Romawaká 11
11
Shìdun Myàng Ashi Mpìr Israilaká
1Mì ri bib abib, Shìdun ya rìghing mpìrká buwá kwìb rà? Bàna. Ku ya fig mpìrká buwá kwìb bàna kó títi nímá. Mì ma shinnmí má, mì í mpìr Israila, mì í wùn ada Ibrahim, mì í swai Banjamin. 2Shìdun ya fig mpìrká zyun-à ku rì shig zu jag sig níng kwìb bàna. Ning yì hing bu-à jir Shìdun dang sig á shinn Iliya, ku dang bai mpìr Israilaká á pyànn Shìdun. 3Ku dang rag, “Shinn Lumí, big gban rìghing yann aswamká ri dang kyann jírwú, n wab gbànn rìghing byar-à big ri twìb swànn ya wù bu. Tàma-à níng dà kàng sig rag mì áwinmí ni, big ri zìm abig gban rìg mì tìnn.” 4Shìdun zìm ya ku í kai rà? Shìdun zìm ya ku rag, “N shig zu rìghing mpìr dubu sùmpyànn, ká ri bìnn kir wann ya fig bu sìnn, zyun-à big ri bar í Baal níng, bàna.” 5I barà shi sig áni tàma-à níng tìnn, Shìdun shig zu sig mpìrká káhi nànn fig bàna, ká ku ri myàng ashibá. 6Shìdun ri shig fig mpìr jir swàm ǹsàn bàna, ama í jirà ku ri myàng ashi mpìr. Shìdun nìm ma ri shig mpìr jir swàm ǹsàn, ai ashi-à ku ri myàng mpìr ma kàhi níng, nìm bàna ma yìr.
7Tàma-à níng yá dang í kai rà? Mpìr Israilaká dìg fig gbìb-à big ri yàn zyun-à má sìnn kà big ǹsàn nímá á pyànn Shìdun ni bàna. Sái íri mpìrká ká Shìdun shig zu sig títi nímá níng, dìg síg nì. Mpìrká ká dà sig mà sim níng, big gbam sung n ngàng jir Shìdun. 8Big ba sig á jir Shìdun ni n rag, “Shìdun gban rìghing kyinnbá, bá kyab fig jír ǹsàn bàna. Bu-à pànn sig wàrì hár n bi tàma-à níng, big kàng rìghing mpìr àfau, mi ri gbam sung.” 9Dawuda dang jírwá n rag,
“Ajwár-à mpìr káníng ri fig níng, a nìm shi kàng àràg í ayàr, jirà abig kù.
Bu-à bibai-à big ri kyab á pìkyinnbá ni níng, a nìm kinn á shinnbá ni.
10A zubá nìm fag rìg, abig myàng kyàr byar bàna.
Abig nìm wa shwìn su big su àràg big swann sig swánn á shinnbá ni.”
11Mì ri bib jakàng abib, kù-à mpìr Yahudawaká kù sig níng, bá dù nann zu kàng fig bàna rà? Bá dù nann zu kàng. Kù-à big kù sig níng, gbar bi mpìrká zyun-à yì fig jir Shìdun bàna níng Shìdun pinn zu big jirà a mpìr Israilaká sa akyib. 12A jir shinn bu pyìr mpìr Yahudawaká ni, í bu-à sa bu-à sìsàn yag sig kó áni á dunyaru. Bu sìsàn-à Yahudawaká zìm fig abig dìg bàna níng, Shìdun ya rìghing mpìrká zyun-à í Yahudawaká bàna. Ayúnn-à Yahudawaká bidìm par ma wib hing Shìdun, bá myàng àsàn Shìdun má kab wàrì.
Shìdun Pinn Zu Mpìrká Zyun-à í Yahudawaká Bàna
13Mì ri dang ma ning, ning ká zyun-à ning í mpìr Yahudawaká bàna. Aràg barà ǹ shi síg nì wùn aswam Shìdun á byar mpìrká zyun-à í Yahudawaká bàna níng, má sa àyán ma swàmmí. 14Kó barà sa áni bidìm pár, mì ri zìm ń sa mpìr Yahudawaká bumí abig sa akyib, jirà abig bir pìkyinnbá ma abig wìm zu. 15Sai-à Shìdun ya mpìr Israilaká kwìb níng, á sai-à níng hi mpìrká á dunyaru kyab n bi jùn kwonn rag ma Shìdun. Ama wà kwa zìg rag hing mpìr Israilaká níng, má shi àràg big dù nann zu sig mà amir ki-à ni.
16Agir brodi wà jijag-à níng, wà ba ya hing Shìdun, àkúnn-à níng shi sig buwá tìnn. Wà ba zìg adinn bínká ma ya Shìdun, ayab káníng shi sig í buwá tìnn. 17Ayab bin zaitun ká káhi wan sig awan ǹsàn nímá, ama big í gib ta wann rìg-à. I wà n zìg ayab bín zyun-à mà awúnn-à ni, n sìr ban ma bín-à wà ǹsàn-à níng. Wù zyun-à wù í mpìr Yahudawaká bàna níng, a shi sig àràg í ayab bín-à mà awúnn-à ni, zyun-à big sìr sig ban ma bín ǹsàn níng. Tàma-à níng à shi sig rag bu ńzyun ma adinn bín-à níng, zyun-à ri ya yonki. 18Kada á gbar dù nann zu shinnwú rag à kab síg nì ayab bín-à big gib ta wann sig níng bàna. Wa sa hing àdòníng, á yì rag à pànn gbam fíg adinn bínká hi nì bàna, ama í adinn bínká pànn gbam síg wù nì.
19N yì hing wá dang má rag, big kyag kìfinn zu sig ayab bín sìsàn káníng jirà abig sìnn kà wù á pyann kàng shinnbá. 20Ajai, big gbar kìm rìghing ayab bín káníng, jir kai bàna big bir fig pìkyinnbá á byar Shìdun bàna. A jir shinn kyinn bir-à à shi sig ma kàhi níng, á sar gbam áni, kada á gbar dù nann shinnwú bàna, ama á shàr Shìdun. 21Barà Shìdun fim fig Yahudawaká ká shi sig àràg ayab bín ǹsàn káníng bàna níng, í barà kwá fim fig wù áni bàna tìnn. 22A myàng barà Shìdun sàn sig áni, n tù sig áni tìnn. Ku ri nànn àgùnn ma mpìrká zyun-à ri wib fig jírwá bàna. Ama kwá tàg àsànwá á byarwú ni, wà wa wib hing ku, ma bir hing pìkyinnwú á byarwá ni. Wà wa wib fig ku bàna, kwá gàb rìg dìr ma wù. 23Wà mpìr Yahudawa káníng ma bir kàng bi hing pìkyinnbá, Shìdun má sìnn kàng big á byar-à big rì shi bab sig. Shìdun shi sig ma gbam-à kwá zìg kàng bi big. 24Wù zyun-à wù í mpìr Yahudawa bàna níng, à shi sig àràg í ayab bín-à mà awúnn-à ni, zyun-à big kyag ta wann sig, n sìr sig ban ma bin zaitun ǹsàn-à níng. Wà má àdòníng, ban-à bá sìr ya mpìr Yahudawaká ma bin zaitun ǹsàn-à níng, má fonn káb nì.
Shìdun Má Pinn Zu Gban Rìg Mpìr Israilaká
25Yiwaimí big, bu atàm zyun shi sig áni, zyun-à mì ri zìm aning yì. Bu-à níng hi má kan dim ning wà ná sìnn kàng shinn ná àràg ning yar kab síg nì kó ni bidìm pár. Bu-à hi bàna í wàníng: Sung gbam-à mpìr Israilaká ri gbam níng, má shi nonn fig bàna. Ama má nonn títi, jir kai bàna sái wà mpìrká zyun-à í Yahudawaká bàna má fig gban rìghing jir Shìdun ma bi hing á byarwá ni. 26A byar-à níng hi, Shìdun má pinn zu gban rìg mpìr Israilaká àràg barà big ba sig á jir Shìdun, n rag,
“Asàin-à má pinn zu yi níng, má bi mà Siyona.
Kwá zìg zu rìg bu bibaiká á byar yann adaká bu Yakubu.
27Wàníng í nu-à má gib ma big, á sai-à má zìg zu big á bu pyìrbá ni.”
28Mpìr Yahudawaká kàng rìghing mpìrká ri zib Shìdun jir shinn barà big ngàng sig jir àjwár-à níng. Sai-à Shìdun ya mpìr Yahudawaká kwìb níng, ning ká zyun-à ning í mpìr Yahudawaká bàna níng, ning dìg pyù n wìm zu. Ama á jir shinn barà Shìdun zìm síg nì, í bu-à sa Yahudawaká shi sig mpìrká bu Shìdun á dò jir shinn yàkúbá ni. 29Wà Shìdun ma shig zu hing mpìr, ku ri ngàng fig wàníng bàna. Wà kwa dang rag, kwá sa sàn ya mpìr, ku ri vim bìr fig nu-à ku gib ya sig mpìr bàna. 30Ningká ning rì ngàng sig jir Shìdun níng, tàma-à níng Shìdun myàng hing ashiná, n ya hing ning pyù á jir shinn mpìr Yahudawaká barà big wib fig Shìdun bàna. 31Barà Shìdun myàng sig ashiná níng, í bu-à sa mpìr Yahudawaká ngàng wà bá wib Shìdun jirà aku myàng ashibá tìnn. 32Shìdun fim mpìrká bidìm pár big gbam sung, n ngàng wà bá wib jírwá. Ku sa sig àdòníng, jirà aku tìya big rag, ku ri myàng ashibá bidìm pár.
33Bu ǹsàn-à Shìdun ri sa ya mpìr, kab hing gbam. Yar-à Shìdun shi sig ma kàhi ma bu-à ku yì sig, zwàun hing wàni. Kwonn wà-à kwá wà mpìr, mpìr má yì vinn sar fig bàna tìnn. I ni má yì gbìb swàmwá rà?
34Jir Shìdun dang sig rag,
“Mpìr-à yì sig kyinn Shinn Luyí í ni rà?
Mpìr-à má wà shang ku jír í ni rà?
35Mpìr-à taba ya sig Shìdun bu í ni, hár kwá dang rag a Shìdun ya kàng ku,
mpìr-à hi í ni rà?”
36Shìdun màm síg nì kó kai bidìm pár, n sìnn kà ya sig big yonki big ri shi. Kó kai bidìm pár í buwá. Ayi swam yan ku hár kinn kinn. Aku shi àdòníng.
Barà Mpìrká Ri Bàg Yesu Má Shi Shu
Currently Selected:
Romawaká 11: Jib
Highlight
Copy
Compare
Share
Want to have your highlights saved across all your devices? Sign up or sign in
© 1996, Wycliffe Bible Translators, Inc., All rights reserved.
