Mìn-su Ki 20

Chhai Kâ-tâi-sṳ̂ Fat-sên ke Sṳ

(Chhut Âi-khi̍p Ki 17:1-7)

1Châng-ngie̍t, Yî-set-lie̍t chhiòn fi-chung lòi-to Chhìm khóng-yâ, chhai Kâ-tâi-sṳ̂ ôn-yàng. Mî-li-ôn sí chhai ke-vi, chhiu chong chhai ke-vi.

2Kì-têu ôn-yàng ke thi-fông mò-súi, ngìn-mìn chhi-si̍p hiong Mô-sî lâu Â-lùn kie-kau, 3tui Mô-sî fat yen-ngièn kóng: “Yî-chhièn ngài-têu ke thùng-pâu Yî-set-lie̍t-ngìn sṳt sí chhai Song-chú ke sṳn-chong-phùng chhièn; ngài-têu kâm-ngien lâu kì-têu khiung-ha sí! 4Ngì-têu cho-má-ke thu ngài-têu — Song-chú ke fi-chung — to liá khóng-yâ lòi? Kám-he oi ngài-têu lâu thèu-sâng khiung-ha sí chhai liá-vi? 5Ngì-têu cho-má-ke thu ngài-têu lì-khôi Âi-khi̍p, to liá mò chhut-sán ke thi-fông lòi nè? Liá-vi mò ńg-kuk, phù-thò, vù-fâ-kó, sa̍k-liù; lièn súi me mò-hó lîm!” 6Mô-sî lâu Â-lùn lì-khôi fi-chung, khî chhai sṳn-chong-phùng mùn-héu. Kì-têu phu̍k chhai thi-song; Song-chú ke yùng-kông hiong kì-têu hién-hien.

7Song-chú tui Mô-sî kóng: 8“Chiông yok-khui thèu-chhièn ke-kî koái-kun-é khià-lòi. Ngì lâu ngiâ-kô Â-lùn oi seu-si̍p chhiòn fi-chung, chhai kì-têu ngién-chhièn min-lin phàn-sa̍k, súi chhiu voi tui phàn-sa̍k liù chhut-lòi. Án-ngiòng, ngì cho-tet pûn ngìn-mìn lâu thèu-sâng lîm tui phàn-sa̍k liù chhut-lòi ke súi.” 9Mô-sî cheu Song-chú ke min-lin hi chiông koái-kun-é tui Kì ke mien-chhièn khià-lòi.

10Mô-sî lâu Â-lùn seu-si̍p chhiòn fi-chung to phàn-sa̍k chhièn. Mô-sî kóng: “Ngì liá-têu phan-thù thâng-hó! Ngài-têu yin-kôi ham phàn-sa̍k liù-chhut súi lòi pûn ngì-têu lîm he-mò?” 11Yèn-heu, Mô-sî khià-hí koái-kun-é, tá phàn-sa̍k lióng-ha, tông-tô ke súi liù chhut-lòi. Fi-chung lâu thèu-sâng chhiòn-phu yû-súi hó-lîm lé.

12Chúng-he, Song-chú chit-phi Mô-sî lâu Â-lùn, kóng: “Yîn-vi ngì-têu sin-sîm mò la, chhai Yî-set-lie̍t-ngìn ngién-chhièn mò chûn Ngài vì-sṳn, ngì-têu cho-m̀-tet thu kì-têu chin-ngi̍p Ngài yin-hí su-pûn kì-têu ke thú-thi.”

13Liá-sṳ fat-sên chhai Mí-li-pâ#20:13 “Mí-li-pâ” yi-sṳ he “koai-yen”. chhièn-súi sùn; Yî-set-lie̍t-ngìn chhai ke-vi koai-yen Song-chú, Song-chú chhai kì-têu tông-chûng hién-mìn chhṳ-kâ he sṳ̀n-sṳn ke.

Yî-tûng-vòng M̀-chún Yî-set-lie̍t-ngìn Kîn-ko

14Mô-sî tui Kâ-tâi-sṳ̂ phai sṳ́-chá hi-kien Yî-tûng-vòng, tui kì kóng: “Ngì ke chhîn-su̍k Yî-set-lie̍t-ngìn yû fa tui ngì kóng. Ngì tî ngài-têu só tù-tó ke khun-nàn. 15Ngài-têu ke chú-siên ngióng-pân to Âi-khi̍p hi; ngài-têu chhai ke-vi he̍t tông-tô ngièn. Âi-khi̍p-ngìn khú-thu̍k ngài-têu ke chú-siên lâu ngài-têu, 16ngài-têu chhiu khiù-ham Song-chú. Song-chú thâng ngài-têu ke ôi-khiù, phai thiên-sṳ́ chiông ngài-têu thu-chhut Âi-khi̍p. Liá-ha ngài-têu to ngì piên-kie ke Kâ-tâi-sṳ̂-sàng, 17chhiáng pûn ngài-têu kîn-ko ngì ke thú-thi. Ngài-têu lâu ngài-têu ke thèu-sâng m̀-voi lì-khôi thai-lu, hàng-to thièn-tú ya-he phù-thò-yèn hi; ngài-têu ya m̀ lîm ngì-têu chiáng-tú ke súi. Ngài-têu tân-chhiang hàng vòng ke thai-lu, mò phiên chó-yu, yit-chhṳ̍t thûng-ko ngì ke thú-thi.”

18Chúng-he, Yî-tûng-vòng en-kóng: “Ngài m̀ chún ngì-têu kîn-ko ngài ke thú-thi! Na-he ngì-têu lòi, ngài chhiu phai-pîn kûng-tá ngì-têu.”

19Yî-set-lie̍t-ngìn kóng: “Ngài-têu tân-chhiang hàng thai-lu. Na-he ngài-têu ya-he ngài-têu ke thèu-sâng lîm ngì ke súi, ngài-têu voi fu-chhièn. Ngài-têu chia-ko thin-thin.”

20Yî-tûng-vòng yu kóng: “Cho-m̀-tet!” Só-yî, kì phai-chhut chîn-liòng ke thai-kiûn lòi, oi kûng-tá Yî-set-lie̍t-ngìn. 21Yîn-vi Yî-tûng-vòng khî-chhie̍t Yî-set-lie̍t-ngìn thûng-ko kì ke thú-thi, Yî-set-lie̍t-ngìn chhiu chón-hiong nang-ngoi yit-thiàu lu hi.

Â-lùn ke Sí

22Yî-set-lie̍t chhiòn fi-chung lì-khôi Kâ-tâi-sṳ̂, lòi-to Hò-ngí-sân; 23liá-sân chhai Yî-tûng ke piên-kie. Song-chú chhai ke-vi tui Mô-sî lâu Â-lùn kóng: 24“Â-lùn cho-m̀-tet chin-ngi̍p Ngài yin-hí pûn Yî-set-lie̍t-ngìn ke thú-thi; kì chhiu voi chón-to kiâ chú-chûng ke-vi hi, yîn-vi ngì-têu lióng-sà chhai Mí-li-pâ chhièn-súi sùn vì-poi Ngài ke min-lin. 25Ngì oi tai Â-lùn lâu kì ke lai-é Yî-li-â-sat sông Hò-ngí-sân, 26chhai ke-vi thot-thet Â-lùn ke chi-sṳ̂ sâm, pûn Yî-li-â-sat chok-hó. Â-lùn chhiu voi sí, chón-to kiâ chú-chûng ke-vi hi.”

27Mô-sî cheu Song-chú ke min-lin hi-cho. Kì-têu chhai chhiòn fi-chung mien-chhièn sông Hò-ngí-sân. 28Mô-sî thot-thet Â-lùn ke chi-sṳ̂ sâm, pûn Yî-li-â-sat chok-hó. Â-lùn chhiu sí chhai ke sân-táng; Mô-sî lâu Yî-li-â-sat hâ-sân. 29Yî-set-lie̍t chhiòn fi-chung tî Â-lùn sí-thet, chhiu vi kì ôi-sông sâm-sṳ̍p ngit.

Currently Selected:

Mìn-su Ki 20: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)