Tan-yî-lî Sû 4

Nì-pu-kap-nì-sat Thi-ngi Chak Mung

1Nì-pu-kap-nì-sat-vòng hiong sṳ-kie tak-koet, tak-chhu̍k, kóng tak-chúng fa ke ngìn fat-chhut hâ-poi ke thûng-tî:

“Ngien ngì-têu thai hióng phìn-ôn! 2Ngài ngien-yi chiông Chṳ-kô Song-ti hiong ngài hién-mìn ke sṳ̀n-chiak khì-sṳ kóng chhut-lòi.

3Song-ti ke sṳ̀n-chiak ngióng voi án ví-thai!

Kì hàng ke khì-sṳ ngióng án yû khièn-nèn!

Kì ke chú-khièn yún-yún yén-yén;

Kì ke thúng-chhṳ chhṳ̍t-to van-thoi!

4“Ngài — Nì-pu-kap-nì-sat chhai vòng-kiûng tú he̍t-to phìn-ôn hó-se, hióng-su yùng-fà fu-kui; 5chúng-he ngài pot yit-ke ok-mung, khon-tó tet-ngìn-kiâng ke yi-siong. 6Ngài seu-si̍p Pâ-pí-lùn vòng-kiûng só-yû ke ku-mun to ngài mien-chhièn lòi, oi kì-têu vi ngài kié-mung. 7Só-yû son-miang ke, voi fap-su̍t ke, hàng sià-su̍t ke, lâu sên-siong-kâ chhiòn-phu lòi. Ngài chiông ngài pot ke mung lâu kì-têu kóng, chúng-he kì-têu mò fap-thu vi ngài kié-sṳt. 8Heu-lòi Tan-yî-lî ngi̍p-lòi. (Kì yu ôn-to Pak-thì-sâ-sat, he cheu ngài sṳ̀n-mìn ke miàng ôn ke.) Kì sîm-tú yû chṳ-sṳn sṳ̀n-mìn#4:8 “sṳ̀n-mìn” ya-he yi̍t-cho “Song-ti”, 4:9 khiung-yong. ke lìn. Só-yî ngài chiông mung lâu kì kóng: 9‘Son-miang ke liâng-chhiu Pak-thì-sâ-sat â, ngài tî ngì sîm-tú yû chṳ-sṳn sṳ̀n-mìn ke lìn, ngì tî só-yû o-pi ke sṳ. Liá chhiu-he ngài pot ke mung, chhiáng ngì vi ngài kié-sṳt.’

10“Ngài tông hó-soi ke sṳ̀, khon-tó yit-chak yi-siong: Chhai thai-thi ke tûng-ông yû yit-thèu thai-su, 11kì ye̍t-lòi ye̍t-thai, yu tông khiòng-chong, kô-to tù-thiên; sṳ-song só-yû ke ngìn chhiòn-phu khon tet-tó. 12Kì ke su-ya̍p chhin-chiâng, su-táng kiet-mân kó-chṳ́, la chhiòn sṳ-kie ke ngìn sṳ̍t. Yâ-chhu chhai kì su-yáng hâ hiet-khun, fî-niâu chhai su-kî táng cho-teu; kok-chúng sâng-vu̍t tû sṳ̍t kì ke kó-chṳ́.

13“Ngài chhai mìn-chhòng táng mén liá yi-siong ke sṳ̀, khon-tó yit-ke khon-sú ke thiên-sṳ́ tui thiên-táng hâ-lòi. 14Kì thai-sâng hêm: ‘Tó-vang su-é, to̍k-thet su-khoá, yèu-lut su-ya̍p, tá-hâ kó-chṳ́. Chiông su-hâ ke yâ-chhu lâu su-táng ke fî-niâu kiuk-chéu. 15Liù su-thèu chhai thi-nài-hâ, yung thùng-thiàu thiet-lien vì-tén, piong chhai yâ-ngoi ke chhiâng-chhó tông-chûng.

“ ‘Chiông liá-ke ngìn liù chhai yâ-ngoi; pûn kì lâu yâ-chhu khiung-ha sṳ̍t-chhó, yù-chhai lu-súi tá-sṳp. 16Yû chhit-ngièn#4:16 “chhit-ngièn” ngièn-vùn chhṳ̍t-yi̍t he “chhit khì”, liá-chông chhut-hien kí-pái. kiú, kì m̀-voi yû ngìn ke sîm-chṳ, m̀-voi chai yû ngìn ke sṳ̂-sióng; kì chhiu-chhiong yâ-chhu. 17Liá he khon-sú ke thiên-sṳ́ siên-ko ke chhài-kiet, vi-tó oi sṳ́ sṳ-kiên-ngìn tî, ngìn ke koet-kâ he Chṳ-kô Song-ti chóng-kón ke; Song-ti yû-khièn chiông koet-khièn su-pûn Kì só kién-sién ke ngìn, chhiu-son he pî-mì ke ngìn, Song-ti ya sṳ́ kì chóng-khièn.’ ”

18Nì-pu-kap-nì-sat-vòng kóng: “Liá chhiu-he ngài pot ke mung. Pak-thì-sâ-sat â, chhiáng vi ngài kié-mung. Vòng-kiûng ku-mun tông-chûng mò yit-ke ngìn nèn vi ngài kié-mung; chúng-he ngì cho tet-tó, yîn-vi ngì sîm-tú yû chṳ-sṳn sṳ̀n-mìn#4:18 “sṳ̀n-mìn” ya-he yi̍t-cho “Song-ti”. ke lìn.”

Tan-yî-lî Kié-mung

19Tan-yî-lî, yu ôn-to Pak-thì-sâ-sat, yit thâng-tó liá-fa, kiâng-to kóng m̀-chhut fa. Vòng kóng: “Pak-thì-sâ-sat â, m̀-hó pûn liá-mung lâu kì ke sin-sit hak-tó.”

Pak-thì-sâ-sat en-kóng: “Ngài ke chú â, ngien liá-mung lâu kì ke yi-sṳ he chṳ́ ngì ke sù-thi̍t! 20Ngì só khon-tó ke-thèu su-é, ye̍t-lòi ye̍t-thai, yu tông khiòng-chong, kô-to tù-thiên, sṳ-song só-yû ke ngìn chhiòn-phu khon tet-tó; 21kì ke su-ya̍p chhin-chiâng, su-táng ke kó-chṳ́ chhin-tô, la chhiòn sṳ-kie ke ngìn sṳ̍t. Yâ-chhu chhai kì hâ-poi hiet-khun, fî-niâu chhai kì su-kî táng cho-teu.

22“Vòng â, ngì chhiu-he ke-thèu thai-su, yu-kô yu-chong. Ngì ke khièn-sṳ thai-to tù-thiên; ngì ke thúng-chhṳ tha̍t-to chhiòn sṳ-kie. 23Vòng tông khon ke sṳ̀, yû yit-ke khon-sú ke thiên-sṳ́ tui thiên-táng hâ-lòi, kóng: ‘Chiông liá-su tó hâ-lòi, fí-thet kì, chṳ́-yû liù su-thèu chhai thi-nài-hâ, yung thùng-thiàu thiet-lien vì-tén, piong chhai yâ-ngoi ke chhiâng-chhó tông-chûng; yù-chhai lu-súi tá-sṳp liá-ke ngìn, pûn kì lâu yâ-chhu khiung-ha sên-fa̍t chhit-ngièn.’

24“Vòng â, liá chhiu-he mung ke yi-sṳ; liá chiông-oi fat-sên chhai ngài chú ngài vòng sṳ̂n-song ke sṳ he Chṳ-kô Song-ti ke chhài-kiet: 25Ngì oi tui ngìn-khiùn chûng pûn-ngìn kiuk-chéu, lâu yâ-chhu khiung-ha sên-fa̍t; ngì oi chhiong ngiù án-ngiòng sṳ̍t-chhó, soi chhai yâ-ngoi, yù-chhai lu-súi tá-sṳp. Chhit-ngièn heu, ngì chang voi sṳ̀n-ngin he Chṳ-kô Song-ti chóng-kón ngìn-lui só-yû ke koet-kâ; Kì yû-khièn chiông koet-kâ su-pûn Kì só kién-sién ke ngìn. 26Thiên-sṳ́ min-lin chiông su-thèu liù chhai thi-nài-hâ; ke he sot-mìn, chhai ngì sṳ̀n-ngin thiên-táng ke Song-ti chóng-kón chhiòn sṳ-kie yî-heu, ngì voi chai yit-pái cho vòng. 27Só-yî, vòng â, chhiáng thâng ngài ke khien-va: Cho-m̀-tet chai fam-chhui, oi phìn kûng-ngi hàng-sṳ, lìn-mén khiùng-ngìn; án-ngiòng, ngì khó-nèn voi ki-siu̍k khiòng-sṳn.”

28Liá-têu sṳ chhiòn-phu chhai Nì-pu-kap-nì-sat-vòng sṳ̂n-song sṳ̍t-hien lé. 29Sṳ̍p-ngi chak ngie̍t yî-heu, kì chhai Pâ-pí-lùn vòng-kiûng ke liòng-thòi táng san-phu ke sṳ̀, 30kì kóng: “Khon â, Pâ-pí-lùn-sàng ngióng-pân hiùng-chong! Ngài yung khièn-sṳ kien-sat liá-sàng cho kîn-sàng, lòi hién-mìn ngài ke yùng-kông lâu vî-ngiàm.”

31Kì liá-ke fa hàn-màng kóng-so̍t, thiên-táng chhiu fat-chhut sâng-yîm kóng: “Nì-pu-kap-nì-sat-vòng, ngì thâng! Ngì ke vòng-khièn liá-ha lì-khôi ngì lé. 32Ngì oi tui ngìn-khiùn chûng pûn-ngìn kiuk-chéu, lâu yâ-chhu khiung-ha sên-fa̍t, chhiong ngiù án-ngiòng sṳ̍t-chhó. Chhit-ngièn heu, ngì chang voi sṳ̀n-ngin Chṳ-kô Song-ti yû-khièn chóng-kón ngìn-lui só-yû ke koet-kâ, yû-khièn chiông koet-kâ su-pûn Kì só kién-sién ke ngìn.”

33Liá-têu fa chit-sṳ̀ chhiu sṳ̍t-hien. Nì-pu-kap-nì-sat tui ngìn-khiùn chûng pûn-ngìn kiuk-chéu, chhiong ngiù án-ngiòng sṳ̍t-chhó, yù-chhai lu-súi tá-sṳp. Kì ke mô sâng-to chhiong ên-tiâu ke mô, sú-chṳ́-kap, kiok-chṳ́-kap sâng-to chhiong tiâu-é ke cháu.

Nì-pu-kap-nì-sat Siung-chan Song-ti

34Vòng kóng: “Chhit-ngièn ko-hi lé, ngài — Nì-pu-kap-nì-sat chu-muk mong-thiên; ngài ke chhûng-mìn fî-fu̍k lé. Ngài siung-chan Chṳ-kô ke Song-ti, chiông yùng-kông chûn-kui kûi-pûn yún-sên ke Song-ti.

Kì ke thúng-chhṳ yún-yún yén-yén;

Kì ke chú-khièn chhṳ̍t-to van-thoi.

35Chhai Kì ngién-chûng, thi-song ke ngìn-mìn pî-mì;

thiên-sṳ́ lâu sṳ-kiên-ngìn chhiòn-phu he Kì chóng-kón ke.

Má-ngìn kám làn-tén Kì ke sú?

Má-ngìn kám tui Kì kóng: ‘Ngì cho má-ke?’

36“Ngài ke chhûng-mìn fî-fu̍k chón-lòi ke-sṳ̀, ngài ke kông-yùng, vî-ngiàm, lâu vòng-koet ke yùng-kông ya chhiòn-phu kûi-vàn ngài. Ngài ke chhâm-mèu lâu thai-sṳ̀n chhiòn-phu yúng-fu ngài; ngài chhùng-sîn tet-tó ke khièn-sṳ pí yî-chhièn hàn-kha thai.

37“Liá-ha, ngài — Nì-pu-kap-nì-sat chhṳ̂n-siung, chûn-chhùng, kin-pai thiên-táng ke kiûn-vòng. Kì ke só-cho chṳn-chhṳ̍t kûng-phìn; Kì nèn kong-tâi kiêu-ngau ke ngìn.”

Currently Selected:

Tan-yî-lî Sû 4: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)