Mì-kâ Sû 3

Mì-kâ Chit-phi Yî-set-lie̍t ke Liâng-chhiu

1Ngài kóng: Yî-set-lie̍t ke liâng-chhiu â, ngì-têu oi thâng! Ngì-têu pún-lòi chhiu yin-kôi chú-chhṳ̀ chṳn-ngi, 2chúng-he ngì-têu fán-chón nâu san-liòng, fôn-hí chhui-ok. Ngì-têu chiông Ngài ke chṳ́-mìn sâng-sâng pok-phì, yu tui kì-têu ke kut-thèu koat-hâ ngiuk lòi. 3Ngì-têu sṳ̍t Ngài chṳ́-mìn ke ngiuk, pok kì-têu ke phì, tá-sui kì-têu ke kut-thèu, chhiong chhiet-ngiuk lo̍k-vo̍k án-ngiòng to̍k mièn-mièn. 4Yû yit-ngit, ngì-têu oi khiù-ham Song-chú, chúng-he Kì m̀-tap ngì-têu. Ke-sṳ̀ Kì voi êm-mien m̀-thâng ngì-têu ke khì-tó, yîn-vi ngì-têu cho tông-tô fái-sṳ.

5Ke-têu siên-tî mì-fe̍t Ngài ke chṳ́-mìn. Yû yit-héu fan hó-sṳ̍t, kì-têu chhiu kóng: “Thiên-ha thai-phìn”; chúng-he tui ke-têu mò pûn kì-têu fan sṳ̍t ke, kì-têu chhiu yung chan-chên lòi hak ngìn. Song-chú tui liá-chúng siên-tî kóng: 6“Siên-tî â, ngit-thèu lo̍k-sân lé, ngì-têu ke hó ngit-è ko-thet lé. Ngì-têu vû-am ke ngit-è to lé, ngì-têu voi mò yi-siong hó khon, mò yi-ngièn hó kóng.” 7Ke-têu hàng sià-su̍t ke lâu puk-koa ke, voi yîn-vi só yi-ngièn ke sṳ mò sṳ̍t-hien chhiu sṳt mien-chṳ́, yîn-vi só-khiù ke sṳ mò tet-tó Song-ti ke yin-tap chhiu tông kien-seu.

8Lun-tó ngài, Song-chú ke Lìn lâu nèn-li̍t chhûng-mân ngài. Kì su-pûn ngài chṳn-ngi lâu yúng-hi, lòi chṳ́-chit Yî-set-lie̍t-ngìn ke chhui. 9Yî-set-lie̍t ke liâng-chhiu â, thâng ngài kóng! Ngì-têu nâu chṳn-ngi, tiên-to sṳ-fî. 10Ngì-têu chiông Song-ti ke sàng Yâ-lu-sat-lâng kói-kien cho liù ngìn-hiet lâu chhui-ok ke sàng. 11Sàng-tú ke kôn-yèn vi-tó fùng-pâu phan-sṳ, chi-sṳ̂ vi-tó kûng-chhièn kóng-kié fap-li̍t, siên-tî vi-tó kîm-chhièn puk-koa. Kì-têu hàn láu-tó Song-chú he kì-têu ke kho-sân. Kì-têu kóng: “Song-chú kám m̀-he lâu ngài-têu khiung-ha? Ngài-têu m̀-voi tù-tó châi-nan.”

12Só-yî, yîn-vi ngì-têu, Siak-ôn voi chhiong thièn-thi pûn-ngìn lài pién chón-lòi; Yâ-lu-sat-lâng voi pien-cho fông-phû; hí sṳn-thien ke sân voi pien-cho su-lìm#3:12 Chhâm-kháu Yâ-li-mí Sû 26:18..

Currently Selected:

Mì-kâ Sû 3: THV12Rdb

Highlight

Copy

Want to have your highlights saved across all your devices? Sign up or sign in