Mìn-su Ki 17

Â-lùn ke Koái-kun-é

1Song-chú tui Mô-sî kóng: 2“Ngì oi fûn-fu Yî-set-lie̍t-ngìn pûn ngì sṳ̍p-ngi kî koái-kun-é, tui tak kî-chhu̍k ke liâng-chhiu nâ-chhut yit-kî, táng-kô oi siá kì chhṳ-kâ ke miàng. 3Oi chiông Â-lùn ke miàng siá chhai thoi-péu Li-vi ke koái-kun-é táng, yîn-vi tak kî-chhu̍k ke liâng-chhiu oi yû yit-kî koái-kun-é. 4Ngì oi chiông liá sṳ̍p-ngi kî koái-kun-é tai-to sṳn-chong-phùng, piong chhai yok-khui thèu-chhièn, chhiu-he Ngài lâu ngì-têu siông-fi ke só-chhai. 5Ngài só kién-sién ke-ngìn ke koái-kun-é voi sâng-ngà. Án-ngiòng, Ngài voi sṳ́ Yî-set-lie̍t-ngìn mài-yen ngì-têu ke fa sêu-thet, mò pûn Ngài chai thâng-tó.”

6Só-yî, Mô-sî fûn-fu Yî-set-lie̍t-ngìn tak kî-chhu̍k ke liâng-chhiu pûn kì yit-kî koái-kun-é, chúng-khiung sṳ̍p-ngi kî; Â-lùn ke koái-kun-é lâu khì-thâ ngìn ke koái-kun-é chhiòn-phu piong khiung-ha. 7Mô-sî chiông só-yû ke koái-kun-é piong-ngi̍p sṳn-chong-phùng, chhai yok-khui ke thèu-chhièn, Song-chú ke mien-chhièn.

8Thi-ngi ngit, Mô-sî to yok-khui ke sṳn-chong-phùng tî-poi hi, khon-tó ke thoi-péu Li-vi kî-chhu̍k Â-lùn ke koái-kun-é yí-kîn sâng-ngà, sâng fâ-pâu, yu khôi-fâ, kiet-chhut ke hen-yìn yí-kîn siuk lé! 9Mô-sî chhiu chiông só-yû ke koái-kun-é tui Song-chú mien-chhièn nâ chhut-lòi, pûn Yî-set-lie̍t-ngìn khon; kì-têu chhiòn-phu yû khon-tó. Kok liâng-chhiu chiông chhṳ-kâ ke koái-kun-é nâ chón-hi. 10Song-chú tui Mô-sî kóng: “Chiông Â-lùn ke koái-kun-é piong-chón yok-khui thèu-chhièn, oi pó-chhùn liá-kî koái-kun-é, lòi kín-ko phoi-ngia̍k ke ngìn, sṳ́ kì-têu m̀-kám ki-siu̍k mài-yen Ngài, miên-tet kì-têu sí-thet.” 11Mô-sî chhiu cheu Song-chú ke min-lin hi-cho.

12Yî-set-lie̍t-ngìn tui Mô-sî kóng: “Ngài-têu kôi-sí lé, ngài-têu chhám lé! 13Má-ngìn chiap-khiun Song-chú ke sṳn-chong-phùng, má-ngìn chhiu voi sí. Án-ngiòng, ngài-têu thin-chho̍k voi sí chhiang-chhiang lé!”

Currently Selected:

Mìn-su Ki 17: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)