1 SAMUẸLI 18
18
1E sọ wá jọ, whenuena é ko dotana hódidọ hlan Sauli, wẹ alindọn Jonatani tọn dọ̀ndo alindọn Davidi tọn go, Jonatani sọ yiwanna ẹn di alindọn etọn titi. 2Sauli sọ yí i to azán nẹ gbè, bo ma sọ jlo na gbọ ni yì owhé otò etọn tọn gbè ba. 3Whenẹnu wẹ Jonatani po Davidi po basi alẹ̀nù de, na ewọ yiwanna ẹn di alindọn etọn titi wutu 4Jonatain sọ dè ede sọn tewu he tin to e go mọ, bo yí ì na hlan Davidi, po awudido etọn po, yèdọ kakajẹ ohi etọn ji, podọ jẹ ogá etọn ji, podọ jẹ homẹbla etọn ji. 5Davidi sọ to fidepope Sauli do e hlan yì, bo sọ yí nuyonẹn do to ede hò: Sauli sọ dè e do omẹ awhàn tọn lẹ ji, é sọ yín dagbe to nukun gbẹtọ lẹpo tọn mẹ, podọ to nukun mẹmẹsi Sauli tọn lẹ tọn mẹ.
6E sọ wà jọ le ye ja, whenuena Davidi lẹ́gọ̀ sọn hùhù Filistini lọ tọn gbé, wẹ yọnnu lẹ tòn sọn tòdaho Islaeli tọn lẹpo mẹ, bo to hànji bo to wèdú, nado pé Sauli ahọlu, po akọ̀hún lẹ po, po ayajẹ po, po nuzinzán ogbèmlin tọn lẹ po. 7Yọnnu lẹ sọ to hànji ode hlan awetọ to aihúndida yetọn mẹ, bo didọmọ,
Sauli ko hù fọtọ̀n etọn lọ,
Davidi fọtọ̀n ao etọn lẹ.
8Sauli sọ yín homẹgblẹnọ susu, hódidọ he mahẹnhomẹhùn in gba; é sọ dọmọ, Yé ko na fọtọ̀n ao lẹ hlan Davidi, podọ yé ko na fọtọ́n lẹ hlan yẹn: etẹ̀ wẹ ewọ sọ sọgan tindo gòna adavo ahọludu lọ: 9Sauli sọ zé Davidi hẹn nukunji sọn azán nẹ gbè podọ hlannukọn.
10E sọ wá jọ to aihọngbe, wẹ gbigbọ ylankan de sọn Jiwheyẹwhe de wá Sauli ji po huhlọn po, é sọ dọdọdai to ogbla owhé etọn tọn gbè: Davidi sọ yí alọ etọn do to ajalẹn hò dile é nọ wà do to gbèpogbè: Sauli sọ tindo owhán etọn to alọ etọn mẹ. 11Sauli sọ dlọn owhán etọn; na é dọmọ, Yẹn na hò Davidi yèdọ hlan adó go. Davidi sọ vì sọn nukọn etọn whlawe. 12Osi Davidi tọn tin na Sauli, na OKLUNỌ tin to e de wutu, yè sọ hẹn ẹn yìsọn Sauli de. 13Enẹwutu Sauli dè e sọn e de, bo yí i do basi awhàngán etọn to fọtọ̀n de ji; é sọ to tintọ̀n bo to whégbe biọ to gbẹtọ lẹ nukọn. 14Davidi sọ yí nuyọnẹn do to ede họ̀ to aliho etọn lẹpo mẹ; OKLUNỌ sọ tin to e de. 15Whenuena Sauli mọ dọ e yí nuyọnẹn do to ede hò talala, ewọ nọte to awujiji mẹ sọn e de. 16Ṣigba Islaeli lẹpo po Juda po yiwanna Davidi; na ewọ to tintòn bo to whégbe biọ to yé nukọn.
17Sauli sọ dọ hlan Davidi dọ, Dayi e go, viyọnnu ṣie mẹho Mẹlabi, ewọ wẹ yẹn na na we hlan asi: hiẹ ni yín adantọ na mi kẹdẹ, bo sọ nọ fùn awhàn OKLUNỌ tọn lẹ. Na Sauli dọmọ, A dike alọ ṣie tin to e go blo, ṣigba gbọ na alọ Filistini lẹ tọn ni tin tò e go. 18Davidi sọ dọ hlan Sauli dọ, Mẹnu yẹn yín, podọ eté wẹ ogbẹ́ ṣie, kavi whédo otọ ṣie tọn to Islaeli mẹ, bọ yẹn na do yín visunnu yọnwhẹ̀n hlan ahọlu? 19ṣigba é wá jọ to ojlẹ mẹ whenuena yè do ko na Mẹlabi viyọnnu Sauli tọn hlan Davidi, wẹ yè yí ewọ na hlan Adlieli Mẹholatinu hlan asi. 20Mikali viyọnnu Sauli tọn sọ yiwanna Davidi: yé sọ dọ na Sauli, onú lọ sọ hẹnhomẹhùn in. 21Sauli sọ dọmọ, Yẹn na na ewọ ẹ, na é nido yín omọ de hlan ẹn, podọ na alọ Filistini lẹ tọn nido tin to e go. Enẹwutu Sauli dọ hlan Davidi dọ, Hiẹ to egbé he na yín visunnu yọnwhẹ̀n ṣie whlawetọ. 22Sauli sọ degbèna mẹmẹsi etọn lẹ, dọmọ, Mì dèpá abọẹabọẹ hẹ Davidi, bo dọmọ, Dayi e go, ahọlu tindo homẹvivi to hiẹ mẹ, mẹmẹsi etọn lẹpo sọ yiwanna we: enẹwutu dinvie yín visunnu yọnwhẹ̀n ahọlu tọn. 23Mẹmẹsi Sauli tọn lẹ sọ dọ ohó helẹ do otọ́ Davidi tọn lẹ mẹ. Davidi sọ dọmọ, E sọawuhia hlan mìwlẹ onú fufua de nado yín visunnu yọnwhẹn ahọlu tọn, mimọ dọ omẹ wamọnọ de wẹ yẹn, podọ mẹmagàndeji? 24Mẹmẹsi Sauli tọn lẹ sọ dọ nẹ̃, dọmọ, Ehe hunkọ ji wẹ Sauli dọhó do. 25Sauli sọ dọmọ, Le wẹ mì na dọ hlan Davidi dọ, Ahọlu ma jlo asibiọnu depope gba, adavo ayútintan Filistini lẹ tọn kanweko, nado yín ahọsuyí sọn kẹ̀ntọ ahọlu tọn lẹ de. Dinvie Sauli to linlẹn nado hẹn Davidi jai gbọn alọ Filistini le tọn dali. 26Whenuena mẹmẹsi etọn lẹ dọ ohó helẹ na Davidi, é hẹnhomẹhùn Davidi dagbedagbe nado yín visunnu yọnwhẹn ahọlu tọn. Azán lẹ ma sọ féwáyì gba; 27Davidi sọ tite bo yì, ewọ po omẹ etọn lẹ po, bo hù sunnusi fọde sọn Filistini lẹ mẹ; Davidi sọ hẹn ayútintan yetọn lẹ wá, yé sọ yí yé na to sọha pipé mẹ hlan ahọlu, na ewọ nido yín visunnu yọnwhẹn ahọlu tọn. Sauli sọ na Mikali viyọnnu etọn ẹn hlan asi. 28Sauli sọ mọ bo yọnẹn dọ OKLUNỌ tin to Davidi de; Mikali viyọnnu Sauli tọn sọ yiwanna ẹn. 29Osi Davidi tọn gbẹ́ sọ tin na Sauli sú: Sauli sọ yín kẹ̀ntọ Davidi tọn jeìjeì.
30Whenẹnu wẹ ahọvi Filistini tọn lẹ tón jẹgbonu: é sọ wá jọ, sùsọ le yé tón jẹgbonu do, wẹ Davidi nọ yí nuyọnẹn do họ ede hú mẹmẹsi Sauli tọn lẹpo; mọ wẹ yè nọ dè oyín etọn do ola.
Currently Selected:
1 SAMUẸLI 18: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.