Lʉʉka 5
5
ɄYesu ɨkʉvakemeela avavʉlanɨsɨvua avatasi
(Mataayi 4:18-22; Malɨka 1:16-20)
1Ɨkɨghono kɨmonga, ʉYesu alyɨmile palʉbale pa lɨsʉmbe ɨlya Genesaleti,#5:1 Lɨsʉmbe ɨlya Genesaleti: Ɨlɨtavua ɨlɨngɨ litambʉlua lɨsʉmbe ɨlya Galilaya. ivʉlanɨsia ɨlɨsio ɨlya Ngʉlʉve. Avaanhu vinga vakavelelelagha kwa mwene kʉkʉmpʉlɨkɨsia, kuhanga kʉkʉmpita. 2Neke mʉlʉbale mʉ lɨsʉmbe, ʉYesu akasaagha ingalava#5:2 Ingalava: Ɨmba ɨlɨsio Ngalava kʉ Vʉghanʉle vwa Masio aMahesia. ivɨlɨ, avalovi avanya ngalava sila namwevalyale, ʉlwakʉva valyale kusuka inyaafu saave. 3ɄYesu akingila mʉ ngalava, jɨno jaale ja Simoni. Akansʉʉma ʉSimoni ajɨvelelesie padebe nkate mʉ lɨsʉmbe, pepano ʉYesu akikala mʉ ngalava ivʉlanɨsia ɨlɨpʉgha ɨlya vaanhu.
4Ye amalile kuvʉlanɨsia, akamʼbʉʉla ʉSimoni akati, “Twala ɨngalava pa kyogho, apuo mwisie inyaafu siinu, mʉlove isamaki.” 5ɄSimoni akamwamʉla ʉYesu akati, “Ghwe Ntwa, tʉvombile ɨmbombo ɨkɨlo jooni, natʉvʉmbʉliile kɨmonga. Lɨno, ʉlwakʉva veeve ʉjovile, apuo nikwisia inyaafu.”
6ɄSimoni na vajaake vakisia inyaafu saave. Ye visisie, isamaki nyinga kyongo sikaghwɨlɨla, nasi nyaafu sikatengʉla kudumuka. 7Pe vakavakemeela avajanave vano valyale mʉ ngalava ɨjɨngɨ, kuuti viise kʉkʉvatanga. Vakiisa, vakamemia isamaki ingalava se ivɨɨlɨ, isamaki silyale nyinga kyongo nasi ngalava sikava mʉ lʉtalamu ʉlwa kʉdwiviila.
8ɄSimoni ʉPeteli ye asivwene isio, akafughama pa Yesu akati, “Ghwe Mʉtwa, nɨkʉkʉsʉʉma ʉvʉʉke palyʉne, ʉlwakʉva ʉne nɨlɨ mhosi.” 9ɄSimoni alyajovile ʉluo, ʉlwakʉva ʉmwene na vange vooni vano valyale lʉmo, valyadeghile kyongo vwɨmɨla isamaki nyinga sino valovile. 10Voope avakina Sebedaayi ʉYakovo nʉ Yohani, vano vakavombaniagha nʉ Simoni, vakadegha kyongo. Pepano ʉYesu akamʼbʉʉla ʉSimoni akati, “Nʉngoghopaghe Simoni, kuhʉma lɨno ghuvisagha mʉlovi ghwa vaanhu.”#5:10 Mʉlovi ghwa vaanhu, kwekʉti kʉkʉvaleeta avaanhu kwa Ngʉlʉve kuhʉma mʉ nyɨvi saave. 11Pambele vakasitwala ingalava saave mʉlʉbale mʉ lɨsʉmbe, apuo vakafileka fyoni vakavʉʉka vikʉmʼbɨngɨlɨla ʉYesu.
ɄYesu ɨkʉnsosia ʉmuunhu ʉnya bʉʉba
(Mataayi 8:1-4; Malɨka 1:40-45)
12Ɨkɨghono kɨmonga, ʉYesu akingila mʉ lɨkaaja lɨmonga, ʉmuo mwealyale ʉmuunhu ʉnya bʉʉba ʉmʼbɨlɨ ghwoni. Ʉmuunhu jʉla ye amwaghile ʉYesu, akakupama pa mwene, akampelepesia akati, “Ghwe Mʉtwa, nave ʉkeliile kʉkʉmbalasia, nisʉʉma ʉmbalasie.”#5:12 Ʉmbalasie: Indaghɨlo sa Moose silyale siiti, ʉmuunhu ʉnya bʉʉba iiva mʉlamafu, neke pano asokile iiva avaliile. 13ɄYesu akagholosia ʉlʉvoko lwake, akamwabasia akati, “Nikeela, valala.” Ʉnsiki ghʉghuo ɨbʉʉba jɨkavʉʉka mʉ mʼbɨlɨ ghwake. 14Akankaana ʉmuunhu jʉla akati, “Nʉngamʼbʉlaghe muunhu, ʉlwene ʉlʉte ghuhʉfie kwa ntekesi, ʉkahʉmie ɨlɨtekelo mʉlwa kʉvalala, ndavʉle alyalaghiile ʉMoose,#Valeevi 14:1-32 vʉʉve vwolesi kʉ vaanhu vooni kuuti ʉvalasivue.” 15Neke imhola isa Yesu sikaghina kupʉlɨkɨka imbale ni mbale. Avaanhu vinga vakakongʼhanagha kʉkʉmpʉlɨkɨsia, na kusosivua inhamu saave. 16Neke ʉmwene akalʉtagha kʉno kʉsila vaanhu, kukufuunya.
ɄYesu alɨ nʉ vʉtavʉlɨlua vwa kʉpyanɨla inyɨvi
(Mataayi 9:1-8; Malɨka 2:1-12)
17Ɨkɨghono kɨmonga, ʉYesu alyale ivʉlanɨsia avaanhu. Mʉ avuo mwevalyale aVafalisayi na vavʉlanɨsi va ndaghɨlo,#5:17 AVafalisayi na vavʉlanɨsi va ndaghɨlo: Ɨmba ɨlɨsio Vafalisayi nɨ lɨsio Vavʉlanɨsi va ndaghɨlo kʉ Vʉghanʉle vwa Masio aMahesia. kuhʉma mʉ fikaaja fyoni ifya Galilaya ni fya Yudea, na mʉ lɨkaaja ɨlya Yelusalemu. Ingʉfu isa Mʉtwa ʉNgʉlʉve silyale nʉ mwene kusosia avatamu.
18Pepano vakiisa avaanhu vamonga, vampɨndile ʉmuunhu ʉnya nhamu ɨja lɨteela mʉ kɨteefu, vakava vilonda pikʉmwingisia mʉ nyumba kuuti vamʼbɨɨke pa Yesu. 19Neke vakakunua kʉkʉmwingisia ʉntamu jʉla pa mʉlyango, ʉlwakʉva avaanhu valyamemile kyongo. Pe vakatogha pakyanya pa nyumba, vakatuvula. Apuo vakamwisia ʉnya lɨteela jʉla mʉ kɨteefu, pakate pano pwale ʉYesu.
20ɄYesu ye alʉvwene ʉlwɨtɨko lwave kwa mwene, akati kwa ntamu, “Nyalʉkolo, ʉpyanilue inyɨvi saako.” 21Pepano avavʉlanɨsi va ndaghɨlo na Vafalisayi vala vakatengʉla kuposania viiti, “Neke ghwe veeni ʉjʉ jʉno ɨkʉmʉligha ʉNgʉlʉve? Nakwale jʉno anoghiile kupyanɨla inyɨvi, looli jʉ Ngʉlʉve mwene.”
22ɄYesu akasitangʼhania sino vaveele viposania akati, “Kɨki musaagha isio mʉ moojo ghiinu? 23Lɨno, lʉhʉʉgʉ lʉlɨku, kʉkʉmʼbʉʉla ʉnya lɨteela kuuti, ‘Ʉpyanilue inyɨvi saako,’ nambe kuuti, ‘Ɨma, ʉghendaghe’? 24Lɨno pe mʉkagʉle kuuti, ʉne ne Mwana ghwa Muunhu#5:24 Mwana ghwa Muunhu: Ɨmba kʉ Vʉghanʉle vwa Masio aMahesia. nɨlɨ nʉ vʉtavʉlɨlua ʉvwa kʉpyanɨla inyɨvi mʉ ɨɨsi muno...” Pe akamʼbʉʉla ʉnya lɨteela akati, “Nɨkʉkʉvʉʉla, ɨma, veghala ɨkɨteefu kyako, vujagha.” 25Ʉnsiki ghʉghuo akɨɨma pamaaso ghaave, akaveghala ɨkɨteefu kyake, akavʉʉka ivuja kʉmo ɨkʉmʉghinia ʉNgʉlʉve. 26Pepano vooni vakadegha, vakamʉghinia ʉNgʉlʉve. Pe vakava nʉ vwoghofi vakati, “Ʉmʉsyʉghʉ tʉsaghile isa kʉdegha!”
ɄYesu ihanga na vahosi
(Mataayi 9:9-13; Malɨka 2:13-17)
27Pambele ʉYesu akahʉma, akamwagha ʉnsongesia songo jʉmonga, jʉno akatambʉlwagha Leevi, ikalile pano isongekesia ɨsongo. Akamʼbʉʉla akati, “Ʉmbɨngɨlɨlaghe.” 28Pe akafileka fyoni, akavʉʉka, akamʼbɨngɨlɨla.
29Pambele ʉLeevi akamʉlɨngʼhanɨkɨsia ʉYesu ʉlʉlio kʉ kaaja kwa mwene. Pwekɨlyale ɨkɨpʉgha ɨkɨkome ɨkya vasongesia songo na vaanhu avange vihanga ɨkyakʉlia na veene. 30Neke aVafalisayi na vavʉlanɨsi vaave va ndaghɨlo, vakatengʉla pikungʼulasia kʉ vavʉlanɨsɨvua#5:30 Vavʉlanɨsɨvua: Ava ve vano vakamʼbɨngɨlɨlagha ʉYesu na kuvʉlanɨsɨvua nʉ mwene. Ɨmba kʉ Vʉghanʉle vwa Masio aMahesia. va Yesu viiti, “Ongo muhanga kulia na kunyua na vasongesia songo na vahosi?” 31ɄYesu akavamʉla akati, “Avakafu navifumbua kulʉta kwa mʉghanga, looli avatamu. 32Fye lʉlɨvuo, nanɨlyakɨsisie kʉkʉvakemeela vano vikuvona vagholofu, looli vano vitangʼhinie kuuva vahosi, neke valaate.”
Ʉlʉposio vwɨmɨla kuvʉhɨɨla kulia mʉlwa kufuunya
(Mataayi 9:14-17; Malɨka 2:18-22)
33Avaanhu vala vakati kwa Yesu, “Avavʉlanɨsɨvua va Yohani na vavʉlanɨsɨvua va Vafalisayi, valɨ nʉ lwiho ʉlwa kʉvʉhɨɨla kulia ifighono fimonga mʉlwa kufuunya. Ongo avavʉlanɨsɨvua vaako vilia na kunyua ifighono fyoni!” 34Ʉmwene ʉYesu akavamʉla akati, “Vano vaghongolilue pa vʉtolani, valɨ nʉ ntolanʼdala, namʉngati vavʉhɨɨle kulia mʉlwa kufuunya.#5:34 Vavʉhɨɨle kulia mʉlwa kufuunya: Ɨmba ɨlɨsio Kuvʉhɨɨla kulia mʉlwa kufuunya kʉ Vʉghanʉle vwa Masio aMahesia. 35Looli, filikwisa ifighono fino ʉntolanʼdala ilivʉsɨvua, apuo pepano vilivʉhɨɨla kulia mʉlwa kufuunya.”
36Akavavʉʉla ʉlʉjovo akati, “Nakwale ʉmuunhu jʉno idemʉla ɨkɨgamba mʉ mwenda ʉmpia, neke ahonele mʉ mwenda ʉnkʉʉlʉ. Nave avombe ʉluo, iiva ademwile ʉmwenda ʉmpia, nakɨ kɨgamba kɨla nakilɨngʼhana nʉ mwenda ʉnkʉʉlʉ. 37Kange, nakwale ʉmuunhu jʉno ivɨɨka ʉlʉhʉʉje ʉlʉpia mʉ nyambe#5:37 Nyambe: AVayahudi vakatendagha inyambe isa ngʼhwembe sino vakavɨkɨlagha ʉlʉhʉʉje, kange navakalʉsɨkɨsyagha ʉlʉhʉʉje mʉ nyambe ingʼhʉʉlʉ ʉlwakʉva sikapusukagha. ingʼhʉʉlʉ, nave fye avombe ʉluo, ʉlʉhʉʉje lʉla lupusula inyambe, ʉlʉhʉʉje lukungʼika nasi nyambe sinangɨka. 38Looli, ʉlʉhʉʉje ʉlʉpia lʉnoghiile kuvɨkua mʉ nyambe imhia. 39Kange, nakwale ʉmuunhu jʉno ilonda kunyua ʉlʉhʉʉje ʉlʉpia, pano anywile ʉlʉkʉʉlʉ, ʉlwakʉva viiti, ‘Ʉlʉhʉʉje ʉlʉkʉʉlʉ lwe lʉnono.’ ”
Currently Selected:
Lʉʉka 5: wbi
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.