JOB 7
7
1BÉ ojlẹ sinsẹ̀nzọ́n tọn de ma tin na gbẹtọ to aigba ji?
Podọ bé azán etọn lẹ ma tin taidi azán pakanọ de tọn?
2Dile devi de he nọ yí sọwhiwhe do jle oyè,
Podọ dile pakanọ de he nọ pọ́n na azọ́nkuẹ etọn do:
3Mọ yè basi mì do nado tindo osùn ovọ́ tọn lẹ,
Podọ yè sọ dè ozán núkikọnọ lọ hlan mi.
4Whenuena yẹn mlọnai, yẹn dọmọ,
Whetẹnu wẹ yẹn na tite bọ yè na hẹn ozán yì?
Bọ yẹn sọ yín gigọ́ na tùntùn lẹ hlannukọn podọ hlangodo jẹ wunkinkẹn okle tọn.
5Yè yí owán le do ṣinyọ̀navọ̀na mi po agó kógudu tọn lẹ po:
Yè gbà ayú ṣie bọ é sọ lẹzùn núlùnwán,
6Azán ṣie lẹ yín awuyatọ hú osóki avọlọntọ de tọn,
Yè sọ zán ẹn matin tódido.
7Ṣó flin dọ ojẹhọn wẹ ogbẹ́ ṣie:
Nukun ṣie ma na mọ dagbe de ba.
8Nukun ewọ he to mimọ mi tọn ma sọ to na mọ mi ba:
Nukun towe lẹ na tin to oji e, ṣigba yẹn ma na tin.
9Le yè nọ sú aslọ do bọ é sọ nọ kọ̀nwá yì
Mọ wẹ éwọ he jẹte yì yọ̀do mẹ ma to na wá aga ba.
10E ma to na sọ lẹ́gọ̀ do otvhé etọn gbè ba,
Mọ otẹn etọn ma to na sọ yón ẹn gbède ba.
11Enẹwutu wẹ yẹn ma na dè onù ṣie sẹ̀;
Yẹn na to hódọ to awubọ́ gbigbọ ṣie tọn mẹ.
Yẹn na to kuefàn to ovivẹ alindọn ṣie tọn mẹ.
12Bé ohù de wẹ yẹn, kavi núdazi ohù mẹ tọn de,
Bọ hiẹ do dè hihọtọ de do oji e?
13Whenuena yẹn dọmọ, Adọzàn ṣie na miọnhomẹna mi, adọtẹn ṣie na nagbọjẹ kuefinfàn ṣie;
14Whenẹnu wẹ hiẹ yí odlọ lẹ do dobuna mi,
Bo sọ dobuna mi gbọn numimọ lẹ mẹ:
15Sọmọ bọ alindọn ṣie dè kọsislona,
Podọ okú hú ohú ṣie helẹ̃.
16Yẹn howán ogbẹ́ ṣie; yẹn ma na nọgbẹ̀ whepoponu gba:
Gbọ sọn ogo e abẹ; na azán ṣie lẹ tin di gbọfufú de.
17Etẹ́ gbẹtọ yín, bọ hiẹ na do nọ jlayínna ẹn,
Podọ bọ hiẹ na do zé ayiha towe do e go,
18Podọ bọ hiẹ na do nọ dla ẹ pọ́n to afọnnu-afọnnu,
Bo sọ nọ glo e pọ́n to ojlẹ lẹpo mẹ?
19Nawẹ hiẹ na dèkọ̀ sọn ogo e dẹ̀n sọ,
Kavi ma gbọ sọn ogo e abẹ̃ kaka yẹn do mì otán ṣie?
20Eyín yẹn ko wàylando, etẹ́ yẹn do wà hlan we,
Hiẹ vàdomẹtọ gbẹtọ lẹ tọn?
Etẹwutu wẹ hiẹ do zé mi do di ohia de na we,
Sọmọ bọ yẹn yín agbàn de hlan dẽ?
21Podọ etẹwutu wẹ hiẹ ma jona sẹ́ngbigbà, bo sọ dè ylanwà ṣie sẹ́?
Na dinvie wẹ yẹn na mlọnai to kógudu mẹ;
Bọ hiẹ na whèsọ do din mi, ṣigba yẹn ma na tin gba.
Currently Selected:
JOB 7: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.