EZEKIELI 40

1TO owhè kòatọ́ntọ mẹmẹglọ mítọn tọn mẹ, to sẹdeji owhè lọ tọn mẹ, to azán aotọ osùn lọ tọn mẹ, to owhè wiẹnẹtọ mẹ godo yè ko hò tòdaho lọ, to azán dopolọ mẹ, alọ OKLUNỌ tọn tin to oji e, ewọ sọ hẹn mi wá finẹlọ. 2To númimọ Jiwheyẹwhe tọn lẹ mẹ wẹ é hẹn mi wá biọ aigba Islaèli tọn mẹ, bo zé mi dai do osé yìaga talala de ji, eheji tin di dido tòdaho de tọn to ohuwàji. 3Ewọ sọ hẹn mi wá finelọ, bo dayi e go, dawe de tin finẹ, awusọhia mẹhetọn tin taidi awusọhia ogànvẹ̃ tọn po okàn azó tọn de po to alọ etọn mọ, po ofán nújlẹnú tọn de po; ewọ sọ site to hòngbo lọ mẹ. 4Dawe lọ sọ dọ hlan mi dọ, Visunnu gbẹtọ tọn, yí nukun towe lẹ do pọ́n, bo sọ yí otọ́ towe lẹ do sè, bo sọ zé ayiha towe do ehe yẹn na dohia we lẹpo go; na hlan ayipanúgo na yẹn nido do yé hia hlan we wẹ yè do hẹn hiẹ wá filelọ: lá ehe hiẹ mọ lẹpo hlan ewhó Islaeli tọn.

5Bo dayi e go, adó de tin to adàgòonu ohò lọ tọn go lédo pé, podọ to alọ dawe lọ tọn mẹ ofán nújlẹnú awàgbà ṣidopo na ote, awàgbà dopo po alọpàhomegbigblo dopo po na dopodopo: mọwẹ ewọ jlẹ otitli dido lọ tọn, ofán dopo; po ojiyì lọ po, ofán dopo. 6Whenenu wẹ ewọ wá jẹ hòngbo he pọ́n hlan whèzẹtẹn tọn kòn, bo sọ he agayìnú etọn le ji yì; é bo sọ jlẹ hòntonu họngboji lọ tọn, ofán dopo gbigblo: yèdọ hòntonu awetọ ofán dopo gbigblo. 7Podọ abò ogànwhé tọn dopodopo yín ofán dopo tedidi, po ofán dopo gbigblo po; podọ hvoto lọ to ojẹtẹn lẹ ṣẹnṣẹn yín awàgbà atón; podọ hòntònu họngboji lọ tọn to awá họngboji lọ ton dali hlan ohò lọ dali yín ofán dopo. 8E sọ jlẹ awá hongboji lo tọn ga hlan oho lọ dali, ofán dopo 9Whenẹnu wẹ é sọ jlẹ awá họngboji lọ tọn, awagbà sinatọn; podọ ohọnte etọn lẹ, awàgbà aweawe; podọ awá hòngboji lọ tọn tin hlan ohò lọ dáli. 10Podọ ojetẹn họngboji lọ tọn lẹ hlan whèzẹtẹn dali yín atọ̀n to adà he ji, podọ atọ̀n to adà ne ji; ye atọ̀n lẹ yín ojlẹ dopone tọn: podọ ohọnte lẹ lọ tindo ojlẹ doponẹ to ada he ji podọ to adà nẹ ji. 11Ewọ sọ jlẹ gbigblo hùnhùn họngbo lọ tọn tọn, awàgbà ao; podọ oga họngbo lọ tọn, awàgbà wiatọn; 12podọ agboji de to ojetẹn lẹ lọ nukọn, awàgbà dopo to adà he ji, podọ agboji de awagbà dopo to ada nẹ ji. 13E sọ jle họngboji lọ sọn ohota ojetẹn dopo tọn jẹ ohòta awetọ tọn, ogblo awàgbà kòatọ́n tọn; ohòn pannukọn ohòn. 14E basi ohònte lẹ ga, awàgbà kandeko; podọ otogùn lọ sọ jẹ ọjẹten lọ kòn, hongbo lọ tin lédo pé. 15Podọ sọn nukọn họngbo lọ tọn to bibiọwhegbè jẹ nukọn awánu họngbo homẹnukọn tọn ji yín awàgbà kandeao. 16Ovẹ́sẹ́ súsú sọ tin finẹ hlan ojẹtẹn lẹ lọ, podọ jẹ ohònte yetọn lẹ kòn to họngbo lọ home lẹdo pé, podọ mọdoponẹ jẹ họntònuhademẹ lẹ kọn: podọ ovẹ́sẹ́ lẹ tin to home lédo pé: podọ odétin lẹ tin to ohònte dopodopo ji.

17Whẹnẹnu wẹ é sọ hen mi wá biọ otògùn gbonu tọn mẹ, bo, pọ́n, abò lẹ tin finẹ po agbàtité de po, yè basi na otògùn lọ lédo pó: abò ogbàn wẹ to agbàtité lọ ji. 18Podọ agbàtité lọ tin to awà họngbo lẹ lọ tọn ji, jlọdo ote họngbo lẹ lọ tọn ji, yèdọ agbàtité odo tọn. 19Whenẹnu wẹ é jlẹ ogblo lọ sọn nukọn họngbo odò tọn jẹ nukọn otògùn homẹ tọn to gbonu, awàgbà kanweko, to whèzẹten ji podọ to agewàji. 20Podọ họngbo otògùn gbonu tọn fimọnújẹ eheton tin hlan agewàji dali, é sọ jlẹ ote etọn po ogblo etọn po. 21Ojẹtẹn etọn lẹ yín atọ̀n to adà he ji podọ atọ̀n to ádà nẹ ji; podọ ohònte etọn lẹ po hòntònuhademẹ etọn lẹ po tin di ojlẹ họngbo tintan tọn: ote etọn yín awàgbà kandeao, podọ ogblo awàgbà kòatọ́n. 22Podọ ovẹ́sẹ́ etọn lẹ, po hòntònuhademẹ etọn lẹ po, po odétin etọn le po, yín ojlẹ họngbo lọ tọn fimọnújẹ ehetọn tin hlan whèzẹtẹn dali; yé bó sọ no hẹji yì jẹ e de gbọn agahénú ṣinawe ji; hòntònuhademẹ etọn lẹ sọ tin to yé nukọn. 23Họngboji de sọ tin finẹ hlan otògùn homẹtọn taga pannukọn họngbo awetọ awelẹ to agewaji ji podọ to wheyihọ ji; e so jlẹ sọn họngboji jẹ họngboji awàgbà kanweko. 24E sọ plan mi jẹ huwaji dali, bo dayi e go họngbo de to huwaji dali; é sọ jlẹ ohọnte etọn lẹ po họntònuhademẹ etọn lẹ po kẹdẹdi ojlẹ helẹ 25Ovẹ́sẹ́ lẹ sọ tin to finẹ to e mẹ podọ to hòntonuhademẹ etọn lẹ mẹ lédo pé, taidi ovẹ́sẹ́ helẹ: ote yín awàgbà kandeao, podọ ogblo lọ awàgbà koatọ́n. 26Ágahénu ṣinawe tin finẹ nado hẹji yì jẹ e kòn, họntònuhademẹ etọn le sọ tin to yé nukọn: é sọ tindo odétin lẹ, ode tò adà he ji, awetọ to odà nẹ ji, to ohònte etọn lẹ ji. 27Họngboji de sọ tin jẹ otògùn homẹ tọn hlan huwaji dali: ewọ sọ jlẹ sọn họngboji jẹ họngboji hlan huwaji dali awàgbà kan weko;

28Whenẹnu wẹ é sọ hẹn mi wá jẹ otògùn homẹ tọn mẹ to huwaji họngboji dali: é sọ jíẹ huwaji họngboji lọ kẹdẹdi ojlẹ helẹ; 29podọ ojẹten etọn lẹ, po ohònte etọn lẹ po, kẹdẹdi ojlẹ helẹ: ovẹ́sẹ́ lẹ sọ tin finẹ to e mẹ po hòntònuhademẹ etọn lẹ po lédo pé: é yín awàgbà kandeao tedidi, podọ awàgbà koatọ́n gbigblo. 30Hòntònuhademẹ lẹ sọ tin finẹ lédo, awàgbà koatọ́n tedidi, podọ awàgbà atón gbigblo. 31Hòntònuhademẹ etọn lẹ tin hlan otògùn gbonu tọn dali; odétin lẹ sọ tin to ohònte etọn lẹ ji: podọ jei aga hlan e de tindo agayìnú sinatòn. 32E sọ hẹn mi wá biọ otogùn homẹ tọn me hlan whèzẹtẹn dali: é sọ jlẹ họngboji lọ kẹdẹdi ojlẹ helẹ; 33podọ ojẹtẹn etọn lẹ, po ohònte etọn lẹ po, po họntònuhademẹ etọn lẹ po, kẹdẹdi ojlẹ helẹ: ovẹ́sẹ́ lẹ sọ tin finẹmẹ podọ to hòntònuhademẹ etọn lẹ mẹ lédo pé: é yín awàgbà kandeao tedidi podọ awàgbà koatọ́n gbigblo. 34Podọ hòntònuhade mẹ etọn lẹ tin hlan otògùn gbonu tọn dali; odétin lẹ sọ tin to ohònte etọn lẹ ji, to adà he ji, podọ to adà nẹ ji: podọ jei aga jẹ e de tindo agayìnú sinatòn. 35E sọ hẹn mi wá jẹ agéwaji họngboji: é sọ jlẹ ẹ kẹdẹdi ojlẹ helẹ; 36ojẹtẹn etọn lẹ, ohònte etọn lẹ, po hòntònuhademẹ etọn lẹ po; ovẹ́sẹ́ lẹ sọ tin finẹmẹ lédo pó: otedidi yín awàgbà kandeao, podọ ogbigblo awàgbà koatọ́n, 37Ohònte etọn lẹ bo sọ tin hlan otògùn gbonu tọn dali; odétin lẹ sọ tin to ohònte etọn lẹ ji, to adà he ji, podọ to adà nẹ ji: jei aga jẹ e de sọ tindo agayìnú sinatòn.

38Podọ abò de po ohòn etọn po tin to ohònte lẹ dali to họngboji; finẹ wẹ yé nọ kló avọ́ nunina mimẹ̀ te. 39Podọ to awánu họngboji lọ tọn dali wẹ tafo awe te to adà he ji, podọ awe to adà nẹ ji, nado nọ hù avọ́ nunina mimẹ̀ lọ po avọ́ nunina ylando tọn po po avọ́ nunina whèylan tọn po to finẹji. 40Podọ to adà dopo ji to gbonu, to aila bibiọ tọn lẹ kòn hlan agéwaji dali, wẹ tafo awe te; podọ to adà awetọ ji, he yín awánu họngboji lọ tọn wẹ tafo awe te. 41Tafo ẹnẹ tin to adà he ji, podọ tafo ẹnẹ sọ tin to adà nẹ ji, to adà họngboji lọ tọn dali; tafo sinatòn, eheji yé nọ hù avsánnu lẹ te. 42Tafo ẹnẹ wẹ finẹ na avọ́ nunina mimẹ̀, zannu pipa tọn, awàgbà dopo po odá po tedidi, podọ awàgbà dopo po odá po gbigblo, podọ awàgbà dopo jiyìyì: eheji yé nọ bó núzinzán lẹ he yé do nọ hù avù nunina mimẹ̀ po avọ́sánnu lẹ po do. 43Po opla lẹ po, alọpàhomẹ gbigblo dopo tedidi, yè whè do dido lọ mẹ lédo pó: podọ to tafo lẹ lọ ji wẹ olàn avọ́ tọn te. 44Podọ to gbonu họngboji homẹ wẹ abò lẹ te na ohànjitọ lẹ to awánu homẹ tọn mẹ, he tin to agéwaji họngbo lọ tọn mẹ; podọ fimọnújẹ yetọn tin hlan huwaji dali: dopo to adà whèzẹtẹn họngboji dali he tindo fimọnújẹ hlan agéwaji dali. 45Ewọ sọ dọ hlan mi dọ, Abò he, fimọnújẹ ehetọn tin hlan huwaji dali, tin na yẹwhenọ lẹ, pinpẹ̀n asẹ ohọ̀ lọ tọn go tẹ́ lẹ tọn. 46Podọ abò fimọnújẹ ehetọn tin hlan agéwaji dali tin na yẹwhenọ lẹ, pinpẹ̀n asẹ agbà lọ tọn go tọ́ lẹ tọn: ehelẹ wẹ visunnu Zadọki tọn lẹ, he wá sẹpọ́ jẹ OKLUNỌ de sọn visunnu Levi tọn lẹ ṣẹnṣẹn nado nọ wàdevizẹ́n hlan ẹn lẹ. 47Ewọ bo sọ jlẹ awánu lọ, awàgbà kanweko tedidi, podọ awàgbà kanweko gbigblo, adàẹnẹsọzẹn; agbà lọ bo sọ tin to ohò lọ nukọn.

48Whenẹnu wẹ é hẹn mi jẹ awánu ohò lọ tọn, bo sọ jlẹ ohònte dopodopo awánu lọ tọn, awàgbà atón to adà he ji, podọ awàgbà atọ̀n to adà nẹ ji: podọ ogblo họngboji lọ tọn yín awàgbà atọ̀n to adà he ji, podọ awàgbà atọ̀n to adà nẹ ji. 49Ote awánu lọ tọn yín awàgbà okò, podọ ogblo awàgbà widopo; yèdọ gbọn agayìnú lẹ dali he yé do nọ hẹji yì jẹ e kòn; odòtin lẹ sọ tin finẹ to ohònte lẹ dali, dopo to adà he ji, podọ awetọ to adà nẹ ji.

Currently Selected:

EZEKIELI 40: BWL23

Highlight

Copy

Compare