HÓWHÍNWHÉN LẸ 17
17
1Nùdo húhú, po jijọho po,
E pónte hú owhé he gó na hùnwhẹ po avùn po.
2Lizonyítọ nuyọnẹntọ na dugán do ovi he wà winyannu ji,
Bo na sọ má to ogú mẹ to mẹmẹsunnu lẹ ṣẹnṣẹn
3Ogànzén tin na fataka, zokán na sika:
Ṣigba OKLUNỌ to ayiha whlepọ́n.
4Ylanwàtọ tùntó nuflo lalo tọn go;
Omẹ lalonọ sọ nọ dayi ohó odó ylankan tọn go.
5Mẹhe vlẹ wamọnọ kò, é vlẹ Jọtọ etọn:
Ewọ he sọ to ayajẹ do tukla ji ma na nọ majiya.
6Ovi ovi tọn wẹ ojẹgbakun yónhó tọn;
Gigo ovi lẹ tọn sọ wẹ otọ yetọn.
7Ohó yẹyi tọn ma jẹ na nulunọ:
Mọ nuflo lalo tọn ma jẹ na ahọvi gba.
8Zannu akuẹgégénu tọn wẹ núnina
di to nukun ewọ he tindo e tọn mẹ:
Fidepope é lé hlan, dagbe wẹ
9Ewọhe ṣinyọnnudo ylanwà, to owanyi din;
Ṣigba ewọ he vó owhẹ da dai, klan hónton lọsulọsu lẹ.
10Wọhẹ biọ oho nuyọnẹntọ tọn mẹ hú obá kanweko
To ohò nulunọ tọn mẹ.
11Gbẹtọ atẹsitọ nọ din avùn pé to ofi popo:
Enewutu mẹdagun oka tọn wẹ yè, na dohlan ẹ ji.
12E ya na beali he yè bẹ́ ovi eton ni
Pé gbẹtọ hú nulunọ to nululu etọn mẹ.
13Mehe yí oylan do suahọ dagbe tọn,
Oylan ma na fọnyì sọn owhé etọn gbè.
14Whẹwhẹwhenu wiwọ tọn tin di
whenuena mẹde kòn osìn yìngbó.
Enẹwutu jo avùn dai, whẹpo é ni do zùn daho.
15Ewọ he suwhẹ́na mẹylankan, po ewọ he gblewhẹ́do dódónọ po,
Yèdọ yé omẹ awe lẹ osùnú de wẹ to OKLUNỌ nukunmẹ,
16Bọ́ etẹwutu wẹ akuẹ tin to alọ nulunọ tọn
Mẹ nado hó nuyọnẹn whenuena é ma tindo ayiha hlan e dali?
17Hóntọn nọ yiwannamẹ whepopenu,
Ṣigba mẹmẹsunnu wẹ yè ji na madodego.
18Omẹ he zìnzìn pò na, nọ yín alọyi namẹtọ,
Bo sọ nọ sú ede afà to họ́ntọn etọn nukọn.
19Ewọ he yiwanna avùn, yiwanna ylando:
Ewọ he sọ zé họ́ngbo etọn daga, to dindọn din.
20Ewọ he tindo ayiha yẹwiwà tọn ma na mọ dagbe:
Podọ ewọ he tindo odé ohógbe awe tọn, na jẹ oylan mẹ.
21Ewọ he ji nulunọ, ji i hlan awubla etọn:
Otọ́ nulunọ tọn ma sọ tindo homẹhùnhùn,
22Homẹvivi hẹn póngbọ dagbe wá:
Ṣigba homẹgble ayiha mẹ tọn hẹn ohú hú.
23Mẹylankan dè nunina sọn yẹndawe avọ̀ tọn
Mẹ nado hẹn aliho whẹ̀dida tọn gble.
24Nuyọnẹn tin to nukọn ewọ he zìn tọn:
Ṣigba nukun nulunọ tọn tin to opodo aigba tọn.
25Ovi nulunọ hlan homẹgble otọ́ etọn tọn wẹ,
Podọ vivó ayiha tọn hlan onọ he ji i.
26E ma yọ́n nado sawhẹ̀do nugbonọ ga gba,
Kavi yè ni linu ahọvi na dódó yetọn.
27Ewọ he tindo nuyọnẹn nọ dè ohó etọn pò:
Gbẹtọ ayiha mimiọnnọ wẹ omẹ zìnzìn.
28Yèdọ nulunọ, whenuena é bọ̀ onù etọn do, yè lẹn ẹn do nuyọnẹntọ mẹ:
Ewọ he sọ bọ nuflo etọn do wẹ yè pa zìnzìn na.
Currently Selected:
HÓWHÍNWHÉN LẸ 17: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.