Romawaká 14
14
Kada á Dang Bai Jàuwú Zyun Bàna
1Aning pànn samyib mpìr-à pìkyinn birwá ma gbam fig ma bàna. Kada aning sa yipyàr ma jírwá bàna. 2Mpìr zyun pìkyinnwá tìya sig ku rag aku zwam kó wi-à wà áni bidìm pár. Ama mpìr zyun-à pìkyinn birwá ma gbam fig bàna, ku ri ming ji íri jì byù, jir kai bàna ku ri kyab, sàn fig wà aku zwam wi bàna. 3Mpìr zyun-à ri zwam buwá kó wi-à wà áni bidìm pár níng, kada aku jwann jàuwá zyun-à ri zwam fig wi bàna níng, bàna. Zyun-à ri ji buwá íri jì byù níng, kada aku jwann zyun-à ri zwam wi níng bàna, jir kai bàna Shìdun zìm hing, n pànn hing ma vù pyànà. 4Mpìr kinn fig wà kwá wà kwonn fàu mpìr zyun bàna. Asàin luwá shi síg nì àsàin-à má wà kwonnwá má myàng kó fàuwá hi sàn hing rà, kó sàn fig bàna rà. Fàu-à hi má shi mpìr sìsàn, jir kai bàna Shinn Luwá má sá nì jirà aku shi fàu ǹsàn.
5Mpìr zyun ri kyab buwá rag, àyúnn zyun sàn kab ni wà aku wib Shìdun áni. Ama mpìr zyun kyab buwá rag, àyúnn bidìm pár í bu ńzyun á byarwá ni. Kó ni ri zìm kab bu-à pìkyinnwá ma dinya sig ku. 6Mpìr-à ma shig zu sig àyúnn zyun aku shi àyúnn ùwài á byarwá ni, ku shig zu síg jirà aku wib Shìdun áni. Mpìr-à ma ri ji kó kai bidìm pár, ku ri wib Shìdun, jir kai bàna ku ri sa ya wàníng ísoko ma buju-à wàníng ya sig ku. Mpìr-à ma ngàng wà aku zwam wi, ku ri sá jirà aku wib Shìdun ma aku sa ya Shìdun ísoko jir bu-à wàníng ya sig ku. 7Ayauyí ni bidìm pár walako mpìr-à má rag buwá ku ri shi íri shu shinn dìrwá níng bàna. Walako mpìr-à má dang buwá rag, ku ri wu ki íri shinn dìrwá níng bàna tìnn. 8Wà ya shi sig big yonki, yi ri shi shu bu Shìdun. Wà ya wu rìghing má, yi ri wu ya Shìdun. Kó ayi sa kai má, yi shi sig bu Shìdun. 9Jir wàníng í bu-à sa Kristi wu n dù nann zu kàng ma yonki, àjirà aku shi Shinn Lu mpìrká ká wu rìghing, ma ká shi sig ma yonki. 10Bu-à sa wù ri myàng abau jàuwú í jir kai rà? Bu-à sa wù má, wù ri sa jàuwú yawari í jir kai rà? Yi bidìm pár, yá sar á pyànn kwonn wà Shìdun. 11Jir Shìdun dang sig rag,
“N shi síg nì ma yonki,
kó ni bidìm pár má bìnn kir wann á pyànnmí ni,
má dang á yiyar-à ni rag, ǹ shi síg nì Shìdun.”
12A jir shinn wàníng ni, yi bidìm pár yá bìnn kir wann á pyànn Shìdun ni, má dang bu-à yi sa sig.
Kada á Sìnn Kà Jàuwú á Gbìb Ajànn Bàna
13Kada ayi wà kwonn bar dìryí bàna. Bu-à yá sa bàna, ayi shi shu zyun-à má sàn ya yi. Kada ayi sa bu-à má sìnn kà jàuyí zyun aku sa bu pyìr bàna. 14Barà ǹ kwonn sig shinnmí ma Kristi níng, ǹ yì hing wi-à mpìr ma ri zìm aku zwam bidìm pár kwá zwam, jir kai bàna sàn hing. Ama mpìr-à ma kyab á kyinnwá ni rag wi-à hi sàn fig bàna, jirà big ya sig bu sìnn, to, kada aku zwam bàna. 15Wà wa ji hing bu-à jàuwú ma dinya wù rag sàn fig mpìr-à ri bàg Yesu aku ji bàna, ama wa ji hing, à sa bai rìghing pìkyinnwá. Wà wa sa hing àdòníng, à tìya sig ku rag à zìm fig ku bàna. Kada á zwam wi-à má sa bai pìkyinn jàuwú zyun-à Kristi wu sig jir shinnwá níng, bàna. 16Bu-à wa myàng ma sàn hing, kada á zìm mpìrká abig dang bai bu-à hi bàna. 17Wà mpìr ma ri dang jír á shinn byar-à Shìdun na sig kùrwá, ku ri dang fig íri jir bu-à jíji ma bu-à wúwa bàna. Ama ku ri dang á shinn shu kyìkyàr á pyànn Shìdun, ma shu ajun, ma àjwár zyun-à Awun Kyìkyàr ri ya mpìr. 18Mpìr-à ma ri wib Yesu Kristi àdòníng, Shìdun má zìm ku, mpìrká má zìm ku tìnn.
19Jir wàníng, ayi sa bu-à má sa mpìrká má shi shu ajun, ma bu-à má gbar gbam yi dìr. 20Kada á sa bai swàm Shìdun á jir shinn buju bàna. Buju-à mpìr má ji kà á nuwá ni bidìm pár í swàm bu pyìr bàna. Ama wà mpìr ma ji buju bu-à má sìnn kà jàuwá aku sa bu pyìr, kàhi sàn fig bàna. 21Sàn kab síg nì mpìr aku ngàng wi zwam, ma shin wa, ma kó bu-à má sìnn kà jàuwá a wàníng sa bu pyìr. 22Bu-à wa kyab sig á pìkyinnwú ni á shinn wi zwam, á fim á pìkyinnwú ni wù ma Shìdun. Mpìr-à ma ri kyab rag ku ri sa bu ǹsàn, wa pìkyinnwá má dinya fig ku rag bu-à hi bai bàna, mpìr-à níng hi má fig àjwár. 23Bu-à kyinn mpìr ma dinya ku rag aku ji bàna, ama kwa ji hing buju-à hi, aku yì rag ku sa hing bu pyìr, jir kai bàna ku ji fig big kyinn ńzyun bàna. Wà ya kyab hing á pìkyinnyí ni rag, bu zyun í bu bibai sàn fig wà ayi sa bàna, ama wà ya sa hing, to, ayi yì rag yi sa síg bu pyìr.
A Sa Bu-à Jàuwú Big Má Fig Ajwár Ani, Kada á Fig Ajwár Iri Shinnwú Bàna
Currently Selected:
Romawaká 14: Jib
Highlight
Copy
Compare
Share
Want to have your highlights saved across all your devices? Sign up or sign in
© 1996, Wycliffe Bible Translators, Inc., All rights reserved.
