Mìn-su Ki 19

Chhak Ngiù-mà ke Fôi

1Song-chú min-lin Mô-sî lâu Â-lùn, 2fûn-fu Yî-set-lie̍t-ngìn chûn-sú yî-ha thiàu-li: “Oi khiên yit-chak mò khiet-tiám, mò koa-ko ak ke chhak ngiù-mà, 3kâu-pûn chi-sṳ̂ Yî-li-â-sat, yèn-heu chiông chhak ngiù-mà khiên-to yàng-ngoi, chhai kì mien-chhièn chhṳ̀-thet. 4Chi-sṳ̂ Yî-li-â-sat yit-thin oi yung sú-chṳ́ vun liá-ngiù ke hiet, hiong sṳn-chong-phùng ke fông-hiong fin chhit-pái. 5Kûi-chak ngiù-mà, lièn phì, ngiuk, hiet, chhòng-è, chhiòn-phu oi chhai chi-sṳ̂ mien-chhièn sêu-thet. 6Yèn-heu, chi-sṳ̂ oi nâ yit-te hiông-pak-su, yit-kî ngiù-chhit-chhó, lâu yit-thiàu chhṳ̂m-fùng set ke sien te̍p-ngi̍p fó tî-poi. 7Sṳ-heu, chi-sṳ̂ oi sé-chhiang sâm-fu, yung súi sé-sṳ̂n, chang cho-tet ngi̍p yàng-thi; chhṳ̍t-to lìm-am-é, kì chhai lî-ngì song he mò chhiang-li ke. 8Sêu ngiù-mà ke ngìn ya yit-thin oi sé-chhiang sâm-fu, yung súi sé-sṳ̂n; khiung-yong, chhṳ̍t-to lìm-am-é, kì chhai lî-ngì song he mò chhiang-li ke. 9Yèn-heu yit-ke chhai lî-ngì song chhiang-li ke ngìn oi sû ngiù-mà ke fôi, piong chhai yàng-ngoi yit-ke chhiang-li ke thi-fông. Liá-fôi oi pó-chhùn chhai ke-vi, nâ-lòi vi Yî-set-lie̍t fi-chung cho chhù lá-sap ke súi yung ke. Chṳp-hàng liá lî-ngì ke muk-tit he oi chhù-chhui. 10Sû ngiù-mà fôi ke ngìn ya yit-thin oi sé-chhiang sâm-fu, chhṳ̍t-to lìm-am-é, kì chhai lî-ngì song he mò chhiang-li ke. Liá thiàu-li oi sàng-cho Yî-set-lie̍t-ngìn lâu he̍t chhai kì-têu tông-chûng ke ngoi-chhu̍k-ngìn yún-yén ke li-kûi.”

Pen-tó Sṳ̂-thí

11“Pen-tó sṳ̂-thí ke ngìn chhai lî-ngì song chhiu chhit-ngit mò chhiang-li. 12Kì yit-thin oi chhai thi-sâm ngit lâu thi-chhit ngit yung súi kiet-chhiang chhṳ-kâ; án-ngiòng, kì chhiu chhiang-li lé. Na-he kì mò chhai thi-sâm ngit lâu thi-chhit ngit kiet-chhiang chhṳ-kâ, kì chhiu-he mò chhiang-li ke. 13Pen-tó sṳ̂-thí yu mò hi kiet-chhiang chhṳ-kâ ke ngìn he mò chhiang-li ke, yîn-vi chhù lá-sap ke súi mò hia chhai kì ke sṳ̂n-song. Kì tá-lá-sap Song-chú ke sṳn-chong-phùng, yit-thin oi tui Song-ti ke chṳ́-mìn chûng chhù-miàng.

14“Yû-ngìn sí chhai chong-phùng tú, tông-sṳ̀ chhai chong-phùng tú ke ngìn lâu hàng-ngi̍p chong-phùng ke ngìn chhiu chhit-ngit mò chhiang-li. 15Chong-phùng tú ke-têu mò koi-é ke yung-phín lâu vo̍k-é ya mò chhiang-li. 16Yû-ngìn chhai vuk ngoi-poi pen-tó pûn-ngìn chhṳ̀-sí ya-he chhṳ-yèn sí-thet ke ngìn, fe̍t-chá pen-tó sí-ngìn ke kut-thèu ya-he fùn-mu, kì chhiu chhit-ngit mò chhiang-li.

17“Ngì-têu oi nâ chhak ngiù-mà ke fôi, chhiu-he sêu-hó cho chhù-chhui yung ke, piong chhai vo̍k-thèu tú, kâ chhiang-súi, vi mò chhiang-li ke ngìn chhù-thet lá-sap. 18Chui-siên, yit-ke chhiang-li ke ngìn oi-nâ yit-kî ngiù-chhit-chhó vun chhai súi-tú, hia chhai chong-phùng lâu chong-phùng tú só-yû ke tûng-sî lâu ngìn sṳ̂n-song. Yèn-heu, chhiang-li ke ngìn oi hia-súi chhai ke pen-tó sí-ngìn kut-thèu, sṳ̂-thí, ya-he fùn-mu ke ngìn sṳ̂n-song. 19Chhai thi-sâm ngit lâu thi-chhit ngit, ke chhiang-li ke ngìn oi hia-súi chhai mò chhiang-li ke ngìn sṳ̂n-song. Thi-chhit ngit, kì oi kiet-chhiang ke-ngìn; ke-ngìn oi sé-chhiang sâm-fu, yung súi sé-sṳ̂n, cho hó yî-heu, tén ngit-thèu lo̍k-sân, kì chhiu chhiang-li lé.

20“Yû-ngìn chhai lî-ngì song mò chhiang-li yu mò kiet-chhiang chhṳ-kâ, kì hàn-he mò chhiang-li ke, yîn-vi chhù lá-sap ke súi mò hia chhai kì sṳ̂n-song. Kì tá-lá-sap Song-chú ke sṳn-chong-phùng, yit-thin oi tui Song-ti ke chṳ́-mìn chûng chhù-miàng. 21Ngì-têu oi sṳ-sṳ thoi-thoi chûn-sú liá thiàu-li. Ke hia-súi chhù lá-sap ke ngìn ya oi sé-chhiang sâm-fu; só-yû pen-tó ke súi ke ngìn chhṳ̍t-to lìm-am-é lûng-chúng mò chhiang-li. 22Mò chhiang-li ke ngìn só pen-tó ke tûng-sî ya chhiòn-phu mò chhiang-li; pen-tó liá-têu tûng-sî ke ngìn, chhṳ̍t-to lìm-am-é lûng-chúng mò chhiang-li.”

Currently Selected:

Mìn-su Ki 19: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)