Osọha lẹ 4
4
1OKLUNỌ lọ sọ dọhó hlan Moṣe podọ hlan Aalọn, dọmọ, 2Yí osọha visunnu Kohati tọn lẹ lọ tọn sọn visunnu Levi tọn lẹ lọ ṣẹnṣẹn, gbọn whédo yetọn lẹ dali, gbọn owhé otọ́ yetọn lẹ tọn lẹ dali, 3sọn owhè ogbàn mẹho podọ humọ, yèdọ kakajẹ owhè kandeao mẹho, ehe biọ awhànpa lọ mẹ lẹ nado wà azón to ogohọ̀ opli tọn lọ mẹ 4Ehe wẹ azón visunnu Kohati tọn lẹ tọn to ogohọ̀ opli tọn lọ mẹ, gbọn onú wiwe talala lẹ lọ tọn dali: 5whenuena osla lọ dèdo nukọn, Aalọn na yì hòmẹ, po visunnu etọn lẹ po, yé bo na dè avọ̀ajlalanọ basẹ lọ tọn do odò, bo yí i do ṣinyọn alki okunnuhó lọ tọn: 6bo na sọ yi oṣinyọn ayú seali tọn de do e go, bo na dlẹn avọ̀ ofé tọn dodo de do e ta, bo nasọ yí opò etọn lẹ do e mẹ. 7Podọ to tafo aklasọhia tọn lọ ji yé na dlẹn avọ̀ ofé tọn de do, bo yí núsónugbán lẹ lọ do e ji, po sivi lẹ lọ po, po otò lẹ lọ po po kọfo lẹ lọ po nado nọ yí do kòn: podọ akla whepoponu tọn lọ nasọ tin to e ji: 8podọ yé nasọ dlẹn avọ́ vẹ́sẹsẹ de do yé ji, bo sọ yí oṣinyọn ayú seali tọn de do ṣinyọn dopolọ ji, bo sọ yí opò etọn lẹ do hòmẹ. 9Yé nasọ yí avọ̀ ofé tọn de, bo do ṣinyọn miyọngbántin hinhọ́n lọ tọn, po miyọngbán etọn lẹ po, po obé etọn lẹ po, po agbán miyọngbánkàn etọn tọn lẹ po, po amì núzinzán etọn lẹpo po, ehe yé do nọ wàdevizọn hlan ẹn: 10yé nasọ yí i po núzinzán etọn lọ lẹpo po do oṣinyọn ayú seali tọn de mẹ, bo na yí i do opatin de ji. 11Podọ to agbà sikanọ lọ ji wẹ yé na dlẹn avọ̀ ofé tọn de do, bo yí oṣinyọn ayú seali tọn de do ṣinyọn ẹn, bo nasọ yí opò etọn lẹ lọ dó e mẹ: 12yé nasọ yí núzinzán devìzónwiwà tọn lẹpo, ehe yé do nọ wàdevizọ́n to fiwiwe lọ mẹ, bo yí yé do avọ́ ofẹ́ tọn de mẹ, bo yí oṣinyọn ayú seali tọn de do ṣinyọn yé, bo nasọ yí yé do kòlétin lọ go. 13Yé na bé afín lọ sọn agbà lọ kòn, bo sọ dlẹn avọ̀ gefunwunmẹ de do e ji: 14yé nasọ yí núzinzán etọn lẹpo do e ji, ehe yé do nọ wàdevizọ́n gbọn e dali, ogànzén lẹ lọ, opla olàn tọn lẹ lọ, po kóbànú lẹ lọ po, po oṣiklẹ lẹ lọ po, po núzinzán agbà lọ tọn lẹpo po; yé bo na dlẹn oṣinyọn ayú seali tọn de do e ji, bo sọ yí opò etọn lẹ lọ do e mẹ. 15Podọ whenuena Aalọn po visunnu etọn lẹ po ko basi opòdo sinṣinyọn fiwiwe lọ tọn de, po asóvànu fiwiwe lọ tọn lẹpo po, le osla tin nado dèdo nukọn; enẹ godo, visunnu Kohati tọn lẹ na wá nado zé e hẹn: ṣigba yé ma na doalọ onú wiwe lẹ lọ go gba, yé nikã kú. Onú helẹ wẹ agbàn visunnu Kohati tọn lẹ lọ tọn to ogohò opli tọn lọ mẹ. 16Podọ asẹ Eleazali tọn lọ visunnu Aalọn tọn lọ yẹwhenọ lọ na yín amì lọ na hinhọ́n lọ, po nuyọnwán vivi lọ po, po avọ́nunina jinulili whepoponu tọn lọ po, po amì sisá lọ po, asẹ gohọ̀túntún lọ tọn lẹpo, po ehe tin to e mẹ lẹpo po tọn, fìwiwe lọ, po asóvànu etọn lọ po.
17OKLUNỌ lọ sọ dọhó hlan Moṣe podọ hlan Aalọn, dọmọ, 18Mì sán whẹndo whédo Kohatinu lẹ tọn lẹ lọ sẹ́ sọn Levinu lẹ lọ ṣẹnṣẹn blo: 19ṣigba le mì ni wà hlan yé, na yé nido nògbẹ, bo ma kú blo, whenuena yé dọ̀nsẹ́pọ jẹ onú wiwe talala lẹ lọ kọ̀n: Aalọn po visunnu etọn lẹ po na yì hòmẹ, bo dè yé omẹ dopodopo do sinsẹ̀nzọ́n etọn kọ́n podọ do agbàn etọn kón: 20ṣigba yé ma na biọ hómẹ yì nado me onú wiwe talala lẹ lọ gba yèdọ na flikún dopo, yé nikã kú.
21OKLUNỌ lọ sọ dọhó hlan Moṣe, dọmọ, 22Yi osọha visunnu Gẹlsoni tọn lẹ lọ tọn ga, gbọn owhé otọ́ yetọn lẹ tọn lẹ dali, gbọn whédo yetọn lẹ dali; 23sọn owhè ogbàn mẹho podọ humọ kakajẹ owhè kandeao mẹho wẹ hiẹ na do yísọhana yé; ehe biọ hòmẹ yì nado wà sinsẹ̀nzọ́n lẹpo, nado wà azón lọ to ogohọ̀ opli tọn lọ mẹ. 24Ehe wẹ sinsẹ̀nzọ́n whédo Gẹlsọninu lẹ tọn tọn lẹ, to sinsẹ̀n mẹ podọ to agbàn lẹ zizẹ́hẹn mẹ 25Yé wẹ na nọ zé avọ̀dido gohọ̀túntún lọ tọn lẹ hẹn, po ogohọ̀ opli tọn lọ po, oṣinyọn etọn, po oṣinyọn ayú seali tọn lọ po he tin to e ji aga, po basẹ lọ po na ohọ̀n ogohọ̀ opli tọn lọ tọn: 26po nuzépla akànmahò lọ tọn lẹ po, po basẹ lọ po na ohọ̀n ohọ̀ngbo akànmahò lọ tọn lọ tọn, he tin to gohọ̀túntún lọ dali podọ to agbà lọ dali lẹ́do pé, po kansislo yetọn lẹ po, po núzinzán sinsẹ́nzọ́n yetọn tọn lẹpo po, podọ núdepope he na yín wiwà po yé po, é mẹ finẹ yé na nọ sẹ́n te. 27To gbèdide Aalọn tọn ji po visunnu etọn lẹ po wẹ sinsẹ̀nzọ́n visunnu Gẹlsọninu lẹ lọ tọn tọn lẹpo na te, to agbàn yetọn lẹpo mẹ, podọ to Sinsẹ́nzón yetọn lẹpo mẹ: míwlẹ nasọ nọ dè hlan yé to asẹ mẹ agbàn yetọn lepo. 28Ehe wẹ sinsẹnzón whédo visunnu Gẹlsọninu lẹ lọ tọn lọ tọn to ogohò opli tọn lọ mẹ: podọ asẹ yetọn na tin to alọ Itamali visunnu Aalọn yẹwhenọ lọ tọn lọ tọn glọ.
29Na visunnu Melali tọn lẹ tọn, hiẹ na yísọhana yé gbọn whédo yetọn lẹ dali, gbọn owhé otọ́ yetọn lẹ tọn lẹ dali; 30Sọn owhè ogbàn mẹho podọ humọ yèdọ jẹ owhè kandeao mẹho wẹ hiẹ na do yísọhana yé, omẹ dopodopo he biọ sinsẹ̀nzọ́n lọ mẹ, nado wà azọ́n ogoho opli tọn lọ tọn. 31Podọ ehe wẹ asẹ agbàn yetọn tọn lọ, kẹdẹdi sinsẹ̀nzọ́n yetọn lẹpo to ogohọ̀ opli tọn lọ mẹ; owhlẹ gohọ̀túntún lọ tọn lẹ, po opatin etọn lẹ lọ po, po odòtin etọn lẹ lọ po, po oslò etọn lẹ lọ po; 32po odòtin akànmahò lọ tọn lẹ po lédo pé, po oslò yetọn lẹ po, po osé yetọn lẹ po, po kansislo yetọn lẹ po, po núzinzán yetọn lẹpo po, podọ po sinsẹ̀nzọ́n yetọn lẹpo po: podọ gbọn oyín dali wẹ mi na yísọhana núzinzán asẹ agbàn yetọn lọ tọn tọn. 33Ehe wẹ sinsẹnzọ́n whédo visunnu Melali tọn lẹ tọn tọn, kẹdẹdi sinsẹ̀nzọ́n yetọn lẹpo, to ogohọ̀ opli tọn lọ mẹ, to alọ Itamali tọn glọ visunnu Aalọn yẹwhenọ lọ tọn.
34Moṣe po Aalọn po po ogán agùn lọ tọn lẹ po yísọhana visunnu Kohatinu lẹ lọ tọn lẹ gbọn whédo yetọn lẹ dali, podọ gbọn owhé otọ́ yetọn lẹ tọn lẹ dali, 35sọn owhè ogbàn mẹho podọ humọ yèdọ jẹ owhè kandeao mẹho, omẹ dopodopo he biọ sinsẹ̀nzọ́n mẹ, na azọ́n to ogohọ̀ opli tọn lọ mẹ: 36podọ enelẹ he yè yísọhana sọn yé mẹ gbọn whédo yetọn lẹ dali yín fọtọ́n awe po nuọntọ̀nkantọ̀ngbàn po. 37Ehelẹ wẹ yé he yè yísọhana sọn whédo Kohatinu lẹ lọ tọn lẹ mẹ, ehe to sinsẹ̀n basi to ogohọ̀ opli tọn lọ mẹ lẹpo, mẹhe Moṣe po Aalọn po yísọhana kedẹdi gbèdide OKLUNỌ lọ tọn lọ gbọn alọ Moṣe tọn mẹ.
38Podọ enẹlẹ he yè yísọhana sọn visunnu Gẹlsoni tọn lẹ lọ mẹ lẹpo, gbọn whédo yetọn lẹ dali, podọ gbọn owhé otọ́ yetọn lẹ tọn lẹ dali, 39sọn owhè ogbàn meho podọ humọ yèdọ jẹ owhè kandeao mẹho, omẹ dopodopo he biọ sinsẹ̀nzọ́n lọ me na azọ́n to ogohò opli tọn lọ mẹ, 40yèdọ enẹlẹ he yè yísọhana sọn yé mẹ, gbon whédo yetọn lẹ dali, gbọn owhé otọ́ yetọn lẹ tọn lẹ dali, yín fọtọ́n awe po nuọntọngbàn po. 41Ehelẹ wẹ yé he yè yísọhana sọn whédo visunnu Gẹlsoni tọn lẹ lọ tọn lẹ mẹ, he to sinsẹ̀n basi to ogohò opli tọn lọ mẹ, mehe Moṣe po Aalọn po yísọhana kẹdẹdi gbèdide OKLUNỌ lọ tọn.
42Podọ enẹlẹ he yè yísọhana sọn whédo visunnu Melali tọn lẹ lọ tọn lẹ mẹ lẹpo, gbọn whédo yetọn lẹ dali, gbọn owhe otọ́ yetọn lẹ tọn lẹ dali, 43sọn owhè ogbàn mẹho podọ humọ yèdọ jẹ owhè kandeao mẹho, omẹ dopodopo he biọ sinsẹ̀nzọ́n lọ mẹ na azọ́n to ogohọ́ opli tọn lọ mẹ, 44yèdọ enẹlẹ he yè yísọhana sọn yé me gbọn whédo yetọn lẹ dali, yín fọtọ́n atọ̀n po fòde po. 45Ehelẹ wẹ yé he yè yísọhana son whédo visunnu Melali tọn lẹ lọ tọn lẹ me, mẹhe Moṣe po Aalọn po yísọhana kẹdẹdi gbèdide OKLUNỌ lọ tọn gbọn alọ Moṣe tọn mẹ.
46Enẹlẹ he yè yísọhana sọn Levinu lẹ lọ mẹ, mẹhe Moṣe po Aalọn po po ogán Islaeli tọn lẹ lọ po yísọhana, gbọn whédo yetọn lẹ dali, podọ gbọn owhé otọ yetọn lẹ ton lẹ dali, 47sọn owhè ogbàn mẹho podọ humọ yèdọ jẹ owhè kandeao mẹho, omẹ dopodopo he biọ sinsẹ̀nzọ́n me, nado wà azón sinsẹ̀nzọ́n lọ tọn, po azón agbàn zizéhẹn tọn lẹ po to ogohọ̀ opli tọn lọ mẹ, 48yèdọ enẹlẹ he yè yísọhana sọn yé mẹ, yín fọtọ́n sinatòn po fòwekẹnnẹnko po. 49Kẹdẹdi gbèdide OKLUNỌ lọ tọn yè do yísọhana yé gbọn alọ Moṣe tọn mẹ, omẹ dopodopo kẹdẹdi sinsẹ̀nzọ́n etọn, podọ kededi agbàn etọn po azonyíwà etọn po: dile OKLUNỌ lọ degbèna Moṣe do.
Currently Selected:
Osọha lẹ 4: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
