Mìn-su Ki 14

Yî-set-lie̍t-ngìn Fat Yen-ngièn

1Yî-set-lie̍t chhiòn fi-chung theu-ya chhin-chhàu, khôi-sâng thai-kieu. 2Kì-têu mài-yen Mô-sî lâu Â-lùn kóng: “Ngài-têu sí chhai Âi-khi̍p ya-he sí chhai liá khóng-yâ hàn-kha yàng! 3Song-chú cho-má-ke oi thu ngài-têu to ke thi-fông hi? Ngài-têu yit-thin voi pûn-ngìn chhṳ̀-sí, ngài-têu ke pû-ngiòng chṳ́-ńg yit-thin voi pûn-ngìn chok-chéu. Ngài-têu to-chón Âi-khi̍p hi kám m̀-he kha-hó?” 4Kì-têu pí-chhṳ́ kóng: “Ngài-têu lòi-sién yit-ke liâng-chhiu tai ngài-têu chón-hi Âi-khi̍p!”

5Mô-sî lâu Â-lùn chhiu phu̍k chhai Yî-set-lie̍t chhiòn fi-chung mien-chhièn; 6Nun ke lai-é Yok-sû-â lâu Yâ-fù-nì ke lai-é Kâ-le̍t liá lióng-ke tham-é pî-sông to chhá-lan sâm-fu, 7tui ngìn-mìn kóng: “Ngài-têu só tá-tham ke ke-te thú-thi he fî-sòng phì ke thú-thi. 8Na-he Song-chú fôn-hí ngài-têu, Kì voi thu ngài-têu to ke-vi, chiông ke-te liù-nen-lâu-me̍t, chhin-phì ke thú-thi su-pûn ngài-têu. 9Ngì-têu m̀-hó phoi-ngia̍k Song-chú, ya m̀-sṳ́ kiâng ke thi-fông ke ngìn-mìn. Ngài-têu voi chhin yùng-yi chṳ̂n-fu̍k kì-têu. Song-chú lâu ngài-têu thùng-chhai; Kì yí-kîn tá-yàng ke-têu pó-fu kì-têu ke sṳ̀n-mìn, só-yî ngì-têu m̀-sṳ́ kiâng!” 10Chúng-he chhiòn fi-chung vî-hia̍p kì-têu, oi yung sa̍k-thèu tá-sí kì lióng-sà. Fut-yèn, Yî-set-lie̍t-ngìn chhiòn-phu khon-tó Song-chú ke yùng-kông chhut-hien chhai sṳn-chong-phùng táng-kô.

Mô-sî vi Ngìn-mìn Khì-tó

11Song-chú tui Mô-sî kóng: “Liá-têu ngìn méu-sṳ Ngài oi to kí-sṳ̀ nè? Kì-têu m̀ siông-sin Ngài oi to kí-sṳ̀ nè? Sûi-yèn Ngài chhai kì-têu tông-chûng hàng án-tô sṳ̀n-chiak, kì-têu hàn-he m̀-sin Ngài. 12Ngài oi sṳ́ kì-têu pot-vûn lòi fí-me̍t kì-têu, chúng-he Ngài oi sṳ́ ngì lâu ngì ke chṳ́-sûn sàng-cho thai-koet, pí kì-têu kha khiòng-thai!”

13Chúng-he, Mô-sî tui Song-chú kóng: “Ngì yung Ngì ke thai-nèn thu liá-têu ngìn lì-khôi Âi-khi̍p. Âi-khi̍p-ngìn thâng-tó Ngì tui Ngì ke chṳ́-mìn só-cho ke sṳ yî-heu, 14kì-têu voi lâu liá thi-fông ke ngìn kóng. Liá thi-fông ke ngìn yí-kîn thâng-kóng Ngì — Song-chú lâu ngài-têu thùng-chhai ke sêu-sit. Ngì ke yùn thìn chhai ngài-têu táng-kô ke sṳ̀, Ngì chhai ngài-têu mien-chhièn hién-hien. Ngit-sṳ̀-thèu, Ngì chhai yùn-chhû tú thu ngài-têu; am-pû-sṳ̀, Ngì chhai fó-chhû tú thu ngài-têu. 15Liá-ha, na-he Ngì chiông Ngì ke chṳ́-mìn chhṳ̀ chhiang-chhiang, ke-têu thâng-ko Ngì miàng-sâng ke koet-kâ voi kóng: 16‘Song-chú chhai khóng-yâ chhṳ̀-thet Kì ke chṳ́-mìn, yîn-vi Kì mò fap-thu thu kì-têu chin-ngi̍p Kì só yin-hí su-pûn kì-têu ke thú-thi hi.’ 17Só-yî, Chú â, ngài liá-ha khiù Ngì hién-chhut Ngì ke thai-nèn, sṳ̍t-hien Ngì ke yin-hí. Ngì sṳt kóng-ko: 18‘Ngài he Song-chú; Ngài m̀-voi sùi-phien fat-khién. Ngài yû fûng-sṳn ke chhṳ̀-oi; Ngài sa-miên chhui-ok lâu ko-fam. Chúng-he, Ngài m̀-voi chiông yû-chhui ke chún-cho mò-chhui, Ngài yit-thin voi yîn-vi yà-ôi ke chhui lòi chit-fa̍t kì-têu ke chṳ́-ńg, chhṳ̍t-to sâm-si thoi.’ 19Song-chú â, khiù Ngì cheu Ngì ví-thai put-pien ke chhṳ̀-oi sa-miên liá-têu ngìn ke chhui, chhiu-chhiong kì-têu tui lì-khôi Âi-khi̍p yî-lòi Ngì yit-chhṳ̍t sa-miên kì-têu án-ngiòng.”

20Song-chú en-kóng: “Ngài cheu ngì só khiù ke sa-miên kì-têu. 21Chúng-he, Ngài chṳ́-tén Ngài ke yún-sên fat-sṳ: Chhiu-chhiong Ngài ke yùng-kông chhûng-mân chhiòn-thi án khok-sṳ̍t, 22liá-têu ngìn lièn yit-sà m̀-voi ngi̍p-hi ke thú-thi. Kì-têu khon-ko Ngài ke yùng-kông, khon-ko Ngài chhai Âi-khi̍p lâu khóng-yâ só hàng ke sṳ̀n-chiak, hàn-he lièn-lièn sṳ-tham Ngài, m̀ thâng-chhiùng Ngài. 23Kì-têu yit-thin cho-m̀-tet chin-ngi̍p Ngài só yin-hí pûn kì-têu chú-siên ke thú-thi; méu-sṳ Ngài ke ngìn, mò yit-sà cho-tet ngi̍p-hi. 24Chúng-he Ngài ke phu̍k-ngìn Kâ-le̍t mò lâu kì-têu khiung-yong; kì yit-chhṳ̍t tui Ngài chûng-sîm, só-yî, Ngài voi thu kì to ke-te kì tá-tham ko ke thú-thi; kì ke heu-thoi ya voi tet-tó ke-thi cho sán-ngia̍p. 25Â-mâ-li̍t-ngìn lâu Kâ-nàm-ngìn liá-ha he̍t chhai sân-lak, só-yî, thiên-kông-ngit ngì-têu oi to-chón hi, hiong Fùng-hói lu-song ke khóng-yâ hàng.”

Song-chú Chit-fa̍t Mài-yen Kì ke Ngìn-mìn

26Song-chú tui Mô-sî lâu Â-lùn kóng: 27“Liá-têu sià-ok ke ngìn-mìn mài-yen Ngài oi to kí-sṳ̀ nè? Kì-têu ke koai-yen Ngài chhiòn-phu thâng-tó lé! 28Ngì-têu hi lâu kì-têu kóng: ‘Ngài chṳ́-tén Ngài ke yún-sên fat-sṳ: Ngài voi cheu ngì-têu só khiù ke tui-fu ngì-têu. Ngài he Song-chú; Ngài án-ngiòng siên-pu lé. 29Ngì-têu chhiòn-phu voi sí; ngì-têu ke sṳ̂-thí voi vang-to liá khóng-yâ. Yîn-vi ngì-têu koai-yen Ngài, ngì-têu tông-chûng ngi-sṳ̍p se yî-song ke ngìn, mò yit-sà cho-tet chin-ngi̍p ke-thi. 30Ngài sṳt tap-yin pûn ngì-têu he̍t chhai ke-vi; chúng-he chhù-liáu Yâ-fù-nì ke lai-é Kâ-le̍t lâu Nun ke lai-é Yok-sû-â, mò yit-sà cho-tet ngi̍p-hi. 31Ngì-têu láu-tó ngì-têu ke chṳ́-ńg voi pûn-ngìn chok-hi, chúng-he Ngài voi thu kì-têu chin-ngi̍p ngì-têu só hi-chhie̍t ke thú-thi; ke-thi voi sàng-cho kì-têu ke kâ-hiông. 32Lun-tó ngì-têu, ngì-têu ke sṳ̂-thí voi vang chhai liá khóng-yâ. 33Ngì-têu ke chṳ́-ńg voi vi ngì-têu ke m̀-sin su chit-fa̍t, chhai liá khóng-yâ liù-long si-sṳ̍p ngièn, chhṳ̍t-to ngì-têu chhiòn-phu sí chhiang-chhiang. 34Ngì-têu voi tâm-tông chhṳ-kâ ke chhui, yit-ngit son yit-ngièn, ngì-têu tá-tham ke-thi si-sṳ̍p ngit, chhiu voi su si-sṳ̍p ngièn ke thung-khú. Án-ngiòng, ngì-têu chhiu tî Ngài lâu ngì-têu ye̍t-lòi ye̍t m̀-chhîn lé. 35Ngài fat-sṳ oi án-ngiòng tui-fu ngì liá-têu chhi-si̍p hí-lòi phoi-ngia̍k Ngài ke sià-ok ngìn-mìn. Ngì-têu mî-yit sà chhiòn-phu voi sí chhai liá khóng-yâ. Ngài he Song-chú; Ngài án-ngiòng siên-pu lé.’ ”

36-37Mô-sî phai-hi tá-tham ke-thi ke tham-é chón-lòi, chhòn-chhut yû-koân ke-thi mò khok-sṳ̍t ke po-ko, hoi chhiòn fi-chung koai-yen Song-chú. Só-yî Song-chú sṳ́ liá-têu ngìn pot-vûn, kì-têu chhiu sí-thet. 38Sṳ̍p-ngi ke tham-é chṳ́-yû Nun ke lai-é Yok-sû-â lâu Yâ-fù-nì ke lai-é Kâ-le̍t mò sí.

Thi-yit Pái Chin-kûng Kâ-nàm

(Sṳ̂n-min Ki 1:41-46)

39Mô-sî chiông Song-chú ke fa lâu Yî-set-lie̍t-ngìn kóng, kì-têu chhiu chhin pî-ôi. 40Thi-ngi ngit tá-chó, kì-têu chhut-fat chin-kûng sân-khî. Kì-têu kóng: “Ngài-têu khok-sṳ̍t yû fam-chhui; ngài-têu liá-ha oi sông-hi Song-chú yin-hí ngài-têu ke thi-fông.”

41Chúng-he Mô-sî kóng: “Ngì-têu liá-ha cho-má-ke m̀ thâng-chhiùng Song-chú ke fa nè? Ngì-têu yit-thin m̀-voi sṳ̀n-kûng! 42M̀-hó sông-hi! Song-chú m̀ lâu ngì-têu thùng-chhai, ngì-têu voi pûn sù-thi̍t tá-phai. 43Ngì-têu tù-tó Â-mâ-li̍t-ngìn lâu Kâ-nàm-ngìn, yit-thin voi pûn kì-têu chhṳ̀-sí. Song-chú m̀ lâu ngì-têu thùng-chhai, yîn-vi ngì-têu lì-khôi Kì, m̀ thèn Kì.”

44Sûi-yèn Song-chú ke yok-khui lâu Mô-sî mò lì-khôi yàng-thi, kì-têu hàn-he khiòng-khiòng sông-sân hi. 45Só-yî, he̍t chhai ke sân-khî ke Â-mâ-li̍t-ngìn lâu Kâ-nàm-ngìn hâ-lòi kûng-tá kì-têu, tá-phai kì-têu, yit-chhṳ̍t chiông kì-têu kiuk-to Hò-ngí-mâ.

Currently Selected:

Mìn-su Ki 14: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Popular Bible Verses from
Mìn-su Ki 14

Videos for Mìn-su Ki 14

Meod / Strength

BibleProject

Yakhal / Hope

BibleProject

Numbers 13-14

Spoken Gospel

Mìn-su Ki 14

Popular Bible Verses from
Mìn-su Ki 14

Videos for Mìn-su Ki 14

Meod / Strength

Yakhal / Hope

Numbers 13-14

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Mìn-su Ki 14

Mìn-su Ki 14

Popular Bible Verses from Mìn-su Ki 14

Videos for Mìn-su Ki 14

Meod / Strength

Yakhal / Hope

Numbers 13-14

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Mìn-su Ki 14

Popular Bible Verses from
Mìn-su Ki 14