Ubwandilo 2
2
1Buno buno Kyala alinkumalīsya ukupela ikị̄su na kumwanya, ni fị̄ngị fyosa ifị fịlịmo. 2Pị̄sịku lya buhāno na bubili, Kyala alinkutūsya bo āmalisị̄sye īmbōmbo jake iji ābōmbaga;
3Kyala alinkulisaja ilịsịku lya buhāno na bubili alinkulipela ukuja lị̄kemo. Papo mwịsịku lilili Kyala ātūsị̄sye kumbōmbo jāke jōsa iji ābōmbaga, īmbōmbo ja kupela.
4Bo syatēndị̄ke buno buno ukupelịgwa ifya kumwanya ni fyapāsi.
Unngūnda gwa Etenị
Pala Kyala apelege ikya kumwanya ni kya pāsi, 5bo amalịle ukupela ikya kumwanya ni kya pāsi fịkālịko nafịmo ifya kubyala nīfị fịkumela nkị̄su; namanga UNTWA Kyala ākāli ukutịmisya īfụla pakị̄su; kangi akālịpo najumo ugwakulima. 6Lolị ulubēfụ lwene lo lulinkufyuka ukufụma pakị̄su lulinkubụ̄ndasya umfụ gōsa. 7Po papo lelo UNTWA Kyala alinkummbūmba umụ̄ndu ni mbụlị ja mfụ, alinkumpụ̄tila umūjị gwa būmị mụmbụlo. Lelo po papo umụ̄ndu alinkuja mūmị.
8Po papo lelo UNTWA Kyala alinkubyala unngūnda mwa Etenị, kubusōkelo ilịsuba, mụla mụla mo alinkummbīka umụ̄ndu uju ālimmbūmbịle. 9UNTWA Kyala alinkumesya mụmfụ imịpịkị gyosa igi gyali mịnụnụ pakugikēta na pakulya iseke syabo. Ugwene umpịkị gwa būmị nu mpịkị ugwa kumanyịlamo inụnụ ni mbị̄bị gyo gilinkuja pakati pa nngūnda gula gula.
10Ulwisi lulinkwịbuka ukufụma mwa Etenị, amīsi gake galinkonekela mụnngūnda; kangi ulwisi lululu nkyenị lulinkwịjabania lulinkwịpela ukuja nyīsi ịna. 11Ingamụ ja lwisi ulwakwanda āli jo Pisyoni, ulu lukwenda nukusyungūtila ikị̄su kyosa kya Habila, kuno ālịko Sahabu; 12kangi Sahabu gwa nkị̄su kila nnụnụ; ko gālịko amafụta ga lūma ulunụnụ aga bịkuti bịteli, kangi niịbwe ili bịkuti Onịkị. 13Ingamụ ja lwisi ulwa bubili jo Gịhonị, lo ulu lukwenda nukukisyungūtila ikị̄su kyosa kya Kụsị. 14Ingamụ ja lwisi ulwa butatu jo Hindekelị Tịgịlịsị; ulwisi ulu luli kubusōkelo bwa ịsuba nkị̄su kya Asịlịja. Ulwisi lwa buna jo Fụlatị.
15Po papo UNTWA Kyala alinkummbīka umụ̄ndu mụnngūnda gwa Etenị ukuti mo alimege kangi nukuti agutendekesyege nukugwenelela. 16UNTWA Kyala alinkummbūla umụ̄ndu alinkuti: Ulyege īseke sya mịpịkị gyosa igya mụnngūnda mụno, 17lolị gwene gu mpịkị gwa kusịmanyịlamo inụnụ ni mbị̄bị go ungalyaga īseke syake namanga linga ulị̄le ilịsịku lila lila kwịsakufwaga.
18UNTWA Kyala alinkuti, kukaja kunụnụ ukuti umụ̄ndu ajege mwene ịtolo, nịkumpelelaga unnịne ugwa kutūlana nagwe. 19Buno buno UNTWA Kyala alinkufịpela ukufụma mụmfụ ifịnyamāna fyosa ifya nndị̄su na sị njunị syosa sya mụ mpālānga. Alinkufịtwala kwa Atamụ ukuti apilị̄ke īngamụ isị Atamụ ịkufịpaga; īngamụ jōsa iji Atamụ āfịpēle ifya būmị iki ijāke iki ijāke jilinkuja jo ngamụ jāke. 20Umụ̄ndu alinkusịpa ingamụ ing'ōmbe syosa, ni fịnyamāna fyosa fya nndị̄su; lolị alinkusị̄ta nukuja nagwe jumo ugwa kuntūla ukufịkapo. 21Po papo UNTWA Kyala alinkumpelela Atamụ utulo utusịto lelo bo agonịle utulo, Kyala alinkwega lumo ulubafụ lwake alinkwịgalapo nummbili pabujo ubu āsōsị̄syepo ulubafụ. 22Ulwene ulubafụ ulu ālyegịle kwa Atamụ lo alinkulupela ukuja nkị̄kulu, alinkuntwalila Atamụ. 23Po papo Atamụ alinkuti: Uju lilino jo mwịnāngu ugwa ịlopa limolyene na nịne ikifụpa ikifụma nkifụpa kyangu, ummbili umfụma mụmmbili gwangu, ịkujobịgwaga ukuja nkị̄kulu papo afụmịle mụnnyāmbala. 24Kokuno umụ̄ndu ịkunndekaga ugwịse nunna; ịkummumililaga ju nkasị; lelo bobabīli bababa bịkujaga mmbili gumogwene. 25Umwene Atamụ nu nkasị bakāli ni myenda gya kufwala pōpe balinkusịta ukuja ni soni nasịmo isyakuti sịbakolege.
Currently Selected:
Ubwandilo 2: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.