Chhut Âi-khi̍p Ki 17

Phàn-sa̍k Chhut-súi

(Mìn-su Ki 20:1-13)

1Yî-set-lie̍t só-yû ke ngìn-mìn chûn-cheu Song-chú ke chṳ́-sṳ lì-khôi Sun ke khóng-yâ, yit-vi yit-vi chhiên-sái tén hi. Kì-têu to Li-fî-tâng ôn-yàng, chúng-he ke-vi mò-súi hó sṳ̍t; 2só-yî ngìn-mìn lâu Mô-sî kie-kau kóng: “Pûn ngài-têu súi sṳ̍t!”

Mô-sî en-kóng: “Ngì-têu cho-má-ke koai ngài? Cho-má-ke oi sṳ-tham Song-chú?”

3Chúng-he ngìn-mìn fî-sòng choi-châu, chhiu tui Mô-sî fat yen-ngièn. Kì-têu kóng: “Ngì cho-má-ke chiông ngài-têu thu-chhut Âi-khi̍p? Ngì oi pûn ngài-têu lâu ngài-têu ke chṳ́-ńg, lièn ngài-têu ke thèu-sâng chhiòn-phu hot-sí he-mò?”

4Mô-sî pet-chhiet chhai Song-chú mien-chhièn khì-tó kóng: “Ngài oi ngióng-pân yin-fu liá-têu ngìn-mìn chang-hó nè? Kì-têu khiòng-khiòng voi nâ sa̍k-thèu chiông ngài te̍p-sí.”

5Song-chú tui Mô-sî kóng: “Ngì tai kí-ke Yî-set-lie̍t-ngìn ke chóng-ló lâu ngì khiung-ha hàng-to ngìn-mìn thèu-chhièn, sú oi nâ-tén ngì tá Nì-lò hò-pa súi ke koái-kun-é. 6Ngài oi chhai Hò-lie̍t-sân ke yit-te phàn-sa̍k táng khî chhai ngì mien-chhièn. Ngì tá ke phàn-sa̍k, chhiu voi yû súi liù chhut-lòi pûn ngìn-mìn sṳ̍t.” Mô-sî chhiu chhai Yî-set-lie̍t chóng-ló ke mien-chhièn án-ngiòng cho.

7Kì chiông ke thi-fông ôn-to Mâ-sat, yu ôn-to Mí-li-pâ#17:7 “Mâ-sat ... Mí-li-pâ” Hî-pak-lòi-fa ke yi-sṳ he “sṳ-tham ... koai-yen”.; yîn-vi Yî-set-lie̍t-ngìn chhai ke-vi koai-yen, sṳ-tham Song-chú. Kì-têu mun: “Song-chú kám-yû lâu ngài-têu khiung-ha?”

Lâu Â-mâ-li̍t-ngìn Siông-chhṳ̀

8Â-mâ-li̍t-ngìn to Li-fî-tâng kûng-tá Yî-set-lie̍t-ngìn. 9Mô-sî tui Yok-sû-â kóng: “Ngì hi sién têu ngìn chhut-lòi, chún-phi lâu Â-mâ-li̍t-ngìn siông-chhṳ̀. Thiên-kông-ngit ngài oi khî chhai sân-táng, sú nâ-tén Song-ti ke koái-kun-é.” 10Yok-sû-â cheu Mô-sî só fûn-fu ke, chhut-hi lâu Â-mâ-li̍t-ngìn siông-chhṳ̀; Mô-sî, Â-lùn lâu Fu-ngí sông-to sân-táng. 11Mô-sî sú khià hí-lòi ke sṳ̀, Yî-set-lie̍t-ngìn chhiu yàng; kì sú piong hâ-lòi, Â-mâ-li̍t-ngìn chhiu yàng. 12Mô-sî ke sú khioi lé, Â-lùn lâu Fu-ngí pân yit-te sa̍k-thèu lòi, pûn kì chhô chhai táng-kô; yit-ke khî chó-phién, yit-ke khî yu-phién, fù-tén kì ke sú, chhṳ̍t-to ngit-thèu lo̍k-sân. 13Án-ngiòng, Yok-sû-â chhiu yung tô-kiam yàng-ko Â-mâ-li̍t-vòng lâu kì tai-lòi ke ngìn.

14Só-yî, Song-chú tui Mô-sî kóng: “Chiông liá-pái ke sṳn-li ki-liu̍k hâ-lòi, hó kóng-pûn heu-thoi thâng. Yu-oi lâu Yok-sû-â kóng, Ngài oi vàn-chhiòn chhu̍t-thet Â-mâ-li̍t-ngìn ke miàng-ho.” 15Mô-sî hí yit-chho chi-thàn, ôn-miàng cho “Song-chú he ngài ke kiûn-khì#17:15 “Song-chú he ngài ke kiûn-khì” Hî-pak-lòi-fa ke fat-yîm he “Yâ-fò-fà nì-sî”.”. 16Kì kóng: “Sú khià Song-chú ke kiûn-khì! Song-chú oi sṳ-sṳ thoi-thoi lâu Â-mâ-li̍t-ngìn siông-chhṳ̀.”

Currently Selected:

Chhut Âi-khi̍p Ki 17: THV12Rdb

Highlight

Copy