Ibrani 10
10
Kristus ysan bosan ro moof toni
1Watum ro Musa to, merif bo moof ro meen mama kʼanu mam sawro ro Allah. Menohe watum reto merif maja bo ro moof weto to sai. Anu bmat bo moof weto kaket fefares. Bo ro ja raa mno tna mmat mam tabam refo fo, bmat bo ro ati reto fefares. Au oh meto, imam sor ja ysan bosan mun aro rau-rau tna tahun firwas tahun. Tna anu bhar bwe bosan ro ana msan reto to, moof mnan si fee. Raa mama skabuk to, ja makah bosan. Mawe msan bosan afo re miranya msya Allah. Menohe bosan weto to matak re mno raa weto mhaf mato mrok moof mnan si to fee. 2Mfi bo bosan weto to, matak re mno raa mhaf mato moof to, kbe raa mamo msan bosan renti u to fee. Mfi bo bosan weto to matak mnan si to, kbe raa msan bosan mun sau aran sai. Feto tna mhar mawe mhaf wana moof mamo snok mam hame wajin. Mhar mawe ana mkair u fee. 3Menohe mfe: Ana ja msan bosan tahun firwas tahun. Mno tna me mnaut iro wana ro mno to u ye meto. 4Sapi msya domba bo to, mees wana matak myon iro raa to fee saut. 5Mees reto matak fee. Feto to Kristus yroh yama tabam refo tna yawe kʼAllah yawe,
“Jõ thar tawe bosan ja raa msan to mame kʼNyõ nhaf fee. Tna raa msan bosan roto aro mkah iro wana ro mno. Tna bosan weto to mame kʼNyõ nhaf aNyõ fee ye. Menohe Nyõ siwyan Jõ mkah tamo ‘Bosan’ ro mnan si moof kaket. 6Tiwya raa ktan kak, tna mko msan kʼNyõ. Tna msan bosan mkah iro wana ro mno to ye. Menohe bosan wana weto to mame kʼNyõ nhaf to fee.”
7Tna Yesus yawe kʼAllah yawe,
“Jõ fi Raa ro tiwya raa mkyas. Mam Bokom aNyõ tiwya raa mkom mawe, ‘Jõ siwyan tna ksoh tno bo ro Nyõ nawe.’”
Mazmur 40:7-9
8Mam uu to, tkom bo ro Yesus ykyas trion ewok. Ro tinyi to yawe, “Jõ thar tawe bosan msya kak ja raa mko msan to, tna msya bosan ja raa msan mkah iro wana ro mno to, mame kʼNyõ nhaf fee.” Fyi re Yesus yawe bo reto? Yawe ebokfi Watum ro Musa mbis mawe anu, raa ro Yahudi mno bo weto. 9Tna fo Yesus yawe kʼAllah yawe, “Jõ siwyan tna ksoh tno bo ro Nyõ nawe.” Anu bmat bokyas trion ewok weto to, tna bhar bwe iso ro tinyi reto Yesus skur beak. Tna re ysair iso ro tna sau. 10Yesus yama ysan yetsu rAit oh to, yno bo ro Allah ksoh. Yesus Kristus ysan yetsu rAit mun sau aran sai. Tna mkah iso reto to, Ait yoo anu ysan kʼAllah re bmo raa wAit.
11 Imam ro agama Yahudi sor mno bo ro Watum ro Musa mbis: Rabu wawa ana ktan kak tna msan mnan anya bo ro ja soo ana mno wia. Menohe bosan reto matak myon iro raa mno to fee. 12Yesus yamo Imam ro yase ye. Menohe yno feto fee. Ait ysan yetsu rAit muhrin sau aran sai. Bo ro Ait yno reto matak re kbe yyon iro raa ro mno. Bosan rAit reto ysan mun sau aran tna matak re kbe bain raa mhai oh. Tna yamo hre su ysya Allah mam ati ro yatem ati. Yaut hre mam hroh ro mase reto mamo snok mam hame wajin. 13Tna Yesus hre mam beto ste wea; ste ati ro Allah yno raa ro mamo byoh kʼAit to, mbtek mte. Tna kbe Ait yros yatak abyõ ybo ana. 14Yesus ysan bosan reto yno raa wAit mrok moof mamo snok mam hame wajin. Bosan reto to, ysan mun sau aran sai tna reto mnan si. Yesus yisoh raa wAit kri-kri fares ye. 15Mam bokom ro nabi Yeremia, Har ro Tuhan mkyas bo reto kʼanu ye. Mawe,
16“Kbe meen Jõ tkyas bosi ro tna kʼraa ro Yahudi. Meen tno re watum aJõ mhau kʼana makit msya mhaf wana ye.”
17Tna mawe,
“Iro msya safo ro ana mno to, kbe Jõ tyon mkak; mnan fi kbe Jõ sorni makus.”
Yeremia 31:33-34
18Yesus yatak yyon iro msya safo ro raa mno. Feto to raa ktan kak msan fares to, mkah bawya? Ne nno bo weto u ma.
Beroh smot Yesus matak
19Taja, tme, tao, tano na; mees ro Yesus rAit reto myon iro wanu oh, mno anu boof. Feto nma, anu bmo bo kʼAllah mam yuk rAit ro mbau toni reto. Waa ma. 20Yesus sair iso ro tna refo. Ait yhai to, tna yetsu rAit mfi horden ro burut wa hawar ro mbau reto to, yno mrok ntwat tna mato maah. Tna mfo refo Ait yhau tna ytar anu truk bmo bo kʼAllah. 21Yesus yamo Imam ro yase ranu. Ait tait yerif iso re kbe anu bmo bo kʼAllah. Anu fo raa ro Allah wAit. 22Feto to, nma, anu bmo biranya bsya Allah. ⌞Anu bashana oh.⌟ Tibyo raa baptis anu mkah aya oh. Feto tna anu bhar bwe bhaf wanu mrok moof. Anu bhaf wanu mrok moof oh, mnan fi raa ro mate aya ro moof oh, tibyo metsu moof. Anu bhar bwe anu smot Ait kaket. Anu fo srau ewok fee. 23Anu bhau bkyas riof ro meen mama kʼanu. Bnaut bwe Yesus ro tiwya ykyas riof reto. Tna bo ro yawe yno to, kbe ybo yno tu oh. Feto to, nma, anu bhau bhaf binaut riof reto yoyo. 24Nma, anu sobu anya nwe batmof anya tna bno bo moof kʼanya ye. 25Nma, kbe anu hre su tna skabuk su ye. Raa taro ja haweboh bo skabuk. Anu bhar bwe ayõ ro Kristus hah yama u to, kene oh. Feto to nma, anu bros tis anya, tna bkyas bo moof kʼanya afo re anu smot Tuhan matak.
26Soh anu bhar iso ro ati oh, menohe ja bno iro fares to, anu biwana Kristus, ro ysan yetsu rAit. Ysan mkah bo yyon iro wanu ro bno. Raa ro beroh mno iro fares to, ana mikyak bo ro Ait yno oh meto. Tna bosan roto aro ro kbe myon iro wana to, aro u fee. 27Ana weto kbe waa fea! Ana mhar mawe meen Tuhan yoo safo mana ymit kʼraa ro mamo byoh kʼAit. Tna mhar mawe tafoh ro mase meen mait ana weto ye. 28Tiwya bo mafa ranu, raa ro Yahudi to, anu bkyas bwe, “Awya sai ro yiwer Watum ro Musa to, raa mai ait yajat. Soh raa mabo ewok, soh mfe mabo tuuf maun ait to, kbe raa matmof ait fee, raa mai ait yajat yum.” 29Soh raa yiwer Watum ro Musa to, yno bo ro mkair. Kbe raa moo safo mee mai tu oh. Soh feto to, kbe fyi soh raa yikyak Ku ro Allah yare? Bo reto bo ro mkair toni! Ro yno feto ymat mees rAit yawe mkair. Yesus mees rAit mno bosi ro tna reto matak. Tiwya mees ro Yesus misoh ait re yamo raa ro Allah rAit. Tna mfo refo raa retait yawe mees reto mkair. Ait retait yamus Har ro Tuhan oh meto. Yamus Har ro tiwya matmof ait. Tibyo kbe meen bo samyoh ro msai toni kbe btek mai kʼait. 30Anu bhar Allah yhaf msya srau rAit. Bhar bwe Ait yawe,
“Jõ oh mi ska bo tna tno bo ro samyoh mai to. Bo woJõ weto kbe tno tu oh!”
Ulangan 32:35-36
Tna yawe,
“Kbe Tuhan yoo safo mana ymit kʼraa wAit.”
Mazmur 135:14
31Allah tait Allah ro yaam. Meen Ait yoo safo mana ymit to, bo ro msai toni reto. 32Nnaut mam wore tinyi anu nmo no kʼYesus, tibyo nhau mam kek rAit. Ati reto to, bo ro samyoh mama mai kʼanu. Menohe anu nros ntak. 33Ti aro rau raa masah anu. Tna raa mai anu. Tna ti aro rau bo ro samyoh feto mai nfoh na wanu ye. Menohe wore weto anu nros su nsya ana ye. 34Nfoh na wanu taro to, raa mfot mbu mam bui mato. Menohe tiwya anu nmo nmat ana, nkyas bo ro moof kʼana. Anu smot Yesus tibyo ti aro to, raa mama mtak bo wanu ye. Menohe anu ja kmo fee. Anu nhar nwe mam mato ro bosmot ranu to, anu nhaf nse bo ro moof miwer bo ro anu bhaf bse mam tabam refo. Anu nhar nwe anu nbo bo ro meen mhau hame wajin. Feto to anu simaut mase. 35Bo ro anu smot tna nhar weto to, nbo kaket matak oh! Anu smot Allah kaket tibyo Ait siwyan bo ro moof toni tna kbe yaren anu. 36Beroh nno bo ro Allah yawe to, nno renti. Nno mkak, tna bo ro ysi kʼanu to, kbe yoo yee kʼanu. 37Bokom ro Allah mawe:
“Tuhan tait kene wore yama oh meto. Kbe nyum ti aro u fee. 38Raa ro ja beroh smot Jõ to, tawe ana weto oh mi mfi raa ro mhaf moof ati to. Menohe soh ana haberek kbor tna mawe me smot Jõ u fee, ana weto mame kʼJõ thaf fee.”
Habakuk 2:3-4
39Menohe anu fo kbe haberek kbor fee. Anu fo kbe Allah yno safe mkak fee. Anu smot Ait tibyo yno riof kʼanu.
Currently Selected:
Ibrani 10: ayz
Highlight
Copy
Compare
Share
Want to have your highlights saved across all your devices? Sign up or sign in
© 2005 Wycliffe Bible Translators, Inc. in cooperation with Yayasan Sumber Sejahtera, 2005
