Yâ-li-mí Sû 51

Chai Sṳ́m-phan Pâ-pí-lùn

1Song-chú án-ngiòng kóng: “Khon â, Ngài oi phai yû fí-me̍t sin ke fûng-chhâi#51:1 “fûng-chhâi” ya-he yi̍t-cho “lìn”. hi kûng-kit Pâ-pí-lùn lâu he̍t chhai Li̍p-kâ-mí#51:1 “Li̍p-kâ-mí” he Pâ-pí-lùn ke am-ho, yi-sṳ he “Ngài tui-thi̍t ke sîm”. ke ngìn. 2Ngài oi sṳ́ ngoi-koet-ngìn lòi fí-me̍t Pâ-pí-lùn, chhiong fûng-chhâi chiông ma̍k-kón chhôi-chéu. Fí-me̍t ke ngit-è yit-to, kì-têu voi tui si-mien pat-fông lòi kûng-kit Pâ-pí-lùn, sṳ́ kì ke thú-thi pien fông-liòng. 3M̀ pûn kì ke chan-sṳ yû kî-fi sa-chien, m̀ pûn kì-têu yû sṳ̀-kiên chông-phi chhṳ-kâ. Lièn ke-têu heu-sâng-ngìn ke miang ya m̀-hén piong kì-têu ko! Oi chiông Pâ-pí-lùn chhiòn-kiûn sêu-me̍t! 4Kì-têu yit-thin voi chhai Pâ-pí-lùn ke thi-fông, chhai chhṳ-kâ ke kiê-hong pûn-ngìn chhṳ̀-thet. 5Sûi-yèn Yî-set-lie̍t lâu Yù-thai chhûng-mân vì-poi Yî-set-lie̍t sṳn-chá ke chhui, chúng-he Ngài — Song-chú, Van-kiûn ke Ngièn-soi, kì-têu ke Song-ti pin mò fit-thet kì-têu. 6Thò-miang â, ngì-têu oi kiak-kiak thò-chhut Pâ-pí-lùn! M̀-hó lâu kì ke chhui khiung-ha sí. Yîn-vi Ngài liá-ha oi cheu Pâ-pí-lùn só yin-kôi su ke po-yin chit-fa̍t kì. 7Pâ-pí-lùn thèu-pái chhiong Ngài — Song-chú sú-chûng ke kîm-pî, sṳ́ thiên-ha ke ngìn chhiòn-phu chiú-chui lé. Lie̍t-koet lîm kì ke chiú chhiu tiên-thet. 8Liá-ha Pâ-pí-lùn fut-yèn-kiên ham-lo̍k, fí-me̍t lé! Ngì-têu oi vi kì sông-sîm thai-kieu! Chhìm nen-hiông lòi kò kì ke sông-héu, mò yit-thin kì hàn-voi yî-hó. 9He̍t chhai Pâ-pí-lùn ke ngoi-koet ngìn kóng: ‘Ngài-têu sióng-oi yî Pâ-pí-lùn, chúng-he yî m̀-hó. Liá-ha ngài-têu oi lì-khôi kì, tak-sà chón ku-hiông hi! Yîn-vi kì ke chhui-ok tù-thiên, thin-chho̍k oi su tông-chhûng ke chit-fa̍t#51:9 “Yîn-vi kì ... chit-fa̍t” ya-he yi̍t-cho “Yîn-vi Song-ti chhin-li̍t chit-fa̍t Pâ-pí-lùn, vàn-chhiòn sêu-me̍t kì”..’ ”

10Song-chú kóng: “Ngài ke chṳ́-mìn voi thai-sâng hêm-kóng: ‘Song-chú yí-kîn vi ngài-têu sṳ̂n-yên. Lòi â! Ngài-têu to Siak-ôn hi, chhai ke-vi siên-yòng Song-chú — ngài-têu ke Song-ti só-cho ke sṳ.’ ”

11Song-chú oi fí-me̍t Pâ-pí-lùn, vi chhṳ-kâ su fí-fái ke sṳn-thien po-fu̍k. Kì chhiu kit Mí-tí-â ke-têu vòng fat min-lin kóng: “Nò-li chien-thèu! Chok-he̍t tún-phài! 12Kiûn-khì khià hí-lòi, chún-phi kûng-tá Pâ-pí-lùn ke sàng-chhiòng! Kâ-khiòng fòng-phi! Phai-chhut sùn-lò pîn! Sat-hó mài-fu̍k!”

Song-chú yí-kîn cheu Kì só-kóng ke chṳ́-yi tui-fu Pâ-pí-lùn ngìn-mìn. 13Sûi-yèn Pâ-pí-lùn yû chhin-tô hò-pa, chhin-tô chhòi-pó, chúng-he kì ke kiet-khiu̍k thin-chho̍k lé, chhù-me̍t kì ke sṳ̀ to lé. 14Song-chú — Van-kiûn ke Ngièn-soi chṳ́ Kì chhṳ-kâ fat-sṳ kóng: “Ngài oi seu-si̍p thai-kiûn, chhiong chhó-máng án-ngiòng, kûi-khiùn lòi kûng-tá cham-liâng Pâ-pí-lùn; kì-têu voi yîn-vi sṳn-li fôn-hí to chhin-sê.”

Siung-chan Song-ti ke Sṳ̂-kô

15Song-chú yung nèn-li̍t chhóng-chho thai-thi;

Kì yung chṳ-fi kien-li̍p sṳ-kie,

yung chhûng-mìn chán-khôi thiên-khûng.

16Kì yit-hióng lùi-kûng, thiên-khûng ke súi chhiu ho-ho-kún;

Kì sṳ́ yùn tui thi-phìn-sien chhung-tén sông.

Kì sṳ́ ngiap-lang chhai yí-chûng fat-kông;

Kì sṳ́ fûng tui chhṳ-kâ ke chhông-khu chhôi-chhut.

17Ngìn tui liá kông-kín chhiòn-phu ngong-tong, mò chṳ-sṳt;

tá-kîm sṳ̂-fu chho ngiéu-siong, fán-chón mò mien-chṳ́,

yîn-vi kì-têu chho ke sṳ̀n-mìn he ká ke, m̀-voi théu-hi.

18Ngiéu-siong chhiòn he hî-khûng, he tông kien-seu ke tûng-sî;

Song-chú sṳ́m-phan ke sṳ̀, kì-têu chhiòn-phu voi sêu-me̍t.

19Ngâ-kok ke Song-ti m̀-he chhiong liá-têu ngiéu-siong;

Kì chhóng-chho van-vu̍t,

kién-sién Yî-set-lie̍t cho chhṳ-kâ ke chṳ́-mìn.

Song-chú — Van-kiûn ke Ngièn-soi he Kì ke miàng.

Song-chú ke Thiet-chhùi

20Song-chú kóng:

Pâ-pí-lùn â, ngì he Ngài ke thai thiet-chhùi, he Ngài ke vú-hi.

Ngài yung ngì tá-kit van-pâng, fí-me̍t lie̍t-koet.

21Ngài yung ngì tá-sí chan-mâ lâu khì-sṳ,

chiông chan-chhâ lâu chan-sṳ tá-to mièn-mièn.

22Ngài yung ngì tá-sí nàm-ńg ló-yu,

tá-sí se-â-kô-é lâu se-â-moi-é.

23Ngài yung ngì tá-sí mu̍k-ngìn lâu yòng-khiùn,

tá-sí nùng-mìn lâu kâng-thièn ke ngiù.

Ngài yung ngì tá-sí sén-chóng lâu kôn-yèn.

Chit-fa̍t Pâ-pí-lùn

24Song-chú kóng: “Yù-thai ngìn-mìn â, ngì-têu voi chhîn-muk khon-tó Ngài hiong Pâ-pí-lùn lâu kì ke ngìn-mìn po-fu̍k, yîn-vi kì-têu cho fái-sṳ sông-hoi Siak-ôn. 25Pâ-pí-lùn â, ngì he fí-me̍t thai-thi ke sân-liâng; chúng-he Ngài — Song-chú oi lâu ngì cho tui-thi̍t. Ngài oi chiông ngì lâi hâ-lòi, siok-phiàng, chiông ngì sêu-thet. 26Ngì tî-poi ke sa̍k-thèu m̀-voi chai nâ-lòi cho vuk-kok-sa̍k ya-he cho sa̍k-kiok. Ngì oi yún-yén fông-fi. Ngài — Song-chú án-ngiòng siên-pu lé.

27“Oi khià-hí ngì-têu ke kiûn-khì! Hi-to lie̍t-koet phùn yòng-kok! Seu-si̍p van-koet hi kûng-tá Pâ-pí-lùn! Seu-si̍p Â-lâ-la̍p, Mí-nì, lâu Â-sṳ̍t-kî-nâ ke-têu koet-kâ khiung-ha hi kûng-tá. Chṳ́-thin kiûn-chóng hi chṳ́-fî siông-chhṳ̀, tiau-phai chhiong chhó-máng án-tô ke pîn-mâ hi kûng-tá. 28Seu-si̍p van-koet, hi kûng-tá Pâ-pí-lùn. Seu-si̍p Mí-tí-â ke-têu vòng, kì-têu ke sén-chóng, kôn-yèn, lâu kì-têu só chhṳ-lî kok-koet ke kiûn-chhui hi kûng-tá. 29Thai-thi chhin-chûn chhin-yèu, yîn-vi Ngài — Song-chú chhai chṳp-hàng Ngài ke chṳ́-yi, oi sṳ́ Pâ-pí-lùn fông-fi, mò-ngìn he̍t. 30Pâ-pí-lùn ke yúng-sṳ piong-thet vú-hi, khong chhai sàng-pó tî-poi. Kì-têu sṳt-thet yúng-hi, chhiong fu-ńg án ngiôn-ngio̍k. Sàng-mùn ke mùn-chhôn chhiòn-phu thôn-thet! Vuk-è chho̍k-fó sêu! 31Po-sin ke ngìn yit-ke chiap yit-ke hiong Pâ-pí-lùn-vòng po-ko: ‘Kîn-sàng si-vì pûn-ngìn cham-liâng lé! 32Thi̍t-ngìn cham-liâng thu-sòn-thèu, piong-fó sêu-thet sàng-pó#51:32 “sàng-pó” ya-he yi̍t-cho “nam-é ke lù-chuk”.! Chan-sṳ kiâng-to pi̍t-pi̍t-chhat!’ 33Mò kí-kiú, thi̍t-ngìn voi sêu-me̍t kì-têu; Pâ-pí-lùn voi chhiong sai-kuk ke vò-thàng án-ngiòng pûn-ngìn tha̍p-lòi tha̍p-hi. Ngài — Song-chú, Van-kiûn ke Ngièn-soi, Yî-set-lie̍t ke Song-ti án-ngiòng siên-pu lé.”

34Pâ-pí-lùn-vòng Nì-pu-kap-nì-sat chiông Yâ-lu-sat-lâng thûn-thet,

chiông sàng chhióng-to chhiang-chhiang,

sṳ́ kì pien-to chhiong khûng âng-é khiung-yong.

Kì chhiong thai hói-koai án-ngiòng thûn-sṳ̍t Yâ-lu-sat-lâng ke chhòi-pó,

chiông sàng pó-kui ke tûng-sî thûn lo̍k-hi,

chiông chhûn-tó ke phi chhut-hi.

35Siak-ôn ke ngìn-mìn chhiòn-phu voi kóng:

Pâ-pí-lùn tui-thai ngài-têu án-fái;

ngài-têu yin-kôi oi po-fu̍k kì!

Yâ-lu-sat-lâng-ngìn chhiòn-phu voi kóng:

Pâ-pí-lùn-ngìn liù ngài-têu ke hiet;

ngài-têu yin-kôi hiong kì-têu thó hiet-chai!

Song-chú Oi Pông-chhu Yî-set-lie̍t

36Só-yî Song-chú tui Yâ-lu-sat-lâng ngìn-mìn kóng: “Ngài oi vi ngì sṳ̂n-yên, vi ngì-têu po-sù. Ngài oi sṳ́ Pâ-pí-lùn ke súi-ngièn châu-thet, hò-pa pien mò súi. 37Pâ-pí-lùn voi sàng-cho fông-phû, sàng-cho yâ-kiéu ke teu, sàng-cho hoi-ngìn kiâng-to pot-tok-ngok, pûn-ngìn sâu-nat ke só-chhai, mò-ngìn he̍t. 38Pâ-pí-lùn-ngìn voi chhiong sṳ̂-é kûi-khiùn ho-ho-kún, chhiong se sṳ̂-é kûi-chhui thai-sâng sê. 39Kì-têu sṳ̍t-to tông-him ke sṳ̀, Ngài oi vi kì-têu chún-phi yèn-si̍t, sṳ́ kì-têu lîm-to chiú-chui, fôn-hí to soi m̀-tî siáng, yún-yén m̀-voi hong. 40Ngài oi tai kì-têu hi pûn-ngìn chhṳ̀, chhiong kiuk se yòng-è, mièn-yòng-kú, sân-yòng-kú ngi̍p thù-chái-chhòng. Ngài — Song-chú án-ngiòng siên-pu lé.”

Pâ-pí-lùn ke Miang-yun

41Song-chú kóng: “Pâ-pí-lùn#51:41 “Pâ-pí-lùn” Hî-pak-lòi-vùn chhṳ̍t-yi̍t he “Sṳ-sâ-khiet”, he Pâ-pí-lùn ke am-ho. ngióng-voi pûn-ngìn tá-vang, chhiòn sṳ-kie só chan-mî ke thai-sàng ngióng-voi pûn-ngìn cham-liâng! Pâ-pí-lùn sàng-cho hoi lie̍t-koet kiâng-to pot-tok-ngok ke koet-kâ. 42Hói-súi voi chong hí-lòi, thai-long voi chim-thet Pâ-pí-lùn. 43Sàng-sṳ voi pien-cho fông-thi, hôn-thi, sâ-mo̍k; mò-ngìn he̍t, ya m̀-voi yû-ngìn kîn-ko. 44Ngài oi chit-fa̍t Pâ-pí-lùn ke sṳ̀n-mìn Pí-le̍t, pet kì éu-chhut só thûn ke chhòi-vu̍t. Lie̍t-koet m̀-voi chai hi pai kì.

“Pâ-pí-lùn ke sàng-chhiòng vang-thet lé! 45Ngài ke chṳ́-mìn â, kiak-kiak chéu, lì-khôi ke só-chhai! Oi thò-miang, sám-khôi Ngài ke thai fat-khién! 46M̀-hó yîn-vi thâng-tó thi-fông song ke yèu-ngièn hak-to mò-tám; tak-ngièn yû mò khiung-yong ke fûng-sâng chhòn-lòi — yèu-chhòn koet-nui voi yû chan-lon, kôn-chóng fu-siông teu-chên. 47Khon â, ngit-è voi-to, Ngài oi chit-fa̍t Pâ-pí-lùn ke ngiéu-siong. Kûi-chak koet-kâ voi su-tó siû-yu̍k, pûn-ngìn chhṳ̀-sí ke sṳ̂n-sṳ̂ vang-to mân-phien he. 48Pet-fông ke fí-me̍t-chá voi lòi fí-me̍t Pâ-pí-lùn; ke-sṳ̀, thiên-thi lâu khì-chûng só-yû ke voi fôn-fû chhong-kô. 49Pâ-pí-lùn sṳt chhai chhiòn-thi chhṳ̀-sí tông-tô ngìn, thi̍t-phe̍t he Yî-set-lie̍t-ngìn; liá-ha kì ke ngìn-mìn ya voi cheu-yong pûn-ngìn chhṳ̀, kì thin-chho̍k voi vang lo̍k-hi. Ngài — Song-chú án-ngiòng siên-pu lé.”

Pûn He̍t chhai Pâ-pí-lùn ke Yî-set-lie̍t-ngìn ke Sin-sit

50Song-chú tui he̍t chhai Pâ-pí-lùn ke Yî-set-lie̍t-ngìn kóng: “Ngì-têu sṳt thò-ko tô-kiam ke sông-hoi, liá-ha oi kiak-kiak chéu, m̀-hó chai tén lé! Sûi-yèn ngì-têu yén-lì ku-hiông, chúng-he ngì-têu oi sióng-ngiam Ngài — ngì-têu ke Song-chú, ya oi fài-ngiam Yâ-lu-sat-lâng. 51Ngì-têu kóng: ‘Ngài-têu thâng-tó vú-yu̍k ke fa, kám-kok chhin kien-seu, yîn-vi ngoi-koet-ngìn chin-ngi̍p Song-chú sṳn-thien ke sṳn-só.’ 52Só-yî Ngài — Song-chú kóng, ngit-è voi-to, Ngài oi chit-fa̍t Pâ-pí-lùn ke ngiéu-siong; koet-nui tak só-chhai voi yû su-sông ke ngìn kín-chhên. 53Chhiu-son Pâ-pí-lùn pak-sông thiên, chhai kô-kô ke só-chhai hí kiên-ku ke sàng-pó, Ngài hàn-he oi phai fí-me̍t-chá tui-fu kì. Ngài — Song-chú án-ngiòng siên-pu lé.”

Pâ-pí-lùn ke Me̍t-mòng

54Song-chú kóng:

Thâng â, Pâ-pí-lùn yû sông-sîm chhin-kieu ke sâng!

Yû thai fí-me̍t ke sâng chhòn chhut-lòi.

55Ngài tông fí-me̍t Pâ-pí-lùn ke sṳ̀,

voi sṳ́ sàng-tú chhàu-nau ke sâng thìn-thet.

Thi̍t-ngìn ke kiûn-chhui voi chhiong ho-ho-kún ke thai-long tá-tén lòi.

56Fí-me̍t-chá oi lòi sêu-me̍t Pâ-pí-lùn.

Kì ke yúng-sṳ voi pûn-ngìn chok-tó;

kì-têu ke kiûng voi pûn-ngìn áu-thôn.

Ngài he hàng po-yin ke Song-ti;

Ngài yit-thin voi hiong Pâ-pí-lùn po-sù.

57Ngài oi sṳ́ kì ke liâng-chhiu, mèu-sṳ, sén-chóng,

kôn-yèn lâu yúng-sṳ chhiòn-phu lîm chiú-chui;

kì-têu soi-to m̀-tî siáng, yún-yén m̀-voi hong.

Ngài ke miàng ôn-to Song-chú — Van-kiûn ke Ngièn-soi, Ngài he thai kiûn-vòng;

Ngài án-ngiòng siên-pu lé.

58Pâ-pí-lùn phûn-phûn ke sàng-chhiòng voi vang-to tap-tap;

kô-thai ke mùn-lèu voi pûn-fó sêu-thet.

Lie̍t-koet só-yû ke nú-li̍t chhiòn-phu pien khûng-khûng;

kì-têu yit-chhiet ke lò-luk voi sêu chhiang-chhiang.

Ngài — Song-chú, Van-kiûn ke Ngièn-soi án-ngiòng siên-pu lé.

Yâ-li-mí ke Sin-sit Chhòn-to Pâ-pí-lùn

59Mâ-sî-ngâ ke sûn-é, Nì-li-â ke lai-é Sî-lòi-ngâ he Sî-tí-kâ-vòng ke hàng-kiûng chúng-kón#51:59 “hàng-kiûng chúng-kón” chhiu-he chóng-kón hiet-siuk sṳ-vu ke kôn-yèn.. Sî-tí-kâ cho Yù-thai-vòng ke thi-si ngièn, Sî-lòi-ngâ oi thèn vòng to Pâ-pí-lùn hi. Ke-sṳ̀, siên-tî Yâ-li-mí yû fa fûn-fu kì. 60Yâ-li-mí chiông Pâ-pí-lùn voi su-tó yit-chhiet ke châi-nan lâu yû-koân Pâ-pí-lùn ke sṳ chhiòn-phu siá chhai sû-kién tî-poi. 61Yâ-li-mí lâu Sî-lòi-ngâ kóng: “To Pâ-pí-lùn yî-heu, ngì yit-thin oi chiông liá sû-kién só-yû ke fa thu̍k-pûn ngìn-mìn thâng. 62Yèn-heu ngì oi khì-tó kóng: ‘Song-chú â, Ngì sṳt chhîn-sṳ̂n siên-pu oi fí-me̍t liá só-chhai, sṳ́ kì yún-yén fông-fi, mò-ngìn he̍t, lièn yâ-chhu me mò.’ 63Sî-lòi-ngâ â, liá-kién sû thu̍k-vàn yî-heu, ngì oi chiông liá-kién sû lâu sa̍k-thèu khún khiung-ha, vok-to Yu-fat-lâ-tí-hò, 64yèn-heu kóng: ‘Pâ-pí-lùn oi chhiong liá-kién sû khiung-yong chhṳ̀m lo̍k-hi, m̀-voi chai fèu sông-lòi, yîn-vi Song-chú oi kong châi-nan pûn kì#51:64 “pûn kì” he kîn-kí yit kú yi̍t-pún, Hî-pak-lòi-vùn he “pûn kì, kì-têu voi tông-thiám”..’ ”

Yâ-li-mí ke fa ki-liu̍k to liá-vi chṳ́.

Currently Selected:

Yâ-li-mí Sû 51: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Popular Bible Verses from
Yâ-li-mí Sû 51

Videos for Yâ-li-mí Sû 51

Jeremiah 46-52

BibleProject

Ep 54. Genesis 29: Why Did God Favor Leah?

The Bible Show

Yâ-li-mí Sû 51

Popular Bible Verses from
Yâ-li-mí Sû 51

Videos for Yâ-li-mí Sû 51

Jeremiah 46-52

Ep 54. Genesis 29: Why Did God Favor Leah?

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Yâ-li-mí Sû 51

Yâ-li-mí Sû 51

Popular Bible Verses from Yâ-li-mí Sû 51

Videos for Yâ-li-mí Sû 51

Jeremiah 46-52

Ep 54. Genesis 29: Why Did God Favor Leah?

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Yâ-li-mí Sû 51

Popular Bible Verses from
Yâ-li-mí Sû 51