Yî-sî-kiet Sû 10

Song-chú ke Yùng-kông Lì-khôi Sṳn-thien

1Ngài ngo-thèu khon kî-lu-pak thèu-nà-táng ke kiûng-chhông, táng-kô yû yit-chho chhiu-chhiong he yung làm-pó-sa̍k chho ke pó-chho. 2Song-ti tui ke chok mà-sâ sâm ke ngìn kóng: “Ngì ngi̍p-hi, tui kî-lu-pak hâ-poi ke lin-é tông-chûng yung sú púng-chhut chho̍k-tén ke fó-than, yèn-heu chiông fó-than ve chhai sàng-tú.”

Ngài khon-tó kì ngi̍p-hi. 3Kì ngi̍p-hi ke sṳ̀, kî-lu-pak khî chhai sṳn-thien ke nàm-phién; yû yùn chhûng-mân nui-yen. 4Song-chú ke yùng-kông lì-khôi kî-lu-pak, thìn chhai sṳn-thien mùn-héu; chiap-tén, yû yùn chhûng-mân sṳn-thien. Song-chú ke yùng-kông chhûng-mân kûi-chak thìn-yen. 5Kî-lu-pak ke yi̍t-kap só fat-chhut ke sâng chhai ngoi-yen ya cho-tet thâng-tó; tông-chhiong chhiòn-nèn Song-ti kóng-fa ke sâng-yîm.

6Song-chú min-lin ke chok mà-sâ sâm ke ngìn, hi kî-lu-pak hâ-poi ke lin-é tông-chûng nâ fó; kì chhiu ngi̍p-hi, khî chhai khì-chûng ke yit-ke lin-é sùn-thèu. 7Khì-chûng yit-ke kî-lu-pak chhûn-sú to kì-têu chûng-kiên ke fó-tôi, nâ-têu fó-than piong chhai ke chok mà-sâ sâm ke ngìn sú-hong. Kì yit nâ-tó chhiu lì-khôi.

8Ngài khon-tó ke-têu kî-lu-pak ke tak-chak yi̍t-kap hâ yû yit-chak sú, chhiu-chhiong ngìn ke sú. 9Ngài yu khon-tó si-chak khiung-yong ke lin-é, tak-ke kî-lu-pak sùn-thèu yû yit-chak lin-é chhiong pó-sa̍k án-kîm; 10tak-chak lin-é phòng-piên nang-ngoi yû yit-chak lin-é, lin-é lâu lin-é fu-siông chhṳ̍t-kok siông-chhiet. 11Kî-lu-pak oi sái thîn-thûng ke sṳ̀, cho-tet hiong tak fông-hiong sái, m̀-sṳ́ chón-sṳ̂n; kì-têu m̀-sṳ́ chón-sṳ̂n, kûi-chak chhiu nèn cheu chhṳ-kâ ke yi-sṳ sái thîn-thûng. 12Kì-têu ke sṳ̂n-thí, poi-nòng, sú, yi̍t-kap lâu lin-é chhiòn-phu mân-yû muk-chû. 13Kóng-tó liá-têu lin-é, ngài ngí-kûng thâng-tó kóng: Kì-têu he thi-yit ke yi-siong chûng khiung-yong voi thîn-thûng ke lin-é.

14Tak-ke kî-lu-pak yû si-chak mien: Thi-yit chak chhiong ngiù#10:14 “ngiù”: Hî-pak-lòi-vùn he “kî-lu-pak”, chhâm-kháu 1:10. ke mien, thi-ngi chak chhiong ngìn ke mien, thi-sâm chak chhiong sṳ̂-é ke mien, thi-si chak chhiong ên-tiâu ke mien. 15Kî-lu-pak pî sông-hi lé; kì-têu chhiu-he ngài chhai Kâ-pâ-lû hò-pa sùn só khon-tó ke sâng-vu̍t. 16Kî-lu-pak hàng ke sṳ̀, lin-é chhai phòng-piên hàng; kî-lu-pak tá-khôi yi̍t-kap pî sông-hi ke sṳ̀, lin-é ya thèn chhai kì-têu phòng-piên. 17Kì-têu thìn hâ-lòi, lin-é ya thìn hâ-lòi. Kì-têu pî sông-hi, lin-é ya thèn chhai kì-têu phòng-piên, yîn-vi kî-lu-pak ke lìn chhai lin-é tông-chûng.

18Heu-lòi, Song-chú ke yùng-kông lì-khôi sṳn-thien ke ngi̍p-héu, sái-to kî-lu-pak táng-kô. 19Ngài khon-tén ke sṳ̀, kì-têu tá-khôi yi̍t-kap pî sông-hi; lin-é chhiòn-phu thèn chhai kì-têu phòng-piên. Kì-têu thìn chhai Song-chú sṳn-thien ke tûng-mùn, Yî-set-lie̍t Song-ti ke yùng-kông chhai kì-têu táng-kô. 20Ngài ngin-chhut liá-têu kî-lu-pak, he ngài chhai Kâ-pâ-lû hò-pa sùn só khon-tó ke, chhiu-he chhai Yî-set-lie̍t Song-ti hâ-poi ke sâng-vu̍t.

21Tak-ke kî-lu-pak yû si-chak mien, si-chak yi̍t-kap; tak-chak yi̍t-kap hâ yû yit-chak chhiong ngìn ke sú. 22Kì-têu ke mien lâu ngài chhai Kâ-pâ-lû hò-pa sùn só khon-tó ke vàn-chhiòn khiung-yong. Tak-ke kî-lu-pak lûng-chúng he hiong thèu-chhièn chhṳ̍t hàng.

Currently Selected:

Yî-sî-kiet Sû 10: THV12Rdb

Highlight

Copy

Compare