ISAIA 3

1SAPỌN, OKLUNỌ, OKLUNỌ awhànpa lẹ tọn dè hẹndote po opò po sọn Jelusalẹm po Juda po, hẹndote núdùdù lẹpo tọn podọ hẹndote osìn lẹpo tọn. 2Omẹ gángán po awhànfuntọ po, whẹ̀dato po yẹwhegán po, nuyọnentọ, po mẹhó po. 3Awhangan kandeao ton, po gbẹtọ yẹyinọ po, tòhodọtọ, anawàtọ po hóvividọtọ po. 4Yọpóvu lẹ wẹ yẹn na yí do basi ahọvi yetọn, ovivu lẹ wẹ na sọ dugán to yé ji. 5Yè na sinawúna gbẹtọ, omẹ depope sọn awetọ etọn si, dopodopo sọn komẹnu etọn si; yọpọ́ na nọ yigò do mẹhó go, omẹ vọnu do yẹyinọ go. 6Whenuena gbẹtọ na tédo mẹmẹsunnu etọn, owhé otọ́ etọn gbè tọn go, dọmọ, hiẹ tindo avọ̀, yín ogán to mí ji, bo gbọ̀ na hẹngble he ni tin to alọ towe glọ. 7Azán lọ gbè wẹ é na donusu dọmọ, yẹn ma na yín jladotọ bà; na to owhé ṣie gbè núdùdù kavi avọ̀ ma tin gba: a yí mi do dogán gbẹtọ lẹ tọn blo. 8Na Jelusalẹm kó zùn hẹngble, Juda ko jai; odé yetọn po walọ yetọn po jẹagọ̀ do OKLUNỌ go, nado hẹn gigo nukun etọn lẹ tọn gblehomẹ. 9Ohia nukun yetọn tọn to kunnude do yé go; yé to ylando yeton sọhia di Sọdọmi, yé ma whla ẹ. Dindọn wẹ na gbigbọ yetọn! na yé ko yí oylan do suahọ yéde. 10Mì dọ na dódónọ dọ, é na yón nẹ̃: na yé na dù sinsẹ́n azón yetọn tọn. 11Dindòn wẹ na ome ylankan! é na ylan nẹ na ale alọ etọn mẹ tọn wẹ yè na na ẹn. 12Gbọn omẹ ṣie lẹ ton dali, yọpọvu lẹ wẹ awusinẹnnamẹtọ yetọn, yọnnu sọ to gándù to yé ji. Ṣó! Omẹ ṣie emì, yé he to yẹyiwlena we lẹ hẹn we buali, bo sọ hẹn ali omọ́ towe tọn gble. 13OKLUNỌ fọ́n nọte nado yiwhẹ̀dọ, é sọ fọ́n nado dawhẹ́na gbẹtọ lẹ. 14OKLUNỌ na biọ whẹ̀dida mẹ hẹ mẹhó omẹ etọn lẹ tọn, podọ hẹ ahọvi he to é mẹ lẹ; na mì ko dù vẹ̃n nẹ súdo; ogbànna wamọnọ lẹ tọn sọ tin to owhé mítọn gbè. 15Etẹwẹ mì lẹn bo do gbà omẹ ṣie lẹ kija, bo sọ gbidi nukunmẹ wamọnọ lẹ ton dai? wẹ OKLUNỌ lọ dọ, Jiwheyẹwhe awhanpa lẹ tọn.

16Humọ, OKLUNỌ dọmọ, Na viyọnnu Ziọni tọn lẹ yín goyítọ, bo sọ to zọnlinzin to okọ̀ dindlẹn mẹ, podọ to nukun nújijlo tọn mẹ, bo to zonlinzin, bo to gigõ whenuena yé to yìyì, bo sọ dikena afọ yetọn ni to nudọ̀di anigle. 17Enẹwutu OKLUNỌ na yí ohàn agada tọn li ota na viyọnnu Ziọni tọn lẹ, bo na sọ dè omẹ́ yetọn do gbonu 18To azán lẹ gbè OKLUNỌ na dè gigo anigle yetọn tọn sẹ̀, aṣọdonu yetọn lẹ, po tablanu yetọn po di osùnwhlẹ. 19Gẹ̀dẹ̀, alọgàn, po nukunmẹnú po, 20gbejè po avọ́ po, tabla, nusisá dagbe, po tómenu po, 21alọkẹ po aṣọdonu awọ̀ntin tọn po, 22avọ̀ dido didiọ po okọ̀do po, owọ̀vi po ogàn sislo po. 23Mẹpọ́nnu, po alà dagbedagbe po, jẹhẹnú po nukunmẹ tọn po. 24To enẹgodo núlùnwán na nọ̀ otẹn nuwhẹnwán tọn mẹ; nukija na sọ nọ̀ otẹn ogbajá tọn mẹ, ota pipá na sọ nọ̀ otẹ̀n tùnudo tọn mẹ; fifiọ na sọ nò otèn whànpẹ tọn mẹ. 25Sunnu towe lẹ na gbọn alọ ohi tọn dali jai, Omẹ gángán towe lẹ na siawhàn. 26Dòkọ́nu etọn lẹ na viavi, bo na sọ blawú, na ewọ jẹvọ́ wutu, é na sinai to aigba.

Currently Selected:

ISAIA 3: BWL23

Highlight

Copy