Tan-yî-lî Sû 3

Nì-pu-kap-nì-sat Ha-lin Pai Kîm-siong

1Nì-pu-kap-nì-sat-vòng chho yit-chho kîm-siong, kô ngi-sṳ̍p chhit kûng-chhak, fat sâm kûng-chhak, ôn chhai Pâ-pí-lùn-sén ke Thu-lâ phìn-ngièn. 2Vòng seu-si̍p só-yû ke thai-sṳ̀n, pâu-hàm chúng-tuk, sén-chóng, fu sén-chóng, chhâm-mèu, chhòi-chṳn thai-sṳ̀n, fap-kôn, thi-fông-kôn lâu tak-sén só-yû khì-thâ ke kôn-yèn, ham kì-têu chhâm-kâ Nì-pu-kap-nì-sat-vòng ôn liá-chho kîm-siong ke khôi-kông tién-lî. 3Só-yî só-yû ke chúng-tuk, sén-chóng, fu sén-chóng, chhâm-mèu, chhòi-chṳn thai-sṳ̀n, fap-kôn, thi-fông-kôn lâu tak-sén só-yû khì-thâ ke kôn-yèn chhiòn-phu chhi-si̍p lòi chhâm-kâ tién-lî. Kì-têu khî chhai Nì-pu-kap-nì-sat-vòng ôn ke kîm-siong thèu-chhièn ke sṳ̀, 4chhòn-lin-kôn thai-sâng siên-pu: “Tak-koet, tak-chhu̍k, kóng tak-chúng fa ke ngìn â, yû min-lin chhòn-pûn ngì-têu: 5Ngì-têu yit thâng-tó yòng-kok, sêu, chhit-hièn-khìm, kú-chên, su-khìm, sên lâu só-yû khì-thâ ngo̍k-hi ke sâng-yîm, chhiòn-phu oi phu̍k lo̍k-hi pai Nì-pu-kap-nì-sat-vòng ôn ke kîm-siong. 6Má-ngìn m̀ phu̍k lo̍k-hi pai, chhiu oi ngiàm-sṳ̀ pûn-ngìn fit-lo̍k chhin-mâng ke fó-lù tî-poi.” 7Só-yî, thâng-tó ngo̍k-hi yit-hióng, tak-koet, tak-chhu̍k, kóng tak-chúng fa ke ngìn, chhiòn-phu phu̍k lo̍k-hi pai Nì-pu-kap-nì-sat-vòng só-ôn ke kîm-siong.

Tan-yî-lî Sâm-ke Phèn-yû Su Khúng-ko

8Ke-sṳ̀, yû-têu Pâ-pí-lùn-ngìn lòi khúng-ko Yù-thai-ngìn. 9Kì-têu tui Nì-pu-kap-nì-sat-vòng kóng: “Ngien vòng van-soi! 10Koet-vòng â, ngì sṳt min-lin, thâng-tó ke-têu ngo̍k-hi yit-hióng, só-yû ke ngìn chhiòn-phu oi phu̍k lo̍k-hi pai kîm-siong; 11má-ngìn m̀ phu̍k lo̍k-hi pai, chhiu oi ngiàm-sṳ̀ pûn-ngìn fit-lo̍k chhin-mâng ke fó-lù tî-poi. 12Vòng só phai-hi kón-lî Pâ-pí-lùn-sén sṳ-vu ke Yù-thai-ngìn — Sâ-tet-lâ, Mí-sâ, Â-pak-nì-kô liá sâm-sà vì-poi vòng ke min-lin. Kì-têu m̀ fu̍k-sṳ vòng ke sṳ̀n-mìn, ya m̀ phu̍k lo̍k-hi pai vòng só-ôn ke kîm-siong.”

13Nì-pu-kap-nì-sat thâng-tó liá-sṳ, chhiu thai fat-khién, min-lin chiông liá sâm-ke ngìn tai-to kì mien-chhièn lòi. 14Nì-pu-kap-nì-sat tui kì-têu kóng: “Sâ-tet-lâ, Mí-sâ, Â-pak-nì-kô, ngì-têu ton-chṳ̂n m̀ fu̍k-sṳ ngài ke sṳ̀n-mìn? M̀ phu̍k lo̍k-hi pai ngài ôn ke kîm-siong he-mò? 15Liá-ha, ngì-têu yit thâng-tó yòng-kok, sêu, chhit-hièn-khìm, kú-chên, su-khìm, sên lâu só-yû khì-thâ ngo̍k-hi ke sâng-yîm, chhiu oi phu̍k lo̍k-hi pai ngài só chho ke kîm-siong; m̀ pai ke ngìn ngiàm-sṳ̀ oi pûn-ngìn fit-lo̍k chhin-mâng ke fó-lù tî-poi. Kám yû má-ke sṳ̀n-mìn nèn kiu ngì-têu thot-lì ngài ke sú nè?”

16Sâ-tet-lâ, Mí-sâ, Â-pak-nì-kô en vòng kóng: “Nì-pu-kap-nì-sat â, ngài-têu m̀-sṳ́ vi chhṳ-kâ phien-fu. 17Ngài-têu só sṳ-fung ke Song-ti nèn kiu ngài-têu lì-khôi chhin-mâng ke fó-lù, ya voi kiu ngài-têu lì-khôi ngì ke sú#3:17 Pún-chiet ya-he yi̍t-cho “Na-he ngài-têu só sṳ-fung ke Song-ti nèn kiu ngài-têu lì-khôi chhin-mâng ke fó-lù lâu ngì ke sú, ngien Kì án-ngiòng cho”.. 18Vòng â, chhiu-son Kì m̀ kiu ngài-têu, ngì oi tî, ngài-têu ya chhie̍t-tui m̀ fu̍k-sṳ ngì ke sṳ̀n-mìn, m̀ phu̍k lo̍k-hi pai ngì só-li̍p ke kîm-siong.”

Tan-yî-lî Sâm-ke Phèn-yû Su Phan Sí-hìn

19Nì-pu-kap-nì-sat thâng-tó chhiu pien-mien, hiong Sâ-tet-lâ, Mí-sâ, Â-pak-nì-kô thai fat-khién. Só-yî kì min-lin chiông fó-lù sêu-to pí phìn-sòng kâ mâng chhit-phi, 20yu min-lin kiûn-chhui tî-poi chhin khiòng-chong ke sṳ-pîn chiông liá sâm-sà khún hí-lòi, fit-lo̍k fó-lù tî-poi. 21Sṳ-pîn chhiu chiông liá sâm-ke ngìn khún hí-lòi, chiông kì-têu fit lo̍k-hi. Ke-sṳ̀ liá sâm-sà hàn chok-tén sâm-fu, ngoi-phàu, ya tai-tén mo-é. 22Yîn-vi vòng ke min-lin chhin-ngiàm, fó-lù sêu-to fî-sòng mâng, tui fó-lù tî-poi phun-chhut ke fó-sa̍t, sa chiông chṳp-hàng min-lin ke sṳ-pîn sêu-sí. 23Ke-sṳ̀, Sâ-tet-lâ, Mí-sâ, Â-pak-nì-kô hàn-he pûn-ngìn khún-tén, fit-lo̍k chhin-mâng ke fó-lù tî-poi.

24Fut-yèn, Nì-pu-kap-nì-sat-vòng chho̍k-kiâng to thiàu hí-lòi, mun kì ke thai-sṳ̀n: “Ngài-têu kám m̀-he chiông sâm-ke ngìn khún hí-lòi, fit-lo̍k mâng-fó ke fó-lù tî-poi?”

Kì-têu en-kóng: “Koet-vòng, he â!”

25Vòng mun: “Ngài ngióng-voi khon-tó yû si-ke ngìn chhai fó tî-poi hàng-lòi hàng-hi nè? Kì-têu chhiòn-phu mò pûn-ngìn khún-tén, ya chhiòn mò sêu-tó ke yong-é; ke thi-si ke khon hí-lòi chhiong he sṳ̀n-mìn#3:25 “sṳ̀n-mìn” ya-he yi̍t-cho “thiên-sṳ́” ya-he “sṳ̀n-chṳ́”..”

Sâm-sà Tet-tó Kô-sṳ̂n

26Só-yî, Nì-pu-kap-nì-sat hàng-khiûn chhin-mâng ke fó-lù héu, thai-sâng hêm: “Sâ-tet-lâ! Mí-sâ! Â-pak-nì-kô! Chṳ-kô Song-ti ke phu̍k-ngìn, chhiáng ngì-têu chhut-lòi!” Kì-têu ngiàm-sṳ̀ tui fó tî-poi chhut-lòi. 27Só-yû ke chúng-tuk, sén-chóng, fu sén-chóng, lâu vòng khì-thâ ke kôn-yèn chhiòn-phu vì ko-lòi khon liá sâm-ke ngìn, khon-tó kì-têu yit-si̍t-é ya mò sêu-sông; thèu-nà-mô mò sêu-tó, sâm-fu chhiòn mò pien-set, sṳ̂n-song ya mò chhu fó-yên.

28Nì-pu-kap-nì-sat-vòng kóng: “Ngien Sâ-tet-lâ, Mí-sâ, Â-pak-nì-kô ke Song-ti tet-tó chhṳ̂n-siung! Kì phai thiên-sṳ́ lòi kié-kiu sin-kho Kì ke phu̍k-ngìn. Kì-têu kâm-ngien mo sâng-miang ke ngùi-hiám fán-khong ngài ke min-lin, ya m̀-hén phu̍k lo̍k-hi pai má-ke sṳ̀n-mìn; kì-têu chôn-sîm kin-pai kì-têu ke Song-ti.

29“Liá-ha ngài min-lin: Mò-lun nai-koet, nai-chhu̍k, kóng nai-chúng fa ke ngìn, só-yû fí-pong Sâ-tet-lâ, Mí-sâ, Â-pak-nì-kô ke Song-ti ke, chhiòn-phu oi chám-thôn sú-kiok, kì ke kâ oi sàng-cho lá-sap-tôi; yîn-vi mò phe̍t-ke sṳ̀n-mìn yû phan-fap chhiong án-ngiòng sṳ̂-hàng chṳ́n-kiu.”

30Só-yî, vòng kô-sṳ̂n Sâ-tet-lâ, Mí-sâ, Â-pak-nì-kô sâm-sà ke kôn-vi, chhai Pâ-pí-lùn-sén tâm-ngim kha-kô ke chṳt-vi.

Currently Selected:

Tan-yî-lî Sû 3: THV12Rdb

Highlight

Copy