Osọha lẹ 28
28
1OKLUNỌ lọ sọ dọhó hlan Moṣe, dọmọ, 2Naṣe ovi Islaeli tọn lẹ lọ, bo dọ hlan yé dọmọ, Avọ́nunina ṣie, akla ṣie na avọ́nunina ṣie lẹ he yè basi gbọn miyọn dali, owán vivi de tọn hlan mi, wẹ mì na nọ payi e go nado nọ yína hlan mi to osã didè yetọn mẹ 3Hiẹ nasọ dọ hlan yé dọmọ, Ehe wẹ avọ́nunina lọ he yè basi gbọn miyọn dali he mì na nọ yína hlan OKLUNỌ lọ; lẹngbọvu asú owhè tintan lọ tọn matin azọ́n, awe egbesọegbesọ, na avọ́nunina mimẹ̀ whepoponu tọn de. 4Hiẹ na yí lẹngbọvu dopo lọ na to afọnnu, hiẹ nasọ yi lẹngbọvu awetọ lọ na to whèjai awe lẹ ṣẹnṣẹn: 5Po madaotọ ẹfa dopo linfin dagbedagbe tọn po na avọ́nunina jinulili de yè yí madẹnẹtọ hini amì tùntùn tọn dopo do hò; 6avọ́nunina mimẹ̀ whepoponu tọn de wẹ, he yè doai to osé Sinai mẹ na owán vivi de, avọ́nunina de yè basi gbọn miyọn dali hlan OKLUNỌ lọ. 7Podọ avọ́nunina nùnù etọn lọ na yín madẹnẹtọ hini dopo tọn na lẹngbọvu dopo lọ: otẹn wiwe lọ mẹ wẹ hiẹ na kòn avọ́nunina nùnù núnùnù sinsinyẹn tọn de jẹgbonu do hlan OKLUNỌ lọ. 8Podọ lẹngbọvú awetọ lọ wẹ hiẹ na yína to whèjai: di avọ́nunina jinulili afọnnu tọn lọ, podọ di avọ́nunina nùnù etọn lọ, wẹ hiẹ na do yi i na, avọ́nunina yè basi gbọn miyọn dali de, owán vivi tọn de hlan OKLUNỌ lọ.
9Podọ to gbọjẹzán gbè lẹngbọvú asú awe owhè tintan lọ tọn matin azón, po madaotọ awe ẹfa linfìn dagbedagbe tọn dopo tọn po na avọ́nunina jinulili de, he yè yí amì do hò, po avọ́nunina nùnù etọn po: 10ehe wẹ avọ́nunina mimẹ̀ gbọjẹzán dopodopo tọn lọ, dogọ́ avọ́nunina mimẹ̀ whepoponu tọn lọ, po avọ́nunina nùnù etọn po.
11Podọ to ṣaunṣaunwhenu osùn mìtọn lẹ tọn mì na nọ yí avọ́nunina mimẹ̀ de na hlan OKLUNỌ lọ; oyìnsú winyanwinyan awe, po agbò dopo po, lẹngbọvu asú ṣinawe owhè tintan lọ tọn matin azọ̀n; 12podọ madaotọ atọ̀n ẹfa linfin dagbedagbe tọn dopo tọn na avọ́nunina jinulili de, he yè yí amì do hò, na oyìnsú dopodopo; po madaotọ awe linfin dagbedagbe tọn po na avọ́nunina jinulili de, be yè yí amì do hò, na agbò dopo lọ; 13podọ madaotọ hunkọhunkọ linfin dagbedagbe tọn he yè yí amì do hò na avọ́nunina jinulili de hlan lẹngbọvu dopodopo; na avọ́nunina mimẹ̀ de, owán vivi tọn de, avọ́nunina yè basi gbọn miyọn dali de hlan OKLUNỌ lọ. 14Podọ avọ́nunina nùnù yetọn lẹ na yín odá hini ovẹ̃n tọn dopo na oyìnsú dopo, podọ dadatòntọ hini dopo tọn na agbo dopo lọ, podọ madẹnẹtọ hini dopo tọn na lẹngbọvu dopo: ehe wẹ avọ́nunina mimẹ̀ osùn dopodopo tọn lọ gbọn osùn owhè lọ tọn lọ mẹ lẹ́do. 15Po alunkun dopo po na avọ́nunina ylando tọn de hlan OKLUNỌ lọ; é na yín yíyína dogó avọ́nunina mimé whepoponu tọn lọ, po avọ́nunina nùnù etọn po.
16Podọ tó osùn tintan lọ mẹ, to azán wiẹnẹtọ osùn lọ tọn ji, wẹ juwayi OKLUNỌ tọn lọ. 17Podọ to azán fọtọ̀ntọ osùn he tọn mẹ hùnwhè de na tin: azán ṣinawe akla madotónnọ na yín dùdù. 18Azán tintan lọ mẹ wẹ opli wiwe de na te; mìwlẹ ma na wà hẹkúkúzón de gba: 19ṣigba mìwlẹ na nọ yí avọnunina de na he yè basi gbọn miyọn dali, avọ́nunina mimé de hlan OKLUNỌ lọ; oyìnsú winyanwinyan awe, po agbò dopo po, lẹngbọvú asú ṣinawe owhè tintan lọ tọn: yé na tin hlan mì matin azọ̀n: 20Po avọ́nunina jinulili yetọn po linfin dagbedagbe yè yí amì do hò: madaotọ atọ̀n wẹ mì na yína na oyìnsú dopo, po madaotọ awe po na agbò dopo lọ; 21madaotọ hunkọhunko de wẹ hiẹ na yina na lẹngbọvú lẹngbọvú ṣinawe lẹ lọ tọn dopodopo; 22po alunkun dopo po na avọ́nunina ylando tọn de, nado basi ovẹ̀se na mì. 23Mì na nọ yí ehelẹ na dogọ́ avọ́nunina mimẹ̀ afọnnu tọn lọ, he tin na avọ́nunina mimẹ̀ whepoponu ton de. 24Le hunkọ mì na nọ yína do gbèpogbè, na azán ṣinawe, akla avọ́nunina lọ tọn lọ he yè basi gbọn miyọn dali, owán vivi de tọn hlan OKLUNỌ lọ: e na yín yíyína dogọ́ avọ́nunina mimẹ̀ whepoponu tọn lọ, po avọ́nunina nùnù etọn lọ po. 25Podọ to azán sinawetọ lọ gbè mìwlẹ na tindo opli wiwe de; mìlẹ ma na wà hekúkúzọ́n de gba.
26To azán sinséntintan lẹ lọ tọn mẹ ga, whenuena mì yí avọ́nunina jinulili yọ́yọ́ de na hlan OKLUNỌ lọ to hùnwhẹ osè lẹ tọn mìtọn mẹ, mìwlẹ na tindo opli wiwe de; mìwlẹ ma na wà hẹkúkúzọ́n de gba: 27ṣigba míwlẹ na nọ yí avọ́nunina mimẹ̀ de na na owán vivi de hlan OKLUNỌ lọ; oyìnsú winyanwinyan awe, agbò dopo, lẹngbọvú asú owhè tintan lọ tọn ṣinawe; 28po avọ́nunina jinulili yetọn po, linfin dagbedagbe yè yi amì do hò, madaotọ atọ̀n na oyìnsú dopodopo, madaotọ awe na agbò dopo lọ, 29Madaotọ hunkọhunkọ na lẹngbọvu lẹngbọvú ṣinawe lẹ lọ tọn dopodopo; 30alunkun dopo nado basi ovẹ̀se na mì. 31Dogó avọ́nunina mimẹ̀ poponu tọn lọ, po avọ́nunina jinulili etọn lọ po, mì na nọ yí yé na (yé na tin hlan mì matin azọ́n) po avọ́nunina nùnù yetọn lẹ po.
Currently Selected:
Osọha lẹ 28: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
