Tan-yî-lî Sû 1

Tan-yî-lî Lâu Kì Ke-têu Phèn-yû

(1:1–6:28)

Tan-yî-lî chhai Pâ-pí-lùn ke Vòng-kiûng

1Yù-thai-vòng Yok-ngâ-kin cho vòng ke thi-sâm ngièn, Pâ-pí-lùn-vòng Nì-pu-kap-nì-sat kûng-tá Yâ-lu-sat-lâng, pâu-vì kûi-chak sàng. 2Chú chún kì chiông Yok-ngâ-kin-vòng chok-hi, yu chhióng-chéu Song-ti sṳn-thien yit phu-fun ke tûng-sî. Kì chiông chok-tó ke ngìn tai-to Pâ-pí-lùn ke sṳ̀n-meu, yu chiông chhióng-lòi ke pó-vu̍t piong chhai sṳ̀n-meu ke chhông-khu tú.

3Nì-pu-kap-nì-sat-vòng min-lin kì ke thai-kam chúng-kón Â-sṳ̂-pí-nâ, tui Yî-set-lie̍t chok-lòi ke vòng-chhîn kui-chhu̍k tông-chûng sién-chhut kí-ke chhiâng-ngièn. 4Vi-tó oi pûn kì-têu chhai vòng-kiûng fu̍k-sṳ, liá-têu chhiâng-ngièn yit-thin oi sṳ̂n-thí mò pho-siong, oi sṳ̂-vùn, chhûng-mìn, ho̍k-sṳt kô-chhṳ̂m, chhòi-chṳ ko-ngìn chang yû chṳ̂-kiet. Â-sṳ̂-pí-nâ oi ham-ngìn kâu kì-têu ho̍k-si̍p Pâ-pí-lùn ke ngî-ngièn, vùn-sṳ. 5Vòng ya min-lin oi tak-ngit kiûng-kip kì-têu vòng-kiûng hióng-yung ke sṳ̍t-vu̍t lâu chiú. Án-ngiòng hiun-lien sâm-ngièn heu, kì-têu chang cho-tet chhai vòng mien-chhièn fu̍k-sṳ. 6Sién-tó ke ngìn tông-chûng, yû Tan-yî-lî, Ha̍p-nâ-nì-ngâ, Mí-sâ-li, Â-sat-li-ngâ, chhiòn-phu he Yù-thai kî-chhu̍k ke ngìn. 7Thai-kam chúng-kón vi kì-têu ôn sîn-miàng, ham-cho Pak-thì-sâ-sat, Sâ-tet-lâ, Mí-sâ, Â-pak-nì-kô.

8Tan-yî-lî kiet-sîm m̀ sṳ̍t vòng-kiûng ke sṳ̍t-vu̍t lâu chiú, miên-tet chhṳ-kâ chhai lî-ngì song sàng-cho mò chhiang-li ke ngìn; só-yî kì khiù thai-kam chúng-kón, mo̍k pet kì tá-lá-sap chhṳ-kâ. 9Song-ti sṳ́ Tan-yî-lî tet-tó thai-kam chúng-kón ke fôn-hí lâu thùng-chhìn, 10chúng-he thai-kam chúng-kón tui Tan-yî-lî kóng: “Ngài m̀-kám phoi-ngia̍k ngài ke vòng, kì yí-kîn kûi-thin ngì-têu oi lîm-sṳ̍t ke tûng-sî, na-he ngì-têu ke mien-set mò chhiong khì-thâ ke heu-sâng-ngìn án hó-khon, vòng voi to̍k ngài ke thèu.”

11Só-yî, Tan-yî-lî hi kien thai-kam chúng-kón só phai-lòi kón kì lâu khì-thâ sâm-ke phèn-yû ke sú-ví, 12-13tui kì kóng: “Chhiáng ngì pûn ngài-têu sṳ̍t chhiâng-chhoi lîm-súi, chhṳ khon-é, sṳ̍p-ngit yî-heu chiông ngài-têu lâu ke-têu sṳ̍t vòng-kiûng sṳ̍t-vu̍t ke heu-sâng-ngìn pí khon-é, yèn-heu cheu ngì só khon-tó ke cho kiet-thin!”

14Sú-ví tap-yin pûn kì-têu chhṳ sṳ̍p-ngit. 15Sṳ̍p-ngit ko-heu, kì-têu khon hí-lòi pí só-yû sṳ̍t vòng-kiûng sṳ̍t-vu̍t ke heu-sâng-ngìn hàn-kha khien-không, hàn-kha hó-khon. 16Só-yî, sú-ví pûn kì-têu ki-siu̍k sṳ̍t chhiâng-chhoi, m̀-sṳ́ sṳ̍t vòng só kiûng-kip ke sṳ̍t-vu̍t lâu chiú.

17Song-ti sṳ́ liá si-ke chhiâng-ngièn chîn-thûng kok-chúng vùn-sṳ lâu ho̍k-mun, yu su-pûn Tan-yî-lî yû kié-sṳt yi-siong lâu mung ke chhòi-nèn.

18Vòng só kûi-thin ke sâm-ngièn khì-han to lé, thai-kam chúng-kón tai só-yû ke heu-sâng-ngìn hi kien Nì-pu-kap-nì-sat-vòng. 19Vòng lâu kì-têu kóng-fa; kì tui Tan-yî-lî, Ha̍p-nâ-nì-ngâ, Mí-sâ-li, Â-sat-li-ngâ yin-siong thi̍t-phe̍t hó, só-yî liù liá si-ke ngìn chhai vòng-kiûng fu̍k-sṳ vòng. 20Vòng mò-lun mun má-ke, ya-he thì-chhut má-ke nàn-thì, chhiu tî kì-têu ke chhûng-mìn chṳ-fi pí koet-nui só-yû son-miang ke lâu voi fap-su̍t ke hó sṳ̍p-phi. 21To Pô-sṳ̂-vòng Sai-lû-sṳ thi-yit ngièn, Tan-yî-lî hàn-chhôi.

Currently Selected:

Tan-yî-lî Sû 1: THV12Rdb

Highlight

Copy