Chhut Âi-khi̍p Ki 32

Kîm-ngiù

(Sṳ̂n-min Ki 9:6-29)

1Yî-set-lie̍t ngìn-mìn khon-tó Mô-sî án-kiú hàn-mò hâ-sân, chhiu chhi-si̍p to Â-lùn ke mien-chhièn, tui kì kóng: “Ngài-têu m̀-tî ke thu ngài-têu chhut Âi-khi̍p ke Mô-sî tù-tó má-ke sṳ; só-yî pai-thok ngì vi ngài-têu chho sṳ̀n-mìn lòi tai-liâng ngài-têu!”

2Â-lùn tui kì-têu kóng: “Chiông ngì-têu ke pû-ngiòng lâu chṳ́-ńg tai-tén ke kîm ngí-vàn pok hâ-lòi, nâ-lòi pûn ngài.” 3Ngìn-mìn chhiu chhiòn-phu pok-hâ kì-têu ke kîm ngí-vàn, sung-to Â-lùn mien-chhièn. 4Â-lùn chhiu chiông ke-têu ngí-vàn yùng-thet, tó chhai mù-è tú, chu-chho yit-chak se-ngiù-è.

Ngìn-mìn chhiu kóng: “Yî-set-lie̍t â, liá he thu ngì-têu lì-khôi Âi-khi̍p ke sṳ̀n-mìn!”

5Só-yî, Â-lùn chhai kîm ngiù-siong chhièn hí yit-chho chi-thàn, siên-pu kóng: “Thiên-kông-ngit oi vi Song-chú sú-chiet.” 6Thi-ngi ngit tá-chó, ngìn-mìn khiên-têu thèu-sâng lòi, yû-têu hien-cho sêu-fa-chi, ya yû-têu cho phìn-ôn-chi lòi-sṳ̍t. Heu-lòi, kì-têu chhô-hâ-lòi thai-sṳ̍t thai-lîm, khî-hí-lòi khòng-fôn thiong-lo̍k.

7Song-chú tui Mô-sî kóng: “Kiak-kiak hâ-sân, yîn-vi ngì tui Âi-khi̍p thu chhut-lòi ke ngìn-mìn yí-kîn fam-chhui vì-poi Ngài. 8Kì-têu sùi-sṳ̀ chhiu phiên-lì Ngài min-lin kì-têu hàng ke lu. Kì-têu yung kîm-é chu-chho yit-chak se-ngiù-è, hiong kì khúi-pai, hiong kì hien-chi. Kì-têu me kóng: ‘Yî-set-lie̍t â, liá he thu ngì-têu lì-khôi Âi-khi̍p ke sṳ̀n-mìn!’ ”

9Song-chú ki-siu̍k tui Mô-sî kóng: “Ngài yí-kîn khon chhut-lòi, liá ngìn-mìn ngióng-voi án ngang-kiáng! 10Liá-ha, ngì m̀-hó chú-tóng Ngài; Ngài oi hiong kì-têu thai fat-khién, sêu-me̍t kì-têu. Chúng-he ngì, Ngài oi sṳ́ ngì lâu ngì ke chṳ́-sûn sàng-cho thai-koet.”

11Chúng-he Mô-sî hiong Song-chú — kì ke Song-ti khiù-chhìn kóng: “Song-chú â, cho-má-ke tui Ngì ke chṳ́-mìn fat-khién to án li-hoi nè? Kì-têu kám m̀-he Ngì yung thai-nèn thai-li̍t tui Âi-khi̍p thu chhut-lòi ke? 12Cho-má-ke pûn Âi-khi̍p-ngìn kóng, Ngì ku-yi thu kì-têu lì-khôi Âi-khi̍p, he oi chhai sân-tú chiông kì-têu vàn-chhiòn sêu-me̍t nè? Khiù Ngì m̀-hó fat-khién, khiù Ngì fì-sîm chón-yi, m̀-hó kong thai châi-fo pûn Ngì ke chṳ́-mìn. 13Khiù Ngì ki-ngiam Ngì ke phu̍k-ngìn Â-pak-lâ-hón, Yî-sat, Yî-set-lie̍t, ki-tet Ngì sṳt chṳ́-tén chhṳ-kâ hiong kì-têu fat-sṳ, kóng: ‘Ngài oi pûn ngì-têu ke chṳ́-sûn tô-to chhiong thiên-táng ke sên-é án-tô; Ngài só yin-hí liá kûi-te thú-thi, yit-thin oi su-pûn ngì-têu ke heu-thoi, cho yún-kiú ke sán-ngia̍p.’ ” 14Yîn-vi án-ngiòng, Song-chú kói-pien sîm-yi, mò chiông ngièn-lòi oi kong ke châi-fo kong chhai Kì chṳ́-mìn ke sṳ̂n-song.

15Mô-sî chón-sṳ̂n hâ-sân, nâ-tén lióng-te lióng-mien siá-tén kie-min ke sa̍k-pán. 16Song-ti chhṳ-kâ chho liá lióng-te sa̍k-pán; kie-min ya he Song-ti chhîn-sú khat chhai táng-kô ke.

17Yok-sû-â thâng-tó ngìn-mìn fû-ham ke sâng-yîm, chhiu tui Mô-sî kóng: “Ngài thâng-tó yàng-chûng yû chan-chên ke sâng!”

18Mô-sî kóng: “Liá m̀-chhiong siông-chhṳ̀ tá-yàng ke sâng, ya m̀-chhiong tá-sû ke sâng, he chhong-kô ke sâng!”

19Mô-sî hàng-khiûn yàng-thi ke sṳ̀, khon-tó kîm-ngiù lâu thiau-vú ke ngìn-khiùn, kì chhiu thai fat-khién, chiông tai chón-lòi ke lióng-te sa̍k-pán chhai sân-kiok hâ piâng sui-thet. 20Kì chiông ngìn-mìn chu-chho ke se-ngiù-è nâ ko-lòi yùng-thet, ngân-cho fún, ve chhai súi mien-song, yèn-heu ham Yî-set-lie̍t-ngìn lîm. 21Mô-sî tui Â-lùn kóng: “Liá-têu ngìn tui ngì cho má-ke, ngì ngióng-pân voi hoi kì-têu fam án-chhûng ke chhui?”

22Â-lùn en-kóng: “Chhiáng ngì m̀-hó án khién; ngì ya tî liá-têu ngìn kiet-sîm chok-ok. 23Kì-têu tui ngài kóng: ‘Ngài-têu m̀-tî ke thu ngài-têu chhut Âi-khi̍p ke Mô-sî tù-tó má-ke sṳ; só-yî pai-thok ngì vi ngài-têu chho sṳ̀n-mìn lòi tai-liâng ngài-têu!’ 24Ngài tui kì-têu kóng: ‘Ke-têu yû kîm-hi ke ngìn oi pok hâ-lòi’; kì-têu chhiu nâ-lòi pûn ngài. Ngài chiông kîm-hi te̍p-lo̍k fó-tú hi, liá se-ngiù-è chhiu chhut-lòi!”

25Mô-sî khon-chhut Â-lùn chiúng ngìn-mìn, kì-têu chang-kám án lon-lòi, sàng-cho thi̍t-ngìn ke seu-fa. 26Kì chhiu khî chhai yàng mùn-chhièn, thai-sâng kóng: “Só-yû su̍k Song-chú ke ngìn chhiòn-phu oi to ngài liá-vi lòi!” Só-yû ke Li-vi-ngìn chhiu chhi-si̍p chhai kì sùn-thèu. 27Kì fûn-fu kì-têu: “Song-chú — Yî-set-lie̍t ke Song-ti min-lin ngì-têu tak-sà chiông kiam kiê-tén, tui liá-chak mùn to ke-chak mùn, chhai yàng-tú mân-phien hàng, chhṳ̀ ngì-têu ke hiûng-thi, phèn-yû, lâu lìn-sa.” 28Li-vi-ngìn sun-chhiùng Mô-sî ke min-lin, chhai ke-ngit thai-yok chhṳ̀-thet sâm-chhiên ngìn. 29Mô-sî tui Li-vi-ngìn kóng: “Ngì-têu kîm-pû-ngit yí-kîn chiông chhṳ-kâ fûn-phe̍t vì-sṳn, chhin chi-sṳ̂ sṳ-fung Song-chú ke chṳt-vu, tak-sà kûng-kit chhṳ-kâ ke lai-é lâu hiûng-thi, án-ngiòng tet-tó Song-chú ke su-fuk.”

30Thi-ngi ngit, Mô-sî tui ngìn-mìn kóng: “Ngì-têu fam chhin chhûng ke chhui lé. Liá-ha ngài oi chai sông-sân, to Song-chú ke-vi hi, khon ngài yû fap-thu vi ngì-têu su̍k-chhui, khiù-tó Song-chú ke sa-miên mò.” 31Só-yî Mô-sî chón-to Song-chú ke-vi, kóng: “Chú â! Liá ngìn-mìn fam chhin chhûng ke chhui lé; kì-têu chu-chho kîm sṳ̀n-siong lòi khúi-pai. 32Khiù Ngì sa-miên kì-têu ke chhui; na-mò, khiù Ngì tui Ngì chṳ́-mìn ke miàng-chhak chhù-thet ngài ke miàng.”

33Song-chú en-kóng: “Tet-chhui Ngài ke ngìn, Ngài oi tui Ngài miàng-chhak chhù-thet kì-têu ke miàng. 34Liá-ha ngì hi, chiông ngìn-mìn tai-to Ngài chṳ́-sṳ ngì ke thi-fông. Ngài oi phai thiên-sṳ́ chhai ngì thèu-chhièn thu ngì. Chúng-he to son-sṳ ke-ngit, Ngài oi chit-fa̍t kì-têu só-fam ke chhui.”

35Song-chú chhiu sṳ́ ngìn-mìn pot vûn-é, yîn-vi kì-têu khúi-pai Â-lùn chu-chho ke kîm ngiù-siong#32:35 “yîn-vi kì-têu ... ngiù-siong” yû-têu yi̍t-pún yi̍t-cho “yîn-vi kì-têu pet Â-lùn chu-chho kîm ngiù-siong”..

Currently Selected:

Chhut Âi-khi̍p Ki 32: THV12Rdb

Highlight

Copy