MATIU 24

1JESU sọ tónjẹgbònu yì sọn tẹmpli mẹ: nuplọntọ etọn lẹ sọ wá e de nado do didó tẹmpli tọn lẹ hia ẹ. 2Ṣigba ewọ gblọn bo dọ hlan yé, dọmọ, Mì ma mọ onú halẹ pó? Nugbo wẹ yẹn dọ hlan mì, Yè ma to na jo zannu dopo dai to awetọ ji, ehe yè ma na hó liai.

3Podọ le é sinai to osó olivie tọn ji, nuplọntọ lẹ wá e de to nuglọ, dọmọ, Dọ na mí, whenuena onú helẹ na jọ? etẹwẹ na yín ohia wìwá towe tọn, po opòdo aihọn tọn po tọn? 4Jesu sọ gblọn, bo dọ hlan yé, dọmọ, Mì payi, na mẹde hẹn mì bu blo. 5Na omẹ susu na wá to oyín ṣie mẹ, dọmọ, Yẹn wẹ Klisti lọ; bo nasọ hẹn omẹ susu bu. 6Mì nasọ sè awhàn linlin po awhàn zingidi po: mì do ayi e go, na mì hanú blo: na onú helẹ pó ma sọgan nọ ma wá jọ gba, ṣigba opòdo ma yín dinvie. 7Na akọta na fọ́n do akọta ji, ahọludu do ahọludu ji; huvẹ po azọ̀n ylankan po, po aigba sisọsisọ po na tin to ofi súsu. 8Onú helẹ pó wẹ dòdó nukunbibia tọn. 9Whenẹnu wẹ yé na jo mì hlan nukunbibia, yé nasọ hù mì: yè nasọ gbẹwanna mì to akọta lẹpo mẹ na oyín ṣie tọn wutu. 10Whenẹnu wẹ omẹ susu na dahli, bo nasọ nọ dè yénọzo jo, bo nasọ gbẹwanna yénọzo. 11Yẹwhegán lalonọ susu na fọ́n, bo nasọ hẹn omẹ susu bu. 12Podọ na ylanwà na sudeji wutu, owanyi omẹ susu tọn na lẹzun mimiọn. 13Ṣigba mẹhe dakónna kaka jẹ opòdo, mẹdopolọ wẹ yè na whlẹn gán 14Podọ yè nasọ dọ yẹwheho wẹndagbe ahọludu tọn he lẹ to aigba fìninọ lepo mẹ na okunnu de hlan akọta lẹpo; whenẹnu wẹ opòdo na wá.

15Enẹwutu, whenuena mì mọ osùnú awuhiọ hẹngble tọn he yè ko dọ gbọn Duniẹli yẹwhegán mẹ tesisi to ofi wiwe mẹ (mẹdepope he hia ẹ gbọ ni tunwun in:) 16Whenẹnu wẹ mẹhe tin to Judé lẹ ni hòn yì osó lẹ mẹ. 17Na mẹhe tin to ohòta jẹte wá nado bé onú he tin to ohò etọn mẹ jẹgbonu blo. 18Na mẹhe tin to dangbo lẹgò wá godo nado yí avọ̀ sinṣinyọn etọn blo. 19Dindọn hlan yé mẹhe mọhò lẹ, podọ hlan yé mẹhe to anó do na ovi to azán nẹlẹ gbè í 20Podọ mì ni hodẹ dọ wìwọ mìtọn yín avivọ whenu blo, kavi yín gbọjẹzán de gbè blo: 21Na whenẹnu wẹ mukunbibia daho na tin, ehe hunkọ ma ko tin sọn whéwhéwhenu aihọn tọn kaka jẹ dinvie, lala, mọtọn hunkọ ma to na tin gbède. 22Adavo le yè ko sán azán nẹlẹ do oglì, mẹhe na sọgan lùn in tón de ma tin: ṣigba na mẹsìnyansinyan lẹ tọn wutu wẹ yè na sán azán nẹlẹ do ogli. 23Whenẹnu eyín mẹdepope na dọ hlan mì, dọ, Pọ́n, Klisti tin to ofi, kavi to finẹ; mì yí i se blo. 24Na Klisti lalonọ lẹ po yẹwhegán lalonọ lẹ po na fọ́n, bo na yí ohia daho po azón dabla lẹ po hia; sọmọ nado hẹnmẹbu, eyín é sọgán yin wiwà, yèdọ mẹsinyansinyan lẹ. 25Pọ́n, yẹn ko dọ na mì jẹnukọn. 26Enẹwutu, eyín yé na dọ hlan mì, dọ, Pọ́n, é tin to zùngbo mẹ; mì jẹgbonu yì blo; pọ́n, é tin to abò hò mẹ; mì yí yé se blọ. 27Na le abì nọ jẹgbonu sọn whezizẹ dali wá, bo sọ nọ yín mimọ yèdọ je wheyìhọ dali, mọkẹdẹ wẹ wiwá Ovi gbẹtọ tọn na nọ. 28Fidẹpope he osiọ te, finẹ wẹ osú lẹ nọ pli dopọ te.

29Ṣigba to afọdoponẹji, to azán nukunbibia nẹlẹ tọn godo, yè na hẹn owhè dozinvlu, osùn ma to na yí hinhọ́n etọn hia, sunwhlẹvu lẹ nasọ flé sọn olọn, huhlọn olọn lẹ tọn lẹ wẹ yè nasọ whan. 30Whenẹnu wẹ ohia Ovi gbẹtọ tọn na sọ awúhia to olọn mẹ; whenẹnu wẹ whẹndo he tin to aihọn mẹ lẹpo na blawú, yé nasọ mọ Ovi gbẹtọ tọn sọn aslọ olọn tọn lẹ go ja, po huhlọn po, po gigo daho po. 31E nasọ do angẹli etọn lẹ hlan gbonu po opẹ́n daho de po, yé nasọ bé mẹsinyansìnyan etọn lẹ plidopọ sọn jẹhọn ẹnẹ lẹ mẹ, sọn opòdo dopo olọn tọn jẹ awetọ.

32Dinvie mì plọ́n oló ovotin tọn; Whenuena ala etọn sẹsẹ tón, bo sọ kọamà, mìwlẹ yọ́n ẹn do ojle alúnlún tọn sẹpọ́: 33Yèdọ mọkẹdẹ wẹ mìwlẹ ga, whenuena mìwlẹ mọ onú helẹ pó, mì ni yọnẹn dọ é sẹpọ́, yèdọ to ohọn ji. 34Nugbo wẹ yẹn dọ hlan mì, Whẹndo he ma to na juwayì, kaka yè nado hẹn onú helẹ pó sẹ. 35Olọn po aihọn po na juwayì, ṣigba ohó ṣie lẹ ma to na juwayì. 36Ṣigba azán nẹ po ojlẹ po tọn, mẹde ma yọnẹn, lala, é ma yín angẹli olọn tọn lẹ, adavo Otọ́ ṣie dopo akàn. 37Ṣigba le azán Noe tọn te, mọkẹde wẹ wiwá Ovi gbẹtọ tọn na nọ. 38Na di to azán nẹlẹ mẹ he tin to osìngigọ lo nukọn yé to dùdù, bo to nùnù, bo to alọwle, bo sọ to nina to alọwiwle mẹ, kaka jẹ azán he gbè Noe biọ ohún mẹ, 39Yé ma sọ yọnẹn kaka osìngigodo wá, bo pló yé omẹ pó yì; mọkẹdẹ wẹ wiwá Ovi gbẹtọ tọn na nọ ga. 40Whenẹnu wẹ omẹ awe na tin to oglè mẹ, yè na yí dopo, bo jo awetọ dai. 41Yọnnu awe na to séli to osé kòn; yè na yí dopo, bo jo awetọ dai. 42Enẹwutu mi nọ hó mìde na mì ma yón azán he gbè Oklunọ mìtọn ja. 43Ṣigba ọ́n ehe dọ, eyín mẹmẹnu owhé lọ tọn o yọ́n ojlẹ he mẹ ajotọ ja te, é na ko họali, é ma do ko dike yè ni kùndo biọ owhé etọn gbè gba. 44Enẹwutu mì ni wleawu dai: na ojlẹ he mẹ mì ma lẹn do wẹ Ovi gbẹtọ tọn ja. 45Enẹwutu mẹnu wẹ afànumẹ nugbonọ, nuyọnẹntọ, mẹhe klunọ etọn do basi ogán whédo etọn tọn, nado na núdùdù yetọn yé to osã sisọ mẹ? 46Donanọ wẹ afànumẹ nẹ, whenuena klunọ etọn wá, mẹhe é na mọ to mọ wà. 47Nugbo wẹ yẹn dọ hlan mì dọ. Ewọ na yí i do basi ogán onú he é tindo lẹpo tọn. 48Ṣigba eyín afànumẹ ylankan ne dọ to ayiha etọn mẹ, dọ, Klunọ ṣie dọ̀n gigò etọn do godo; 49Bo sẹ̀ nuli devi ohatọ etọn lẹ, bo sọ to dùdù, bo to ahannumu; 50Klunọ afànumẹ nẹ tọn na wá to azán de mẹ whenuena é ma donukun in, podọ to ojlẹ he é ma yọnen de mẹ, 51Bo nasọ hò e susu, é na dè tẹnme etọn to yẹnuwàtọ lẹ de; finẹ wẹ avi po adukúnkún po na te.

Currently Selected:

MATIU 24: BWL23

Highlight

Copy