Ukusōka 26

Īhēma ja NTWA īnyị̄kemo

1Kangi kwisakūnjengelaga inyụ̄mba ja mabālika kalōngo aga mwenda untakanyịfụ unkafụ ugwa lāngi ja bulū iji jōngēne nubukesēfụ nubujīnja bunāndi; gwịsutendekesyengemo na bakelụbụ, jịsejitendekesịgwege numụ̄ndu umfūndi fị̄jo. 2Ubutali bwa ịbālika lyosa bwịsebujege imịta 12 ubwelefụ imịta ịbili; amabālika gosa gịsegajege nikipimo kimokyene, gị̄segafwanege. 3Amabālika mahāno gị̄segasonanịgwege pamopēne, agāngi mahāno gōpe gịsegasonanịgwege pamopēne. 4Po gwịsutendekesyege īhululila sya twenda bulū mụmbali pānja kumbali kwịbālika ili limalikị̄sye mmabālika aga galūngisanị̄gwe ukuja ịbālika limolyene; mōpe mwịbālika lya bubili lịlūngisanie kwịsakubōmbaga bububo. 5Mwịbālika ilịtasị ili galūnganịkisịgwemo mahāno, gwịsusonelengemo ihululila amalōngo mahāno; kangi īhululila amalōngo mahāno gwịsutendekesyege mụmbali mwịbalika ilịnāndi ili limalikị̄sye mwịbalika lya bubili ili lisonanịgwe mmābalika amanāndi mahāno. Īhululila sịsesịnịngisanịege. 6Kangi kwisakutendekesya utukuba twa sahabu amalōngo mahāno twa kulunganịkisya amabālika amanywamụ; bo buno buno lelo īhēma jōsa jị̄sakuja jimojēne ịtolo.

7Kangi kwịsakutendekesyaga amabālika ga lusyoja lwa mbene ga hēma ja kukụpikila panyụ̄mba; kwịsakutendekesyaga amabālika kalōngo nalimo. 8Gosa gisegafwanege ifịpimo ubutalị imịta 13, ubwelefu imịta ịbili. 9Po lelo mahāno gwịsugalūngisanịege ukuja ịbālika limo, gōpe ntandatu gwịsugasonanịege ukuja ịbālika, po ilya ntandatu gwịsulipịndanịege ukuja ịbālika, gwịsulipịndanịege pabili nkyenị mụ hēma. 10Po kwịbālika ilịtasị mwa mabili kwisakutendekesyaga ihululila amalōngo mahāno kulubafụ lwa kubumalikisyo bwa ibalika ili limalikisye mmabālika mahāno aga galūngisanị̄gwe, kangi kwịbālika lya bubili ilị̄lūngisanịe ihululila amalōngo mahāno kulubafụ lwa kwịsakulunganikisya ninịne.

11Gwịsutendekesyege utukuba twa kibūngu twakukolela, amalōngo mahāno; gwịsutusondege mụ hululila ukugapịnyānịa amabālika go mabili ukuti gịpelege ukuja hēma jimojēne jakukụpikililapo. 12Ulubafụ lumo lwa ịbālika ili lisyele ku hēma gwịsulikungege pamyụma pa hēma. 13Kangi ulubafụ lumo lwa hāfụ ja mīta, kangi ulubafụ ūlungi hāfu ja mīta kuli aga gịkusyalako mbutalị bwa mabālika aga gịsakukūngịgwaga mūmbali mụ hēma, ulubafụ ulu na lula ukujikụpikila jōsa. 14Ihēma ja kukụpikilila mwị̄semụjitendekesyege nifịgubo fya mbōngo ifị fịpakị̄gwe īlāngi, ifụbīfụ nīngubo sya mbongo indakanyịfụ pamwanya.

15Mwịsakutendekesyaga amatapwa ga kwimika mụnyụ̄mba amakafụ aga mpịkị unnụnụ. 16Ubutalị bwa ịtapwa limo bwịsakujaga imịta ịna, ubwelēfụ bwịsakujaga isentịmịta 66. 17Kukuti ịtapwa lịselijege ni ndimị ịbili isị sịkukētana sya kulūnganịkisya nị̄tapwa ilị̄nịne; amatapwa gosa ga nyụ̄mba jijiji gịsegatendekesịgwege buno buno. 18Amatapwa ga nyụ̄mba aga gwịsakutendekesyaga, ulubafụ lwa kwịtōngo gịsakujaga amalōngo mabili. 19Po lelo gwịsakutendekesyaga ifya kwimamo fya fesa amalōngo mana, ifị fịsakujaga pāsi pa matapwa amalōngo mabili aga. Ifyakwimapo fịbili fya ịtapwa limo lya ndimị ịbili lila, kangi ifyakwimapo fịbili fya ịtapwa limo lya ndimị ịbili lila, kangi ifyakwimapo fịbili pāsi palīngi ilya ndimi ịbili. 20Kangi gwịsutendekekesyege amatapwa amalōngo mabili ga lubafụ lwa bubili lwa nyụ̄mba, ulubafụ lwa kulūlu; 21kangi ifyakwimamo fya fesa amalōngo mana, ifyakwimamo fịbili pāsi pītapwa limo, kangi ifyakwimamo fịbili pāsi pịtapwa ilīngi. 22Lelo aga kunyụma kunyuṃ̄ba, ulubafụ lwa kubujōngelo ilịsuba go kwịsakusōngolaga amatapwa ntandatu. 23Kangi mwịsakutendekesyaga amatapwa mabili agā kuja mụngụto sya nyụ̄mba ulubafụ lwa kunyụma. 24Mụngụto jimo gịsakulekanịlaga pāsi lolị gịsakwaganịlaga kumwanya pa kakuba ka kwanda; bo gịsakujaga buno buno mụngụto syo ịbīli. Gịsakupelaga ingụto ịbili. 25Kangi gịsakujangapo amatapwa lwele ni fyakwimapo fyabo fya fesa kalōngo na ntandatu; ifya kwimamo fịbili pāsi pị̄tapwa limo kangi ifyakwimamo fịbili pāsi pị̄tapwa ilīngi ilịnịne.

26Kangi kwịsakusōngolaga amatapwa amapị̄mba amabụ̄tanịe ga mpịkị unnụnụ ugwa matapwa amakafụ, mahāno gịsakujaga ga kubōmbela pa matapwa amatalị ga lubafụ lumo lwa nyụ̄mba. 27Kangi agāngi mahāno ga lubafụ ulūngi lwa hēma, kangi mahāno aga kunyụma ku hēma ulubafụ lwa kubujōngelo ilịsuba, 28ilịtapwa ilị̄bụ̄tanịe ilya pakati na pakati kumwanya na pāsi pa matapwa aga gimịle, lịsakukisanịaga ukufụma kubwandilo mpaku kubumalikisyo. 29Po lelo amatapwa gagaga gwisugapakege sahabu, kangi gwisakugatendekekesyaga utukuba twa sahabu twakwịkolelamo; amatapwa amabụ̄tanịe aga gōpe kwịsakugapakaga sahabu. 30Ihēma iji mwisakujēngaga mwịsemụkōngege ikifwanị iki nabanāngị̄sye pa kyamba.

31Po lelo kwịsakutendekesyaga umwenda gwakukị̄nga pamwanya, untakanyịfụ ugwa bulū iji jōngēne ni lāngi ingesēfụ ni njinja jinja; umwenda gugugu gwịsegutendekesịgwege mbumaganyị, na bakelụbụ bịsebajengemo. 32Lelo mwịsemụgutulikege pa mbānda ịna sya mpịkị gwa matapwa amakafụ, imbānda sịsesịpakịgwege sahabu; utukuba twa kukolela twa sahabu twịsakujaga pa nyālo sya fesa ịna. 33Po ilibạ̄lika lya mwenda mwịsakugutulikilaga ntukuba, po ilịbokosị lya lufị̄ngo mwịsakulị̄ngisyaga kunyụma ja ịbālika, ị̄libālika lilili lyo gwịsakubutapulanịkisyaga ubujo ubwịkemo nubujo ubu bwịkemo fị̄jo. 34Mwịsakubīkaga ikikota kya kisa pamwanya pị̄bokosị lya lufị̄ngo lya mmbujo ubwịkemo fị̄jo. 35Po lelo mwịsakujibīkaga imēsa pānja pị̄bālika, umpịkị gwa kwimamo ikikolela nyāle kịsakujaga kulubafu lwa kwịtōngo ukunịngana ni mēsa; imesa kwịsakujibīkaga ulubafụ lwa kulūlu.

36Pa kifịgo kya hēma sakubikangapo ilibālika lyamwenda lya kusịga, umwenda ugwa lāngi ja bulū inyōnganịe nubukesēfụ nubujīnja, untakanyịfụ ugu gunosịgwe gusonịgwe na maboko. 37Ilị̄bālika lya kusịga gugugu mwịsakugubīkilaga imbānda ịhāno isya mpịkị gwa matapwa amakafụ, mwịsakusịpakaga sahabu; utukuba twake utwakugukolela twisakujaga twa sahabu, po lelo kwisakusipōndelaga ifyakwimamo fịhāno ifya kibūngu.

Currently Selected:

Ukusōka 26: NYB96

Highlight

Copy

Compare