AMỌSI 6

1DINDỌN hlan yé he tin blẹo to Ziọni mẹ, podọ hlan yé he yín gingán to osó Samalia tọn mẹ, omẹ gbogbo lẹ sọn nukọntọ akọta lẹ tọn mẹ, mẹhe de owhé Islaeli tọn wá 2Mì juyì jẹ Kalnẹ, bo pọ́n; podọ sọn finẹ mì yì jẹ Hamati daho lọ: whenẹnu mì jẹte yì Gati Filistini lẹ tọn: yé tin pọ́nte hú ahọludu helẹ la? kavi agboji yetọn yín daho hú agboji mìtọn la? 3Mì he dè azán ylanylan lọ sẹ́ do aganu, bo sọ hẹn aisinsin huhlọnnọ tọn nado sẹpọ́ wá; 4he mlọnai to adọzan ajlankudú tọn lẹ ji, bo sọ dlẹn yéde to númẹzẹn yetọn lẹ ji, bo to lẹngbọvú lẹ sọn kanlinpa mẹ dù, podọ oyìnvú lẹ sọn gblagbla apó lọ tọn mẹ; 5he to ohàn gblolo lẹ ji do núdidọ viọli tọn ji; he dowé núzinzán ohàngbè tọn lẹ na yéde, taidi Davidi tọn; 6he to nùnù to apánkó ovẹ̃n tọn lẹ mẹ, bo sọ nọ yí núsisa he péde lẹ do sanusisána yéde; ṣigba yè ma hẹn yé sadi na nukunbiamẹ Josẹfu tọn gba. 7Enẹwutu dinvie wẹ yé na yì mẹglọnọ hẹ tintan he yì mẹglọnọ, podọ opaṣa yé he nọ dlen yéde lẹ tọn na ju wáyi. 8OKLUNỌ JIWHEYẸWHE ko whle gbọn ede dali, wẹ OKLUNỌ dọ, Jiwheyẹwhe awhànpa lẹ tọn, dọmọ; Yẹn gbẹ́na osakla Jakob tọn, bo sọ gbẹwanna ohọ̀nmẹ etọn lẹ: enẹwutu wẹ yẹn na jó tòdaho lọ do po núhe tin to e mẹ lẹpo po. 9E na sọ wá jọ, eyin omẹ ao pò to owhé dopo gbè, wẹ yé na kú. 10Podọ whenuena otavẹ́ omẹ de tọn yí i do, yèdọ èwọ he mẹ̀ ẹn, nado hẹn ohú lẹ tẹ́n jẹgbonu sọn owhé lọ gbè, bo na sọ dọ hlan ewọ he tin to ofi nukọnnukọn owhé lọ gbè tọn dọ, Mẹdepope gbẹ́ sọ tin to de we finẹ? ewọ bo na dọmọ, Lala; whenẹnu wẹ ewọ na dọmọ, Nọabọẹ towe; na míwlẹ ma na sọgan dọhóylọ oyín OKLUNỌ tọn tọn gba. 11Na, dayi e go, OKLUNỌ degbè, é na sọ yí okikẹ̀ lẹ do hò ohọ̀ daho lọ, podọ ohọ̀ pẹvi lọ po zizẹ̀ lẹ po. 12Bé osọ́ lẹ na dowezun to osé ji? bé omẹde na yi oyín lẹ do jloaigba to finẹ? bọ mìwlẹ ko do lẹ́ whẹ̀dida do ovivẹ́ mẹ, podọ osinsẹ́n dódó tọn do ogbò mẹ: 13mì he to ayajẹ to ovọ́ onú de tọn mẹ, he didọmọ, Bé míwlẹ ma ko yi azò lẹ hlan míde gbọn huhlọn mítọn titi dali? 14Na, dayi e go, Owhé Islaeli tọn E, yẹn na zé akọta de tite do mì ji, wẹ OKLUNỌ, Jiwheyẹwhe awhànpa lẹ tọn dọ; yé na sọ hẹnnukunbia mì sọn bibiọ họmẹ Hamati tọn mẹ jẹ tọ̀pẹsẹ Alaba tọn kòn.

Currently Selected:

AMỌSI 6: BWL23

Highlight

Copy

Compare