Yî-sî-kiet Sû 24

Sâng-lû ke Vo̍k-thèu

1Ngài-têu pûn-ngìn chok-hi ke thi-kiú ngièn sṳ̍p-ngie̍t chhû-sṳ̍p, Song-chú lâu ngài kóng-fa. 2Kì kóng: “Ngìn-chṳ́ â, ngì oi chiông kîm-pû-ngit liá ngit-è ki hâ-lòi, yîn-vi kîm-pû-ngit Pâ-pí-lùn-vòng khôi-sṳ́ vì-kûng Yâ-lu-sat-lâng. 3Ngì oi hiong Ngài phoi-ngia̍k ke chṳ́-mìn kóng liá pí-yi. Oi lâu kì-têu kóng, Ngài — Chṳ-kô ke Song-chú án-ngiòng kóng:

Chiông vo̍k-thèu piong chhai fó táng-kô,

vo̍k-thèu tú oi chông-súi.

4Chiông song-tén ke kiok-pí-ngiuk, kiên-thèu-ngiuk piong-lo̍k vo̍k-thèu tú,

chiông thi̍t-sién ke kut-thèu ya piong-lo̍k vo̍k-thèu, piong-to mân-mân.

5Chiông chui-hó ke yòng-ngiuk piong-lo̍k vo̍k-thèu tú,

vo̍k-thèu hâ oi tôi-mân chhèu;

chiông súi sêu-kún lòi-chú kut-thèu lâu ngiuk.”

6Chṳ-kô ke Song-chú án-ngiòng kóng: “Chhûng-mân liù ngìn-hiet ke sàng voi tù-tó châi-nan lé. Liá-chho sàng chhiong mò sé-ko, sâng-lû ke vo̍k-thèu, tî-poi ke ngiuk oi yit-te yit-te sùi-phien kia̍p chhut-lòi, yit-te ya mò liù. 7Liá-sàng yû chhṳ̀-ngìn liù-hiet ke sṳ, hiet tó chhai kông-kông ke thai-sa̍k táng, m̀-he tó chhai yû nài-fún hó yûng ke thi-song. 8Chiông hiet tó chhai mò fap-thu yûng ke thai-sa̍k táng yû Ngài ke chṳ́-yi; liá hiet-chiak ngiâ Ngài fat-khién, yêu-khiù Ngài po-sù.”

9Só-yî, Chṳ-kô ke Song-chú án-ngiòng kóng: “Chhûng-mân liù ngìn-hiet ke sàng voi tù-tó châi-nan lé! Ngài oi chhîn-sṳ̂n lòi tôi-chhèu. 10Oi thiâm-chhèu, phat-fó, chú-ngiuk, chiông thông chú-châu, lièn kut-thèu ya sêu-to chhu-fó-sêu! 11-12Yèn-heu oi chiông piang-chhiang ke thùng vo̍k-thèu piong chhai fó-than-fó táng-kô sêu-to fùng-fùng, sûi-yèn thùng-lû mò fap-thu vàn-chhiòn sêu-thet, chúng-he vo̍k-thèu chhiu chhiang-li lé. 13Yâ-lu-sat-lâng â, ngì fong-thong ke sên-fa̍t chiông chhṳ-kâ tá-lá-sap. Sûi-yèn Ngài sṳt sat-fap sṳ́ ngì chhiang-li, chúng-he ngì hàn-he án ô-chô. Tén-to Ngài chiông thai fat-khién piang chhai ngì sṳ̂n-song yî-chhièn, ngì chhiu mò khó-nèn chai chhiang-li lé. 14Ngài — Song-chú án-ngiòng siên-pu lé. Ngài oi chhái-chhí hàng-thung ke sṳ̀-chiet to lé. Ngài chhie̍t-tui m̀-voi m̀-chhap ngì ke chhui-ko; Ngài tit-khok m̀-voi lìn-mén, ya m̀ heu-fí. Ngì oi yîn-vi ngì ke só-hàng só-cho su chit-fa̍t.” Chṳ-kô ke Song-chú án-ngiòng siên-pu lé.

Siên-tî ke Pû-ngiòng Sí-thet

15Song-chú lâu ngài kóng-fa; 16Kì kóng: “Ngìn-chṳ́ â, Ngài oi fut-yèn-kiên chiông ngì chui siak ke ngìn chhióng-chéu. Ngì m̀-hó ôi-sông, thai-sâng kieu, m̀-hó liù muk-chṳp. 17M̀-hó pûn ngìn thâng-tó vi sí-ngìn pî-sông thai-kieu ke sâng. Hàn-oi cheu-sòng tûng thèu-kîn chok-tén hài. M̀-hó miâng-mien, ya m̀-hó sṳ̍t phe̍t-ngìn vi sông-kâ yi-phi ke sṳ̍t-vu̍t.”

18Ke-ngit chêu-sṳ̀n, ngài lâu ngìn-mìn kóng-hí liá-ke sṳ; ke am-pû, ngài ke pû-ngiòng chhiu sí-thet. Thi-ngi ngit, ngài cheu Song-chú ke min-lin hi cho. 19Ngìn mun ngài: “Ngì án-ngiòng cho he oi lâu ngài-têu kóng má-ke nè?”

20Ngài lâu kì-têu kóng: “Song-chú lâu ngài kóng-fa; 21Kì oi ngài hiong ngì-têu Yî-set-lie̍t-ngìn chhòn-kóng liá sin-sit. Chṳ-kô ke Song-chú án-ngiòng kóng: ‘Ngì-têu chiông sṳn-thien chún-cho kiêu-ngau ke li̍t-liong, muk-chû só fôn-hí ke lâu sîm-lìn só koân-sîm ke; chúng-he Ngài oi vú-yu̍k Ngài ke sṳn-thien. Ngì-têu liù chhai Yâ-lu-sat-lâng ke chṳ́-ńg chhiòn-phu voi pûn-ngìn chhṳ̀-thet.’ 22Ke-sṳ̀, ngì-têu oi cheu ngài — Yî-sî-kiet só-cho ke hi cho. Ngì-têu m̀-hó miâng-mien, ya m̀-hó sṳ̍t phe̍t-ngìn vi sông-kâ yi-phi ke sṳ̍t-vu̍t, 23ngì-têu ke thèu-nà oi chhàn thèu-kîn, kiok oi chok-hài, m̀-hó pî-sông, m̀-sṳ́ kieu. Ngì-têu oi yîn-vi chhṳ-kâ ke chhui mân-mien yù-sèu, mien-tui-mien kín-théu thai-hi, sôi-ngio̍k lòi sí. 24Ngài — Yî-sî-kiet chhiu-he ngì-têu sṳ-siên khon-tó ke seu-thèu; ngài só-cho ke, ngì-têu chhiòn-phu oi cheu án-ngiòng cho. Song-chú kóng, to ke-sṳ̀, ngì-têu chhiu voi tî Kì he Chṳ-kô ke Song-chú.”

25Song-chú kóng: “Ngìn-chṳ́ â, Ngài oi chhióng-chéu kì-têu ke sàng-pó — kì-têu só khoâ-khiéu, muk-chû só fôn-hí, sîm-lìn só koân-sîm ke sṳn-thien. Ngài ya oi chhióng-chéu kì-têu ke chṳ́-ńg. 26Ke-sṳ̀, thot-lì châi-nan ke ngìn voi lòi hiong ngì sot-mìn tông-sṳ̀ ke chhìn-hìn. 27Ke-ngit, ngì m̀-voi chhiong á-khiéu; ngì voi khôi-choi hiong kì kóng-fa. Án-ngiòng, ngì oi cho kì-têu ke seu-thèu, kì-têu chhiu voi tî Ngài he Song-chú.”

Currently Selected:

Yî-sî-kiet Sû 24: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)