Mì-kâ Sû 4

Song-chú Chóng-kón Sṳ-kie Fò-phìn

(Yî-soi-â Sû 2:2-4)

1To chui-mî ke ngit-è,

Song-chú sṳn-thien ke sân thin-chho̍k voi kien-li̍p chhai khiùn-sân ke táng-kô,

kô-kô chhai-song, chhêu-ko chung-sân.

Chhin-tô mìn-chhu̍k chhiòn-phu voi liù hiong liá sân;

2van-koet voi chhi-si̍p chhièn-lòi, kóng:

Lòi â, ngài-têu khiung-ha sông-hi Song-chú ke sân#4:2 “Song-chú ke sân” chṳ́ Siak-ôn-sân, liá sân he Yâ-lu-sat-lâng-sàng ke yit phu-fun, sṳn-thien chhai liá sân-táng.,

khiung-ha lòi-hi Ngâ-kok Song-ti ke sṳn-thien.

Kì voi chṳ́-kau ngài-têu yin-kôi hàng ke tho;

ngài-têu ya oi hàng Kì só chṳ́-sṳ ke lu.

Song-chú ke kau-hiun tui Siak-ôn fat-chhut;

Kì ke sin-sit tui Yâ-lu-sat-lâng chhòn chhut-lòi.

3Kì voi kié-kiet mìn-chhu̍k kiên ke kiu-fun,

vi yén-fông khiòng-sṳn ke koet thiàu-kié chên-tôn.

Kì-têu voi chiông tô-kiam tá-cho lài-thèu,

chiông màu-chhiông tá-cho liàm-è.

Koet-chi kiên m̀-voi yû siông-chhṳ̀,

kì-têu ya m̀-sṳ́ chai ho̍k-si̍p chan-chên.

4Tak-sà oi chhai chhṳ-kâ ke phù-thò yèn-chûng,

chhai vù-fâ-kó-su hâ, hióng-su thai-phìn;

mò-ngìn voi hoi kì-têu chho̍k-kiâng.

Song-chú — Van-kiûn ke Ngièn-soi án-ngiòng yin-hí lé.

5Sûi-yèn lie̍t-koet chhiòn-phu kin-pai, fu̍k-sṳ kì-têu chhṳ-kâ ke sṳ̀n-mìn, chúng-he ngài-têu oi kin-pai, fu̍k-sṳ Song-chú — ngài-têu ke Song-ti, chhṳ̍t-to yún-yún yén-yén.

Yî-set-lie̍t-ngìn To-chón Pún-koet

6Song-chú kóng: “Ngài chit-fa̍t Ngài ke chṳ́-mìn, chúng-he to ke-ngit, Ngài oi chiông liù-mòng chhai kok-koet ke chṳ́-mìn chhi-si̍p cho yit-ha. 7Ngài oi sṳ́ só-chhûn ke chṳ́-mìn sàng-cho fu̍k-hîn ke chúng-chṳ́, ngiôn-ngio̍k sṳt-san ke, sàng-cho khiòng-sṳn ke koet-kâ. Ngài chhṳ-kâ oi chhai Siak-ôn-sân thúng-chhṳ kì-têu, chhiùng-kîm chhṳ̍t-to yún-yén.”

8Yâ-lu-sat-lâng â, ngì chhiong sú-mong-thòi lâu sàng-pó pó-fu Song-ti ke yòng-khiùn; ngì chiông-lòi voi fu̍k-koet; ngì oi chhùng-sîn sàng-cho kîn-sàng.

9Liá-ha ngì cho-má-ke thai-sâng chhin-kieu? Cho-má-ke chhiong sán-fu chhṳn-thung to mò-kat mò-sat? Ngì mò kiûn-vòng he-mò? Ngì ke chhâm-mèu chhiòn-phu sí chhiang-chhiang he-mò? 10Siak-ôn ke ngìn-mìn â, ngì-têu oi chhiong sán-fu chhṳn-thung, fî-sòng thung-khú; yîn-vi ngì-têu chhiu oi lì-khôi liá-sàng, hi he̍t chhai fông-thi. Ngì-têu yit-thin voi pûn-ngìn chok-to Pâ-pí-lùn hi; chúng-he chhai ke-vi, Song-chú voi chṳ́n-kiu ngì-têu, tui thi̍t-ngìn sú-chûng chiông ngì-têu kiu-su̍k chhut-lòi.

11Liá-ha chhin-tô koet-kâ lièn-ha̍p hí-lòi kûng-kit ngì. Kì-têu kóng: “Ngài-têu lòi tá-lá-sap Yâ-lu-sat-lâng! Ngài-têu oi khon-tén Siak-ôn fí-me̍t!” 12Chúng-he kì-têu m̀-tî Song-chú ke kie-va̍k, m̀-tî Song-chú chiông kì-têu chhi-si̍p khiung-ha he oi chit-fa̍t kì-têu, chhiong nùng-mìn chiông vò-pá sû-to tá-kuk-chhòng hi tá khiung-yong.

13Song-chú kóng: “Siak-ôn ke ngìn-mìn â, hong hí-lòi! Chhiong ngiù tha̍p-kuk án-ngiòng hi hìn-fa̍t ngì-têu ke thi̍t-ngìn! Ngài oi sṳ́ ngì-têu khiòng-chong to chhiong sâng thiet-kok thùng-thài ke ngiù-kú. Ngì-têu oi sêu-me̍t chhin-tô koet-kâ, chiông kì-têu yung phau-li̍t chhióng-lòi ke chhòi-vu̍t hien-pûn Ngài — thiên-ha ke Chú-chái.”

Currently Selected:

Mì-kâ Sû 4: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)