me lediije qa'a eetac: «Auachiya'ña na'me Urías ga'me ueteda'a gaa'me 'uaechidiñe nalada't lo'ol, jo'ne auañiya da'me yataqachiñe 'uo da'me laqalaic; yem qama'le auomachii'ta, aueñi onolec qaedi qoyalat.»
16Chane'eja, ca'li Joab coleejop di'me noic qaedi quiiñgui, yacha'ña ñe'me Urías ga'me jo'ne joote yayaten da'me ueda'a jogaa'me nalada't lo'ol jo'ne yataqachiñe 'uañaĝayaqa. 17Ca'li laloqo' da'me male nenoĝodegue gaa'me jo'ne de'uodelegue di'me noic qaedi deloi'ye'to ñe'me Joab, qama'le uo'oe gaa'me qoyala't jo'ne lajoĝola'ate gaa'me nalada't lo'olpi nejoĝonaqa ñe'me David, nach'egaua uauelo di'me Urías.
18Qama'le Joab yamaĝague ga'me 'laqataĝanaĝac ñe'me David, 'yaĝatetelegue da'me eeta ga'me nalada't, 19qama'le yanem da'me dojo' laqataĝac ga'me 'laqatanaĝanaĝanec, enaac:
«Qom yem da'me a'uaqataĝanem ñe'me jaliaĝanec ena'uac joga'me eeta ga'me nalada't, 20uotaĝa dalemata qomle ñe'me jaliaĝanec; qama'le qom am yachimaĝata, enaac: “¿Toqoch'e yataqachiñe auepaquiya'a ga'me noic? ¿Qo'li ja auayachiñe' jogaa'me, da'me gamachaqaega yajaĝadegue yachiyoĝotedalegue ga'me nequepaĝanaĝat? 21Naq'aeta ca'li di'me noic Tebés, 'uo jaga'me yauo yalat di'me Abimélec jo'ne c'oĝot di'me Jerubaal, chiyoĝotalegue ga'me nequepaĝanaĝat da'me yajaĝaye ga'me qa' jo'ne 'nonataĝanaĝat. Chane'eja ¿toqoch'e da'me auepaquiya'a ga'me nequepaĝanaĝat?” Qama'le auenaac qom a'uateguet: “Nach'e ena'am yeleu di'me Urías jo'ne hitita le'ec, jo'ne lajoĝola' ga'me coicopi jo'ne mach'e adalemaĝajet.”»
22Chane'eja ñe'me 'naqatanaĝanaĝanec male ec, qama'le da'me yovita ñe'me David male 'yaĝatem yema ga'me jo'ne yamaĝalegue ñe'me Joab ta'le 'yaĝatetac. Qama'le ñe'me enapega ñe'me namaĝajec enaac:
«¿Toqoch'e auepaquiya'a di'me noic? ¿Qo'li ja auayachiñe jogaa'me da'me yajaĝadegue gamachaqaega jo'ne yachiyoĝotedalegue ga'me nequepaĝanaĝat? Naq'aeta ca'li jaga'me yauo 'lachaqa' di'me Tebés ca'li yalat di'me Abimélec, jo'ne c'oĝot di'me Jerubaal, chiyoĝotalegue ga'me nequepaĝanaĝat da'me yajaĝaye ga'me qa'. Qama'le ¿toqoch'e auepaquiya'a ga'me nequepaĝanaĝat?»
23Qama'le ñe'me 'naqatanaĝanaĝanec 'yateguet joñe'me:
«Da'me nenoĝodegue gaa'me coicopi qaedi qo'mi deloi'ye'to ua'a ga'me 'nonaĝa, jogaa'me yaguegue da'me 'lañaĝa'j, qalaĝaja jenaĝa qojete' chayovida'a ga'me qotayape'uo ga'me noic. 24Nach'ega ueda'a ga'me nequepaĝanaĝat da'me qoyeloĝonegueta gaa'me chiquenal jogaa'me adalemaĝaje'te, qama'le uo'oe dia'me yele'u jo'ne lajoĝola'ate gaa'me coicopi, jogaa'me uetauelo di'me Urías jo'ne hitita le'ec.»
25Chane'eja ñe'me David 'yateguet ñe'me namaĝajec:
«A'uaqataĝanem ñe'me Joab qaedi ja uenadeja'a da'me dojo', qa'a naq'aeta nale ga'me nalada't. Qalaĝaja 'noota qom yaconeguet da'me 'lañaĝac da'me quiiñgui di'me noic, chayovida'a nolaĝachiñe. Qama'le da'me am 'noota qom a'uañaqatet.»
26Ca'li jañe'me loua di'me Urías noma'a da'me yeleu di'me loua, yaediñe gaa'me leuo jo'ne yelo'teguet da'me 'uo ga'me lajouaĝac jouaĝat jodi'me. 27Qalaĝaja yenoĝonegue ca'li da'me dojo', David damajoĝona jañe'me en yec'ata ga'me lejaliaĝaiqui, da'me en loua, qama'le jañe'me c'oe ca'li. Qalaĝaja ñe'me Jaliaĝanec yataqachiñe ja 'yamaqatenec da'me dojo' ya'uo ñe'me David.
Currently Selected:
2 Samuel 11: TDO
Highlight
Share
Compare
Copy
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
