Osọha lẹ 30
30
1MOSE sọ dọhó hlan nukọntọ whẹndo ovi Islaeli tọn lẹ lọ tọn lẹ, dọmọ, Ehe wẹ onú lọ he OKLUNỌ lọ ko degbèna. 2Whenuena sunnusi de do opa de hlan OKLUNỌ lọ, kavi whle whiwhle de nado yí mẹglọninọ de do dogàn alindọn etọn, ewọ ma na hẹn ohó etọn nu gba; ewọ na wà kẹdẹdi ehe tón sọn onù etọn mẹ jẹgbonu lẹpo. 3Eyín yọnnusi de ga do opa de hlan OKLUNỌ lọ, bo gbọn mẹglọninọ de dali bla ede, tintin to owhé otọ́ etọn tọn gbè, to ovú whenu etọn mẹ; 4bọ otọ́ etọn sè opadido etọn, po mẹglọninọ etọn po ehe é yí do bla alindọn etọn, bọ otọ́ etọn whónyín do ogo nó; whenẹnu opadido etọn lẹ na nọte, podọ meglọninọ he é ko do bla alindọn etọn dopodopo nasọ nọte. 5Ṣigba eyín otọ́ etọn gbẹ́na ẹn to azán he gbè é sè te; opadido etọn lẹ de kavi mẹglọninọ etọn lẹ he é ko do bla alindọn etọn ma na nọte gba: OKLUNỌ lọ nasọ jona ẹn, na otọ́ etọn gbẹ́na ẹn wutu. 6Podọ eyín ewọ yín alọwletọ hlan asú de, whenuena opadido etọn lẹ tin to e ji, kavi ohó yawu dọ nùflo etọn lẹ tọn, ehe é ko do bla alindọn etọn; 7bọ asú etọn sè e bo whẹnyín do ogo nẹ̃ to azán he gbè é sè e te: whenẹnu opádido etọn lẹ na nọte, podọ mẹglọninọ etọn lẹ ehe é ko yí do bla alindọn etọn nasọ nọte. 8Ṣigba eyín asú etọn gbẹ́na ẹn to azán he gbè é sè e te; whenẹnu ewọ na hẹn opadido etọn he tin to e ji zùn ovó, po ohó yawu dọ nùflo etọn lẹ tọn po ehe ewọ ko do bla alindọn etọn: OKLUNỌ lọ bo nasọ jona nẹ. 9Ṣigba opadido asúṣiọsi de tọn lọ, kavi ewọ he yè gbédai tọn, yèdọ onú he ewọ ko do bla alindọn etọn lẹpo, na nọte to kọji nẹ. 10Podọ eyín ewọ dopa to owhé asú etọn tọn gbè, kavi bla alindọn etọn gbọn mẹglọninọ de dali po whiwhle de po, 11bọ asú etọn sè e, bo whẹnyín do ogo né, bo ma gbéna ẹn gba: whenẹnu opadido etọn lẹpo na nọte, podọ mẹglọninọ dopodopo he ewọ ko do bla alindọn atọn nasọ nọte. 12Ṣigba eyín asú etọn hẹn yé zùn malódo podọ ovó to azán he gbè e sè yé te; whenẹnu núdepope he tón sọn nùflo etọn lẹ mẹ jẹgbonu gbọn opadido etọn lẹ tọn dali, kavi gbọn mẹglọninọ alindọn etọn tọn lọ dali, ma na nọte gba: asú etọn ko hẹn yé zùn ovó; OKLUNỌ lọ nasọ jona ẹn. 13Opadido lepo po bibla whiwhle tọn lẹpo po nado bianukunna alindọn lọ asú etọn sọgan hẹn ẹn lódo, kavi asú etọn sọgan hẹn ẹn zùn ovọ 14Ṣigba eyín asú etọn whẹ́nyín do ogo nẹ́ patapata sọn azán jẹ azán; whenẹnu ewọ na hẹn opadido etọn lẹpo lódo, kavi mẹglọninọ etọn lẹpo he tin to e ji: ewọ ko hẹn yé lódo, na ewọ ko whẹnyín do ogo nẹ́ wutu to azán he gbè e sè yé te. 15Ṣigba eyín ewọ na hẹn yé zùn malódo podọ ovó to godo he ewọ ko sè yé; whenẹnu ewọ na zé ylanwà etọn hẹn. 16Ehelẹ wẹ asedai lẹ lọ he OKLUNỌ lọ degbèna Moṣe, to sunnu de po asi etọn po ṣẹnṣẹn, to otọ de po viyọnnu etọn po ṣẹnṣẹn, tintin to OVU etọn mẹ, to owhé otọ etọn tọn gbè.
Currently Selected:
Osọha lẹ 30: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
