DANIẸLI 8

1TO owhè atọ̀ntọ ahọludu, ahọlu Belṣazali tọn tọn mẹ númimọ de sọ sọawuhia hlan mi, yèdọ hlan yẹn Daniẹli, to enẹ he sọawuhia hlan mi tintan tọn godo. 2Yẹn bo mọ to númimọ lọ mẹ; mọwẹ é yín dinvie, na whenuena yẹn mọ, yẹn tin to Ṣuṣani osíngbo lọ mẹ, he tin to gbétatò Elami tọn mẹ; yẹn bo sọ mọ to númimọ lọ mẹ, podọ yẹn tin to otọ Ulai dali. 3Whenẹnu wẹ yẹn zé nukun ṣie lẹ daga, bo mọ, bo, dayi e go, agbò he tindo azò awe de ṣite fìnẹ to otọ̀ lọ nukọn: azò awe lẹ lọ yìaga; ṣigba ode yìaga hú awetọ, ehe yìagahugán wẹ wá aga gbọngodo. 4Yẹn mọ agbò lọ lo avùndlọn hlan whèyihọ dali, podọ hlan agéwaji dali, podọ hlan huwaji dali; podọ gbékanlin lẹ de ma sọ sọgan ṣite to ewọ nukọn mọ mẹdepope ma tin finẹ he sọgan whlẹnmẹ sọn alọ etọn mẹ; ṣigba ewọ to wiwà kẹdẹdi ojlo etọn, bo sọ to ede hẹnklo. 5Podọ le yẹn to nulẹnpón, dayi e go, alunkùn de sọn whèyihọ ji wá nukunmẹ aigba lọ pete tọn tà, bo ma jẹ aigba go: alunkùn lọ sọ tindo azò klòklo de to nukun etọn lẹ ṣẹnṣẹn. 6Ewọ sọ wá agbò he tindo azò awe lọ de, he yẹn mọ ṣite to otọ̀ lọ nukọn, bo họ̀nwezun dli do e ji to homẹwlu huhlọn etọn tọn mẹ. 7Yẹn sọ mọ ẹn sẹpọ wá jẹ agbo lọ ji, yè sọ hẹn ẹn yi fifìẹ do wlu do e ji, bo sọ hò agbò lọ, bo wẹ́n azò etọn awe lẹ; huhlọn de ma sọ tin to agbò lọ mẹ nado ṣite to ewọ nukọn: ṣigba é zé e jai jẹ aigba, bo tùnafọ e ji; mẹde ma sọ tin finẹ he sọgan whlẹn agbò lọ sọn alọ etọn mẹ. 8Alunkùn lọ sọ to ede hẹnklo gbahugbahu: podọ whenuena ewọ yín huhlọnnọ, yè wén azò daho lọ; podọ to otẹn etọn mẹ azò klòklo ẹnẹ hẹaga wá hlan ojẹhọn ẹnẹ olọn tọn lẹ dali. 9Podọ azò pẹvi de tón sọn dopo yé tọn mẹ jẹgbonu wá, ehe whén zùn kiklo talala, hlan huwaji dali, podọ hlan whèzẹtẹn dali, podọ hlan aigba gigonọ lọ dali. 10E whén zùn kiklo, yèdọ jẹ awhànpa olọn tọn lọ de; podọ é zé vude sọn awhànpa lọ mẹ podọ sọn sunwhlẹvu lẹ mẹ dlan odò jẹ aigba, bo sọ tùnafọ yé ji. 11Mọwẹ, ewọ to ede hẹnklo, yèdọ jẹ ahọvi awhànpa lọ tọn de; yè sọ yí avọ́ nunina mimẹ̀ whepoponu tọn lọ yì sọn e si, yè sọ zé otẹn fiwiwe etọn tọn lọ liai. 12Yè sọ na awhànpa de hlan ẹn do avọ núnina mimẹ whepoponu tọn lọ ji gbọn osẹ́nmẹjẹ mẹ; é sọ zé nugbo dlan odò jẹ aigba, é bo sọ wà homẹhùnnu etọn bo duale. 13Whenẹnu wẹ yẹn sè omẹ wiwe de to hódọ; omẹ wiwe devo sọ dọ hlan omẹ doponẹlọ he dọhó dọmọ, Nawẹ númimọ gbọn avọ́ nunina mimẹ whepoponu tọn lọ tọn dali, po osẹ́nmẹjẹ he hẹn zùn ovọjẹ po, na tin dẹn sọ, nado jó fiwiwe lọ po awhànpa lọ po nado yín zínzíndai to afọ glọ? 14Ewọ sọ dọ hlan ẹn dọmọ, Jẹ whèjai lẹ po afọnnu lẹ po fọtọ́n awe po fọdekanweko po: whenẹnu wẹ fiwiwe lọ na yín whèsuna.

15E sọ wá jọ, whenuena yẹn, yèdọ yẹn Daniẹli, ko mọ númimọ lọ, wẹ yẹn din wuntùntùn; bo, dayi e go, di awusọhia gbẹtọ de tọn site finẹ to yẹn nukọn. 16Yẹn sọ sè ogbè omẹ de tọn to otọ́ Ulai tọn lẹ ṣẹnṣẹn, he ylọ, bo sọ dọmọ, Gabriẹli, hẹn dawe he nado tùnwun númimọ lọ. 17Mọwẹ ewọ wá sẹpọ́ fie yẹn site te; podọ whenuena é wá, yè hẹn yẹn dibu, bo sọ họ dó nukunmẹ ṣie ji: ṣigba ewọ dọ hlan mi dọmọ, Tùnwun, hiẹ visunnu gbẹtọ tọn È; na númimọ lọ tin hlan ojlẹ opòdo tọn. 18Dinvie le ewọ to hódọ hẹ mi, yẹn sọ́ biọ amlọn yìtóji de mẹ po nu-kunmẹ ṣie po hlan aigba: ṣigba ewọ doalọ ogo e, bo zé mi do fie yẹn ko ṣite te. 19Ewọ sọ dọ hlan mi dọ, Dayi e go, Yẹn na hẹn we yọ́n núhe na tin to ojlẹ agọ̀gbọnẹn homẹgble tọn lọ mẹ: na é tin hlan ojlẹ didè opòdo lọ tọn. 20Agbò he hiẹ mọ he tindo azò awe, ahọlu Media po Pẹlsia po tọn lẹ wẹ yé. 21Podọ alunkùn òfúnnọ lọ ahọlu Javani tọn wẹ: podọ azò daho he tin to nukun etọn lẹ ṣẹnṣẹn wẹ ahọlu tintan lọ. 22Podọ na enẹ he yè wén tọn, to otẹn ehetọn mẹ ẹnẹ site do, ahọludu ẹnẹ na fọ́n tite sọn akọta lọ mẹ, ṣigba po huhlọn etọn po ma gba. 23Podọ to ojlẹ agọ̀gbọnẹn ahọludu yetọn tọn lọ mẹ, whenuena yè hẹn osẹ́nmẹjẹ lẹ wá jẹ gigọ́ mẹ, ahọlu nukunmẹ dobu, po wuntùntùn owhẹ́dahó lẹ tọn po de, na site. 24Huhlọn etọn yín hlọnhlọnnọ, ṣigba po huhlọn etọn pọ ma gba; ewọ bo na sọ yí awujiji do vàmẹ, bo na wàdagbe bo sọ wà homẹhùn etọn: podọ ewọ na và omẹ hlọnhlọnnọ lẹ po gbẹtọ mẹwiwe lẹ tọn po. 25Podọ gbọn zìnzìn etọn mẹ é na hẹn anà nado wàdagbe to alọ etọn mẹ; ewọ bo na sọ to ede hẹnklo to ayiha etọn mẹ, podọ to madodego yetọn mẹ wẹ ewọ na và mẹsusu: ewọ na tite ga do ahọvi ahọvi lẹ tọn ji; ṣigba yè na wẹ́n ewọ matin alọ. 26Podọ númimọ whèjai lẹ po afọnnu lẹ po tọn he yè ko dọ lọ nugbo wẹ: ṣigba hiẹ ni súnúdo númimọ lọ; na é tin hlan azán susu to godo ja. 27Yẹn Daniẹli sọ kuṣiọ, bo sọ yín awutunọ azán de; whenẹnu wẹ yẹn fọ́n tite, bo sọ wà azón ahọlu tọn lọ: yè sọ hẹn awuji mi do númimọ lọ go, ṣigba mẹde ma tin nado hẹn ẹn yín nutùnwun gba.

Currently Selected:

DANIẸLI 8: BWL23

Highlight

Copy

Compare