Nâ-fùng Sû 1

1Hâ-poi he yû-koân Nì-nì-mì ke sin-sit, he ki-liu̍k Yî-le̍t-kô-sṳ̂-ngìn Nâ-fùng só khon-tó ke yi-siong.

Song-chú Hiong Nì-nì-mì Fat-khién

2Song-chú he tông-nâu sià-ok ke Song-ti, m̀-chún ngìn lâu Kì tui-li̍p;

Song-chú sṳ̍t-hàng po-fu̍k, khién hí-lòi fî-sòng li-hoi.

Kì chit-fa̍t lâu Kì chok-tui ke ngìn;

Kì hiong Kì ke sù-thi̍t thai fat-khién.

3Song-chú mò sùi-phien fat-khién, chúng-he thai-yû nèn-li̍t;

Kì chhie̍t-tui m̀-voi chiông yû-chhui ke chún-cho mò-chhui.

Song-chú hàng-ko ke só-chhai, chhiu kién-hí phau-fûng lâu liùng-kién-fûng;

yùn he Kì kîn-ko ke sṳ̀ kiok-hâ ke fôi-chhṳ̀n.

4Kì chit-phi hói, hói chhiu châu-thet;

Kì sṳ́ kông-hò pien-to châu-châu.

Kì sṳ́ Pâ-sân ke chhó-chhòng khû-kôn,

Kâ-me̍t-sân pien-vòng,

Lì-pâ-nun ke fâ chhia-thet.

5Khiùn-sân chhai Song-chú mien-chhièn kín-chûn;

sân-kông ya chhai Kì ke mien-chhièn yùng-thet.

Song-chú chhut-hien, thi chhiu chṳ́n-thung;

chhiòn sṳ-kie lûng-chúng pi̍t-pi̍t-chhat.

6Kì yit fat-khién, má-ngìn khî tet-he̍t nè?

Kì ke nu-hi, má-ngìn nai tet-hò nè?

Kì ke fat-khién chhiong fó sêu-to tông-mâng;

ngàm-sa̍k chhai Kì mien-chhièn liet-to sui-sui.

7Song-chú he chṳ-san ke,

Kì pó-fu chhai fam-nan chûng ke chṳ́-mìn;

Kì cheu-ku ke-têu sin-kho Kì ke ngìn.

8Kì chhiong pot thai-súi, chha̍t-tái sêu-me̍t Kì ke thi̍t-ngìn#1:8 “Kì ke thi̍t-ngìn” he kîn-kí yit-têu kú yi̍t-pún, Hî-pak-lòi-vùn he “kì ke só-chhai”, chṳ́ Nì-nì-mì.;

Kì chiông lâu Kì chok-tui ke ngìn kiuk ngi̍p-hi yîm-kiên.

9Ngì-têu sat má-ke yîm-mèu lòi fán-tui Song-chú nè?

Kì thin-chho̍k voi chiông ngì-têu fí-me̍t to chhiang-chhiang;

mò-ngìn yû khó-nèn chai fán-khong Kì yit-pái.

10Chhiong nùng kau-kau ke net-è lâu châu-châu ke ma̍k-kón,

ngì-têu chiú-chui ke ngìn voi pûn fó sêu chhiang-chhiang!

11Nì-nì-mì â, tui ngì ke-vi yû yit-ke kúi-kie tô-tôn ke ngìn chhut-lòi, yîm-mèu kûng-kit Song-chú. 12Song-chú tui Kì ke chṳ́-mìn Yù-thai án-ngiòng kóng: “Â-sut-ngìn sûi-yèn yu khiòng yu tô, kì-têu voi su fí-me̍t, pûn-ngìn chhù-thet. Ngài ke chṳ́-mìn â, Ngài sṳt sṳ́ ngì-têu su-khú, chúng-he Ngài m̀-voi chai ham ngì-têu su-khú lé. 13Ngài liá-ha oi kiet-suk Â-sut tui ngì-têu ke kón-hot, tá-thôn khún ngì-têu ke só-lien.”

14Hâ-poi he Song-chú koân-he Â-sut-ngìn ke siên-ko: “Su̍k ngì-têu miàng-hâ ke ngìn mò-hó chhòn-chúng. Ngài oi chhù-thet ngì-têu sṳ̀n-meu chûng ke ngiéu-siong. Ngài oi vi ngì-têu yi-phi chhúng-pû, yîn-vi ngì-têu fái-to mò chṳ̂-kiet sên-chhùn!”

15Khon â, yû po hó sêu-sit ke ngìn phàn-sân ko-liâng lòi! Kì lòi po fò-phìn ke hó sêu-sit! Yù-thai-ngìn â, oi khin-chuk ngì-têu ke chiet-khì, hiong Song-ti vàn ngì-têu só-hí ke ngien! Fái-ngìn m̀-voi chai lòi chhîm-fam ngì-têu ke thú-thi. Kì-têu yí-kîn chhiòn-phu sêu-me̍t lé.

Currently Selected:

Nâ-fùng Sû 1: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)