Yî-sî-kiet Sû 48

Chhit Kî-chhu̍k Fûn-phi Thú-thi

1-7Thú-thi pet-phién ke thi-kie he tui Thi-chûng-hói hiong-tûng kîn-ko Hî-thi̍t-lùn, Ha̍p-mâ ai-héu, Ha̍p-sat-Yî-nàn, chhṳ̍t-to Thai-mâ-sṳ-kiet vòng-koet lâu Ha̍p-mâ vòng-koet ke kâu-kie. Tak kî-chhu̍k oi chhai liá-te thú-thi — tui tûng-phién ke piên-kie to sî-phién ke Thi-chûng-hói, cheu Tan, Â-sat, Nâ-fut-thâ-li, Mâ-nâ-sî, Yî-fap-lièn, Lî-phien, Yù-thai ke sun-si, tui-pet to-nàm kok pûn-tó yit-fun thú-thi.

Chûng-phu ke Thi̍t-khî

8Oi chhai Yù-thai nàm-phién va̍k-chhut yit-te thú-thi cho thi̍t-phe̍t yung-thù. Liá-te thú-thi tui-pet to-nàm fat sṳ̍p-ngi kûng-lî pan, tui-tûng to-sî lâu tak kî-chhu̍k pûn-tó ke thú-thi phiàng-fat. Sṳn-thien oi hí chhai liá-thi tông-chûng.

9Chhai liá-te thú-thi ke chûng-sîm oi liù yit-phién chhòng sṳ̍p-ngi kûng-lî pan, fat sṳ̍p kûng-lî#48:9 “sṳ̍p kûng-lî” he kîn-kí yit kú yi̍t-pún, Hî-pak-lòi-vùn he “ńg kûng-lî”, chhâm-kháu 45:1. ke thi hien-pûn Song-chú. 10Chi-sṳ̂ oi tet liá-te sṳn-khî ke yit phu-fun thú-thi. Kì-têu só pûn-tó ke, tui-tûng to-sî sṳ̍p-ngi kûng-lî pan, tui-pet to-nàm ńg kûng-lî. Song-chú ke sṳn-thien chhai liá-khî ke tûng-ông. 11Liá sṳn-khî he pûn Sat-tuk heu-thoi cho chi-sṳ̂ ke. Kì-têu chûng-sîm sṳ-fung Ngài, mò chhiong Li-vi kî-chhu̍k ke ngìn hi thèn Yî-set-lie̍t-ngìn phoi-ngia̍k Ngài. 12Só-yî, kì-têu oi chhai Li-vi kî-chhu̍k ke sùn-thèu pûn yit-fun thú-thi; liá thi̍t-khî ke thú-thi he chṳ-sṳn ke. 13Li-vi kî-chhu̍k oi chhai chi-sṳ̂ ke thú-thi sùn-thèu pûn-tó yit thi̍t-khî, tui-tûng to-sî sṳ̍p-ngi kûng-lî pan, tui-pet to-nàm ńg kûng-lî. 14Hien-pûn Song-chú ke liá-khî he chhiòn-koet chui-hó ke thú-thi, cho-m̀-tet mâi-mai, kâu-von, ya-he sung-ngìn. Liá-te thú-thi he sṳn ke, he su̍k Song-chú ke.

15Thi̍t-khî hàn-chhûn yit-te chhòng sṳ̍p-ngi kûng-lî pan, fat lióng kûng-lî pan ke thú-thi; liá-te thi m̀-he sṳn-thi, yit-pân ngìn cho-tet he̍t, cho-tet sṳ́-yung. Sàng oi hí chhai liá-khî ke tûng-ông. 16Sàng he si-fông-hìn ke, tak-phién chhòng lióng-chhiên lióng-pak ńg-sṳ̍p kûng-chhak. 17Sàng ke si chû-vì oi liù khung-thi, tak-phién fat yit-pak ngi-sṳ̍p ńg kûng-chhak. 18Sàng hí-hó só-chhûn ke sṳn-khî nàm-phién yit-te thú-thi, tûng-phién chhòng ńg kûng-lî, fat lióng kûng-lî pan, sî-phién chhòng ńg kûng-lî, fat lióng kûng-lî pan; liá-te thi he pûn sàng-tú ke ngìn-mìn kâng-chung yung ke. 19Só-yû chhai sàng-tú kûng-chok ke ngìn, mò-lun kì su̍k Yî-set-lie̍t nai kî-chhu̍k, chhiòn-phu cho-tet kâng-chung liá-thi.

20Án-ngiòng, só va̍k-chhut ke thi ke chûng-sîm he thi̍t-phe̍t thi-khî, he si-fông-hìn ke, tak-phién he sṳ̍p-ngi kûng-lî pan, tî-poi yû sṳn-khî lâu sàng-sṳ yung-thi.

21-22Liá thi̍t-phe̍t thi-khî pâu-hàm sṳn-thien, chi-sṳ̂ ke thú-thi, Li-vi kî-chhu̍k ke thú-thi, sàng-sṳ, lâu sàng-sṳ yung-thi. Liá thi-khî ke tûng-phién lâu sî-phién só chhûn-tó ke thi chhiòn-phu kûi-su̍k vòng, hiong-tûng to tûng-phién ke thi-kie, hiong-sî to Thi-chûng-hói, pet-phién lâu Yù-thai ke thi-kie lièn-chiap, nàm-phién lâu Phien-ngâ-mén ke thi-kie lièn-chiap.

Khì-thâ Kî-chhu̍k ke Thú-thi

23-27Oi chiông thi̍t-khî nàm-phién ke thú-thi pûn-pûn khì-thâ kok kî-chhu̍k; tui tûng-phién ke thi-kie to sî-phién ke Thi-chûng-hói, cheu Phien-ngâ-mén, Sî-mién, Yî-sat-kâ, Sî-pu-lùn, Kâ-tet ke sun-si, tui-pet to-nàm kok tet yit-fun.

28Kâ-tet kî-chhu̍k nàm-phién ke thi-kie he tui Thâ-mâ hiong sî-nàm kîn-ko Mí-li-pâ-Kâ-tâi-sṳ̂ ke hò-pa, chai hiong sî-pet thèn-tén Âi-khi̍p piên-kie ke se hò-pa, chhṳ̍t-to Thi-chûng-hói.

29Chṳ-kô ke Song-chú án-ngiòng kóng: “Oi yung chhû-chhiâm ke fông-fap chiông liá-te thú-thi pûn-pûn Yî-set-lie̍t kok kî-chhu̍k, cho kì-têu ke sán-ngia̍p.”

Yâ-lu-sat-lâng ke Sàng-mùn

30-34Ke sàng-sṳ chúng-khiung yû sṳ̍p-ngi ke sàng-mùn. Si-mien ke sàng-chhiòng kok chhòng lióng-chhiên lióng-pak ńg-sṳ̍p kûng-chhak, kok-yû sâm-ke sàng-mùn. Tak-ke mùn cheu Yî-set-lie̍t kî-chhu̍k ôn-miàng. Pet-chhiòng ke sâm-chak mùn he Lî-phien, Yù-thai, Li-vi; tûng-chhiòng ke sâm-chak mùn he Yok-sit, Phien-ngâ-mén, Tan; nàm-chhiòng ke sâm-chak mùn he Sî-mién, Yî-sat-kâ, Sî-pu-lùn; sî-chhiòng ke sâm-chak mùn he Kâ-tet, Â-sat, Nâ-fut-thâ-li. 35Sàng-chhiòng si chû-vì yit-khiung chhòng kiú-chhiên kûng-chhak. Chhiùng-kîm yî-heu, liá-sàng oi ham-cho ‘Song-chú Chhai Ke-vi.’

Currently Selected:

Yî-sî-kiet Sû 48: THV12Rdb

Highlight

Copy