Mìn-su Ki 16

Khó-lâ, Thai-thân, Â-pí-làn ke Poi-phan

1-2Yî-sṳ̂-ha̍p ke lai-é Khó-lâ su̍k Li-vi kî-chhu̍k ke Kô-hot chûng-chhu̍k; Khó-lâ poi-phan Mô-sî. Lâu kì khiung-ha ke yû Lî-phien kî-chhu̍k Yî-li-ap ke lióng-ke lai-é — Thai-thân lâu Â-pí-làn, pin Pí-le̍t ke lai-é Ôn. Nang-ngoi hàn-yû lióng-pak ńg-sṳ̍p ngìn he tui Yî-set-lie̍t fi-chung sién chhut-lòi, yû miàng-mong ke liâng-chhiu. 3Kì-têu chhi-si̍p fán-tui Mô-sî lâu Â-lùn, tui kì-têu kóng: “Ngì-têu thet ko-fun lé! Chhiòn fi-chung tak-sà he sṳn-kiet ke; Song-chú ya lâu ngài-têu thai-kâ thùng-chhai. Ngì-têu cho-má-ke khon-chhung chhṳ-kâ, chhêu-ko Song-chú ke fi-chung nè?”

4Mô-sî thâng-tó liá-fa chhiu phu̍k chhai thi-song khì-tó. 5Yèn-heu kì tui Khó-lâ lâu thèn kì ke ngìn kóng: “Thiên-kông chêu-sṳ̀n, Song-chú oi chṳ́-sṳ ngài-têu, má-ngìn he su̍k Kì ke, má-ngìn he sṳn-kiet ke; Kì oi ham su̍k Kì ke ngìn, chhiu-he Kì só kién-sién ke, chhai chi-thàn chiap-khiun Kì. 6-7Thiên-kông chêu-sṳ̀n, ngì lâu thèn ngì ke ngìn oi tai-tén hiông-lù, tî-poi chông fó-than fó lâu hiông, to chi-thàn ke-vi lòi. Yèn-heu ngài-têu khon, ngài-têu tông-chûng má-ngìn he Song-chú só kién-sién ke, má-ngìn chhiu-he sṳn-kiet ke. Ngì liá-têu Li-vi-ngìn chang-he thet ko-fun!”

8Mô-sî ki-siu̍k tui Khó-lâ kóng: “Ngì liá-têu Li-vi-ngìn, thâng ngài kóng! 9Yî-set-lie̍t ke Song-ti chiông ngì-têu tui fi-chung tông-chûng fûn-phe̍t chhut-lòi, sṳ́ ngì-têu cho-tet chiap-khiun Kì, chhai Song-chú ke sṳn-chong-phùng kûng-chok, yu khî chhai fi-chung mien-chhièn fu̍k-sṳ kì-têu. Ngì-têu ngin-vì liá he séu-khó sṳ-chhìn mâ? 10Kì pûn ngì-têu lâu khì-thâ ke Li-vi-ngìn cho-tet chiap-khiun Kì, ngì-têu hàn sióng-oi tet-tó chi-sṳ̂ ke chṳt-vi, he-mò? 11Ngì-têu mài-yen Â-lùn, khì-sṳ̍t, ngì-têu lâu ngì-têu ke thùng-tóng he chhai poi-phan Song-chú!”

12Mô-sî phai-ngìn hi ham Yî-li-ap ke lai-é Thai-thân lâu Â-pí-làn, chúng-he kì-têu kóng: “Ngài-têu m̀ hi! 13Ngì thu ngài-têu lì-khôi liù-nen-lâu-me̍t tông-phì ke Âi-khi̍p, hoi ngài-têu sí chhai khóng-yâ, liá hàn m̀-la he-mò? Ngì hàn-oi châ-khièn lòi-kón ngài-têu ô! 14Ngì pin mò thu ngài-têu hi-to liù-nen-lâu-me̍t tông-phì ke thú-thi, ya mò pûn ngài-têu thièn-thi lâu phù-thò-yèn cho ngài-têu ke sán-ngia̍p. Ngì kám oi khî-phien liá-têu ngìn mâ? Ngài-têu m̀ hi!”

15Mô-sî chhiu thai fat-khién. Kì tui Song-chú kóng: “Khiù Ngì m̀-hó chiap-su liá-têu ngìn ke chi-vu̍t. Ngài mò hoi-ko kì-têu yit-ke ngìn, ya m̀-sṳt chhióng-ko kì-têu yit-chak lì-è.”

16Mô-sî tui Khó-lâ kóng: “Thiên-kông-ngit ngì lâu thèn ngì ke lióng-pak ńg-sṳ̍p sà, chhiòn-phu oi to Song-chú ke sṳn-chong-phùng lòi; Â-lùn ya oi to ke-vi. 17Ngì-têu tak-sà oi nâ chhṳ-kâ ke hiông-lù, tî-poi chông-tén hiông, chiông kì tai-to Song-chú ke mien-chhièn.” 18Só-yî kì-têu tak-sà tai-tén hiông-lù lòi, tî-poi chông chho̍k-tén ke fó-than fó lâu hiông, thèn Mô-sî lâu Â-lùn, khiung-ha khî chhai sṳn-chong-phùng mùn-héu. 19Khó-lâ chhi-si̍p chhiòn fi-chung chhai sṳn-chong-phùng mùn-héu, mien-tui Mô-sî lâu Â-lùn khî-tén. Fut-yèn-kiên, Song-chú ke yùng-kông hiong chhiòn fi-chung hién-hien. 20Song-chú tui Mô-sî lâu Â-lùn kóng: 21“Ngì-têu khî khôi, lì liá-têu ngìn kha-yén têu-é! Ngài chit-sṳ̀ oi sêu-me̍t kì-têu.”

22Chúng-he, Mô-sî lâu Â-lùn phu̍k chhai thi-song, kóng: “Song-ti â, Ngì he só-yû sâng-miang ke ngièn-thèu. Yit-ke ngìn fam-chhui, Ngì chhiu hiong chhiòn fi-chung fat-khién he-mò?”

23Song-chú chhiu tui Mô-sî kóng: 24“Ngì lâu ngìn-mìn kóng, ham kì-têu yén-yén lì-khôi Khó-lâ, Thai-thân lâu Â-pí-làn ke chong-phùng.”

25Mô-sî khî hong-hí-lòi, hi-to Thai-thân lâu Â-pí-làn ke-vi; Yî-set-lie̍t ke-têu chóng-ló ya thèn kì hi. 26Kì fûn-fu ngìn-mìn kóng: “Ngì-têu lì-khôi liá-têu fái-ngìn ke chong-phùng, m̀-hó miâ kì-têu ke tûng-sî. Na-he ngì-têu m̀-thâng, ngì-têu chhiu voi yîn-vi kì-têu ke chhui lâu kì-têu khiung-ha sêu-me̍t.” 27Só-yî kì-têu lì-khôi Khó-lâ, Thai-thân lâu Â-pí-làn ke chong-phùng.

Thai-thân lâu Â-pí-làn tai-tén pû-ngiòng chṳ́-ńg chhut-lòi, khî chhai kì-têu ke chong-phùng mùn-héu. 28Mô-sî tui ngìn-mìn kóng: “Ngì-têu chhiu voi tî, he Song-chú phai ngài cho liá-têu sṳ, m̀-he ngài chhṳ-kâ oi án-ngiòng tui-fu kì-têu. 29Na-he liá-têu ngìn hàn-he chhiong yit-pân ngìn án-ngiòng sí, mò su-tó hìn-fa̍t, chhiu-he péu-sṳ Song-chú mò phai ngài lòi. 30Chúng-he, Song-chú na cho yit-khien chhiùng-lòi màng-sṳt thâng-ko ke sṳ, pûn thi lie̍t-khôi, thûn-thet liá-têu ngìn lâu kì-têu só-yû ke tûng-sî, sṳ́ kì-têu sâng-sâng tiet-lo̍k yîm-kiên, ngì-têu chhiu tî he liá-têu ngìn méu-sṳ Song-chú.”

31Mô-sî chang kóng-so̍t, Thai-thân lâu Â-pí-làn kiok-hâ ke thi chhiu lie̍t-khôi, 32chiông kì-têu lâu kì-têu vuk-hâ ke ngìn, pin só-yû thèn Khó-lâ ke ngìn lâu kì-têu ke tûng-sî, chhiòn-phu thûn-thet. 33Kì-têu sâng-sâng lâu kì-têu ke tûng-sî khiung-ha tiet-lo̍k yîm-kiên. Thi chhai kì-têu táng-kô yu ha̍p hí-lòi, kì-têu chhiu m̀ kien-thet. 34Só-yû chhai-chhòng ke Yî-set-lie̍t-ngìn thâng-tó kì-têu thai-kieu, chhiu chhiòn-phu thò-chéu, hêm-tén kóng: “Kiak-kiak chéu! Kiâng-pha thi ya voi thûn-me̍t ngài-têu!”

35Chiap-tén, yû fó tui Song-chú mien-chhièn chhut-lòi, sêu-me̍t ke hien-hiông ke lióng-pak ńg-sṳ̍p sà.

Chhú-lî Ke-têu Ngìn ke Hiông-lù

36Song-chú tui Mô-sî kóng: 37“Ngì hi lâu chi-sṳ̂ Â-lùn ke lai-é Yî-li-â-sat kóng, ham kì chiông ke-têu pûn fó sêu-sí ke ngìn só liù hâ-lòi ke hiông-lù nâ-chéu, chiông hiông-lù tú ke fó-than fó ve chhai phe̍t ke só-chhai, yîn-vi hiông-lù he sṳn ke. 38Hiông-lù hien chhai Song-chú mien-chhièn ke sṳ̀, chhiu sàng-cho sṳn ke. Só-yî oi chiông ke-têu kôi-sí ke chhui-ngìn ke hiông-lù nâ-chéu, tá-chho pho̍k-phién, vi chi-thàn cho yit-ke koi-é. Kì oi cho Yî-set-lie̍t-ngìn ke kín-kie.” 39Só-yî chi-sṳ̂ Yî-li-â-sat chiông ke-têu pûn fó sêu-sí ke ngìn só hien ke thùng hiông-lù nâ-lòi, tá-chho pho̍k-phién, vi chi-thàn cho yit-ke koi-é. 40Liá he oi kín-kie Yî-set-lie̍t-ngìn, na-m̀-he Â-lùn ke heu-thoi, chhie̍t-tui cho-m̀-tet lòi-to Song-chú ke mien-chhièn sêu-hiông; vì-fam ke ngìn, chhiu voi chhiong Khó-lâ lâu thèn kì ke ngìn khiung-yong. Liá-sṳ he cheu Song-chú thûng-ko Mô-sî min-lin Yî-li-â-sat phan ke.

Â-lùn Kiu Ngìn-mìn

41Thi-ngi ngit, Yî-set-lie̍t chhiòn fi-chung mài-yen Mô-sî lâu Â-lùn kóng: “Ngì-têu chhṳ̀-sí Song-chú ke chṳ́-mìn lé.” 42Kì-têu chhi-si̍p koai-yen Mô-sî lâu Â-lùn yî-heu, chón-sṳ̂n hiong sṳn-chong-phùng. Kì-têu khon-tó yùn châ-tén sṳn-chong-phùng; yû Song-chú ke yùng-kông chhut-hien. 43Mô-sî lâu Â-lùn to sṳn-chong-phùng thèu-chhièn khî-tén; 44Song-chú fûn-fu Mô-sî kóng: 45“Lì liá-têu ngìn kha-yén têu-é, Ngài chit-sṳ̀ oi sêu-me̍t kì-têu!”

Kì lióng-sà phu̍k chhai thi-song; 46Mô-sî tui Â-lùn kóng: “Nâ ngì ke hiông-lù lòi, chiông chi-thàn táng ke fó-than fó piong chhai tî-poi, chai piong yit-si̍t-é hiông chhai fó táng-kô, kiak-kiak tai-to ngìn-mìn ke-vi, vi kì-têu su̍k-chhui. Kiak-kiak hi! Song-chú yí-kîn fat-khién, ngìn-mìn khôi-sṳ́ pot-vûn lé.” 47Â-lùn thâng-chhiùng Mô-sî ke fa, tai-tén hiông-lù chéu-ngi̍p chhi-si̍p ke ngìn-khiùn tông-chûng. Kì khon-tó vûn-é yí-kîn fat-chok, chhiu chiông hiông piong chhai fó-than fó táng-kô, vi ngìn-mìn su̍k-chhui. 48Kì khî chhai sâng-ngìn lâu sí-ngìn tông-chûng, vûn-é chhiu thìn hâ-lòi. 49Chhù-liáu yîn-vi Khó-lâ chho-fán sí-thet ke ngìn yî-ngoi, liá-pái yîn-vi pot-vûn sí-thet ke chúng-khiung yû yit-van si-chhiên chhit-pak ngìn. 50Pot-vûn thìn hâ-lòi yî-heu, Â-lùn chón-to sṳn-chong-phùng mùn-héu Mô-sî ke-vi.

Currently Selected:

Mìn-su Ki 16: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)