Li-vi Ki 23

Chûng-kau Chiet-khì

1Song-chú fûn-fu Mô-sî 2hiong Yî-set-lie̍t-ngìn kóng: “Yî-ha he Ngài — Song-chú só thin ke chiet-khì; chhai chiet-khì nui, ngì-têu oi siên-pu kí-hàng sṳn-fi, lòi kin-pai Song-chú.

Ôn-sit-ngit

3“Yit lî-pai ngì-têu yû liuk-ngit hó cho-se, chúng-he thi-chhit ngit he sṳ̀n-sṳn ke ôn-sit-ngit, ngì-têu yit-thin oi hiet-khun. Liá-ngit, ngì-têu má-ke se chhiu m̀-hó cho, oi chhi-si̍p kin-pai. Mò-lun ngì-têu he̍t chhai nai-vi, ôn-sit-ngit he Song-chú ke.

Phàn-ko-chiet lâu Chhù-kau-chiet

(Mìn-su Ki 28:16-25)

4“Yî-ha he Song-chú ke chiet-khì, chhai liá-têu ngit-è tông-chûng ngì-têu oi siên-pu kí-hàng sṳn-fi. 5Mî-ngièn châng-ngie̍t sṳ̍p-si, tui lìm-am-é khôi-sṳ́ chhiu-he Song-chú ke Phàn-ko-chiet. 6Châng-ngie̍t sṳ̍p-ńg khôi-sṳ́ chhiu-he hiong Song-chú sú ke Chhù-kau-chiet; chhit-ngit nui, ngì-têu oi sṳ̍t vù-kau-piáng. 7Liá chiet-khì ke thi-yit ngit, ngì-têu oi chhi-si̍p kin-pai Song-chú, ngit-sòng yit-chhiet ke kûng-chok tû m̀-hó cho. 8Chhai liá chhit-ngit nui tak-ngit oi hiong Song-chú hien fó-chi. Thi-chhit ngit, ngì-têu oi chai chhi-si̍p kin-pai Song-chú, ngit-sòng yit-chhiet ke kûng-chok tû m̀-hó cho.”

Sîn Sû-sṳ̀n ke Ńg-kuk

9Song-chú fûn-fu Mô-sî 10hiong Yî-set-lie̍t-ngìn kóng: “Chin-ngi̍p Ngài — Song-chú só su-pûn ngì-têu ke thú-thi yî-heu, tak-pái sû-kot, ngì-têu oi nâ chui-siên sû-kot ke yit-khún ńg-kuk to chi-sṳ̂ ke-vi; 11kì oi chiông liá yit-khún chhai Song-chú mien-chhièn yèu kí-ha, sṳ́ ngì-têu tet-tó Song-chú ke chiap-na̍p. Chi-sṳ̂ oi chhai ôn-sit-ngit ke thi-ngi ngit chiông liá-khún yèu kí-ha. 12Yèu liá-khún ńg-kuk ke-ngit, ngì-têu oi chiông yit-chak mò khiet-tiám yit-se thai ke mièn-yòng-kú hien-pûn Song-chú cho sêu-fa-chi; 13thùng-sṳ̀ oi hien lióng kûng-kîn kiâu kám-lám-yù ke yu-mien-fún cho su-chi, chiông kì sêu-hien cho chhîn-hiông ke lî-vu̍t hien-pûn Song-chú, ya oi hien yit kûng-sṳ̂n ke chi-chiú. 14Sîn sû-sṳ̀n ke ńg-kuk, mò-lun he sâng ke, phoi-su̍k ke, ya-he phoi-cho piáng ke, oi tén-to ngì-têu hiong Song-ti hien chi-vu̍t heu chang cho-tet sṳ̍t. Ngì-têu ke heu-thoi, mò-lun he̍t chhai nai-vi, oi yún-yén chûn-sú liá thiàu-li.

Ńg-sùn Sû-kot-chiet

(Mìn-su Ki 28:26-31)

15“Oi tui ôn-sit-ngit ke thi-ngi ngit, chhiu-he ngì-têu hien yit-khún ńg-kuk cho yèu-chi pûn Song-chú ke-ngit son-hí, ngì-têu oi son-mân chhit lî-pai. 16To thi ńg-sṳ̍p ngit, chhiu-he thi-chhit ke ôn-sit-ngit ke thi-ngi ngit, ngì-têu oi chiông sîn sû-sṳ̀n ke ńg-kuk cho su-chi hien-pûn Song-chú. 17Tak-kâ oi tai-lòi lióng-te piáng, hien-pûn Song-chú cho yèu-chi. Tak-te piáng oi yung lióng kûng-kîn yu-mien-fún kâ fat-fún lòi-phoi, cho sîn sû-sṳ̀n ke chi-vu̍t hien-pûn Song-chú. 18Chhù-liáu piáng, ngì-têu oi hien chhit-chak yit-se thai, mò khiet-tiám ke mièn-yòng-kú, yit-chak se ngiù-kú, lâu lióng-chak mièn-yòng-kú. Liá-têu thèu-sâng oi lâu su-chi lâu chi-chiú khiung-ha cho sêu-fa-chi hien-pûn Song-chú. Sên-ngì ke hiông-hi he Song-chú só fôn-hí ke. 19Ngì-têu ya oi hien yit-chak sân-yòng-kú cho su̍k-chhui-chi, lióng-chak yit-se thai ke mièn-yòng-kú cho phìn-ôn-chi. 20Chi-sṳ̂ oi chiông piáng lâu lióng-chak mièn-yòng-kú cho yèu-chi, chhai Song-chú mien-chhièn yèu kí-ha, yèn-heu kûi-pûn ke-têu chi-sṳ̂; liá-têu chi-vu̍t he sṳn ke. 21Ke-ngit, ngì-têu oi chhi-si̍p kin-pai Song-chú, ngit-sòng yit-chhiet ke kûng-chok tû m̀-hó cho. Ngì-têu ke heu-thoi, mò-lun he̍t chhai nai-vi, oi yún-yén chûn-sú liá thiàu-li.

22“Sû-kot ke sṳ̀, ngì-têu cho-m̀-tet kot thièn-sùn ke ńg-kuk, ya cho-m̀-tet fì-thèu ngiâm tiet-hâ ke kuk-chhon; oi chiông liá-têu liù-pûn khiùng-khú ngìn lâu chhiam-he̍t ke lî-hak. Ngài he Song-chú — ngì-têu ke Song-ti.”

Sîn-ngièn

(Mìn-su Ki 29:1-6)

23Song-chú fûn-fu Mô-sî 24hiong Yî-set-lie̍t-ngìn kóng: “Ngì-têu tak-ngièn oi sú chhit-ngie̍t chhû-yit cho thi̍t-phe̍t ke ôn-sit-ngit; oi phùn yòng-kok cho ki-ngiam, thai-kâ chhi-si̍p lòi kin-pai Song-chú. 25Ngì-têu ngit-sòng yit-chhiet ke kûng-chok tû m̀-hó cho; oi hiong Song-chú hien fó-chi.”

Su̍k-chhui-ngit

(Mìn-su Ki 29:7-11)

26Song-chú tui Mô-sî kóng: 27“Tak-ngièn chhit-ngie̍t chhû-sṳ̍p he Su̍k-chhui-ngit. Ke-ngit, ngì-têu oi kim-sṳ̍t, khiet-khú chhṳ-kâ, oi chhi-si̍p kin-pai Song-chú, hiong Kì hien fó-chi. 28Ke-ngit, má-ke se tû m̀-hó cho, yîn-vi he Su̍k-chhui-ngit, oi chhai Song-chú — ngì-têu ke Song-ti mien-chhièn hàng su̍k-chhui-lî. 29Mò-lun má-ngìn, na chhai ke-ngit mò kim-sṳ̍t, mò khiet-khú chhṳ-kâ, chhiu-oi tui Song-ti ke chṳ́-mìn chûng chhù-thet. 30Mò-lun má-ngìn, na chhai ke-ngit cho má-ke se, Ngài — Song-chú oi chhîn-chhṳ tui chṳ́-mìn chûng chiông kì chhù-thet. 31Ngì-têu má-ke se tû m̀-hó cho. Ngì-têu ke heu-thoi, mò-lun he̍t chhai nai-vi, oi yún-yén chûn-sú liá thiàu-li. 32Tui chhit-ngie̍t chhû-kiú ke lìm-am-é to thi-ngi ngit lìm-am-é, ngì-têu oi sú liá-ngit cho thi̍t-phe̍t ke ôn-sit-ngit, oi chhai liá-chham khì-kiên kim-sṳ̍t, khiet-khú chhṳ-kâ.”

Tap Liàu-è Chiet

(Mìn-su Ki 29:12-40)

33Song-chú fûn-fu Mô-sî 34hiong Yî-set-lie̍t-ngìn kóng: “Chhit-ngie̍t sṳ̍p-ńg he Tap Liàu-è Chiet, oi lièn-tén chhit-ngit hiong Song-chú sú liá-chiet. 35Tap Liàu-è Chiet ke thèu-yit ngit, ngì-têu oi chhi-si̍p kin-pai Song-chú, ngit-sòng yit-chhiet ke kûng-chok tû m̀-hó cho. 36Chhai chhit-ngit nui, ngì-têu oi tak-ngit hiong Song-chú hien fó-chi; thi-pat ngit, oi chai chhi-si̍p kin-pai Song-chú, hiong Kì hien fó-chi. Liá he ngiàm-siu̍k ke si̍p-fi, ngì-têu ngit-sòng yit-chhiet ke kûng-chok tû m̀-hó cho.

37(“Yî-song só-lie̍t ke ngit-è he Song-chú só thin ke chiet-khì. Ngì-têu oi chhi-si̍p kin-pai Song-chú, tak-ngit on-cheu thiàu-li hiong Kì hien fó-chi, sêu-fa-chi, su-chi, thèu-sâng-chi lâu chi-chiú. 38Chhù-liáu Song-chú só thin ke ôn-sit-ngit, ngì-têu hàn-oi sú liá-têu chiet-khì; chhù-liáu cheu-sòng ke sên-ngì, vàn-ngien-chi, lâu kâm-sîm-chi, ngì-têu hàn-oi hiong Song-chú hien liá-têu sên-ngì.)

39“Sû-kot vàn-sṳ̀n yî-heu, ngì-têu oi tui chhit-ngie̍t sṳ̍p-ńg khôi-sṳ́ sú Song-chú ke chiet-khì chhit-ngit. Thi-yit ngit he thi̍t-phe̍t ke ôn-sit-ngit; thi-pat ngit ya he thi̍t-phe̍t ke ôn-sit-ngit. 40Thi-yit ngit, ngì-têu oi nâ kó-su só-kiet chhin hó ke kó-chṳ́, chûng-su kî, meu-sṳn ke su-kî, lâu liû-su khoá, chhai Song-chú — ngì-têu ke Song-ti mien-chhièn fôn-hí khin-chuk chhit-ngit. 41Tak-ngièn chhit-ngie̍t, ngì-têu oi hiong Song-chú khin-chuk liá chiet-khì chhit-ngit. Ngì-têu oi sṳ-sṳ thoi-thoi chûn-sú liá thiàu-li. 42Só-yû Yî-set-lie̍t-ngìn chhiòn-phu oi chhai liàu-è tî-poi he̍t chhit-ngit, 43sṳ́ ngì-têu ke heu-thoi tî Ngài thu Yî-set-lie̍t-ngìn chhut Âi-khi̍p yî-heu, sṳt sṳ́ kì-têu he̍t chhai liàu-è tî-poi. Ngài he Song-chú — ngì-têu ke Song-ti.”

44Án-ngiòng, Mô-sî chhiu hiong Yî-set-lie̍t-ngìn siên-pu Song-chú só thin ke chiet-khì ke thiàu-li.

Currently Selected:

Li-vi Ki 23: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Popular Bible Verses from
Li-vi Ki 23

Videos for Li-vi Ki 23

Sabbath

BibleProject

Leviticus 23-24

Spoken Gospel

Li-vi Ki 23

Popular Bible Verses from
Li-vi Ki 23

Videos for Li-vi Ki 23

Sabbath

Leviticus 23-24

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Li-vi Ki 23

Li-vi Ki 23

Popular Bible Verses from Li-vi Ki 23

Videos for Li-vi Ki 23

Sabbath

Leviticus 23-24

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Li-vi Ki 23

Popular Bible Verses from
Li-vi Ki 23